1月份好评餐厅十强
2018-02-07

嚟到2018年,今年嘅饮食潮流系点玩法呢?早前做过一个简单预测(详文:2018十大饮食潮流预测),即管睇睇第一个月有冇呢个走势先!2018年1月嘅十强,都有唔少新面孔,亦有旧店回勇重新上榜,唔讲咁多,立即睇睇今年第一次好评餐厅十强!


第10位 和气食堂

上个月获第7位嘅日式居酒屋,今个月回落至第10位。日本菜始终深得香港人欢心,而且难得食物质素唔错、选择多又抵食,牛油果芒果三文鱼班戟、樱花虾调鱼汤泡饭、脆脆烧三文鱼皮都系其他餐厅少见嘅创意菜式,连续两星期上榜都系合理嘅。

图:广亮先生playviolin


第9位 古早牛肉面 (*新上榜)

之前预告过台式牛肉面会继续走红,呢间只系开咗几个月嘅深水埗小店,环境好有台湾街头feel,有唔少怀旧摆设装饰。招牌红烧牛肉面用80斤牛骨及蔬菜熬成,味道香浓,亦有肉燥便当及乾拌面,手抓卷饼、面线及盐酥鸡等夜市小吃。

图:花太郎yankeyau


第8位 亚苏尔 (*新上榜)

香港葡国菜或澳门菜唔算好多,所以呢间餐厅一开都有唔少人去试!有地道香茜柠檬牛油煮蚬、非洲鸡、脆猪扒包、缅甸鸡汤米、烤乳猪,亦有自家创作嘅十月初五虾籽松露意大利粉,用当地老店出品嘅虾籽,亦有加入海胆嘅水蟹粥、加入芝士马介休球等。

图:alice''Nikita_cheung


第7位 炊豕店

呢间猪扒小店人气持续高企,最近因为新推避风塘猪扒,再次引起唔少foodie们注意。炸猪扒舖满炸蒜及辣椒,食落非常之惹味香口,唔会炸到乾争争,保持肉汁同质感松化,可以配饭或者捞面。而且铜锣湾区嚟讲又唔算好贵,唔怪得咁多人排队食嘅。

图:yantung117抽油烟机


第6位 串烧食堂

串烧店虽然冇以前咁hit,不过都有一定捧场客。呢间北角小店主打港式串烧,细细间都几深夜食堂feel,款式就唔算好特别,但胜在有成四五十款选择,火候掌握得均匀,必吃明太子酿鸡翼、厚切牛舌心、蒜蓉烧生蚝等,仲有较少见嘅烧鸡子!十几蚊串都好抵食吓。

图:Yandaylohastar


第5位 忠记咖啡屋‧私房菜 (*新上榜)

铜锣湾呢间老店由以前茶餐厅变成上楼私房菜,因为食物平靓正,有唔少熟客去帮衬。供应住家菜式,小菜好似咕噜肉、小炒皇都系招牌,亦不时有特色宴席,好似鲍鱼虎虾宴、佛跳墙宴、盆菜宴等,菜式更加精致,6位起就食得,价钱都几抵食添。

图:Sweetdiegrandpachunkychopsticks


第4位 豚道乐 (*新上榜)

总店位於荃湾,虽然唔少日本过江龙,但拉面款式都几特别,好似用信州山葵制成嘅wasabi拉面,又可以自选九州直面或札幌曲面。黄埔新店推出松叶蟹海老蕃茄汤拉面,汤底浓郁有蟹香,最新更推出黑松露酱油豚骨汤拉面。拉面都咁有新意,所以吸引唔少拉面迷去试架。

图:letsgocrazyjanetG4gourmand


第3位 骏景轩 (*新上榜)

原本位於跑马地酒店内嘅骏景轩,以粤菜川菜驰名,曾连续六年获米芝莲一星荣誉,早前结业令到唔少食客失望。今次喺湾仔再开,一重开即刻登上三甲位置!仍然保留瓦罉焗胡椒虾、酸菜桂鱼、杏汁白肺汤等招牌菜及麻辣火锅,食评暂时都系正面嘅。

图:Scorpion Jhkfoodiebobo


第2位 越满

平民面食继续受欢迎,旺角呢间越南菜,微升一级上到亚军。食物简朴但质素唔错,款式包罗万有,好似软壳蟹米纸卷脆身足料,春卷即叫即炸,用上和牛炮制嘅河汤底清甜,牛味突出。环境都算几舒服,价钱ok而且份量足,唔少食评都话抵食有回头呀。

图:sonson723minieater


第1位 桃园眷村 (*新上榜)

2018嘅冠军宝座系属於来自国内嘅台式早餐店!香港台菜餐厅有唔少,但主打早餐又真系好似第一次见。四大招牌食物系豆浆、油条、烧饼、饭团,用加拿大非基因黄豆,浸洗磨豆隔渣都喺舖头制作。食物唔花巧但做得出色,烧饼松化、饭团足料、油条唔油腻,有时简单但窝心嘅食物,仲好过食咩山珍海味啦。

图:jenjenloveeatingmandymanlovefoodie



文:Perrins

关键字
十强
排行榜
越南菜
日本菜
牛肉面
葡国菜
铜锣湾
串烧
私房菜
拉面
台湾菜
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】最後倒数!即将结业的老字号及人气小店
2020-07-21
【随时更新】零食速报 每周新款零食、酒品点评
2020-07-31
全城抗炎!屋企都叹到三层架下午茶 Tea Set外送/外卖自取推介
3天前
全城抗炎!北角酒店最新应变 自助餐都有得外卖?
2020-07-17
全城抗炎!送上门懒人煮食包及套餐大合集2.0 花胶炖汤/火锅/铁板烧
2020-07-30