容記小菜王

营业中

休息中

昨晚與家人到容記食晚飯,實在覺得太差,所以不得不寫這段食評。這是第ㄧ次到新店堂食,以前在深水埗舊舖經常晚飯或外賣,自己最喜歡的是馳名燒腩仔,所以今次専登同媽媽去試試。但昨晚的燒腩仔水準非常差,不熱,不脆,還淡而無味,其他菜式亦不見得好很多,非常失望,真的新不如舊,沒有下次了!

食物好與否，大家心照是不差～ OpenRice 關門時間寫了是 03:00，我打電話去也告訴我收 02:00，我們二人帶了一支紅酒，20:30 到、21:00 到菜（細燒肉、小炒王）開始吃飯飲酒、21:45 再點個炸蝦餅，22:30 開始趕我哋走、23:15 收餐具還大力敲碗、發出巨響（我們的酒，還有兩杯），強調場內還有其他四張枱（有三枱係宵夜客），我不認為，我們有阻礙他們收工之嫌，不明白他們這樣的態度為何事？！我去哩度吃飯，好大原因是不收開瓶、坐得舒服、收得夜、食物也 Ok，如果唔係，根本食物又不是非吃不可的好味（新舖，始終比舊舖遜色），這樣未夠十點半（星期六），已想趕客，太子、深水埗，也大把選擇，算罷啦你～（還違反消防外加走廊枱）

今晚親戚嚟自澳洲住喺太子附近啲酒店。 坐咁耐飛機梗係冇咩好食啦。 就帶佢哋去搵嘢食， 行過見到呢間容記就入咗去試下啦。 我都係第一次去 。宵夜小炒唔錯。幾好味。我地8個人叫咗一鍋菜幹豬肺湯，椒絲味菜鵝腸，半隻燒鵝，魚香 茄子煲 ， 椒鹽九肚魚， 南乳羅漢齋煲， 豉椒炒蜆仲有碟菜 。 碟碟餸都炒得好有鑊氣 。 出餐都幾快 。$1000有找，價錢合理。 因為我哋九 點後入席一律八折。 坐得舒服環境乾淨。 啲侍應係咁sell你食海鮮。會在去食。

昨晚一行11人已訂枱，可惜去到還是要比原先訂枱時間等了一個多小時🤦🏻‍♀️我都唔知訂枱黎做乜?服務差搭𨋢上到去😡未坐低已經問你嗌咩餸又推介你食＄980唔知乜斑套餐2味係咁叫你食海鮮老實講要食海鮮都唔嚟佢呢度啦一開口就話出名嘅燒肉話賣晒我明明訂枱時留咗個大燒肉，佢睇完我張卡之後就話有，之後我哋開始點餸，嗌咗個鐵板茄子漏單我哋都費事再追每碟都叫我地加大，我哋話想叫多啲款式所以唔想加大我哋落咗個天下第一嘴佢話正常Size我哋11個人有2個係小朋友佢話我哋每人分得兩粒會唔夠食好啦我哋聽夥計佢講加大到碟野上到枱都嚇死我地，大碟成咁覺得有啲呃人成份講真味道真係好一般同其他酒樓一樣完全唔同舊店極之失望一定唔會再去服務極差

每次去太子都會見到容記個大招牌 每次經過都好多客人排隊等位 但一直都無上去試下今次一於帶d朋友去試下究竟有幾好味今日我地大概7點左右到 門口唔係太多人排隊等位 而且我地大去boom左位 所以好快就坐低上到餐廳 人山人海 全部都坐滿人 好熱鬧！我地一共四個人 叫左4送一湯！第一個上既當然係湯 今日係沙參玉竹湯 好夠火候 而且材料十足 湯渣都可以當一個送！沒人有大概3-4碗湯 好好味容記最出名既燒肉 黎到一定要食 皮十分香脆 肥瘦分佈均勻食落唔會肥膩小炒皇材料豐富 有韭菜 蝦仁 魷魚 腰果等 炒得干身且有鑊氣另外仲有個招牌沙拉骨之後還有個蝦餅 彈牙香口值得再食！

