麗島小廚 (已結業)

今晚揀了醉雞煲，湯底同雞係分開上嘅，半隻雞嘅份量，碟雞都幾大碟，侍應叫我地湯滾起時先至落雞，淥5分鐘左右就OK，先飲湯再食雞，食到七七八八先至開始打邊爐。雞湯鮮甜美味。火鍋配料叫咗美國安格斯牛肉、鱔片、韭菜餃同埋一份菜。碟安格斯牛肉都幾靚，脂肪均勻，食落唔會"un"，性價比高。鱔片新鮮，夠爽彈，質素高。自家製韭菜餃D韭菜同D餡料真係好新鮮，韭菜味夠晒香，好好食。油麥菜好新鮮。佢隻德國麥啤好好飲，食雞煲啱晒。

今晚試了胡椒豬肚雞煲，好似係新野，兩個人要咗半隻雞，雞同湯底分開上，碟雞幾新鮮，胡椒豬肚湯嘅胡椒味唔係好重，湯底好足料所以個湯好好味，豬肚切成絲都洗得乾淨無臭味。飲完湯又將d雞食得七七八八就開始打邊爐，叫咗萵筍、雲吞同烏冬，雲吞好好味，萵筍都幾新鮮，烏冬滑得黎都幾彃牙。之後再加咗個手打蝦滑，估唔到一份有兩條，落湯淥一陣就食得，幾爽幾彈牙，如果D飛魚子再多D應該仲正。另外佢哋隻德國麥啤幾易入口幾好飲。

石門而家非常興旺食肆林立，今次去呢間主打少鹽少糖少油冇添加味精嘅麗島小廚食午市套餐，叫咗👇剁椒珍珠鱲魚🐟套餐＄70包咗油菜🥬、白飯🍚、湯🥣及飲品🥤🐟珍珠鱲魚非常新鮮而且大條厚肉，食落腍滑鮮甜；有薑粒蔥絲之外，仲有醃製過鹹鹹酸酸紅辣椒碎，不過鹹味就多過酸味🥣例湯係紅蘿蔔粟米粉葛煲豬肉，非常清甜潤喉，湯頭都濃郁，唔會好似其他鋪頭咁淡如水得啲鹽味，不過唔記得影相😅青菜🥬、白飯🍚及熱檸茶🥤正常發揮70蚊有蒸魚、白飯、例湯、青菜及飲品，已經好抵，仲要食落條魚非常新鮮大條，例湯又濃，非常住家的味道，店家誠意十足👍

講開住家飯，最近發掘到呢間餐廳感覺健康又有營養雖然佢主打係食打邊爐，但係午市有套餐選擇今次我叫咗魚嘅套餐，黎到好有驚喜，因為好大條魚而且食得出好新鮮，魚肉好滑仲送好好味嘅住家湯，同埋一碟青菜真係好健康好有家嘅感覺啊

今日食咗個蟲草花午餐，原因係揀咗荷葉籠仔蟲草花蒸雞飯之外，是日例湯竟然係南瓜蟲草花煲唐排，所以無啦啦變咗做蟲草花午餐。講返個是日例湯，無落味精，真係好掂，D南瓜煲到溶晒，D排骨又無雪藏味，超級正，直頭想要多一碗黎飲。個荷葉籠仔蟲草花蒸雞飯好大籠，份量真係絕無欺場。佢D雞嘅質素都幾好，可能呢間舖頭晚市做雞煲所以D雞都靚D啦。佢成個Set除咗個例湯之外，仲跟埋一碟油菜，另外仲有一杯餐飲，真係幾豐富。餐飲我叫咗凍檸茶。

