麗島小廚 (已結業)

兩個人Lunch Time諗緊叫個雞煲加兩碗白飯好定係叫翻午餐算數，其實價錢差唔多，不過最後決定食午餐，因為見到有我最愛嘅酸菜魚。個酸菜魚似係用桂花魚，因為好滑，另外佢個汁都好正，酸同辣都夠平衡，唔無則埋一邊得一隻味，餸飯真係一流。個午餐仲跟餐有碟菜同埋有碗湯，雖然係例湯，不過無味精真係好飲，佢仲包埋一杯餐飲，$68真係好抵食。另一個餐就叫咗順德碌鵝，個碌鵝都幾好食，炆得好淋好入味，佢個汁用黎撈飯都真係唔錯，唔洗嘥晒D汁。

心思思想食雞煲於是Lunch Time就走去食。麻辣雞煲只敢叫小辣，不過都已經好惹味，半隻雞夠晒兩個人食，最欣賞佢入面有上海年糕，煙煙un un，原來同個麻辣雞煲好夾，另外佢個汁真係好正，D香料如洋蔥乾蔥芹菜芫茜等等都好正，餸飯真係餸到兩碗。跟手仲叫咗碟手切牛，脂肪分佈都算靚，肉質都好，仲叫咗碟韭菜餃同埋巨型炸魚皮，個餃幾好食，餡料新鮮，碟炸魚皮係阿侍應姐姐推介嘅，都好食，又薄又脆，出面好似好少見咁大塊。

昨天食晏過咗石門京瑞嗰邊，嚟咗呢間麗島，見到佢 set lunch 有小菜有湯有飯，都係五十幾六十蚊，望落都幾好。個場都幾闊落，兩個人都有張大枱座。叫咗兩set，一個豉汁蒸䱽魚，一個梅菜蒸肉餅。佢個是日靚湯的確幾好飲，足料夠味，都似佢寫唔落味精。梅菜肉餅我覺得淋咗dd，味係唔錯。蒸魚佢新鮮蒸嚟所以要等一陣，的確新鮮，熟度啱啱好，味都調得好，成條都好好味。跟大碗白飯仲有都幾大碟菜跟餐，菜芯仲幾鮮甜，整體好高質，絕對值得再嚟。

石門而家好方便, 商場好近馬鐵, 差不多直達, 商場裏面仲好多食肆, 今次搵到呢間食lunch, 叫做麗島小廚。 叫咗個午市套餐招牌酸菜魚🐠$68, 包老火例湯🥣, 油菜🥬, 白飯🍚及餐茶☕。例湯🥣:是日例湯喺海帶苦瓜湯,非常足料, 苦而清甜, 如餐牌所寫, 真係好似冇落味精, 呢碗例湯真喺誠意足夠😋👍酸菜魚🐠魚肉質地算ok, 唔算太淋太梅, 食到不是雪櫃魚, 因為有啲舖頭會用雪藏鯰魚之類做酸菜魚; 而酸菜湯唔酸唔辣比較淡口, 但勝在食完之後喉嚨唔會乾涸, 可能真係冇落味精😜。油菜就略嫌多油環境座位舒適開揚闊落, 坐近窗口景色更佳; 服務態度一般正常, 環境衛生算乾淨。午市套餐包主菜, 例湯,油菜, 白飯及餐茶只係68蚊, 唔使加一, 環境又舒服, 確實唔錯👍

今天吃雞煲，選了不辣的椰子雞煲，感覺像是清潤一點。椰子雞煲的湯底和雞是分開上的，然後再落原個椰青水，之後再落椰青內的椰子肉到湯底中，提升椰子的鮮味。頭啖湯清甜美味，非常滋潤，吃過雞煲後開始打邊爐，牛方面點了一碟本地牛頸脊、安格斯牛肉和牛胸爽，還有炸響鈴和炸魚皮。牛頸脊和安格斯牛肉都很靚，油花均勻，牛頸脊的牛肉味比安格斯濃，而安格斯因為油花多一點，所以肉質會比較淋，兩款牛肉都不曾錯。牛胸爽越來越多地區能吃到，不過此店的牛胸爽比較厚身，幸好淥熟時仍不會太韌，如果能夠切得薄一點會更理想。炸魚皮很大塊，乾身很脆。炸響鈴也很脆，質素不錯。