記得好耐之前同朋友傾計，講起鐘意食邊一個國家的菜式，我毫不猶豫地選擇了中國菜。朋友們紛紛表示認同，更認為多種菜式之中，中國菜可數是最難學成的，也就是最難煮得好吃。淨是烹調技法已經有煎、炒、煮、炸、蒸、燉、燜、燒、燴等十多種，烹調過程中講究火侯，更別說刀法和調味。容記小菜王曾在深水埗札根，還記得它結業之前我更特意走到去朝聖，果真是一試難忘。如今太子有新店，當然又要好好品嚐，重溫滋味。燒味是廣東人的至愛，一般吃中茶自然唔少得，由其是燒鵝，要做得好味，燒的過程是非常講究。工夫未到家的，就會燒得不均勻，過於乾身，破壞肉質。脆皮燒鵝皇 ($98)容記小菜王的脆皮燒鵝皇的確不俗，表皮光滑油亮，色澤一致，燒過後的鵝皮能完整，沒有下塌，輕輕咬下去，皮脆而骨香，鵝皮、鵝肉、鵝骨都緊緊相連，入口即離，證明受熱均勻，沒有過乾的情況，鵝香味突出，鵝肉挺有彈性，肥而不膩，口感緊緻而嫩滑。容哥第一嘴 ($68)容哥第一嘴原來就是椒鹽墨魚咀，墨魚咀不大也不少，一口吃下去剛剛好，薄薄的脆漿緊緊包住墨魚咀，金黃、甘香又酥脆，炸得很乾身，沒有過多的油，鹹香的椒鹽輕輕地撒在黃金戰衣上，調味恰到好處，內裹的墨魚咀爽脆彈牙，入

今日遲到, 攪到女王要等左我半小時。實在罪該萬死, 好彩有容記小菜王幫我補補飛!容記小菜王係深水埗的老店係人都識, 大K也是容記的常客。 只是深水埗的老店, 比較舊, 裝修也是比較簡單, 單純係用食物質素取勝, 容記小菜王絕對是小菜界的實力派王者。太子新開左間容記小菜王, 可能未有好多人食過。地方方便左, 大K又多個落腳點。新小菜王保持食物質素, 也升級全新裝修, 已經成為一個新太子小菜地標。得罪女王當然要付上美麗的食物來請罪。首先係足料燉湯, 嘩, 好多湯料。厚厚濃郁的雞湯。飲3~5碗多多都唔夠飲, 飲一啖暖烘烘的燉雞湯, 成身有一種輕飄飄的滿足感。清澈金黃的顏色, 視覺爆燈。只可以說一句: Yes, I do!再來是招牌作品,  揚名國際燒肉。美中不足是大K 遲到,  燒肉已經放到凍左。大家要襯熱食呀! 不過, 雖然大K食的時候已經凍左, 但依然不失霸氣。脆卜卜的。仲有引起大K 注意的是第一嘴, 咩來呀? 原來是墨魚嘴。香炸而成, 又係脆卜卜的! 嘩, 大K 的反應係: 一定好好的慢慢品嚐, 不要浪費咁多小生命為我們的一道菜曾經活過。

容記小菜王在太子開張都一段時間了，每次由太子回家都必定會經過。容記小菜王位處馬路十字路口，加上搶眼的霓虹燈招牌及廣告板，位置非常奪目。 燒肉 $78已切開粒粒麻雀般形狀，感覺整齊美觀。入口時依然是暖的，皮十分香脆，肉質軟腍有肉香。脂肪比例平均，不是集中的大肥膏，而是分怖均勻，吃上來不覺肥膩。芥末醬亦出色，辛辣味道溫和，不會太嗆喉及蓋過肉香。容哥第一嘴 $68椒鹽炸魷魚咀，上枱依然熱辣辣，外層炸得鬆脆不厚粉，魷魚咀彈牙軟腍不韌，舖上金黃炸蒜碎，更香口惹味。容記鐵板原條茄子 $86本身不愛吃茄子，朋友一看到餐牌就說要嚐，就吃一點點吧！鐵板上枱熱辣辣，打開包著茄子的錫紙，香味立刻撲鼻而來。茄子軟腍入味，饟入茄子中的蝦滑鮮甜軟彈，不愛吃茄子的我竟也吃不停口，驚喜！黑毛豬陳醋骨 $138酸酸甜甜好入味，醋香中帶有肉香，味道濃郁而不油膩，黑毛豬肉香嫩滑，水準之作！

