人人和平小飯店 (已結業)

平時好少黎港島區 所以出開黎就食埋隻燒篤髀先番去.book左枱6點 店入面都冇乜客 所以好快就可以上座 2人坐卡位都幾舒服同寬點餐時本身想一次過食晒燒鵝同叉燒 但經waiter提點之後驚食唔晒 所以最後決定點燒鵝同鵝汁炒飯但隻鵝黎果時已經凍左 但皮脆, 鵝香, 肉嫩 拉番唔少分數另外既鵝汁炒飯入面既鵝粒, 栗米同埋鵝汁隻味好夾 食得好開胃最後食完會送個紅豆沙 但感覺似紅豆湯多d 因為真係幾稀.整體黎講唔錯 下次要黎食埋個叉燒

睇完蘋果動新聞推介和平小飯店嗰個羊腩煲，一直想去試吓，難得天氣又轉凍，即刻Call番三個舊同事去敘一敘舊啦。四個人三餸一湯，飽到嘔，真係無選錯地點食飯。講返三餸一湯，首先飲個鮑魚螺頭花膠湯，好鬼充足料，飲完碗湯，d渣仲好有味，可以食番哂。跟住就係荔枝柴嘅燒鵝，燒鵝d皮好鬼脆，肉質好彈性。朋友叫叫咗個豆腐，不過唔記得叫乜嘢名，d豆腐好有蛋味，好鬼滑。最後到主角啦，冰鮮黑草羊腩煲，個師傅真係炆到d羊肉好鬼淋，仲要冇骨，又入味，真係冇得輸。不知不覺大家由晚上七點半傾計傾到10點半，難忘的一餐。

外賣跟餐叫咗個即磨咖啡得半杯，同個侍應講，佢話部機係出咁多架喎，有冇搞錯！𠱓錢！你部機有問題換咗佢啦，講埋啲癈話敷衍我。當人白痴咩，我都有係其他地方飲過即磨咖啡架！very bad experience!

年半前光顧和平飯店，燒味及燉湯都有水準。四個月前再去，巳不太像樣，服務亦差了！湯似加了開水，小炒亦全無鑊氣。昨天剛好在同區，考慮往那家晚飯，友人提議往和平，正好我想給它最後機會，也一同前往，結果，$198 元杏汁豬肺湯如開水無味！燒鵝韌到到連胸肉也不開！每枱惠顧 $560 以上有半隻香妃雞送的推廣，侍應竟扮作不知道！推說香妃雞巳售馨！衹可以比一碟菜我們。當時衹是8.30pm。我要找經理出來質詢才能爭取那半隻香妃雞！不用多說大家心情如何不滿！以後如果有人再次提議去和平飯店的話，我會堅决反對！

食物是ok的。但係，信用唔ok。同家人在北角店晚飯，老父很滿意，所以訂了房（大約20人）替老人家做生日。訂房時已確定當晚有房及最低消費。後來，我們收到店的電話，說房間已被30多人預訂。到抵是先留房給他人而忘記所以給我們再訂？或者我們先訂但揀客？不知道。

日本朋友想試燒鵝，但又不想去深井，所以便選了這家港島區的飯店。甫入店，店員便熱情款待，當中更有略懂日文的店員，真貼心。事先已預訂了下庄跟冬瓜盅，所以只要點菜跟飯就可以。我們點了番茄浸菜心跟石窩炒飯。冬瓜盅一端出來，便吸引了我們的眼球。原隻冬瓜盅份量足夠6人食用，湯料充足，加了蟹肉，瓜肉清爽，湯鮮味十足。而下庄則不比名店遜色，皮脆肉嫩。但就是份量少了點。番茄浸菜心雖然清淡，但番茄味濃，菜心也爽口。壓軸登場的是石窩炒飯。未開蓋已散發着濃烈的香味，開蓋後飯冒煙，香氣四溢。飯炒得粒粒分明，帶點焦香，更有燒鵝肉粒，令飯帶油香。食物質素不俗，店員友善，日本朋友好評。

話說，有親戚嚟到呢度食燒鵝／燒腩／叉燒，對佢讚不絕口！我本身唔食鵝同鴨，但係都鐘意食燒腩／叉燒！所以中午走咗嚟食午餐 3寶飯 set。燒腩同叉燒都略肥，已經大打折扣。燒腩都夠脆，但啲肉唔算好嫩。叉燒就普通啦… 我覺得太興嘅叉燒好味啲，又唔會咁肥！至於滷水大腸，平平無奇。另外我揀咗餐菜：新鮮水種菜係好新鮮，但啲菜仲有好多水，而且冇味。其實只要配返隻簡單 salad dressing 應該已經好正。我寧願要好味嘅 salad dressing， 都唔要咁滿滿嘅菜。不過不失嘅黑豆漿。其實晚餐嘅燒味係咪會靚啲㗎？？可能係我期望太高…