攞完身分證之後揀咗呢一間餐廳幫襯，選擇困難症咁樣喺麻辣雞煲、椰子雞煲同埋烤魚至中三選一，最後揀咗椰子雞煲。我哋叫咗半隻雞，原來椰子雞煲係喺你面前將個椰青倒落湯底度，侍應等到個湯滾左嘅時候幫我哋叫咗半隻雞，原來椰子雞煲係喺你面前將個椰青倒落湯底度，侍應等到個湯滾左嘅時候幫我地落雞，然後就話等5分鐘就食得，我哋跟足指示， 5分鐘開蓋，啲雞真係好滑，師兄話先飲咗個椰子雞湯先，要趁未比其他食材整到太油膩嘅時候飲先至最好，果然冇介紹錯，好清甜好滋潤，仲可以刮埋椰青入面啲椰子肉食添。配料方面我哋嗌咗墨魚滑、韭菜餃、蔬菜拼盤、蜂巢豆腐、即炸響鈴、炸魚皮同埋烏冬。個墨魚滑係有埋墨汁嘅黑色墨魚滑，都幾彈牙，味道唔錯。豬肉韭菜餃嘅韭菜好香，感覺都幾新鮮。即炸響鈴夠脆，應該都真係即炸嘅，最有驚喜係個炸魚皮，超級大塊，就咁食同埋落湯滾一滾食都一樣咁正。蔬菜拼盤比想像中大份，d菜都夠新鮮。

麗島小廚 (沙田)沙田石門安群街1號京瑞廣場2期2樓225號舖午市套餐附送白飯🍚青菜🥬老火湯，熱餐飲免費豉汁蒸桂花魚🐟 $68原條桂花魚奉上～驚喜地🤩蒸魚時間掌握得剛好～肉質嫩滑～魚香而不腥！桂花魚夠晒新鮮～其實用薑蔥清蒸都好好～太多豆豉反而掩蓋咗魚鮮味鹹蛋蒸肉餅 🐽 $59份量十足 可惜味道一般～😞肉餅色澤偏灰白～肉質太淋冇咬口～肉味比較淡～調味亦不足～可能因為‘少鹽少油’～如果可以剁D冬菇梅菜落去調吓味會更好～🙈 另外 鹹蛋黃油份點不足 乾身偏硬

去沙田石門出Job，難得無皇管，梗係要約朋友食返個Long Lunch啦，朋友約我黎呢一間，真係無介紹錯。有圖有真相，先睇睇D相先︰首先真係要讚下個例湯，真心一D都唔係例牌的求求其其的湯，而係無味精的老火湯，而且都幾足料，唔係溝滾水再落鹽嗰D。我地兩個人一個叫蒸魚另一個叫肉餅，Share食，蒸魚嗰條魚比想像之中大條，食落都幾新鮮，至於個肉餅都幾好，肥肉同瘦肉的比例算適中，因為好多時出面成日食到D好多肥肉嘅，大部份要lur出黎，無乜肉食到落肚，呢度就無呢個問題。另外話佢抵食嘅原因係因為個Set Lunch仲會跟碟菜同埋餐飲，而因為個湯真係好好味，所以我問個侍應可唔可以杯餐飲轉埋做湯，飲多一碗。

就算少辣都好味😋座位闊落又舒服。同一般烤魚唔同。下次會再試其他👍🏻服務態度還好。。淨叫一個烤魚4人吃勉強足夠，加埋半隻雞煲真係大滿足。。。。。第一次來感覺良好。實在需要介紹為食一族😝😝😝😝😝讚

疫情轉好當然非常開心，更好開心嘅係終於可以晚上出街堂食。今晚去了石門京瑞廣場2期的麗島小廚食雞煲，不過今次唔係食麻辣雞煲，而係選擇了溫和的椰子雞煲。湯底一到，店員即場將個椰青落落去個湯度，然後再落雞去煲，店員又話唔好煲咁耐，大約5-6分鐘就可以開蓋食得，不過食之前不仿先飲下個湯，清甜到呢，之後再食雞，D雞好滑。之後再點其他配料打邊爐。鱔片都好新鮮個鴨血都好味，不過估計如果麻辣湯底會仲正雲吞係佢地師傅自己包嘅，好食安格斯牛都好新鮮，價錢亦算合理呢個巨形魚皮真心正，即食或者落湯打邊爐都好掂呢個德國麥啤之前飲過，打邊爐一流。

