大圍小館

营业中

休息中

第一次黎，朋友介紹，日頭係飲茶，夜晚食小菜。食物質素有驚喜，不過整體價錢比一般小菜高少少。欖角骨個汁幾好味，食落又唔算骨杉杉。蜜汁叉燒好食，夠鬆軟，係厚切，我唔中意食瘦叉，呢個半肥瘦比例啱啱好，好適合送飯，大家都中意食，前後都叫左兩碟。蝦仁炒蛋啲蝦🦐幾大隻，海蜇都幾爽口。蛋白蟹飯唔夠入味，但上菜幾靚。食物OK，不過服務比較慢，fill茶水都要叫三四次。事關員工分工勁清晰，傳菜只會傳菜，落單只會落單，帶位只會帶位，執枱只會執枱。當晚餐飯有出現漏單，搞到咩都要等！等！等！

大圍食肆都唔少，中菜來講達就唔算好多。呢間中菜小館裝修唔錯，坐得幾好，環境亦都唔錯。有時一家人或者一班朋友都會想食中菜，我地叫咗農舍雞，店員話喺香港農場自家養嘅，所以係新鮮雞；而且真係食得出有雞味，呢個真係好食。叉燒係我推介！因為叉燒夠厚肉，咬落去夠林，而且醬汁好夠好juicy ，有啲邊位燒到濃濃地好香。竹串九肚魚，成條用竹籤簽住，炸得香脆，外脆內軟。兩面黃，佢有腐乳味及黑松露味，我地叫咗黑松露味。黑松露味食落有中式感覺，可能配左呢個麵餅。味道唔錯，麵餅有點厚，食落有口感好飽。腐乳蝦球西蘭花，蝦球夠大隻，而且面上有淡淡腐乳香。啫啫煲生菜，好香，好惹味。不過食到底真係有啲鹹。生炒骨亦都整得幾出色，生炒骨炸得夠脆，而且細細件易入口，味道酸酸甜甜，好食！最後甜品叫左馬豆糕及芋頭西米露，兩樣唔會太甜，幾好。馬豆糕軟硬度適中，入邊夠多豆；芋頭西米露都足料。

第一次試下呢到嘅晚飯，6點鐘無訂位好彩walk in 到佢最後張枱，環境幾乾淨，唔係豪華酒樓裝修，勝在簡單舒服。餐牌最少係6人餐，我地冇咁多人所以散叫。一眼望見係食懷舊菜，價格唔平，一般都要過百元一個小菜，原本有些擔心物非所值，不過食第一口就覺真材實料。茶先上，水滾茶靚，茶味夠，茶香亦夠。上菜好快，先來椒鹽豆腐，外脆內滑，香蒜味道喺口入面散開，前菜夠開胃，好。再上叉燒，蜜汁夠甜，豬油夠香，梅頭夠軟，媲美高級酒家出品。四季豆炒得夠香夠鑊氣，主食食左兩面黃，面夠脆夠乾食。比較可惜係小炒王唔夠鑊氣，否則本餐會令人更回味。埋單八佰多元，除小炒王外，其他值回票價。

第一次食有成個蛋黃既壽包, 好誇張但充滿驚喜, 整體餐廳食材味道性價比ok, 份量足, 建議多人飯局可以試多d款式, 叉燒肥厚, 鵝腸頗彈牙, 炸鮮奶不錯, 蝦球都好大份, 整體好飽。老細都幾高大靚仔

第一次寫食評，第一次嘅差評俾你哋，舖入面所有嘅所謂侍應好似行屍走肉咁，由坐低到走全程唔好講話有笑容，完全係目無表情，一句多謝都無，我哋講唔該都多過佢哋，睇open rice 知道佢哋啲態度唔係咁好但係無諗過咁差！所有嘅樓面連收銀都好似唔想做咁，不過最差嘅係嗰個疑似經理著西裝好瘦嘅四眼阿叔，做到黑口黑面仲要眼啤啤，食完飯俾錢叫佢寫張手寫單，寫完之後掉喺枱面，茶餐廳嘅服務都好過佢哋，食咗差唔多$1200咁嘅服務，仲夠膽收服務費 其實唔想做就唔好做啦！你哋嘅老闆真係唔知點請人，請咗啲咁嘅人嚟趕客，嘢食份量又少又唔係話好食到一個點，真係貼錢買難受囉！今次係第一次亦係最後一次(最衰唔可以講粗口去表達，如果唔係會更加傳神囉)

