2018年亞洲最佳50餐廳 亞洲地區得獎餐廳精華
2018-03-27

今年移師澳門舉行嘅亞洲最佳50餐廳(Asia’s 50 Best Restaurants),香港區有9間獲得殊榮之外,亞洲其他地區嘅餐廳都非常值得留意!日本、台灣、泰國及新加坡等都有唔少得獎餐廳,日本同泰國分別有 11 間及9間餐廳入選。今次我哋挑選咗幾間新入圍以及地區最佳餐廳,下次去旅行就可以去慕名一試喇!



亞洲第一 四度冧莊  Gaggan

第1位又係曼谷Gaggan穩奪,連續四年奪冠,大廚Gaggan Anand都話拎過咁多次唔知講咩好!將印度菜帶上另一層次,晚餐有十多道菜式,用創意手法呈現出獨有的印度風味。大廚曾表示希望於2020年將餐廳結業,結果會唔會令佢改變主意呢?



日本最佳餐廳  Den

第2位為東京嘅Den,相比傳統懷石料理,年輕大廚長谷川在佑以幽默輕鬆手法擺盤,如招牌菜Den-tucky炸雞翼以外賣盒上枱,釀雞翼內包住唔同餡料,相當有創意又有想像力。大廚上台拎獎都扮鬼扮馬,好搞笑!



最佳新餐廳  La Cime

第17位為首次入圍而獲得最高名次,為大阪米芝蓮二星法國餐廳La Cime。主廚高田裕介曾遠赴巴黎,於米芝蓮三星餐廳Le Meurice跟名廚Yannick Alleno學藝,將日本食材融合法國製法。



最佳進步獎  MUME

第二年入選,於今年躍升25級而獲最佳進步獎,係台北MUME。主廚Richie Lin為香港人,夥拍美國及澳洲廚師開設。餐廳主打新派北歐菜,幾位大廚曾於丹麥NOMA、悉尼Quay等名店工作,擅長用台灣食材以北歐風格呈現。



其他新入圍餐廳包括第28位東京Il Ristorante – Luca Fantin、第31位曼谷Paste、第42位首爾Toc Toc、第47位早前已獲米芝蓮二星榮譽台北祥雲龍吟,及第50位新加坡Whitegrass。



今年亞洲最佳女廚神由曼谷Paste主廚Bee Satongun奪得,大廚Bee夥拍同為廚師嘅丈夫,將古老幾近失傳泰菜重新包裝,選用最新鮮地道泰國食材及香料,製成一道道精緻又不失傳統味道嘅菜式。



而獲得終身成就獎嘅André Chiang江振誠,為新加坡Restaurant André 及台灣RAW老闆及主廚。Restaurant André已於今年2月結業,雖然表明不想獲星,但台灣RAW亦獲得米芝蓮一星。André上台領獎時,更係首位華人大廚於台上講中文,勁呀。

 

按此瀏覽2018「亞洲50最佳餐廳」完整名單

 

延伸閱讀 

《2018亞洲50最佳餐廳 》香港上榜名單
《2017亞洲50最佳餐廳 》香港上榜名單
《2017亞洲50最佳餐廳 》地區精選推介
《2016亞洲50最佳餐廳 》香港上榜名單
《2015亞洲50最佳餐廳 》香港上榜名單



文:Perrins

圖:Asia's 50 Best Restaurants

關鍵字
亞洲50最佳餐廳
Asia's 50 Best
東京餐廳
泰國餐廳
台灣餐廳
開飯專題
開飯仔為你提供各類型最新飲食情報及優惠,全面照顧你的飲食喜好。
本月熱門
【隨時更新】零食速報 每周新款零食、酒品點評
2020-09-11
全城抗炎!屋企都嘆到三層架下午茶 Tea Set外送/外賣自取推介
2020-09-18
悠閒時光 9月份下午茶推介
2020-09-02
【9月生日優惠】最低至半價!生日平食放題.韓式炸雞
2020-09-02
油麻地新開小木屋Cafe 嘆西日Fusion龍蝦湯烏冬配咖啡
2020-09-08