久聞這裡有正宗古井燒鵝，加上新假期的報導（雖然都係賣廣告居多），但係都即管試一次。下午茶時間來到，客人也有不少，一坐下本來食叫個叉燒燒鵝雙併飯，不過下午茶餐的燒鵝瀨連飲品只需36左右，確實忘記了。便叫了個燒鵝瀨餐。很特別的是可以隨餐送凍豆漿。一來到我才醒起叫佢分開上，因為我最憎燒鵝俾d湯浸軟左皮，又會浸淡左。冇計自己唔記得。好睇有鵝脾，當然不是全隻脾，皮不脆也不會，傳說那用荔枝木煙烤的味道完全嚐不到，鵝肉正正常常，味道沒什麼特別，瀨粉也是正常不會太林。那傳說中的古井荔枝木燒鵝跟普通燒味檔的沒什分別，雜誌報導的所謂第一位 真的不明白怎得來。

與cc到北角買金器，晚餐，也在這兒解決了。cc說與丈夫吃厭了茶餐廳，是晚想吃小菜。到Openrice搜尋，決定光顧堡壘街這家以古井燒鵝為主打的「和平小飯店」。據資料顯示，「古井」是廣東省新會一個小鎮，當地出名的美食，就是以荔枝柴燒的燒鵝。基於客觀環境條件所限，香港食肆當然不能用柴火燒鵝，只能用明火燒鵝。半隻新會古井燒鵝，乃把荔枝柴放在港式烤爐內，以熱力迫出荔枝木的香氣來煙燻鵝。燒鵝賣相尤佳，脆皮泛着鵝油光澤，就算放置一會，皮仍不會軟腍，咬落香脆酥化而不韌，且滿口脂香。只是，鵝皮入口不太察覺有荔枝柴的味道。此外，鵝肉入口十分韌，需費勁咀嚼，大感失望。蜜糖柚子橙皮蝦一客有五隻炸蝦，鮮蝦以滾油油炸後，淋上以韓式柚子茶調製的香甜惹味稠密的醬汁，再橵上橙皮絲。蝦隻碩大且鮮美，只是，醬汁實在太甜膩了，教小妹與Mr A吃不消。砂鍋鵝汁炒飯/小，善用燒鵝汁和頭頭尾尾的燒鵝肉，大廚以鵝汁、鵝肉和粟米等配料炒飯，飯粒滲有鵝汁和鵝油香，好吃非常。當然，也是極其肥膩邪惡的。翡翠時蔬炒帶子，西蘭花夠鮮嫩爽口，而帶子，則與鮮甜扯不上任何關係。飯後甜品，乃紅豆糖水，普通之作。

年初四，第二日要返工，所以今晚同Mr C響北角搵野食，都預咗新年期間嘢食會貴啲不過冇所謂啦。嚟到呢間飯店，Mr C成日都話佢啲燒鵝好食，咁我梗係要試吓。點嘢食叫咗個服務員，一個燒鵝下庄（$168），一個砂鍋鵝汁炒飯（細$95），同埋一個鴛鴦蒸肉餅（$88）。嗰位女侍應話 ... "冇晒下庄，得返上庄咋，其實我都鍾意食上庄，冇咁肥，好味啲。太多人叫下庄啦，冇啦"。佢咁講無辦法啦，就唯有叫上庄（$148）。其實本身覺得$168/$148都只係差$20，梗係試下庄好味啲啦，但沒辦法。坐喺度等緊嘅時候竟然聽到另外一位侍應同燒味部講... "再嚟一個下庄!" 我同Mr C 就話，"吓？唔係冇晒下庄咩？"嗰位同我地落單嘅啊姐就過嚟，驚死我哋會cancel張單咁，"你哋嗰碟響度啊" 我哋問佢點解仲有下庄，真係估你唔到，"頭先話冇㗎，禾都冇辦法架"... 跟手就擺低碟燒鵝上庄，行開咗。唉。態度好到。算啦。初四同Mr C食飯，開開心心算啦。咁個燒鵝又幾好食，但都係肥咗啲（啊姐唔係話上庄冇咁肥架咩？。。。）嗰砂鍋鵝汁炒飯幾香，而且有鵝粒，不過個人覺得啲粟米唔係好夾。嗰鴛鴦蒸肉餅，一半就梅菜響面，一半就有一

