唔知道由幾時開始，去飲茶嘅時候唔見哂啲點心車，對住部電話仲多過對住屋企人，食親啲點心都係嗰兩三款例牌......其實除咗最出名嘅陸羽茶室、蓮香樓同蓮香居之外，香港仲有啲有「姐姐」推住點心車，有唔同懷舊點心，而且各有特色嘅茶樓。唔好等無嘅時候先嚟珍惜，新嘅一年，你會唔會先嚟尋找一下以前細細個上茶樓嘅快樂？
 

晨早食西洋菜豆腐花　　端記茶樓

圖：smile_cat，花生mama

如果入過荃灣川龍行山嘅朋友仔，應該都會聽過佢地嘅大名。嚟食嘢記得要早起，朝早七八點就已經有唔少老友記帶住雀籠嚟飲早茶。茶樓係自助形式，點心蒸好就擺出嚟，想食就請閣下揭開蒸籠慢慢搵，連飲茶都要自己沖。佢地嘅點心全部水準都唔錯，但最出名嘅係嚟自茶樓對面菜田嘅鮮摘西洋菜，同滑溜嘅山水豆腐花。
 

嗌埋鵪鶉蛋燒賣芝麻卷　　彩龍茶樓

圖：kbltsui，甘甘子

如果已經試過端記，咁下一次就可以去試下同樣喺川龍村嘅彩龍。同樣係自助形式，而且招牌山水豆腐花同西洋菜同樣值得一食。而其餘最多食客推薦嘅點心，分別係皮薄餡靚嘅鵪鶉蛋燒賣、有大大粒爽甜蝦肉嘅蝦餃，同其他酒樓未必搵到嘅芝麻卷！黑色一卷卷嘅芝麻卷又叫菲林卷，不過而家唔少小朋友可能成世人都未見過菲林......
 

街坊懷舊點心車　　中央飯店

圖：kimada，甘甘子

如果你唔係「山系」人或者唔想入荃灣嘅話，咁就可以嚟到深水埗搵呢間中菜館，雖然地點唔太就腳，而且身處嘅商場較為隱蔽，但茶市真係會有細細過見開嘅點心車同煎腸粉車㗎！無知客帶位，人多又唔想等嘅時候可能要搭枱。點心方面老實講唔算非常出色，最出名嘅其實係甜品焗西米布甸，軟滑得嚟帶蓮蓉甜味。
 

大包整多兩籠　　新龍城茶樓

圖：mohkc，Sunny1948

雖然個名叫新龍城，但可以放心嘅係同以前彩虹原址龍城茶樓嘅水準有得Fight。點心蒸好就放喺門口兩邊嘅點心區，想食邊籠自己揀。最有特色嘅就係佢地嘅懷舊大包同傳統芋角，前者名副其實夠大個，而且絕對唔係大而無當，而係足料好味。後者嘅蜂巢脆皮就算無加臭粉，依然炸得鬆化香脆。
 

禾稈冚珍珠之選　　勝興茶室

圖：bageladdiction

或者因為忙碌嘅香港人唔會成日入離島，坪洲呢間一樣有點心車嘅茶室就未必係大家第一時間諗起嘅傳統茶樓。但喺茶餐廳格局同綠白瓷磚嘅舊式裝修之下，係一籠籠熱辣辣又有傳統風味嘅點心。五香荔芋燒腩卷嘅腩肉帶住南乳香同脂油香，邪惡得嚟唔過膩。酥皮蛋黃蓮蓉包大大個又做到一層層嘅酥皮效果。
 

復刻七十年代茶居　　老馮茶居

圖：為食女司機，nutty_eater

老實講，舊式茶樓嘅衛生同環境真係爭少少。如果想去感受一下舊香港又唔想去舊式茶樓，可以考慮下去走懷舊路線嘅新餐廳。點心方面就有元朗呢間茶居做代表，裝修主題係六七十年代香港嘅公屋。古法千層糕跟足傳統做法加入肥豬肉整嘅冰肉，砵仔蝦醬蒸腩仔飯亦係必點，豬油香十足食落有鹹香。
 

回憶中嘅懷舊點心　　爐峰

圖：Yan~*

無獨有偶，山頂呢度都有間懷舊特色茶樓，裝修用五六十年代香港街景做主題。三星燒賣一籠有齊豬肚、鵪鶉蛋同冬菇三款豬肉燒賣，有舊式情懷又啱哂畀有選擇恐懼症嘅為食友一次過試哂三款。雞札平時就食唔少，但跟返傳統用淮山片包嘅就越嚟越少，難得呢度仲搵到。值得一讃嘅係筍尖蝦餃同欖仁馬拉糕等食開嘅點心都有水準。

文：Cathy

開飯編輯推介：

1. 【專訪】有故事的Man 手紋母親心電圖 以上門私房菜延續愛

2. 11月份好評餐廳十強

3. 2017年港澳版米芝蓮指南

熱門文章推介：

1. 【一個人開飯】一個人喺尖沙咀食乜好？

2. 大埔墟街市一日五餐之選

3. 顏值爆燈 「色」飲「色」食在荃灣

隨時接收最新資訊
讚好OpenRice專頁！