4月份好評餐廳十強
2020-05-07

至今香港已經18日本地零確診,餐廳防疫措施亦開始放寬,只要注意好個人衛生就可以繼續瓹窿瓹罅食好西!呢個月10強有嚟自觀塘、荔枝角工廈嘅高質餐廳,亦有登上國際榜單嘅小店,榜首就係香港人嘅最愛:日本菜!
 

第10位  小茶角(*新上榜)


圖:TungTungFoodie219852linglingling

位於屯門碼頭附近商場嘅地舖,有落地大玻璃面海,環境真係加晒分。當然食物都吸引,招牌牛角包系列都有好多餡,十足十牛角包版本嘅漢堡咁。個名最特別嘅屯門牛有煙肉、蛋、磨菇、芝士,同蕃茄,味道同口感都好豐富。
 

第9位  Wagyu Ya


圖:PeonyPat

上月第1嚟到4月依然停留喺10強榜上,證明香港人真係好鍾意食日式燒肉呢。鹿兒島直送和牛燒完肉味濃郁就一定㗎啦,除咗燒肉,佢哋嘅丼都好出色,Wagyu Don每日限定,用上熊本和王和牛、油香十足嘅鵝肝、新鮮海膽,同三文魚籽,一試難忘。
 

第8位  Bellevue Bar and Grill    


圖:lankiman6330

旺角呢間扒房位於23樓,落地大玻璃飽覽市中心夜景,加上裝修頗有情調,情侶撐枱腳或者慶祝紀念日就啱晒。餐廳特設熟成肉櫃,將嚟自美國、澳洲等地嘅優質牛扒乾式熟成,蒸發多餘水分,令牛味更加濃郁!
 

第7位  丼瀛(*新上榜)   


圖:cheungkkk

呢間主打日式丼飯嘅居酒屋呢期有午市半價同晚市七折優惠,咁平靚正難怪喺美食雲集嘅觀塘工廈當中都可以突圍而出啦!有折扣之餘,食物質素都Keep到,刺身丼飯嘅主角刺身新鮮,唔會有腥味。唔食刺身嘅話必食鰻魚飯,好似放大版嘅鰻魚壽司咁,肉厚惹味。
 

第6位  Homeland  


圖:sinsinyym

位於大埔嘅酒吧餐廳,外牆彩色Graffiti好搶眼,而且有兩層樓高,感覺特別Chill。餐廳唔添加味精,主打每日新鮮製作嘅手打意粉,食落特別彈牙。酒鬼就記得試佢哋特別挑選嘅香港製造手工啤,有齊Light、Medium、Full唔同選擇。
 

第5位  Honbo(*新上榜)


圖:hk.good.food

小店早前登上Bloomberg「全球最佳漢堡2020」同Big 7 Travel「亞洲50間最佳漢堡店」兩個榜單,令大家都忍唔住要去試下有幾特別。主打美式經典芝士漢堡,用自家研發嘅薯仔牛奶麵包,配美國直接進口、肉味濃郁嘅Double Gold牛肉漢堡扒,加埋半融芝士真係好吸引!
 

第4位  Cobber Coffee and Tonys Pastry(*新上榜)


圖:chingchingjaiijaslene777

觀塘新開嘅西式甜品Cafe,有齊小食、沙律、多士、意粉等選擇,不過最多人點嘅係佢哋即叫即做嘅日式梳乎厘班戟,有榛子朱古力香蕉、綠茶紅豆、芒果百香果等唔同口味,班戟充滿空氣感又有蛋香。而且可以用手機掃QR Code落單,方便直接。
 

第3位  FAB Kitchen(*新上榜)


圖:mylittlegourmand

餐廳名FAB解Fabulous Appetite Bon,藏身於荔枝角工廈當中,裝修優雅有格調,而且菜式擺盤一絲不苟,但價錢就比起旺區同質素嘅西餐廳平!菜式設計都有心思,法式烤羊卷配味道刺激強勁嘅哈里薩辣醬,香煎比目魚就配清爽嘅菠蘿清酒泡沫。
 

第2位  am.pm(*新上榜)


圖:bellywongs

位於油麻地同旺角中間,呢間主打梳乎厘班戟,店面成部黃色巴士咁嘅甜品店首次打入10強!雖然只有立食位,但因為抵食又多口味選擇,依然有唔少好評。最多人推介炎燒焦糖布丁疏乎厘,面頭好似Crème brûlée咁有層脆焦糖,同疏乎厘嘅蛋香好夾!
 

第1位  玄鮨(*新上榜)


圖:eataroundwithme

無得飛的確會特別掛住其他國家嘅菜式,特別係日本菜。所以銅鑼灣呢間曾獲米芝蓮推介,加上有折扣優惠嘅Omakase日本餐廳就成功登上本月第1位!食材每日由日本新鮮空運到港,如果想獎勵自己同時錫住荷包,Lunch Set品項少啲,但刺身同壽司一樣都係咁鮮甜咁高質呀。
 


文:Cathy


關鍵字
十強名單
好評十強
報榜
日本菜
漢堡
觀塘
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2020-06-26
食豪啲啲 城中5間海鮮+肉扒父親節自助餐
2020-06-10
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11
送A4和牛拼盤!最平$298任食兩小時 銅鑼灣新開鬼怪主題日式燒肉放題店
2020-06-22