點咗下裝，鵝皮脆，但肉唔夠鮮甜。豆腐炆班頭腩，係裹炸粉炸定先炆，勉強啦。食完唔口渴都值得讚咯。整體唔差，坐得密，但唔算侷促，香港地產霸權，冇法。微調一下，忠言逆耳，老板聽唔聽得入呢?1) 食到近九點，見廚房勤力清潔玻璃，既然咁乾淨，廚師為何唔戴帽?收費又唔似爛撻撻嘅茶餐廳，提升一下形象得啩? 大家樂都做到， so can you!2) 話喺非是卜點讚、Tripadviser 寫食評送一杯紅酒。唔可以先送，埋單先算咩？未食點寫，點讚，吹漲! 紅酒不過不失，但要收番服務費4.8!老板條氣咁唔順就唔使送啦!3) 廁所未夠整潔，員工應多注意下。隔離枱阿姐埋單走人，留低舊(一舊哦)用完紙巾喺疏化，到我地食完都一路冇執。

我係第一次寫食評，平時只係睇，但今次好想寫出嚟，希望個老闆睇到改善吓啦。話晒而家租貴又生意難做，對於一啲食品質素唔差嘅食市嚟講，死響員工嘅服務態度就唔抵啦！接咗個仔放學就嚟食，剛好大約十二點前已到；因為之後趕去興趣班，打算快食半個鐘就走㗎啦。當時餐廳好少人，但所有卡位都寫住「留座」，因為帶住個三歲小朋友，佢又扭要睇電視，於是問職員可否坐卡座，當時職員有答可能之後有人撘枱架，咁我諗住快食所以就坐上去了。之後食食吓有個黑衣嘅黑面大嬏出嚟鬧啲職員話好俾張枱我地兩母子坐，期間仲要指住我地喎；跟手仲要攞返個「留座」牌放響我面前，好似想間接話我盲咁話。因為唔想響小朋友友面前鬧人，我只怒睥回應。其實好多餐廳見你帶住小朋友都會主動俾張卡位你，方便你照顧小朋友的，唔明呢位高級阿姐個心諗咩。何況我見最近和平響家長雜誌 playtime 度賣廣告，應該都係期望附近家長放學帶小朋友嚟。但咁樣包容小朋友嘅態度真係關於食品質素：我個仔每星期呢日放學都話要嚟食的，小朋友把口最直接最傳真，唔好食佢唔會叫我嚟。講返呢餐，我地半個鐘已食晒埋單走人，小朋友肯食咁快証明食物水準唔差，所以期待老闆可以改善吓

因為架車有問題，今日午飯時去佐北角車房修理，緊係試下呢度有咩好食啦。行行下見到間餐廳幾四正，價錢又ok，即刻入去試下。佢午餐都係standard 5款，有燒味，炒飯，炒河，仲有個荷葉飯，我就試佐個荷葉飯啦。個飯用個籠仔裝住，賣相討好有金針，雲耳，同埋鮮雞。鮮雞好新鮮，d飯係有味飯，好好味套餐仲包埋例湯，同埋野飲$51 呢個價錢真係超抵，好多茶餐廳都要啦。呢度俾到你既係舒適既環境，有質素既食物，仲有乾淨既洗手間。下次經過我都會再試

聽完為食麻甩騷楊英偉談及和平小飯館， 今晚一個人走去試試，點了半隻燒鵝，一蛊淮山燉花膠及砂窩紅燒翅。燒鵝肉嫩多汁又不太肥，可惜 鵝肉上段肉厚但味太薄，同下段冇得比，我下次只會叫下段。紅燒翅個味道足夠，火腿及燉鷄的味道都嘗到，但個翅身就一般，不過128元冇得苛求。又要個湯底好又要個翅身靚 ，就不是這價錢。 個蛊淮山燉花膠就一般些，個湯清鮮味但我直情懐疑舊花膠是后來補上。又說回來個湯賣48元，用料足又冇味精，算不錯。不過我下次點豬肺湯比較好。至少豬肺唔會有下等貨。另外我特別欣賞個湯是無調味，食鹽另上。有時其他菜式比較濃味，您會希望個湯比較清淡，而且個湯沒有加鹽，一上枱的時候能夠取悅您的食慾只有香味及湯水的鮮味。您先飲一口才加鹽調味，您對個湯水質素都心中有數。

三個月無嚟，今次到港再幫襯。點知服務差咗。早上十一点到，我話一位，冇人理。有一侍應在收緊錢，有三個在互打牙骹。 我自己揀左個位坐， 想點碗燒鵝瀨粉， 佢地話要等到十一點半後先知得， 無問題， 我叫咗杯凍檸茶。 十一點二十九分，我再叫燒鵝瀨粉，佢哋話仲要等多一陣，我講笑地回應(吓，係咪真係要咁準時呀) 博得待應小姐超咗我一吓。 跟住我仲想叫碟豉椒炒西洋菜，嗰位待應小姐話佢係做早餐嗰班， 唔知正餐有呢樣餸，我話妳唔知就算啦，我只食碗燒鹅瀨粉罷……瀨粉到，水準仍不錯。