10月份好评餐厅十强
2019-11-05

最近有报道指10月份饮食业嘅整体生意额跌咗近5成,甚至有超过200间餐厅结业,可以话系饮食业嘅低潮。不过,同一时间,亦有唔少餐厅努力喺逆境中求存,并做出唔错嘅成绩,10月份嘅十强榜内,仲有唔少都系新开冇耐嘅餐厅,迅速获得大众支持啦。

第10位  Check-In Taipei   

 图:emmieunice2046

8月上过榜嘅呢间台式餐厅出名多花臣,蛋饼馅料有新意,例如有冬荫功龙虾牛油果蛋饼、芋泥咸蛋黄蛋饼同埋脏脏紫薯麻糬蛋饼等等,款款都好吸引。但最吸引嘅应该系参考台湾淡水鲜奶麻糬做法嘅奶奶麻糬,再自创多款口味,麻糬又滑又有奶香。

第9位  Top Blade Steak Lab(*新上榜)

 图:vicki422933kicheuk

Menu上选择唔多,就系胜在够专,主打平铁牛扒。美国390日谷饲牛,medium rare啱啱好,啲肉仲系粉红色㗎,肉味香浓又有肉汁,仲好嫩滑;至於黑桃black jack嘅肉味相对较淡,但配埋以黑啡同焦香蜜桃制嘅酱汁,甜甜地又几夹。重点系,薯条无限量添加任食呀!

第8位  鳗工房(*新上榜)

 图:muisasaTM128

好多香港人都锺意食鳗鱼饭,难怪呢间鳗鱼专门店一开,就迅速打入十强榜内。餐厅提供几款鳗鱼丼,全部即叫即烧,有原条上嘅,都有三重丼——一次过可以食晒穴子、白烧生鳗鱼同蒲烧鳗鱼三款,香口惹味。

第7位  寿司郎(*新上榜)

 图:moritatintinmandyywong

呢间嚟自日本嘅回转寿司店,出晒名CP值高,开张以嚟几乎日日都见人龙。除咗有传统同创作寿司外,仲有啲系香港限定嘅寿司,选择困难症朋友今次就头痕喇。锺意试新嘢嘅可以考虑麻辣赤虾寿司,同埋芝士三文鱼寿司,前者微辣,後者带奶香,都几过瘾。

第6位 漫花灯火(*新上榜)  

 图:IE食神侠侣Miss K.fly

嚟呢间餐厅打卡当然系重点,一入去已经好似穿过个万花筒隧道咁,好鬼靓,相信净系装修同食物卖相都已经吸引咗唔少女生嚟影IG呃like相。而食物亦都好有心思,好似羽衣甘蓝焦糖果仁话梅西瓜沙律咁,就将各种材料分别放喺个玻璃塔内,等客人自己捞,酸酸甜甜好开胃。

第5位  博多拉面别天神(*新上榜)

 图:b612andreaaafoodcritic65

呢间拉面店喺香港都开咗一段时间,每日限量供应嘅虾味噌猪骨汤面好受食客欢迎,汤底加入虾味噌,味道鲜香,仲有唔少樱花虾吊味。呢排帮衬,仲送RFID卡套,同埋可以拎张绘马贴纸写低心愿贴上愿望墙,好似日本神社外嘅祈愿所咁。

第4位  龙门冰室(*新上榜)

 图:tht_dawnDidtal 1992

讲到呢期最红嘅餐厅,一定有呢间份,几区嘅分店日日夜夜都有条人龙喺门口。呢间充满港式情怀嘅冰室,选择比一般冰室多,仲有铁板扒同海鲜食添。菜式传统中带创新思维,例如捞丁有各款好似奄列咁嘅玉子烧配搭,咸牛肉芝士、黑松露芝士等味都相当受欢迎。

第3位  椰子日记

 图:Monkey Sumfcbrosa

上个月榜首嘅椰子小店,今个月微微下跌两位,依然保持三甲位置。打卡要靓靓嘅就梗系椰奶蓝水晶,下层蓝水晶系加入蝶豆花嘅啫喱,整体带有椰香。另一碗大众飞佛嘅系杂果芋圆椰冻,成个椰子面都系芒果、菠萝同芋圆,要酸有酸要甜有甜,口感丰富。

第2位  鬼金棒(*新上榜)

 图:soya1314Handsome XO

香港应该有好多辣椒仔女,个个听到呢间嚟自东京嘅过江龙辣麻拉面店开业都争住要过嚟挑战,神速登上第2位一啲都唔出奇。店内有25种配搭嘅麻辣拉面选择,当中有款仲用咗全世界最辣嘅卡罗莱纳死神辣椒去制作添!顺带一提,芫荽怪记住点芫荽辣麻味噌拉面,可以增量到成座山咁高㗎。

第1位 面面(*新上榜)

 图:KwunLingfood_enthusiasthk

旺角呢间上楼小店,以鱼面做主打,雪白鱼面幼身啲,含鱼肉多啲,食落脆口啲;手工鱼面就烟韧啲,两款鱼面都每日制造,鱼味突出。拣拌面食又得,汤面食又得,锺意食鱼嘅朋友仔记住bookmark低啦。

文:Kar

关键字
十强报榜
十强
旺角
铜锣湾
红磡
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】便利店寻宝 每周新品速报
5天前
【2019圣诞】早鸟优惠! 圣诞自助餐推介
7天前
【2019圣诞】年尾叉电 圣诞下午茶集合推介
2019-11-19
秋风起!5间大闸蟹放题食店集合
2019-11-19
【2019圣诞】约会之选 圣诞市集推介
2019-12-06