之前幫襯過ssp嘅新容記，唉……以後唔會再去，今次決定去返有容哥坐陣，住於太子道嘅容記試下!上次星期五即興嚟，晚上7點去到已經超多人等位，等咗一陣放棄咗。今次揀咗星期一晚上8點左右到，明顯比上次少好多人，一問即有位!一入去就有容哥個嘜頭，唔知點解佢令我諗起”大家食”果個平頭裝老細!呢間容記分上下兩層，下面係reception比人等位同埋一間VIP房。新呢間容記同舊舖相比，面積大咗，門面亮麗咗，樓底高咗，舖面光猛咗，裝修時尚咗!向街果邊全部用上大玻璃方便採光。呢度整體係茶樓嘅格局，但佢d枱唔會放到密密麻麻，坐得都幾舒服。仲有個大魚缸放晒d生猛海鮮，蝦同蟹就實有啦!另外仲有大大隻鮑魚，又有斑馬瀨尿蝦，仲有好多大大條嘅斑。龍蝦都分澳洲同本地龍蝦，但係餐牌見佢寫加拿大龍頭，可能真係有3種。今晚主要係想嚟飲燉湯同食小炒，點知……一睇menu 已經比佢d海鮮吸引住! 蟹妹當然係比蟹吸引住，魚王推介有埋炒蜆，超吸引!另一樣吸引嘅係巨型瀨尿蝦，78蚊隻如果真係肥大肉厚巨咪果種瀨尿蝦，算好抵食!除咗海鮮，其實呢度仲有柚皮同焗魚腸呢d懷舊菜式。前菜-喬頭而家d茶樓多數俾花生已經好少俾喬頭，仲要有一粒超大粒

在九龍區，說是以小菜聞名的食肆，容記小菜王，不得不提，這間老店以味道及價錢大眾化而著名。聽聞重開，當然就要去一睹名菜，要去朝聖。我和朋友不需多等待就有坐位，而且還是近馬路的窗台卡位，可以邊吃，邊看著一帶的夜色。除了卡位，店內也有大枱，合一眾好友的聚會。我們要了水仙茶，這個茶味很特別，入口清香，茶味清清，與一般不同。來朝聖，當然要選擇最著名的菜式，選擇困難的我們，不足如何是好。店員看到我們不知所措，與我們談了一會，介紹了幾道容記著名的小菜，可以品嚐著名菜式，自然就照著店員的介紹點菜。原來除了食物味道著名，上菜速度也很快，大約等了十五分鐘，點了的菜也先後送上。極品燒鵝皇，當然是最先上枱，單是放在枱上，燒鵝的香味已經四溢，燒鵝油光滿滿，碟上並沒有什麼油，可見鵝本身並非油脂豐厚。入口皮脆肉香，鮮軟，肉汁豐富，味道並不是一般鹹得要命，卻是配合香味剛好，不會失去肉味。彈牙鮮蝦餅，真如期名彈牙非常，入口並不乾，軟綿綿，蝦肉味香，而且炸得香口，令味道更上一層樓。容哥第一嘴，即是墨魚咀，單外外表已知炸得香脆。置於上的調味粉，非常惹味，令味道更為突出，入口香脆，脆得似薯片的感覺，飲啤酒最為合適。黑毛豬陳醋

熱愛中菜的我除了喜歡煎炒煮炸佳餚，更喜歡那道飲茶文化。三五知己聚首圓桌，加無限添飲的茶水，仍是當今世上最合傾計的聚餐~!星期2,我地兩對couple去左位於太子，馳名的容記小菜王度食晚飯，對了，就是深水埗開左好多年果間同一老細的。但太子呢間是上樓的舒適酒家間格，坐得比較舒服呢~❣先post下menu俾大家睇，呢度有齊你想在大牌檔食的一切鑊氣小炒，亦有酒家級的雞煲翅同游水海鮮(成個大魚缸喺度，有幾條大龍躉游游下). 價錢亦親民，難怪我朋友當呢處係飯堂~❣我地一共叫左5餸一湯，飯都只係象徵式叫左一小碗，因為想食多個餸見差唔多枱枱都有叫湯飲，我都唔例外，食中菜點可以唔飲湯呢~~~呢個五指毛桃燉湯又係超級足料，個味超濃呀，好飲到不得了，睇下幾多湯料~~油又唔算多湯渣都食埋~之後一來就是容記米芝蓮推介，馳名燒肉，呢個必點！我地叫份大嘅都覺得唔夠喉，因為實在太太太超水準了~!!!!! 皮脆肉鮮嫩不特止，味道保留到豬肉的原汁原味，不像坊間燒肉咁咸，連個皮都一d都唔咸，平時燒肉是要塗很厚的鹽喺面度，真的好難估到容哥點可以做到咁出色的燒肉。個燒肉配左兩碟醬，但我地都冇咩點到，因原汁原味太好食了~❣然

