麗島小廚 (已結業)

呢間餐廳的Lunch令我最欣賞的就係佢碗例湯，因為真係真材實料無味精咁煲出黎嘅。今日個例湯係白蘿蔔牛腩湯，熱辣辣真係好飲。佢嘅午市套餐都有幾多選擇，今日我地兩個人揀了香煎蓮藕餅同埋蔥霸雞，佢個Set Lunch除了例湯、主要的餸同一碗白飯之外，跟餐仲有一碟菜再加一杯餐飲。佢個香煎蓮藕餅都幾好食，蓮藕好爽，煎出黎嘅藕餅唔會好油。蔥霸雞都算大碟，D雞都幾新鮮，佢加埋豆醬去蒸特別惹味。碟菜同個飯都OK架，尤其是碟菜，以跟餐黎講都算大碟。檸菜檸水呢D熱飲就唔洗加錢，以咁嘅質素，真係好抵食。

食雞煲食咗好多間 今日去咗石門 試咗一間朋友推介嘅麗島小廚 由於今日只是table for two 所以沒有叫太多食物 先來一個中辣嘅肥腸雞煲 再加個菜 雞煲一上電爐 已經聞到香濃麻辣窩味 配料甚多 加添香氣 加熱之後 麻辣香味更加濃郁 隔籬枱都聞到 雖然只是order 半隻雞 但份量十足 除了雞肉滑之外 肥腸非常爽口 整體味道唔錯 值得推介整體服務態度👍👍 衛生環境也 👍👍 唯一挑剔地方 小廚門面較少 唔係熟客都幾難到間小廚 現今真材實料嘅小店 一間難求 希望大家食友 多點幫襯呢一啲有心機嘅小店

落大雨的星期五晚上為了要Happy Friday於是去幫襯了這一間位於石門的雞煲店，因為我個Friend話唔食辣(D人唔食辣又約我食雞煲真係有D奇怪)，Anyway我地最後叫咗個唔辣嘅花膠雞煲，另外再加了一碟安格斯牛肉同埋一碟韭菜餃。開爐前先飲返杯，呢度有隻德國麥啤幾好飲，仲有杯巨型檸茶都正。佢個花膠雞煲真係物超所值，有相為證。隻雞都算新鮮，無咗麻辣雞煲D濃味醬汁影響之下，D雞肉嘅新鮮程度更為明顯，呢間餐廳用嘅雞真係有返咁上下質素，仲有就係D蟲草花都好正。隻雞滾到咁上下，侍應會黎幫我地剪開隻雞，認真細心。碟安格斯牛肉都幾好食，脂肪分怖有板有眼，打邊爐真係要呢D級數先至掂。韭菜餃都唔錯，韭菜好香。D野份量好足，已經食唔落其他野了。

今日在石門工作，上Openrice見到呢間都好似唔錯，於是入去試吓。佢哋Set Lunch 7選1，我揀咗豉汁蒸䱽魚，老人家食蒸魚最養生，個Set一到嚇咗我一跳，無諗過條䱽魚會係咁大條，簡直就係兩個人嘅份量。有啲人會話唔size大冇用個喎，最緊要新鮮，咁佢條䱽魚又真係新鮮嘅，一食落去嘅肉質就好明顯知道條䱽魚嘅狀態係非常之好，肉質有彈性，啲肉一梳一梳，好味，另外值得一讚就係佢嘅豉汁真係有豆豉，啲豆豉用嚟送飯真係冇得輸。雖然呢個餐$70 ，但係除咗條䱽魚同埋碗白飯之外，仲跟一碟油菜同埋一碗麗湯，想講碗麗湯係冇味精嘅，真係好好味。最後仲連一杯飲品，性價比都算幾高，有機會真係要試吓。