這間茶樓我也幫襯過好多次，出品穩定，味道不俗，勝過許連鎖茶樓。先講裝潢，門外掛滿大紅燈籠，有一金漆招牌，對聯一對：「大饞涎滴嘗於圍，小酌怡情醉此館」。入內，大廳陳設富中國風，樸實淡雅。邊品茗，亦可細看牆上的水墨畫。食物方面又如何？先講茶，水滾茶靚，即叫即沖。這裡的點心有幾十樣是固定的，時不時會加入新品，下圖的椰汁合桃包及柚皮鴨腳就是新品。今次，我叫了豬潤腸、椰汁合桃包、柚皮鴨腳、蝦餃、燒賣。豬潤腸。腸粉頂撇了幾絲炸瑤柱，皮薄餡靚，豬潤不腥。瑤柱的脆、腸粉的米香、豬潤的甘爽，加上特別調製的醬油，非常可口。（此處的醬油有別於一般茶樓，味道固然優。其保存方法，令我很深刻。我覷到它的醬油壺，有保溫器一直保溫，腸粉做好時才倒入小杯，送到人客面前才淋落腸粉。）燒賣。外皮爽身，豬肉是手剁的，有嚼勁，肥瘦均勻。餡料只有豬肉和蝦，蝦爽脆可口。蝦餃。外觀不錯，皮薄而不會一夾即散。皮內的蝦亦多，整粒送入口，爽滑甘味。椰汁合桃包。這款點心在大陸常食，在香港少見。黑糖外皮，搓成合核狀。餡用椰汁、合核碎等製成。送來時，包皮乾爽，蒸得恰好。咬開，椰香四溢，香香甜甜。合核碎令口感更佳。＿柚皮鴨腳。鴨腳入味，一吮即脫。

去大圍同屋企人黎就入去飲杯茶啦。裝修有中國feel，整潔，但都算幾迫，椅背貼椅背。点心價錢算是中等價，小点$23.8，大$32.8，每位茶$12等，点心紙多數是中和大点，還有其他是特和頂点。侍應全冇笑容，穿便服的更有一種高傲的感覺，又不可以說侍應冇禮貌，感覺好怪。講番点心，叫了7款点心，1个小食，1个飯和1碟叉燒。点心馬拉糕、山竹牛肉、燒賣、鳳爪、潮州粉果，正常啦，都算好味，我比較喜歡奶黃包，不太甜，夠流心，即使放了很久，仍然流心👍至於手拉布腸粉就麻麻啦，不夠滑身。香蒜排骨飯，飯香，排骨霖，但係香蒜味不重。最後有碟厚切叉燒，醬汁夠濃，有口感，但不夠霖，幾好味，但未到超正，因為要$128，所以一定有所要求。環境佈置不錯，可惜比較迫，食物不錯，侍應就高傲，5人平均@$100，間中也可以去。

同朋友好耐冇見, 大家都帶住小朋友既時候就要搵一D 又舒服又唔趕人走既地方. 一來又可以慢慢食慢慢傾,另一方面又可以俾小朋友多D時間食野. 朋友介紹左大圍一間開左一段時間而又話好正既小菜館. 去到環境都好寬敞7:00左右已經坐滿客.店員既服務態度好到你估唔到, 見到我地有大有細就安排左一間房俾我地,有電視又夠冷氣!! 真係好適合同埋小朋友一齊. 前菜都好有HEART 唔係一般既咸花生. 有酸梅苦瓜同埋麻煩木耳! 響呢個又成日落雨同埋咁熱既天氣真係好好既開胃菜!有小朋友我地都必定會叫叉燒. 嘩...呢個蜜汁黑豚肉真係令到我地好喜出望外!!!! 店員果然冇介紹錯... 入口鬆化肉質好林仲要好有肉味. 真係好好味!店員見我地大讚話就我地知師父之前係做中環都X利,佢既叉燒任何人食完都番唔到轉頭! 哈哈... 之後叫左幾個小菜, 呢個腐乳蝦球係我最鐘意既! 真係不得不讚師父既創意. 腐乳汁做到唔咸不過好香, 配埋大大隻既爽口蝦球. 有D 似芝士焗龍蝦不過係轉左腐乳. 真係可以食到幾碗飯. 呢個家鄉煎藕餅我見到都必定會叫. 呢D 係屋企唔會自己煮既食物, 同埋間間的家鄉口味都唔同. 次次食都有一番