約咗男同事DN噚日(29-12-2020 Tue)晏晝farewell佢,佢成日出街食晏,所以由佢話事食咩嘢,佢揀咗呢間,呢間晏晝做小菜,夜晚打邊爐,睇完menu,我要$56.00嘅蔥霸雞,DN要$65.00嘅醬爆京蔥炒牛肉,套餐送白飯,青菜同老火湯.1. 呢日嘅老火湯係白蘿蔔湯其實都唔稱得上老火,因為都幾清,白蘿蔔冇渣亦冇苦味,ok嘅.味道: 3分2. 蔥霸雞蔥霸雞都幾多,口感嫩滑,豉油同蔥都係甜嘅.菜心同白飯都正常冇問題.味道: 4分3. 餐飲我就要熱奶茶,口感滑,有茶味但唔會太濃.味道: 3分

今晚同一個唔食辣嘅朋友黎麗島小廚，揀咗椰子雞煲。半隻雞份量好足，上咗湯底再落一個新鮮椰青，令到個湯底嘅椰子味更加香濃。湯滾起再落另上嘅雞，侍應話滾5分鐘就食得，不過食之前先黎個頭啖湯，清香嘅椰子味加上雞香，真係好好味。之後叫埋雲吞、五福臨門(魚滑蝦滑墨魚滑拼盤)、冰豆腐同菜，雲吞好新鮮好食，入面隻蝦夠彈牙；五福臨門入面個黑色墨汁墨魚滑最出色，好香墨魚味；冰豆腐落湯之後好入味，吸滿咗椰子雞湯，所以都係好好食。最後叫咗杯咸檸七，超巨型，可惜唔記得影相。

呢間是無意中發現嘅，原來有全天供應嘅set 方便一個人食。每個星期換一次菜單，蒸魚同肉餅水準都保持幾好，有時都會有啲辣辣嘅菜，水煮牛肉等供應，一餐食落，有湯有青菜有飯有肉，滿意。仲有侍應都有禮貌，已經當呢度係自家飯堂啦。

外賣雞煲真係可以食上癮﹗好似我呢D火鍋L，成日都想打邊爐，不過疫情之下等了又等，7日7日再7日延長晚市堂食暫停，唯有叫外賣去解一解我好miss的火鍋啦。不過今次有D特別，因為叫咗雞煲餸白飯，再整返支德國麥啤，咁樣玩法全因我老友想飲呢間雞煲的麥啤，佢話飲開有感情同埋好似好少地方有得飲，所以就叫咗個咁樣陣容的外賣晚餐。半隻雞份量的雞煲對於兩個人黎講似乎啱啱好，個雞煲好惹味，用黎餸白飯真係一流。我好鍾意佢個汁唔會太鹹，配料有好多洋蔥、芫茜同蒜頭，夠晒味。順帶一提，原來麥啤同雞煲真係好夾，下次要叫多D麥啤先至夠飲。

今日竟然要入到去石門工作，6點幾收工，於是就諗住順路買賣外賣晚餐返屋企食，見到呢一間烤魚都好似食正，於是就決定試一試。打開個Menu，因為想食魚，所以就叫咗麻辣大海斑，中辣嘅，另外就要咗一份雲吞同埋老闆娘極力推介嘅炸魚皮。都唔係等咗好耐，兩大袋外賣已經Ready。由石門返到屋企大約半個鐘，返到屋企將成兜魚連湯倒返落個煲度翻熱，條石斑比想像中大條。湯底好香好多配料，中辣仲頂得順，值得一讚係佢似乎無落味精，因為食完之後唔會係咁想飲野。不過幾樣野之中最有驚喜嘅就係個炸魚皮，大大塊長條形，返到屋企開餐嗰陣都竟然仲脆，厲害﹗