「容記小菜王」在深水埗區一向享有不俗口碑，自該店結業後，老闆容哥豹隱一段時間之後，不久前在太子重整旗鼓，東山再起。這一晚，我便與太太前往，到容哥的新店捧場。 雖然餐牌中有不少容哥的拿手好戲，好像「容哥第一嘴」、「容哥鐵板原條茄子」、「天下第一雞」與「招牌沙拉骨」等，當中最吸引的仍是容哥最享負盛名的「脆皮燒腩仔」。化名為「揚名國際燒肉」脆皮燒腩，大的賣 $168，細的就只是 $78，這夜我只得太太與我一起用餐，細的已經足夠。 這細燒腩份量一點不少，足有12 件之多，排得齊齊整整的燒腩仔肥瘦比例均勻，由頂至底層層相間，皮和肉清晰可見，外皮香脆非常，咬下去卜卜有聲，肉汁澎湃，肉味甘甜，如果滿分是十分的話，就算不給十分，九分或九分半絕對走不掉。 「金蒜蒸龍躉件」（$168/例牌）味道甚好，魚肉蒸得火候剛好，入口滑而不嚡，又是另一水準之作。 「容記小炒王」（$88）材料挺多，韮菜花嫩而無渣，腰果脆而不腍，加上蝦仁、蝦乾、魷魚、彩椒等物，份量十足。這菜式味道雖稍稍偏鹹，佐飯仍佳，要是配以啤酒的話，更是如魚得水。兩盅足料靚湯「蟲草花煲雞腳」味道不錯，濃而好喝，才 $38一盅，已是物有所值。

容記小菜呢個名聽就聽得多啦,試真係未試過,今次一於黎試下!佢個招牌好搶眼,離遠一望就望到~新鮮海鮮menu~d野影落都幾令唔同普通酒樓,佢有卡位坐既,比較舒服,雖然今次無得坐,不過我地個位就望到街景~五層脆皮燒肉! 個樣已經好吸引, 塊皮真係好脆 ! 肥瘦均勻,食落唔會好油膩!佢個醤唔係普通芥末醤,食落無咁辣!容記小炒皇! 好有獲氣, 加左魷魚仔、蝦米落去炒,好香口! 不過就油左小小彈牙鮮蝦餅~ 炸得好香、彈牙招牌沙拉骨~ 沙參玉竹湯~夠哂火侯, 飲落仲有一朕胡椒味!好足料! 有落埋魚去煲~唔係得豬骨, 湯味自然更濃! 大概有8-9碗,好抵飲大合照! 小菜既質素真係唔錯阿! 值得一試~ 埋單617蚊

揚名國際燒肉 ($78)其實唔係燒肉咁簡單，應該係燒腩仔先正確，皮脆，肥瘦分明，清清楚楚見到五層，又juicy，傳統嘅黃芥辣就無提供，反而比咗wasabi 你，又幾特別，又創新家鄉秘製扣肉 ($168)大大塊五花腩，入口即溶，仲炆得好入味，仲有甜甜哋嘅梅菜，送飯一流濃湯雞煲翅 ($368 四人份)上菜時，先把翅分在碗內，然後就用gas 爐再將雞湯加熱，再倒入碗內，碗碗都有好多翅，仲有成半隻雞添，雞湯鮮甜，鹹度適中，食完仲可以再添湯小炒皇 ($88)好夠火喉嘅小炒，又乾身，有韭菜花、腰果、銀魚仔、蝦乾，好野味容哥第一嘴 ($68)即係墨魚咀，外層嘅炸粉不太厚，好香脆，墨魚咀，爽口彈牙唔韌，係送酒良伴！

大口仔之前食過容記嘅燒腩仔，話念念不忘喎，所以容記重開就約埋幾個靚女一齊去食，睇吓有幾巴閉先揚名國際燒肉 ($78)完美演繹乜野叫肥瘦分明，脂肪及豬肉真係數得出總共有五層！先切最靚嘅部位出嚟以焗爐焗，焗完第一次之後喺啲燒肉上面鬆吓針，之後再焗多一次。先試吓唔點自家製wasabi，燒肉皮又脆又鬆化，肉質juicy，有豬肉味但無臊味。點wasabi醬係好創新，不過我都係鍾意唔點多啲家鄉秘製扣肉 ($168)好有罪惡感嘅一道菜，不過都係忍唔住要食。五花腩入口溶化，肉質幾軟腍唔癡牙；梅菜吸晒五花腩嘅油脂，入口滑溜超香甜，真係可以用一碗飯撈晒嚟食呀！濃湯雞煲翅 ($368)翅嘅份量慷慨，仲有隻雞食添，雞湯鮮味濃厚，鹹度適中，啲翅唔係散收收，係可以夾起嚟食㗎，正！小炒皇 ($88)有韭菜花、腰果、銀魚仔、蝦乾等，口感好爽脆，炒得好乾身夠晒火喉，撈飯非常合適容哥第一嘴 ($68)第一次食墨魚咀，外層炸得非常香脆，入面爽口彈牙唔韌，同埋最緊要有炸蒜吖嘛！送酒啱晒！坐得幾舒服，大口仔話而家好好多了，換轉係以前阿靚女們一定唔肯嚟喎！每人$240，大聲講大聲笑，食到捧住個肚走