入秋之後，唔少酒店餐廳都推出咗期間限定嘅秋季主題自助餐，仲以海鮮為題，例如包括豪華澳洲龍蝦刺身拼盤等矚目菜式。無論你鍾意大啖食蟹抑或迷戀任食新鮮刺身，都總有一間啱你心水！
任食龍蝦+魚子海膽Taco Food Studio
餐廳以新形象回歸，裝潢時尚又融入香港特色，仲少有設置3間私人包廂，可容納8至24位賓客，而開放式廚房讓客人欣賞大廚即場烹調𠻹～現時主打任食爽口大隻嘅龍蝦，煮法會不定期轉換，例如清蒸、上湯龍蝦伊麵、龍蝦叻沙湯麵等；另外刺身壽司Bar嘅即製魚子海膽Taco都係一大亮點，唔少人不停encore；Live Station方面必去即煮鐵板燒區，豬肉串Juicy彈牙、魚扒夠惹味，佐酒一流。如果每位加$168，就可以無限暢飲Espresso Martini on tap，真係自助餐全新體驗呀！
可口可樂星夜自助晚餐 灣景廳 
大家未食過都會聽過用可樂煮雞翼，呢間酒店自助晚餐即將大膽挑戰，推出用可樂炮製黃金蟹肉薯餅、檸檬可樂糖醋骨、可樂慢煮和牛面頰等食品！另外仲有造型吸睛嘅瀑布可樂黑森林蛋糕、可樂蓋掩抹茶慕絲紅桑子蛋糕、懷舊可樂遮仔啫喱同埋可口可樂特飲工作坊，鹹甜點都帶嚟新驚喜～當然陣容鼎盛海鮮都不客錯過，好似加拿大鱈場蟹腳、麵包蟹、即開生蠔、藍青口等冰鎮海鮮，香口嘅星洲黃金麥皮蝦、酥炸生蠔 、香蒜粉絲蒸扇貝、辣椒膏炒大蜆、椒鹽魷魚都會輪流供應。
「蟹逅世界・海鮮狂饗」自助餐 The Place
今個秋季自助餐將矚目嘅江蘇大閘蟹帶到餐桌，配搭環球海鮮，為食客呈獻極致秋日盛宴。晚市每位成人可獨享一隻清蒸3.5両大閘蟹，金黃蟹膏鮮香濃郁，令人一試難忘；仲有任食北海道毛蟹，蟹肉鮮甜細膩。另外亦供應多款特色蟹料理，例如香蔥蟹殼黃酥餅、金沙螃蟹、紫蘇蟹肉炒飯同蟹皇蒸豆腐，每一款都將蟹味演繹得淋漓盡致。冰鎮海鮮區同刺身壽司區選擇都好豐富，熱葷方面則有焗烤戰斧牛扒、鐵板香煎鵝肝、特式燒乳豬、避風塘炒小龍蝦同薑蔥清蒸比目魚，中、西式滋味應有盡有。最後當然唔少得甜品區，薑茶湯丸、焦糖燉蛋泡芙、榴槤雪芳蛋糕等款款精緻，加埋MÖVENPICK雪糕車即場製作雪糕三文治，為自助餐劃上甜美句號。
蟹鮮蠔饗‧海鮮自助晚餐 City Café 
呢間餐廳最近推出「蟹鮮蠔饗‧海鮮自助晚餐」，以多款蟹饌同新鮮生蠔為主題，為食客帶嚟滿載滋味嘅初秋盛宴。冷盤海鮮方面選擇豐富，包括空運生蠔、布朗蟹、雪花蟹腳等，新鮮飽滿；蟹料理更係今次焦點，三色焗生蠔色彩繽紛，鮮香濃郁；西班牙魚子醬雪花蟹伴溫泉蛋嫩滑細膩，入口層次分明；金不換芝士梳乎厘焗釀蟹蓋香氣撲鼻，黃金香蒜炒蟹則融合鹹蛋黃同香脆蒜粒，辛香惹味，令人回味無窮。其他推介仲有香芒蟹棒雞絲粉皮、蟹子醬烘大蝦、雪花蟹伴西班牙海鮮飯等，款款驚喜。甜品方面以榴槤為主題，準備咗榴槤千層酥、迷你榴槤泡芙、榴槤糯米糍同榴槤蛋撻，配搭Häagen-Dazs雪糕、果汁、紅白酒同啤酒無限encore，超滿足！
