12月份好評餐廳十強
2020-01-08

2019年最後一個月份,可以話係屬於麻辣控嘅天下,有唔少上榜嘅餐廳都係以辣食作招徠。至於餐廳菜式方面就幾平均,中、西、日、台等都有。

第10位 金鶴拉麵(*新上榜)

 圖:sparkles0702singron26

呢間拉麵店唔少分店都曾經上過榜,今次就輪到天后店。去到基本上必食雞白湯拉麵,以日本赤雞熬煮而成,奶白色嘅湯底好creamy,味道亦夠濃郁。而且賣相靚仔,打卡呃到唔少like。

餐飲券:72折 - 極濃雞白湯拉麵

第9位  麻辣串串香

 圖:Jhcc09Ayumilcy

為咗搵好嘢食,有時係要捐窿捐罅。呢間餐廳位置就偏咗少少,不過去到成日都見到有好多人就知道質素有保證。麻辣友梗要食佢酸辣粉,叫多幾串串燒就夠晒刺激。選擇好多,特別推介燒原條茄子,蒜香味重,好入味。仲有蟶子皇都好鮮甜。

第8位 ULURU

 圖:chungemeniki_cheung

第三度上榜嘅打卡餐廳,今次同大家介紹下佢嘅下午茶,除咗三層架上嘅自家製朱古力、馬卡龍、藍莓蛋糕等,仲有兩款鹹食,閨蜜約TEA就啱晒。最吸睛同吸like嘅應該係迷你朱古力糖果溫室,仲有棵鮮紅玫瑰插住,少女心要爆發了。

第7位  Deer Kitchen(*新上榜)

 圖:phonebusVivian._.

觀塘工廈嘅西餐廳,間間都有特色。呢間就以鹿為裝修主題。牛魔王嚟到記住叫頂級美國西冷扒,10-12安士重㗎,配埋紫薯蓉。西冷肉味濃郁,仲好有肉汁。另外黑松露意大利雲吞都唔好錯過,芝士味同黑松露都好香。

餐飲券:$10一隻新鮮生蠔

第6位  滿樂中菜(*新上榜)

 圖:為食MoJilchongjacky

好難得10強有中菜廳上榜,就知實力非凡啦。由擁有30年經驗嘅中菜大師許美德先生同團隊主理,必食梗係片皮鴨,外皮脆卜卜,配埋自家調製嘅甜麵醬、蘿蔔絲、子薑、青瓜絲同京蔥絲一啖放落口,係滿足啊。

第5位  牛大人台灣火鍋吃到飽

 圖:Dee Shum小清新劑

呢間火鍋店係最近最多人要bookmark收藏嘅餐廳,120分鐘任食台式火鍋係抵食嘅,食得辣嘅記住揀麻辣鍋,湯底加入先烤後煮嘅牛骨,仲有三十幾款中藥材熬煮,啖啖牛香之中滲出辣香。用嚟淥牛肉同鴨血就最正。澳洲和牛M5牛肩卷、手切封門柳、安格斯一口牛肉粒通通都有得食。

第4位 鬼金棒(*新上榜)

 圖:迷你黑洞starki

呢間嚟自東京嘅人氣辣麻味噌拉麵店,喺港島開設第一間分店嘅時候已經引起全城辣椒仔嘅注意,而家喺尖咀開埋,聲勢自然更大。尖咀店仲要有新出嘅辣麻拌麵呢~ 自問食得辣嘅朋友仔要嚟挑戰下喇,睇下自己食唔食到世界上最辣嘅死神級辣味拉麵!

第3位 Zeng(*新上榜)

 圖:Amber1117

12月應該係一個要飲酒要chill嘅月份,呢間位於銅鑼灣嘅高空酒吧餐廳,仲可以望到270度維港海景,自然得到一眾酒迷垂青,上去chill返兩杯。杯杯cocktails都好有特色,仲有加入陳皮等嘅中國風版old fashioned添,係特別嘅。食物方面,意式新鮮生龍蝦刺身同和牛他他亦值得一試。

餐飲券:$500現金劵(8折)$250現金券(9折)

第2位  小黑糖

 圖:joxfoodiesallyho703

你以為黑糖珍奶嘅熱潮已經過咗?sor,呢間小店話你聽,未呀!仲打入第2位添呀!再度上榜嘅小黑糖主打黑糖珍珠,粒粒煙韌,手炒黑糖味道濃甜,特別在於仲可以選配泰式奶茶或者紫薯牛奶等。泰好喝歐蕾珍珠頗受歡迎,茶味甚香;紫薯牛奶仲有紫薯蓉添!

第1位  鰻工房

 圖:laihinfungmuisasa

排首位嘅係以鰻魚為主食嘅小店,幾款鰻魚丼都係即叫即燒,夠晒新鮮,仲全部都可以加高湯,自製茶漬飯。餐廳會按時令挑選最好嘅鰻魚產地,白燒生鰻魚、蒲燒鰻魚、整埋芝士焗鰻魚丼都有,鰻魚迷要搵機會朝個聖啦。


文:Kar


關鍵字
十強
好評餐廳
十強名單
報榜
銅鑼灣
尖沙咀
天后
荃灣
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
4天前
全城抗炎 與醫護同行!提供醫護餐飲免費優惠餐廳一覽
2020-01-31
美國人氣肉桂卷抵港!煙韌原味/朱古力/焦糖胡桃卷(有片)
2020-02-06
全城抗炎!60間餐廳推$0-$25酒精搓手液換購計劃
2020-02-12