9月份好評餐廳十強
2017-10-06

仲有3個月就要同2017年說goodbye喇,第三季完結,又有咩餐廳上榜先?今個月似乎有唔少日本菜上榜,始終香港人都係鍾意食日本料理,放題拉麵居酒屋都係我哋杯茶!其他小店都不乏捧場客,第一位更加係本土美食!立即同你睇睇今個月嘅十強先:


第10位 雲南啊老表黑羊湯鍋米綫 (*新上榜)

呢間米線雖然開咗一段時間,但長期多人幫襯,選擇好簡單,主要就係羊肉同牛腩,黑山羊肉可以揀有皮或淨瘦,湯底睇落好清,但係食落羊肉味濃微羶,係略嫌羊肉切得太碎,加埋辣油好惹味。唔食牛羊可以揀豬手、雞肉或者小食,份量十足,係觀塘返工人士嘅午餐飯堂。

圖:心太軟*~sunny.ho


第9位 金田家

元朗雖然有唔少拉麵店,但呢一間由銅鑼灣開入新商場,仍然吸引到唔少拉麵迷朝聖,梗有原因嘅!豬骨湯底濃郁又唔油膩,食完拉麵唔會太滯,溏心蛋更加係十個讚。食完拉麵唔夠飽,小食選擇多,好似有男爵薯餅、芝士年糕、北寄貝海鮮沙律同埋芝士蛋糕等,抵佢多回頭客嘅。

圖:FOOODHUNTERAmyFu5007


第8位 極尚大喜屋日本料理 (*新上榜)

放題一直都係好受歡迎嘅菜系,不過似乎間間差唔多,呢一間就有啲特色。新開冇耐就打入十強,因為有好多放題甚少出現嘅新菜式,好似磯燒海鮮、鮑魚花膠、原隻葡式乳豬、海膽拖羅壽司,雪糕就係movenpick任食,好豪啫!不過有食評指人太多兼要排好耐隊,咁要改善吓先得喎。

圖:yemenikwanChiuyu118


第7位 雲長小龍坎老火鍋 (*新上榜)

今個冬天麻辣火鍋肯定繼續hit,天氣未凍已經陸續有新店上榜!呢間由情歌王陳柏宇開設,麻辣湯底面層一層紅油,辣度十足,而且愈滾愈濃,每人有一樽麻油俾你加料,重口味人士一定鍾意!配料就有牛舌花、鵝腸、鴨血等招牌菜,仲有一個摩天輪有齊手打丸同餃子,打卡一流。

圖:小東hkfoodelicious


第6位 正宗上海生煎皇 (*新上榜)

最近連開幾間分店嘅生煎包專門店,唯一港島分店上榜!生煎包新鮮熱辣出爐,皮薄兼一咬爆汁,千祈唔好成粒啪入口呀!底部有脆皮,餡料份量亦十足。其他點心好似小籠包、雞絲粉皮同埋拉麵都有唔少好評,環境舒服而且服務唔錯,絕對有機會打低曾獲米芝蓮嗰間呀。

圖:RosanLaitangjack


第5位 青花 (*新上榜)

又係新餐廳!旺角最新商場The Forest開咗唔少新食肆,以呢間人氣最旺!班底係做甜品起家嘅ATUM,貫徹商場嘅綠化感覺,裝修都係小清新花園feel,似足城市綠洲。食物就係新派東南亞菜為主,招牌菜有泰式生蝦、牛油果辣青檸薯花、檸檬柚子魷魚水冷麵等,賣相夠靚,最啱MK潮人打卡。

圖:hanna_y糖小妹


第4位 鮨一日本料理 (*新上榜)

海鮮丼人氣雖然稍為回落,不過呢一款食物就長期有人like,就係紅爆fb、IG嘅千層海膽飯!海膽埋到成座山咁高,配上吞拿魚蓉、加入赤醋嘅秋田小町米同即磨山葵,好犯規呀。難得其他菜式好似刺身、燒物等都唔錯,即使唔係海膽控都可以幫襯!不過人太多,難book之餘亦坐得唔係太舒服。

圖:chongjackyiameatproduct


第3位 蝦棧 (*新上榜)

全部都係蝦!呢一間台式餐廳主打蝦煲,大頭蝦全部都係游水貨色,即叫即撈,肯定新鮮啦!有多款煮法,有台灣地道胡椒、奶油及三杯等口味,仲有港式避風塘,惹味香濃,蝦膏多而且蝦肉彈牙。老闆太太係台灣人,所以其他台式小菜好似魯肉飯、醉雞卷等質素都相當唔錯,小店值得支持!

圖:ooiooiMiss K.fly


第2位 北海道爐端燒

又平又正嘅日本餐廳,喺香港真係唔多,偏偏香港人最鍾意就係日本菜。呢一間來自日本大阪嘅居酒屋,走大眾化路線,菜式選擇好豐富,車輪芝士意粉、稻草烤魚或牛、燒物都係必點,難得每一款質素都唔錯,最重要係性價比高,抵食!餐廳座位唔多,都幾有深夜食堂feel,成日爆滿,唔book一定食唔到。

圖:hktastycrushALISY


第1位 永年士多 (*新上榜)

長年人氣高企嘅車仔麵,衝出元朗喺尖沙咀開店,連條人龍都移師埋九龍!雖然評價兩極,有街坊話不復當年勇,但仍然無損霸氣,想食就要排隊!招牌菜有豬腸、豬紅、魷魚、蘿蔔等等,橙紅色嘅辣汁有啲似辣版嘅沙嗲,濃郁惹味,食得辣不妨挑戰大辣。地方好企理乾淨,不過座位唔多,乖乖哋等位啦。

圖:eatscravingFufooodie



文:Perrins


關鍵字
十強
排行榜
米線
拉麵
放題
火鍋
生煎包
泰菜
海膽
台灣菜
居酒屋
車仔麵
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
2019-12-30
荃灣新開無敵海景日式放題 佔地過萬呎 新張期間88折!
2020-01-03
【2019回顧】 過江龍之年 逾50間海外人氣店登陸 + 2020年預告 (有片)
2019-12-30
【特約分享】新年去始創 食盡中、日、國際賀年佳餚
2020-01-13
迎接全新2020 1-2月下午茶推介
2020-01-06