媽咪生日，本來訂了一間中菜館，卻因那裡的老師傅退休了，我們失了預算下，決定在家裡附近找吃。這才發現原來從前的新斗記早已改朝換代，換成了屬於大圍人的菜館。安頓好後，這裡的小吃明顯比別家都花了心思，桂花馬蹄實在花香撲鼻我對馬蹄一向又愛又恨批皮批到手都損，但係只係食到少少肉，這次竟然有這個削得乾乾淨淨的入口爽口，桂花汁又香又甜，名符其實的開胃小吃。吃這個真的要看彩數，因為我看到隔離枱是個話梅苦瓜呢! 我家的肥老豆最喜歡吃燒味，所以我們點了一客例牌燒鵝皮脆肉嫩，媲美對面海福的金城當然優勝的是這裡從來不催促我交枱。這裡的啫啫生菜煲用上原個生菜，撕好一片片後再放上這個熱鍋生菜爽口，而且蝦醬香濃嚟到呢度不得不試呢個出面唔係度度有得食嘅三馫籠仔飯用咗白飯魚仔乾、魷魚鬚同蝦乾蒸成整籠飯實在是咸咸香香入口又有口感，相當有漁鄉風味。四個人食生日飯，每人大約二百五十倒，又近屋企，又食到特式菜我個人認為下次我做節一定會嚟

Happy Friday選了這間小酒樓跟同事午餐。推門，一步已是大廳，盡頭見廂房，裝飾簡約，以木條子為裝飾主調，中菜廳是也。正題，點心選擇不多，喜見特別和懷舊款式可選，如川芎蒸魚頭丶鵪鶉蛋燒賣、牛肉酥餅.... 試了甜梅菜叉燒腸粉，梅菜有咬口感，甜度適中，义燒較諗，粉皮略厚，整體可以。另嘗了‘最殘忍’的煲仔飯，新鮮熱辣，有飯焦，即叫即整，讚其他點心實而不花巧，即叫即蒸，熱熱辣辣，味道可以，飲茶之選！惟地方偏細座位較狹窄，大城小問題吧！

平少真係唔會踏足大圍，不過朋友強烈推介呢間餐廳，又比較近佢地住嘅地方，所以我就放工搭地鐵黎呢到同佢地食飯門口掛咗好多嘅紅燈籠，而且仲有人等緊位，係店外係睇唔到入面係咩狀況，我一打開門，見到幾乎座無虛席，唯一剩番嘅枱就係我地訂咗嘅枱，令我嘅期待感即刻大咗!黎呢到必叫呢個蜜餞叉燒皇，份量都幾多下，而且仲要舊舊都厚身大件，紅彤彤又亮麗嘅色澤，望落好吸引，原本見到咁大件，就驚會好韌、難咬，但係驚喜地係表面燒至脆口，而中間係多汁軟身，一啲都唔韌，口感就好比高質嘅黑毛豬咁，而且甜甜嘅蜜汁真係好惹味，我自己都食咗至少4大舊下一道係我好鍾意嘅前菜小食—沙薑豬手，一粒粒切到好似方形嘅豬手粒，每一粒都沾滿沙薑汁，鹹鹹嘅味道配上爽口彈牙嘅豬皮同豬肉，質感同味道都好好，呢個係冷盤黎，啱曬夏天時食之後就有少女貴妃鮮雞，呢到係半隻黎，可以睇到雞本身唔太大隻，因為餐廳只採用未長大嘅幼雞，成年嘅雞，食落肉質會較韌同粗糙，但係幼雞則會食落嫩滑，點埋薑蓉一齊食，雞皮好嫩，有淡淡雞油香，而雞肉亦好嫩滑，一啲都唔韌，可能就係幼雞嘅功效食咗咁多肉，食番個蒜香無骨魚先，呢個都係喜出望外嘅一碟餸黎，魚嘅表面非常脆口，而內裡嘅魚肉係