上次與朋友來光顧有驚喜，其食物質素及服務都稱心滿意，故決定今天晚上再來幫襯。上次吃雞煲時看見此店亦有烤魚，於是在訂位時順便訂了麻辣大海斑，侍應生告訴我們如果兩個人吃大海斑會有點吃力，而且未必有空間再點其他配料，因為他們的大海斑一般而言都真的大條，真的非常細心。不過因為我們都想試，所以決定預訂海斑，並叫他們幫我們選一尾小一點的就好了。究竟是他的鍋太少還是那海斑真的太大？真的不知道，我們只知道那海斑真的很巨型而且厚身，肉質鮮美，真的是物超所值。因為怕太辣我們吃不了，所以只敢來一個比小辣更小的BB辣，其辣度還可以，感覺上可能再辣一點味道會更理想。鍋內的其他配料也非常豐富，如韭菜、唐芹、芫茜、炸菜、蔥及蒜等，當然少不了辣椒，味道很好。最後我倆雖然將整尾魚吃掉，不過就如侍應所講，吃不了其他配菜，下次還是多一些人才點這大海斑。另外此德國麥啤味道很好，與麻辣大海斑的味道很匹配，邊飲邊吃真的很開心。

今晚幫襯麗島小廚真係超多人，好彩預早Book定位先如果唔係實有排等。今晚唔食麻辣雞煲改為試吓新野，叫咗花膠蟲草花雞煲試一試，我地兩個人要了半隻雞，都幾好味幾清甜，以後唔想食辣雞煲除了叫椰子雞煲之外仲可以叫呢個。D雞好新鮮好有雞味，另外值得一讚係個湯真係好飲，飲左兩碗先食D雞。其他配料仲叫了韭菜餃、蜂巢豆腐、墨魚滑、粉絲同菜。佢個韭菜餃真係好食，應該係自己包嘅，如果唔係好難咁新鮮而且又無雪味。墨魚滑好彈牙，一份有兩條好抵食。蜂巢豆腐用黎食雞煲真係無敵，因為吸晒個花膠蟲草花雞湯D味，好好食。今晚唔食烏冬改食粉絲。菜都夠新鮮，真係幾好。

食材新鮮，喜出望外，招呼周到，朋友介紹麻辣雞煲，果然超級好味😋仲可以繼續打邊爐，最好食係墨魚滑、牛肉、蠔、韮菜餃和鱔片⋯⋯特別推介炸魚皮，正到不得了！記得Order埋德國啤酒🍻下次再會去食椰子雞煲湯底🥳🤩

去了這間店舖幾次，本身覺出品不錯，今日一肚子氣，下午時間食客多，做唔切，明明我先來，食物無上，湯亦都無，遲過我來的應該係熟客，就有野食，追問左幾次，淨係識答黎緊，黎左半個鐘都黎緊，其實之前都係慢，但無今次甘誇張，呢間舖永不會再去。

其實我常常去這間飯店食飯但今天遇到的事情確實令我有點覺得不接受他們廚房煮食是好食的午餐和打邊爐我都有試過都十分滿意可惜今天發現一件事情讓我十分感到不安我們對面枱客人都是叫了同款午餐服務員把午餐拿錯到對面枱本來都沒有注意但過了1分鐘後服務員回到該枱上取回餸菜那時候對枱男士告訴他我已經食過服務員仍然把餸菜取走之後送到我枱上其實只是一碟菜沒必要把別人食過的給其他客人重點是別枱男士已經告訴你已經食過這樣處理食物和衛生真的十分不能接受不是有沒有發現這個事情主要是應該處理的方式不是這樣最後他再來的菜我都不敢食真的讓人十分失望

以為主打烤魚雞煲,點知烤魚無魚味,所謂大海班一啲魚鮮甜味都無,檯又迫,座位又唔舒服,服務態度又唔好,最重要冷氣又唔夠,一邊食一邊流汗。成餐叫左個烤魚,一碟牛,一碟菜,一碟鱔,埋單總共$900兩個人。真心覺得好貴,唔抵食,性價比超低。無下次。

