2018亚洲50最佳餐厅 香港上榜餐厅一览
2018-03-27

第六届亚洲50最佳餐厅完整得奖名单新鲜出炉!今年有9间香港餐厅上榜,比去年7间多出2间。有新餐厅上榜,其他餐厅排名亦有上升或下降,甚至跌出榜单。不过最意外嘅系有中菜餐厅得到最佳进步奖!


 

第7位  Amber(↓)

连续10年(2009-18)得到米芝莲二星殊荣,亦系优秀开饭热店大赏最优秀法国菜餐厅嘅长胜将军,Amber厨艺总监Richard Ekkebus对现代法式菜肴嘅用心再次得到认可。采用传统法国烹调技巧配合嚟自世界各地嘅新鲜食材,菜单每隔三个月都会更换一次,保持新鲜感。虽然今年排名下跌,不过就连续第三年得到中国最佳餐厅奖项。
 

第13位  8½ Otto e Mezzo BOMBANA(↓)

去年得到终生成就奖嘅意大利名厨Umberto Bombana,旗下餐厅一向都有水准保证。香港旗舰店唔单止系意大利境外第一间获得米芝莲三星评级嘅意大利餐厅,更加连续7年维持三星评级,不过今年喺亚洲50最佳餐厅名单上就跌出十强。必点招牌菜包括手工意大利面同松露菜式。
 

第16位  Ta Vie(↑)

呢间法日创意料理餐厅嘅主厨佐藤秀明先生,系高级怀石料理店天空龙吟日本料理创办总厨山本征治先生嘅徒弟。餐厅出品秉持精心挑选时令食材嘅精神,再糅合法日嘅烹调技术,为各位食客奉上一个个非凡味觉之旅,难怪可以比去年成功晋升17个名次!
 

第22位  大班楼 (↑)

纵然近年未有米芝莲星星肯定,但依然系唔少老饕心中最好嘅粤菜馆之一,由去年嘅47位跃升至今年嘅22位,同台北嘅MUME一样上升咗25个名次,同时获得最佳进步奖!出品同餐厅装修嘅感觉一样,沉实而暗藏心思。招牌菜包括鸡油花雕蒸花蟹、酥炸蟹肉香菇盒,同十八味豉油鸡,都系食得出厨师功架嘅心机菜。坚守传统之外亦有创新之处,例如甜品就系少见嘅桂花杞子雪糕。
 

第24位  龙景轩(↓)

同样属於米芝莲三星餐厅,呢间新派高级粤菜馆由拥有多年经验嘅陈恩德师傅出任行政总厨,糅合上盛食材、烹调技术,同精致卖相嘅点心最能够彰显餐厅嘅特色。当然典雅嘅装修,同维港开扬景色亦系令整个用餐体验更难忘嘅元素。
 

第32位  Neighborhood(新上榜)

又一间法国菜馆,呢间餐厅一如其名走比较亲切嘅路线,服务贴心,门面低调,令人感觉舒适Cozy。由香港主厨David Lai主理(同时亦系西环Fish School嘅主理人),餐牌每星期更新一次,选择精简,以法国及意大利菜为主,同时糅合各国新派菜式元素。
 

第40位  Belon(新上榜)

中环时尚法国菜馆,菜单选择唔算多,但就系贵精不贵多嘅例子之一。皆因主厨James Henry擅长突出食材本来嘅风味,而且挑选当季新鲜食材,因此餐牌大部分菜式会每星期更换一次,令食客每次光临都有惊喜。而餐厅供应嘅酒大部分亦系嚟自法国,环境亦优雅舒适。
 

第41位  Ronin(↑)  

去年香港区唯一新上榜嘅日式居酒屋今年上升至41位,作风低调,无任何招牌之余更需要网上订座。但推开灰色大门又另有一番天地,从每日更改嘅菜单就感受到诚意,背後原因系厨师会按当日从本地鱼档同日本空运得到嘅新鲜海鲜决定菜式,例如海胆花蟹就以日本北海道海胆配以本地花蟹肉。
 

第46位  Caprice(重新上榜)

同样得到米芝莲星级肯定,亦系优秀开饭热店大赏最优秀法国菜餐厅嘅长胜将军,呢间位於四季酒店嘅高级法国菜馆继2015年嘅42位之後,今年再次登上亚洲50最佳餐厅榜单。餐厅精选法国空运食材,烹调出令人难忘嘅现代法式佳肴。值得留意嘅餐厅嘅糕点师傅Nicolas Lambert亦成为本年亚洲最佳糕点师。
 

比较返上年嘅名单,当中L'Atelier de Joël Robuchon跌出榜单,Caprice重新上榜。亚洲最佳糕点师奖由香港Caprice嘅Nicolas Lambert获奖,最佳进步奖由大班楼及台北嘅MUME同时夺得。

亚洲最近餐厅再次由曼谷分子料理餐厅Gaggan再度「冧庄」,而亚洲最佳女厨师就由以创新方式演绎传统泰菜,曼谷米芝莲一星餐厅Paste嘅Bee Satongun夺得(睇亚洲地区得奖餐厅精华!)。

 

按此浏览2018「亚洲50最佳餐厅」完整名单

 

延伸阅读 

《2018亚洲50最佳餐厅 》地区精选推介
《2017亚洲50最佳餐厅 》香港上榜名单
《2017亚洲50最佳餐厅 》地区精选推介
《2016亚洲50最佳餐厅 》香港上榜名单
《2015亚洲50最佳餐厅 》香港上榜名单



图:Asia's 50 Best Restaurants
文:Cathy

关键字
香港
亚洲50最佳餐厅
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】最後倒数!即将结业的老字号及人气小店
2020-07-21
【随时更新】零食速报 每周新款零食、酒品点评
7天前
全城抗炎!北角酒店最新应变 自助餐都有得外卖?
2020-07-17
全城抗炎!屋企都叹到三层架下午茶 Tea Set外送/外卖自取推介
2020-07-23
全城抗炎!送上门懒人煮食包及套餐大合集2.0 花胶炖汤/火锅/铁板烧
2020-07-30