朋友推介呢間雞煲果然有料到，我哋叫咗椰子雞煲，一開波先原個椰青水車落去湯底，水滾就落雞，等5分鐘就食得，啲雞好好食好滑，雞湯有埋椰子水之後覺得特別潤。飲完雞湯食完雞就開始打邊爐，我哋叫咗美國桶蠔、炸魚皮、黑柏葉、豬膶、西洋菜同埋紅薯粉，樣樣都幾新鮮。美國桶蠔淥2分鐘食就啱啱好，又大隻又肥美。炸魚皮超巨型好薄身，我覺得直接就咁食好味過落一落湯再食。黑柏葉淥一陣就要食，否則淥得太耐會太韌，衣家啱啱好就好爽口好鮮味。豬膶一食落口就知好新鮮同埋都幾脆口，啱晒打邊爐。西洋菜同紅薯粉都唔錯。最後想講呢度有隻德國麥啤幾好飲，好襯雞煲，真係要試下。

足料花膠雞煲好味道，佢D雞都應該幾新鮮，如果唔係佢個湯D雞味唔會咁香濃咁出，一滾起就已經聞到好香。滾5分鐘左右就可以食，店員叫我地先飲個雞湯先然後再食雞，D雞都算滑，食到七七八八之後就開始打邊爐。打邊爐配料叫咗我最鍾意嘅鱔片，呢間嘅鱔片都幾新鮮，淥一陣就食得，好正。呢度嘅墨魚滑係黑色的墨汁墨魚滑，一份有2條又幾抵食，D墨魚滑都幾彈牙幾新鮮。我地又叫咗雲吞，佢呢度唔係D巨型雲吞不過一啖一粒都唔錯，入面D蝦都幾新鮮，D肉質係呃唔到人嘅。最後仲叫了一個什菇藍，都好食。整體唔錯，會返頭。

凍冰冰打邊爐係不二之選，不過又驚燥熱，於是決定去食椰子雞煲。兩個人要半隻雞，飲完雞湯食完雞先至打邊爐會無咁燥，其實又會唔會自己呃自己呢？ ！Anyway保暖最要緊。湯底、半隻雞同埋椰青係分開上，先將椰汁倒落個湯底度，滾起咗先至落雞，落雞後大火滾5分鐘就食得，佢有個5分鐘漏斗俾你計時。d雞啱啱好，肉質好滑，雞湯有雞味又有椰子味，湯底入面已經有竹笙杞子紅棗等配料，食落感覺好滋潤。另外佢半隻雞都幾大份，無呃秤。打邊爐嘅配料就叫咗魚皮餃、雲吞同韭菜餃各半份、骨髓、油麥菜同烏冬。三款餃都好食，特別係個韭菜餃，韭菜味好香。雲吞同魚皮餃d餡料都ok唔錯。油麥菜同骨髓嘅份量都幾多，性價比高。個烏冬又估唔到咁滑。

今晚想食雞煲於是再次幫襯呢一間，有一排無食不過水準都Keep到。今晚唔食麻辣食了花膠雞煲。湯一滾起先飲頭啖湯真係好清甜好潤，天氣凍凍地真係啱晒。$198有半隻雞，花膠唔算多不過都OK嘅。飲完湯食完雞就開始打邊爐，叫了韭菜餃、鴨血、巨型炸魚皮，仲有個什菌籃，之後再叫咗一份菜，樣樣食物都幾新鮮。韭菜餃好好食，D韭菜好新鮮。鴨血都唔錯，如果麻辣雞煲應該仲正。巨型炸魚皮都係好巨型，佢好薄嘅，我鍾意直接就咁食多D，我個Friend就話浸一浸落湯度先食正D。什菌籃乜都有D都幾好啦。佢D菜都好新鮮。

今晚選擇了這家店食雞煲，這店舖面都大，樓底高幾好坐，不過人手卻少所以成日見到D侍應走來走去非常忙碌，不過卻不減其服務質素，佩服，值得一讚，舉例說我們點了椰子雞煲，原來椰子、雞和湯底是分開上，侍應幫我們將椰青倒到湯底內，並提我們等涉湯底滾起才落雞，湯滾時我們準備落雞，侍應就隨即過來幫忙，非常細心。侍應幫我地落雞後還提我們等5分鐘就可以食，先飲湯和吃雞，因為個雞湯係幾好飲的，果然好清甜好潤。之後侍應幫我地加湯開始打邊爐，我們點了牛脷、豬潤、蓮耦片、冰豆腐、墨魚滑、韭菜餃及紅薯粉，樣樣味道都不錯，很滿足。

