6月份好評餐廳十強
2019-07-04

時間過得太快,話咁快2019年又過咗一半。睇返呢半年嘅十強榜,每個月都有唔少新餐廳上榜,素食餐廳仲愈嚟愈受歡迎添。睇下6月嘅走勢又係點先。

第10位  牛魔 

 圖:面包超人hk.kiddi

上個月排外第2嘅牛魔,喺多間石燒牛扒店嘅夾擊底下,今個月仍然上榜。呢間燒肉店主要提供美、日、澳嘅和牛,部位選擇多,仲可以畀客人自己燒製牛肉,全面滿足各位牛魔牛!拼盤當然推介啦,一次過試到幾款部位,另外A4牛魔野原燒都係大推,薄薄der和牛燒完沾埋蛋漿食,好香口。

第9位  牛惣居酎屋(*新上榜) 

 圖:Pcsy黑糖天王

新開冇耐嘅日式居酒屋,睇個名都知主打和牛串燒同埋燒酎。有成26款牛內臟串燒,當中有唔少仲係坊間少見,好似牛心管、牛沙瓜、牛腸咁樣,牛心管即係牛嘅大動脈,口感爽脆;牛沙瓜就係第4個胃袋,外脆內韌;至於牛腸,油脂豐滿好鬼香。

第8位  放下素(*新上榜) 

 圖:nkyfoodieletgo.veg

素食朋友就最開心,終於有素食自助餐啦,仲有成80幾款素菜選擇,有中式有西式,要特別介紹下呢度嘅素食漢堡,係自由配搭㗎,紅腰豆、鷹嘴豆會係基底,on top嘅配料同醬料大家可以隨便揀,例如有香菇、羅勒、紅蘿蔔、菠蘿等。

第7位  Mamaday (*新上榜)

 圖:foodiesspigeatingchingching

呢間餐廳由台灣開過嚟香港,但原來老闆係兩位香港人嚟。揭下menu就會見到好多都充滿特色嘅食物,最吸引嘅就係天然紫薯蛋糕,啖啖紫薯香,下層以cream cheese製嘅芝士蛋糕,口感軟滑。

第6位  為食龍(*新上榜)

 圖:LukeYeunglittleyaya

以恐龍做主題嘅日式外賣店,係就係主打壽司,不過淨係腐皮壽司都有排佢哋玩,有8款口味咁多,好似牛油果三文魚腐皮壽司、蕃茄玉米鵪鶉蛋腐皮壽司咁,啲配搭又幾新鮮。另外餐廳都有飯糰同便當賣,怪不得一新開已經咁受銅鑼灣嘅朋友仔歡迎。

第5位  船皇

 圖:貓豬豬tiksan0610014

穩守第5位嘅船皇,最平$12碗船麵真係唔講得笑,咁抵食抵佢哋繼續留榜嘅。湯底藥材味濃郁,鮮甜微辣。湯麵以外仲有撈麵,加入泰國製嘅辣醬,較湯麵嘅味道鹹身同更濃烈,重口味啱晒。

第4位  三一餃子(*新上榜)

 圖:天天食好野Yiuuu__

開喺喺中環區嘅一間餃子店,因為創意同價錢相宜,令佢哋成功上榜。首推大阪餃子燒,真係好似大阪燒咁㗎,面頭舖滿木絲同紫菜,淋上沙律醬,而個底,就係煎到香脆嘅冰花餃子,又幾有新意。另一款食餃都要打卡嘅係炸玫瑰花餃子,堅係成棵花形㗎。

第3位  王牌冰室(*新上榜)

 圖:海豹王vvv.foodies

南豐紗廠個個Weekend都好多人去打卡呃like,連帶呢間冰室嘅人氣都相當旺盛,仲打入三甲。瑞士汁撈公仔麵呀、滑蛋叉燒蝦仁飯等都係比較受歡迎嘅菜式,十枱可能有八枱都叫緊,前者香口後者滑口,但呢期去嘅話,記得試黃金奶蓋東方美人啊!用咗近年大熱嘅食材——鹹蛋加入奶蓋,仲食到粒粒蛋黃添啊。

第2位  登堂

 圖:Ladyteex小慳妹吃好西

開喺觀塘工廈嘅呢間西餐廳,好啱一大班frd一齊去,事關選擇太多,想試多幾款真係要有人開心些牙至得,好似炭烤澳洲M5和牛斧頭扒咁就已經1.7kg,仲有個串燒拼盤就有成11串肉類同海鮮,鮮甜虎蝦、北海道帶子等,都好吸引。

第1位  % Arabica(*新上榜)

 圖:emmi7eating

呢間咖啡店,過往都有唔少分店上過榜,而今次榜首嘅呢間,就係新開喺PMQ嗰間,成間舖都係打卡位呢~ 做返半日文青,悠閒咁坐下嘆杯漸層嘅Iced Caffe Latte休息下,唔飲咖啡嘅,去到可以叫matcha latte或者lemonade呀,前者抹茶味香濃,後者微酸解渴。


文:Kar


關鍵字
十強
報榜
好評餐廳
尖沙咀
銅鑼灣
中環
牛肉
素食
咖啡
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
2019-09-27
尖沙咀新商場開幕 過江龍餐廳一覽
3天前
日本人氣茶室登陸尖沙咀 招牌Tea Set、甜品推介(有片)
2019-09-25
【特約分享】茶記實測 西多、菠蘿油控必睇
2019-09-19
幾時都要打邊爐!火鍋控必試特色店!
2019-09-24