8月想嘆個悠閒、抵食又豐富嘅brunch？今次開飯仔精選咗幾間唔同風格嘅餐廳推介畀大家，無論想同朋友聚餐抑或帶屋企人一齊試美食relax吓，總有一款啱你心水～
嘗．點心雅宴 嘗申滙
全新點心主題週末早午餐，完美糅合經典江南風味同現代創意，氛圍優雅又帶點懷舊韻味。呢個Brunch由米芝蓮星廚陳天龍師傅主理，點心、湯品、飯麵、主菜等都可以無限任食。例如涼菜紹興醉雞，雞肉嫩滑兼滲透淡淡酒香；點心方面，花雕小籠包以高湯精華鎖住鮮甜肉汁，一咬即爆湯，配上花雕酒嘅幽香，層次感滿分；而烏魚子鮮肉糯米燒賣則用鹹香濃郁嘅烏魚子同軟糯糯米相互融合，食落別有風味。主菜選擇亦相當豐富，例如煙燻樟茶鴨、紅燒獅子頭、羊肚菌燜飯同蔥油拌麵，每道菜都展示出江南風味嘅層次與講究，最後仲有滬式甜品為盛宴劃上完美句號。
供應時間：每週末及公眾假期(中午)
海鮮主題週日早午自助餐 露台餐廳 
想喺週日嘆返個悠閒又奢華嘅早午餐，可以留意尖沙咀半島酒店入面呢間帶有英式懷舊情調嘅餐廳。首先入場就已經畀滿滿嘅海鮮陣吸引住，波士頓龍蝦、鱈場蟹腳、日式鮑魚、加拿大扇貝同鮮蝦都係任食，而且全部新鮮十足、冰鎮得啱啱好，啖啖都好鮮甜。主菜方面亦好有水準，龍蝦香草醬烤比目魚加埋龍蝦莎莎青醬，鮮香濃郁；燉牛小排軟腍入味，配埋西班牙紅椒同滑滑嘅薯蓉，口感層次豐富。最後仲有精緻甜品區，包括即製班㦸配雪糕、意大利芝士蛋糕等，絕對滿足甜品控。如果想再chill啲，可以加$398升級兩小時無限暢飲，除咗有Wakefield Estate嘅白酒(雷司令)同紅酒(梅洛)，仲有香檳、紅白酒同雞尾酒任飲，真係週日放空首選！
供應時間：每週日上午11時至下午2時30分
週末社交早午餐體驗 WHISK
一場長達三小時嘅味覺盛宴，主打無限量供應六款精緻小碟，加埋四道菜主廚精選，啱晒美食愛好者慢慢嘆、打卡放鬆吓。頭盤包括檸檬醃漬日本鰤魚，魚肉滑嫩鮮甜帶清新海洋味；布拉塔芝士番茄塔汀奶香濃郁又唔膩，仲有蟹肉杯配茴香青蘋果，甜中帶脆，好有層次。主菜方面值得一試嘅係慢煮炭烤牛柳，唔只鎖住肉汁，肉味都好濃郁；另一款咖啡奶醬本地黃油雞則玩味十足，將中西風味融合得恰到好處。甜品以72%黑巧克力慕斯收尾，質感幼滑濃香，令人滿足又難忘。
供應時間：每週六及週日中午12時至下午3時
清新夏日粵菜週末早午餐 唐述
如果你鍾意中菜，呢個粵韻飄香週末早午餐一定啱你！以清新夏日味道為題，前菜包括用20年花雕酒醃製、魚香籽點綴嘅生醃蝦，鮮香撲鼻，開胃一流；而用木瓜、西瓜、蜜瓜、冬瓜同雪蓮子慢火燉成嘅杏汁肆菓湯，夠晒滋潤解暑。主菜選擇都好吸引，例如香蔥沙薑屈雞、胡椒龍蝦等，每款都誠意十足、層次豐富。甜品必試脆炸蜜瓜奶配椰子雪糕，外脆內軟、加埋清涼椰香，即刻掃走暑氣。另外仲有20多款精緻手工粵式點心任你點，如玉帶小籠包、香脆蝦多士、西班牙黑毛豬酥等；甜品有煙韌黑糖糍粑、即焗蛋撻、奶黃千層糕、貴妃玉露、白糖糕、薑汁糕等等，真係甜品控福音！
供應時間：逢星期六、星期日及公眾假期推出，由中午12時至下午3時
任食生蠔海鮮早午餐 / 生蠔海鮮周末早午餐 Porterhouse 
圖：呢間高質扒房搬舖重開後走精緻氛圍，仲有靚靚天際線做背景，慵懶嘅氛圍感令人好relax～週末推出嘅海鮮自助早午餐無限量供應凍肉拼盤、精選芝士、即開生蠔、波士頓龍蝦、焗鱸魚、烤澳洲和牛上後腰脊肉等美食，冷熱盤都各有選擇。龍蝦包都係必食item，麵包外層酥脆內裡柔軟，龍蝦肉鮮甜彈，仲有三文魚籽做配料，口感層次豐富；仲有即煮意粉可自由配搭食材同醬汁。你亦可以升級加配「2小時無限暢飲」($138起)，按級別供應氣泡酒、朝日啤酒、Telmont香檳、粉紅酒等等。留意而家經OpenRice book枱有優惠啊。
文：Yanica、Cathy
編：Cathy