這家位於石門京瑞廣場二期的雞煲真的出色，配料如芫茜、蔥、芹菜、紫洋蔥及蒜頭等與雞件再加上自家的醬料，其整體味道可以說是非常Balance，出面一些地方食到的雞煲好多時候D配料太出(通常都係太鹹或者太濃味)，搞到D雞味無晒(當然有小人之心話就係D雞無味先至要用D好濃好重口味嘅醬去整雞煲啦)，不過呢一間就唔係咁，食嘅時候食到雞嘅鮮味同時又食到D配料同醬汁D味，真係幾好食。另一樣野想講就係呢間雞煲嘅飲品，佢有隻德國麥啤幾好飲(唔係H字頭嗰隻)，佢入口好清爽，而佢嘅麥味都好香，幾易入口。仲有佢杯大檸茶都正，真係好大杯。

忽然想食雞煲於是去麗島，小辣半隻雞二人前剛剛好，侍應姐姐幫我哋兜好個雞煲好細心。個雞煲d配料好惹味，特別係d紫洋蔥。雞煲入面d上海年糕索晒雞煲啲味好正於是另外叫多一份。其他配料仲有安格斯牛肉、韭菜餃、紅薯粉同油麥菜。碟安格斯牛好味，脂肪分怖都好靚仔。韭菜餃好好食，d韭菜好新鮮。成日覺得雞煲係要配紅薯粉先至掂。油麥菜好新鮮。D人話雞煲同麥啤最夾，呢隻德國麥啤幾好飲，麥味好香，一D都唔苦好易入口，一邊食雞煲一邊飲麥啤真心正。

好鍾意食呢一間石門的小餐廳，不過次次都係食雞煲，母親節慶祝活動老媽子竟然話去呢一間但係就想試烤魚，打電話去訂位時順便訂埋個烤魚。烤魚一共有兩款可供選擇，分別係大海斑同埋桂花魚，我哋揀咗大海斑，辣度就要咗少辣。等齊人嘅時候叫了一碟尖椒皮蛋食住等，尖椒只屬於微辣，配皮蛋又幾好食。終於等齊人條大海斑出場喇，真係好大條好好肉，阿媽鍾意食魚尾所以立即解體比佢，佢話好新鮮好好味。而少辣亦剛剛好，有輕微冒汗，所以就梗係要飲啤酒啦，唔啤的阿妹就要咗個椰青飲。佢呢度有隻德國麥啤幾好飲，出面少見啲所以黎親都飲，藍妹青島嗰啲留返第二度飲都得。另外就再叫咗手打蝦滑同埋油麥菜。手打蝦滑都幾新鮮，而且竟然一份有兩條蝦滑真係開心。

呢間餐廳嘅午市套餐真係勁，勁就勁在佢嘅例湯竟然係海帶涼瓜煲唐排，真係非常有誠意，個湯仲要冇味精，重點係佢啲套餐都係有$59至到$70，除咗例湯之外仲有油菜同埋跟餐飲，真係問你服未，可想而知飲食業嘅競爭真係好大。七個餐之中睇中咖喱薯仔牛坑腩同埋剁椒蒸珍珠鱲魚，好可惜個天已經幫我揀咗，因為珍珠鱲魚已經沽清。佢個咖喱薯仔牛坑腩都唔失禮，咖喱本身唔係好辣，牛坑腩炆得好淋好入味，仲有牛筋同薯仔都好味。碟菜雖然話係餸嘅，但係都好鮮嫩。整體性價比高，好食。

呢間雞煲成日幫襯，今日本來打算食個lunch就算，點知見到佢個藥膳雞煲要半隻雞都係$138，同嗌2個午市套餐差唔多錢，於是就叫咗藥膳雞煲，再加個紅薯粉。雞同湯底係分開上嘅，半隻雞都咁大碟真係份量好足。店員話湯底滾起之後先好落雞，然後冚蓋淥5分鐘就食得，佢仲俾咗個漏斗我哋計時，好正。5分鐘後開蓋食得，d雞又真係幾滑。湯底材料有沙參玉竹紅棗桂圓杞子等等嘅藥材，藥材味唔會太濃。紅薯粉配雞煲幾好食。最後一提，老闆好好人請我哋飲例湯，平時係要食set lunch先至有得送，今日係西洋菜湯，無味精。