麗島小廚 (已結業)

凍冰冰打邊爐係不二之選，不過又驚燥熱，於是決定去食椰子雞煲。兩個人要半隻雞，飲完雞湯食完雞先至打邊爐會無咁燥，其實又會唔會自己呃自己呢？ ！Anyway保暖最要緊。湯底、半隻雞同埋椰青係分開上，先將椰汁倒落個湯底度，滾起咗先至落雞，落雞後大火滾5分鐘就食得，佢有個5分鐘漏斗俾你計時。d雞啱啱好，肉質好滑，雞湯有雞味又有椰子味，湯底入面已經有竹笙杞子紅棗等配料，食落感覺好滋潤。另外佢半隻雞都幾大份，無呃秤。打邊爐嘅配料就叫咗魚皮餃、雲吞同韭菜餃各半份、骨髓、油麥菜同烏冬。三款餃都好食，特別係個韭菜餃，韭菜味好香。雲吞同魚皮餃d餡料都ok唔錯。油麥菜同骨髓嘅份量都幾多，性價比高。個烏冬又估唔到咁滑。