上次黎已經係舊年，仲記得話一定要再返黎試其他餸😅但依半年太忙，完全冇機會。前幾日朋友入開黎大圍，就梗係乘機返兜啦！由於得4個人，其中一個仲要係細食到暈，所以其實又係只可以叫3-4樣餸。第一樣，我去中式酒樓必叫就係例湯🤣而嗰日就係青紅蘿蔔，簡直係至愛！湯係老火湯，真材實料，唔會好咸。再叫左餐牌推介既厚切叉燒，上枱時已經覺得好有睇頭，食落真係幾好食，我到而家都有d掛住😋仲叫左粟米魚塊及啫啫菜，啫啫菜上枱時香到不得了，老遠都聞到，唔小心仲再叫多左碗白飯share，最後仲唔夠喉叫多個小食排骨仔，又幾惹味喎，送啤酒一流！服務都算唔錯，會主動送甜品！

大圍新店開唔夠一年，口碑唔錯同幾位親戚黎食下就失傅嘅菜式野食未上前菜已有驚喜，話梅甘草苦瓜片同桂花馬蹄勁有心機，好Match，酸得開胃清甜到入心厚切蜜餞叉燒皇根本就係豬扒黎，又厚，夠肥又唔膩，完美融合，餸飯一流豉油皇鮮鵝腸真係鵝腸，新鮮爽口又夠大厚夠闊，豉油香口脆皮炸鮮奶夠完整唔會散開曬，夠熱，如果炸得香d會更岩我地口味啫啫通菜煲落到黎店員會再用餘溫炒香，保持住最佳食用時間，一炒就勁香，蝦膏香而不過咸，菜好鮮嫩蜑家鴛鴦魷 全晚重點，絕對係高質之選，不一般的材料，除左新鮮鮮魷，仲有曬到半乾嘅咸魷，屋企人話係好多年前婆婆煮嘅味道黎，已經好耐無食到蛋白薑米蒜香蟹飯雖然唔係主打大蟹，但亦唔馬虎，好香口，份量好大（忍唔住用左叉燒皇餸飯），蛋白就蒸老左小小舟山海蜇從未食過咁脆口嘅海蜇，懷疑人生，到底我以前食個d係咩野？沙薑豬手好濃沙薑味，係成晚最重味道的一款足料糖水店員話老闆好著重食材同傳統味道，愈失傳愈花功夫愈去保留，多謝老闆呢份堅持，令到我地可以食得番當年嘅味道

一間店舖怎樣設計裝修其實真係幾重要，於大圍就被呢間門外掛滿一個個紅紅燈籠的中菜館所吸引，好有中國風，店內感覺寧靜舒服，枱與枱之間有一定的距離，服務員亦親切有禮，不時向我們介紹菜式，一睇餐前小食就知呢間中菜館與別不同，甘草話梅涼瓜，桂花馬蹄，味道清新，厚切蜜餞叉嬈皇，應該有約1.5cm厚，肉軟，肥瘦適中，口感好好，豉油皇鮮鵝腸，感覺同平時食的鵝腸好唔同，好爽口，必試，脆皮炸鮮奶，好香奶味，又唔會太甜，啫啫唐生菜煲，轉左通菜，未行到埋枱已聞到好香的味道，令食慾大增，蔬菜新鮮嫩口，蜑家鴛鴦魷，乾魷香，鮮魷彈牙，芥蘭脆，蛋白薑米蒜香蟹飯，份量十足，再試埋個沙薑豬手同舟山海蜇，真係好滿足，整體黎講，真係一間好高質素的中菜館。

前幾日，太太不在香港，獨個兒諗緊去邊到食時，突然好想食燒鵝，所以最後決定再食大圍小館！8點去到都幾多人，我自己一丁友坐邊都無所謂啦，以為要搭枱，但原來大圍小館晚市係必定分枱坐，最終可以一個人舒舒服服坐一張枱咁我就嗌咗燒鵝下庒加一碟油鹽水菜芯，我自己覺得燒鵝比之前仲好食（可能我獨自享受啦），皮香肉嫩，好彩揀下庒，我自己怕胸位“鞋颯颯”，都係燒鵝脾正啲！菜芯就唔使講啦，都係菜芯咁，但呢間野就批埋腳位，確實美觀好多（菜芯咁大路，我真係無影相喇），油鹽水菜芯係我太太介紹嘅做法，平時淨係識嗌蒜子上湯最後埋單好似$200幾，一個人黎講，唔平！但可以獨享一張枱、一隻燒鵝脾同一呷熱茶，足矣！