11月份好評餐廳十強
2018-12-06

又係時候同大家報榜喇。11月嘅十強餐廳入面,有兩三間都係火鍋店,睇嚟天氣開始轉涼,令到一眾邊爐友密密出動喇。而今次仲有成7間餐廳都係第一次新上榜㗎,甜品店、西餐廳、茶飲店等都有代表,百花齊放啊。

第十位  菓甜品(*新上榜)

甜品幾時都會食得落,呢間甜品一嚟開喺尖咀呢個旺區,地理方面絕對佔優,二嚟佢哋嘅甜品造型相當精緻,最啱就係打卡呃like。要入十強絕對唔難。就好似呢道「芝士栗一燒」咁,差唔多枱枱都嗌,像真度激高,香甜嘅粟米粒粒包住嘅係芝士蛋糕,味道同樣香濃。

 圖:Wincyholic山區麵包王

第九位  幸福班戟

一開業已經即刻登上上個月榜首位置嘅日本pancake店,今個月稍稍回落至第9位,但人氣依然高企。排長龍都要等食嘅pancake,鬆軟、帶啲啲空氣感,蛋香唔使講啦,蜂蜜牛油、焦糖醬都令佢嘅味道更加香甜,想試下特別口味嘅可以諗諗熱朱古力同奶茶味。

 圖:lamphoebe15nnnjoo

第八位  發哥粥底海鮮火鍋(*新上榜)

呢間粥底火鍋新開冇耐,位於九龍灣工廈內,但日頭係冰室嚟,夜晚先做粥底火鍋。有唔少海鮮選擇,好似鮑魚、蟶子、龍蝦咁,幾新鮮,令到最後煲粥有好香濃嘅海鮮味,格外鮮甜。

 圖:5teps20eatingchingching

第七位 烤魚工房(*新上榜)

近年好多人都鍾意返深圳食酸菜魚或者烤魚,其實唔使上去,元朗呢間一樣好受歡迎,成日都要排隊。蒜香酸菜烤魚非常惹味,條魚幾新鮮嫩滑。鍾意食蒜嘅重味朋友,仲可以叫埋蒜蓉燒生蠔,夠晒香口。

 圖:chowroy為食女司機

第六位   泰濃麵

上個月第7位嘅泰濃麵,今個月前進一位。由泰國廚師主理,湯底相當濃郁,而船麵嘅配料亦有返咁上下份量,即使以牛肉為主,都有美國肥牛、頂級安格斯牛同飛驒和牛揀。唔食牛食海鮮一樣咁開心,例如有原隻波士頓龍蝦海鮮船湯。

 圖:食最重要甘甘子

第五位  一茶詞(*新上榜)

喺一堆珍珠奶茶圍攻中,呢間茶飲店能夠突圍而出打入十強,當然有佢過人之處。大家都係珍奶,但佢哋嘅珍奶就再加多咗少少功夫,少少變奏,變成火焰焦糖珍珠鮮奶。面層焦糖用火槍燒過,脆脆地,另外有杯烤棉花波波茶都好過癮。

 圖: Victoria Ylamlamyuk

第四位  金鶴拉麵

由三甲微跌至第四位嘅拉麵店,主打雞白湯拉麵,湯底由日本製造直送,上枱前打入泡沫,幼滑清香。無論賣相定味道都有一定水準,難怪持續得到拉麵迷嘅歡心。

 圖:花生mamanutty_eater

第三位  寶哥火鍋味館(*新上榜)

打邊爐嘅季節,造就咗呢間佐敦嘅火鍋店新上榜就進佔三強嘅位置。喺度打邊爐,有ABC餐揀,都係不外乎刺身、和牛同海鮮,湯底仲有成12款選擇,三個鐘任飲任食,食物質素又唔錯,係值得試嘅。

 圖:Molly_Momo

第二位   LIFETASTIC Patisserie(*新上榜)

甜品控嘅新寵兒,首推當然就係佢哋主打嘅澳洲西瓜蛋糕啦,杏仁碎餅、玫瑰忌廉、西瓜夾埋有五層,頂頭仲有士多啤梨同開心果碎,個樣靚仔之餘味道又香甜。另外法式焦糖燉蛋泡沫咖啡都好特別啊。

 圖:cloudybluevioletloveeating

第一位  豬手工房(*新上榜)

榜首係屬於大圍嘅一間工廈食店,但環境幾chill下,仲要有露天座位。招牌菜係外脆內軟嘅脆爆鹹豬手,真係卜卜脆㗎,鹹香肉滑,送埋杯菠蘿0%啤都幾爽。燒扇貝、燕麥紫薯餅同樣要試。

 圖:ChickenBalemckey


文:Kar



關鍵字
十強
排行榜
甜品
拉麵
火鍋
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
$68鰻魚飯 日本人氣連鎖鰻魚專門店登陸尖沙咀 香港Menu率先試
2018-12-10
【又到聖誕】任食各款海鮮、環球美食!聖誕自助晚餐精選
2018-11-26
【特約分享】尖咀商場搵食地圖 多國美食任你揀
2018-11-30
2019及歷屆米芝蓮香港澳門指南完全版
2018-12-11
佔地三層!九龍城新開日式料理 一次食勻壽司+鐵板燒+ 爐端燒(有片)
2018-11-19