10月份好評餐廳十強
2018-11-06

話咁快又一個月,踏入年尾,競爭更加白熱化呀!今年好似特別多過江龍來港插旗,而且間間都係香港人熱捧嘅當紅餐廳。今個月都唔例外,輕而易舉登上榜首嘅係佢!即刻睇睇今個月有邊間餐廳打入十強先。


第10位    團日式拉麵

上個月已經上榜嘅拉麵店,由香港人一手一腳開設,引入日式拉麵機,四款拉麵口味各有千秋,難得好多食材都係自家製,製作相當有誠意。飲完湯唔口渴,溏心蛋生熟度剛好,而且有唔少新奇日本飲品,好有心機!

圖:vincitoswloklucas


第9位    第一郡

同樣係上過榜嘅餐廳,呢間小店由越南人開設,食物正宗而且價錢抵食。餐牌唔算多選擇,但都好地道,好似招牌蟹膏蕃茄湯檬同出面有少少唔同,湯底較清,但蟹膏餅質感似雞蛋,但就有鮮甜濃郁蟹味,有特色。

圖:karyngng一座山


第8位    Hami Harmony

開業一段時間仍然持續人氣,多次登上我哋十強榜嘅西餐廳,開業3年以來水準穩定,而且不時推出新菜式,好似賣相精緻下午茶、打卡一流嘅軟殼蟹意粉等,田園風裝修亦成為唔少少女文青聚會好地方。

圖:Ms.ZoieR


第7位    泰濃麵 (*新上榜)

越來越多人鍾意食泰式船麵,呢間新開船麵店唔同泰國街邊一口一碗,改以靚料好似安格斯牛、飛驒和牛、黑豚肉等做配料。精髓湯底呈深色,牛骨香草味重而帶甜,風味十足。性價比當然冇當地咁抵,叫做可以止吓口癮囉。

圖:doc25jpeatallyoucan


第6位    響 - Hibiki 日本燒肉

呢間燒肉放題已經連續三個月上榜,走勢相當強勁!唔少人讚食物質素高,刺身有齊三文魚、吞拿魚、海膽、帆立貝,海鮮有生蠔鮑魚大蝦可以燒,和牛仲有牛胸腹、西冷同肉眼等唔同部位。仲有大量清酒甜品任食,貴少少食好啲都值嘅。

圖:sheila_lo


第5位    Appendix Coffee & Bar

上個月季軍位國稍為回落,型格咖啡吧位於商廈內,開放式設計開揚而且樓底高,氣氛悠閒唔侷促。咖啡為自家烘焙,雞尾酒就由得獎調酒師設計,以職業命名玩味十足。另有tapas小吃、全日早餐等,嚟hea同chill都一樣得。

圖:vickyyy824紫揚晴海


第4位    Snow Peak Eat (*新上榜)

頭四位係新餐廳嘅天下!殿軍係日本著名山系品牌Snow Peak開設嘅露營主題餐廳,展示咗一系列型格產品。食物就以健康輕食為主,好似沙律、薄餅等,賣相靚而且份量足,坐住名牌露營餐枱椅,好有outdoor風味!

圖:karin_torumonstergirlshk


第3位    金鶴拉麵 (*新上榜)

今個月同時有兩間拉麵上榜。開業冇耐就登上三甲位置,主打雞白湯拉麵,賣相做法同名店相似,有泡沫同炸牛篣,雞湯係於日本訂造再直送來港,濃度刻意調低,唔會杰稠到飲唔到。另一主打鰻魚飯夠厚身,價錢唔平,但環境、食物都有日本水準。

圖:cyndiiKwokwaiha


第2位    小糖鈕 (*新上榜)

呢間甜品店本身位於元朗,由經驗豐富酒店甜品師自立門戶開設,甜品味道同賣相都有五星級,之後遷至尖沙咀,食物款式更多。必吃柚輪、富士蘋果撻、大糖鈕精選拼盤等甜品,鹹食就要試海南雞飯,做法係來自文華酒店架。

圖:siufarbkei_dessert


第1位    幸福班戟 (*新上榜)

千呼萬喚全城期待,來自日本嘅Happy Pancake,未開已搶盡風頭吸引眼球!難得過江龍來港可保持水準,班戟質感輕盈鬆軟,雞蛋同蜂蜜牛油香味突出。排隊排足兩小時都無損人氣,開業短短一個月登上榜首唔出奇!

圖:fififishNicolewongg



文:Perrins

關鍵字
十強
排行榜
甜品
梳乎厘班戟
拉麵
咖啡
燒肉
放題
船麵
越南菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
美登利登陸旺角! 必食大件吞拿魚、足料蟹膏沙律
2018-10-31
10月份好評餐廳十強
2018-11-06
灣仔無限時半自助放題!厚切刺身+熊本和牛串+華味雞(有片)
2018-11-02
任食Movenpick、Haagen-dazs! 海洋公園酒店新開幕 首推全環保海鮮自助餐
2018-11-08
【特約分享】過大海打邊爐! 澳門百老匯秋冬限定火鍋街
2018-10-23