迎瀛日逸自助餐 嶼坊
全新半自助晚餐走高級路線，以豪華澳洲龍蝦刺身拼盤打頭陣，鮮甜爽口，帶嚟海洋嘅極致鮮味。之後賓客可以從六款主菜中揀選心水主菜，包括油香四溢兼肉質嫩滑嘅美國USDA牛柳、外脆內嫩嘅香草烤羊架；海鮮愛好者則可選擇珍寶大蝦濃湯汁扁意粉、味噌黑鱈魚、冬菇花膠鮑魚粗麵或黑松露意大利雲吞，每一道都精緻考究，各具特色。配合無限暢飲Sapporo札幌生啤，為盛宴增添幾分豪邁感。最後嘆埋抹茶紅豆忌廉卷、香印提子吉士撻同鯛魚燒等精緻日式甜品，為一晚完美收結。
「蟹迷出動」自助晚餐 The Food Gallery 
蟹迷要出動喇！呢個自助晚餐將時令蟹料理發揮到極致，為一眾鍾意海鮮同蟹料理嘅食客帶來豐富選擇。現煮專區每日都會推出四款蟹肉菜式，包括甲羅燒、蟹肉茶碗蒸、蟹肉糯米球同蟹肉薄餅，款款即場炮製，保證新鮮熱辣；連香氣四溢嘅經典蟹饌如避風塘炒蟹、黑椒炒蟹同泰式咖喱炒蟹亦一應俱全！焦點美饌必定要食波士頓龍蝦，以松露忌廉汁、龍蝦汁或番茄芝士醬炮製，啖啖鮮甜飽滿。仲有冰鎮海鮮區、日本料理專區、西式及中式熱葷𠻹。甜品區則以芒果同榴槤為主題，芒果奶凍、百香果芒果朱古力蛋糕、榴槤千層酥、榴槤忌廉蛋糕同榴槤炸波款式繁多，果香濃郁。另有即製法式可麗餅、焦糖燉蛋同多款蛋糕，樣樣都精緻誘人。
仟國魚鮮自助餐 Le Café
同本地海產養殖專家「仟國水產」合作，推出以可持續海鮮為主題嘅限定自助餐。作為專門養殖龍蝦同海水魚類嘅品牌，「仟國水產」獲得多項國際認證，更長期供貨畀米芝蓮星級餐廳同五星級酒店。今次自助餐重點放喺鮮魚料理，透過唔同烹調手法將魚肉嘅鮮味、口感發揮到淋漓盡致。當中主廚特別推介蘇式燻䱽魚，魚肉細嫩帶有淡淡煙燻香氣；泰式肉碎蒸烏頭就融合香料同魚肉嘅鮮味；仲有豆腐火腩炆鱸魚件，味道濃厚惹味，配飯一流。凡惠顧自助午餐，每枱會獲贈酸菜魚一客，酸香開胃。值得一提嘅係逢星期六、日同公眾假期午餐時段仲會舉辦免費曲奇製作活動，小朋友可以即場參與，邊食邊玩，享受充滿樂趣嘅親子時光。
更多OpenRice詳細推介：
► 2025香港海鮮放題推介 任食即撈海鮮/和牛/雞煲火鍋 (按此)
►【2025中秋】10+創意月餅/特色禮盒/早鳥優惠推介 (按此)
► 2025秋季自助餐合集！海鮮與大閘蟹主題/豪華澳洲龍蝦刺身拼盤 (按此)
文：Yanica
編：Cathy