今晚試了滋補花膠濃湯雞煲，味道唔錯，隻雞都幾新鮮，湯底料都幾足。伙記幫我地剪開隻雞，服務很好。花膠之真身，咬落質素唔錯，收晒貨。第一Round一定係飲湯，花膠雞湯真係正。飲晒湯之後開始打邊爐，叫咗墨魚滑、冰豆腐、美國桶蠔同韭菜餃。墨魚滑係墨汁嗰隻，仲要一客兩條，墨魚味夠香夠彈牙。冰豆腐係其中一款我最喜愛的食物，D冰豆腐吸晒D湯真係好正。美國桶蠔都真係好大隻，而且幾鮮味，好食。韭菜餃係自家製，所以D韭菜好新鮮，又係好正。

今日試了這家店的午餐，第一眼望落去覺得有D貴，不過食完之後就覺得物有所值。我叫了最貴的$70餐，剁椒蒸珍珠鱲魚，因為出面D蒸魚餐通常都係紅鮪、盲鰽、䱽魚，好少見有鱲魚，所以就揀呢款。餐漡好足料仲要真係無味精個餐比想像中大份，仲跟一碟菜，非常好。條珍珠鱲真係好大條，你睇對筷子Size做比較就知道，而且條魚都好新鮮。雖然係剁椒，不過只係少少辣，而且D辣椒帶出條魚嘅鮮味。店員表示為了確保新鮮，所以每日限量，賣晒就無。呢個餐有湯有菜仲要包埋餐飲，真係好抵。

打完風微微雨凍冰冰梗係要食雞煲亂一亂個新啦，今晚唔食麻辣揀咗海南椰子雞煲，兩個人揀咗$198的半隻雞，侍應喺你面前成個椰青倒落去個湯底度夠霸氣，半隻雞比想像中大碟，侍應姐姐話湯底滾起落雞冚蓋淥5分鐘就食得，佢仲話食之前先飲碗湯最和味。配料叫咗一碟細嘅安格斯牛肉、巨型炸魚皮同埋年糕，碟牛肉都幾靚幾好食。呢間嘢嘅炸魚皮真係好巨型食得好開心，不過比起平時嘅炸魚皮佢就薄身啲。年糕用嚟打邊爐原來都唔錯，不過估計如果係麻辣雞煲落年糕應該會仲好食。飲品叫咗杯大嘅凍檸茶，又真係幾大杯嘅。

因為星期日，其他食市都很難有位，見呢度不用等位可即入，都估到好極有限，果然自己攞嚟賤……！叫左個八人餐，系八人餐！！！我地得7個人，再加30蚊轉花膠雞煲，花膠細細片，一人一片都冇，已經反影左，結果係冇人理你！都算啦，脆肉鯇嚟到得6片，又一人一片都冇，大老呀，八人餐，6片魚你真系比得出既，我哋又反影啦，答案系：set餐系咁既份量！仲有，八人餐得一片烏冬，真系（夠）晒飽肚😡真係離譜到極，$1298又加1，又10蚊一個人醬油費，花膠少都算，基本一人一片魚都畀唔到客？真系祝你生意興隆囉！！！！！！

呢間雞煲店的椰子雞煲好清潤，味道唔錯，而且無諗過呢D小店的服務好好，仲要幾個伙記都係好服務，好難得呢﹗我地無叫麻辣雞煲反而叫咗個椰子雞煲，要半隻雞，個煲黎到時係湯底、椰子同埋隻雞都係分開上嘅半隻雞份量好足呢伙記於你面前將個椰青倒落個煲度椰青入面D肉可以直接食又或者刮埋落去個湯底度湯底滾起後落雞冚蓋煲5分鐘就食得，仲有個5分鐘漏斗比你計時好過癮5分鐘開蓋先飲個雞湯先，鮮甜美味，D雞肉都好嫩滑因為我地得2個人所以只係叫了細的安格斯牛肉同埋一碟炸魚皮。碟牛都幾靚，以$188的價錢他的份量比想像中多D炸魚皮勁大塊，好正