1月份好評餐廳十強
2020-02-05

2020年1月,冬,亦係飲食業嘅寒冬。喺種種因素下,多間餐廳生意受影響。不過只要堅持,憑住良心提供高質素嘅食物同服務,相信大家都可攜手,同步過冬!呢10間餐廳能夠喺艱難日子仍然得到大眾支持,總有佢哋嘅秘訣。

第10位  Deer Kitchen 

圖:little_tummymmyfoodland

位於觀塘工廈嘅呢間西餐廳,上個月都有上榜。推介佢哋嘅安格斯牛肉漢堡,份量十足,漢堡肉又juicy。而呢排如果想食得健康啲,水果藜麥沙律就啱晒,仲好清新添。

餐飲券:$10一隻新鮮生蠔

第9位 ChaTraMue(*新上榜)

圖:chingchingjaiikarcc

進駐香港接近一年嘅呢間泰國茶葉品牌,初開業時紅極一時,今個月終於打入十強榜。茶飲店內嘅茶飲,都選用泰國材料,來回撞茶九次製作,茶味香濃。特別推介泰國玫瑰花奶茶,粉紅色㗎充滿少女心,而且仲有放鬆同Detox嘅功效。

第8位  咖喱葉(*新上榜)  

 圖:ckbear0little_tummy

佐敦呢間傳統印度餐廳,主打北印度菜,好羊嘅朋友不妨試下佢哋嘅羊肉咖喱角,脆卜卜,入面包住好多羊肉,香而不羶。印度烤雞亦係招牌菜之一,滿滿香料味。

餐飲券:凡惠顧即送免費口罩

第7位  牛県(*新上榜)

圖:天天食好野manmuiii

石燒牛嘅熱潮仍然未退,荃灣呢間舖主要有6款牛選擇,包括最平嘅$88平鐵牛扒、上腰西冷、牛側腹扒等等。要特別介紹下嘅係佢哋有兩款自家製醬汁,分別係以意大利黑醋、牛肉汁同紅酒煮成嘅紅酒牛肉汁,同埋以多種西式香料混製嘅阿根廷青醬,兩款都各有風味。

第6位  蟲二(*新上榜)

 圖:nee.eat.playkk_genki

旺角新開一排嘅餐廳,裝修走懷舊風,食物則相當新潮。最受歡迎嘅莫過於伯爵茶傳統班戟,配燒海鹽芝士忌廉醬,中間仲有麻糬添,多重口感好有驚喜。另外「一汁三菜」更係王牌,就咁食又得,加入柴魚湯變茶漬飯又得,最後加埋慢煮太白蛋,撈勻食都得!

第5位  鬼金棒

 圖:alice''CarmenTsui

上月第4位嘅呢間東京人氣辣麻味噌拉麵店,今個月微微回落1位。嚟得尖咀店,梗係要試港島店冇嘅辣麻肉碎拌麵,啲辣辣醬料集中晒喺啲麵度,啖啖刺激。叫湯麵嘅話,建議叫少麻多辣咁先可以食啲辣味食得真啲呀!死神級辣味拉麵真係唔係人人食得到。

第4位  CURATOR BY LEX ART CAFÉ(*新上榜)

圖:chungkkkcheungmandy001

呢間充滿住藝術氣息嘅餐廳,由裝修到食物都係打卡之選,餐廳內仲有多幅世界名畫同藝術收藏品。飲杯咖啡都靚過人,採用藝術打印咖啡機製作,任何圖案都可以print到落面呢~ 想要名畫如梵高星夜又得,要隻卡通如pepe都得。

第3位  天 · 悠蔬食(*新上榜) 

圖:gomeihoFoodie Baby

事實證明素食有巿場呀,荃灣呢間新開嘅素食館,迅速已打入三甲。好多人平時都鍾意食鰻魚丼,素食版一樣掂,以淮山蓉做嘅素鰻魚埋加埋日本珍珠米,像真度高得嚟又有營養,淋上照燒汁亦好惹味。晏晝去飲茶嘅話可以叫返個點心拼盤,齋春卷齋叉燒包等都有。

第2位  Zeng  

 圖:twtracy1017tracytaitai

上月第3位嘅呢間高空酒吧餐廳,今個月就上升多格。望到270度維港海景當然加分唔少,除咗多款特色cocktails外,嘢食方面都花咗唔少心思。好似普通茶記嘅乾炒牛河,嚟到就變咗高級版,牛肉用澳洲牛,厚身帶肉香,仲要加埋松露落去炒,好香口。

餐飲券:$250現金劵

第1位  Espresso Alchemy (*新上榜)

圖:imbloggerjoyamichelintummy

或者好多香港人都需要放鬆一下,呢間位於鬧巿嘅café,正好畀人一種chill chill嘅感覺。嚟到梗要嘆返杯,Earl Grey Chocolate嘅配搭幾有新意,甜中帶茶香。仲有all breakfast同樣推介,除咗一般都會有嘅炒蛋呀腸仔呀之類,呢度有牛!油!果!吸引呢~ 


文:Kar


關鍵字
十強
報榜
十強名單
荃灣
銅鑼灣
尖沙咀
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
5天前
美國人氣肉桂卷抵港!煙韌原味/朱古力/焦糖胡桃卷(有片)
2020-02-06
全城抗炎 與醫護同行!提供醫護餐飲免費優惠餐廳一覽
2020-01-31
全城抗炎!60間餐廳推$0-$25酒精搓手液換購計劃
7天前