8月份好评餐厅十强
2018-09-06

话咁快又一个月,回顾返上个月有唔少新上榜餐厅,8月份可以用人气反弹嚟形容!竟然有好几间旧餐厅,不约而同再次打返入十强,所以话虽然饮食潮流来得快去得快,新餐厅固然吸引,但要站得住脚都要靠实力同埋稳定水准嚟保持人气。唔讲咁多,立即倒数!


第10位    汤•米 (*新上榜)

今个星期继续有台式臭臭锅专门店,选用蔡澜都推荐过嘅臭豆腐店出品,加上台式鸭血、米血糕、贡丸等配料,连汤底沙茶酱都系台湾入口!另亦有沙茶牛肉锅、巴蜀烤鱼锅等好多选择。饮品当然唔少得大热嘅芝士奶盖茶同水果茶,一站满足晒几个愿望。

图:l.tsui小东


第9位    茶屋町

今个月无起跌嘅日式定食及甜品店,继续占据第9位。食物以列车便当为灵感,难得抵食得来有水准,平均消费大约七八十蚊,卖相亦靓,连饮品都系日本入口货。值得一提系门面装修似日式传统建筑,而舖头入面就似列车车厢,好有心思。

图:依云斯boooo_bo


第8位    芝乐坊餐厅

一开张时疯魔全城,估唔到开业一年後再重返十强榜!餐厅曾喺港岛开pop-up,又大搞半价优惠,而且而家冇当初排得咁癫,令未有机会试嘅人都终於食到。温馨提示下午茶同Happy Hour时间去帮衬,又或者5pm前订定枱,就唔使等得咁辛苦啦。

图:852FoodVoyagesoya1314


第7位    渝味晓宇重庆老火锅

麻辣火锅长开长有,呢间《舌尖上的中国》介绍过嘅火锅店,同时亦系重庆50大火锅品牌排名第一,开业一段时间人气仍然不减!内脏如牛肝、毛肚、黄喉等配料够新鲜,索埋麻辣汤好惹味,亦有重庆耗儿鱼、苕粉、燕饺同现炸豆皮等少有啲食材。天气开始凉又可以开始打喇!

图:TMTRAVELERchloehahahaha


第6位    第一郡 (*新上榜)

呢间越南小店由越南夫妻档开设,虽然冇名人加持,但就以朴实无华而且价钱公道嘅地道越南菜式,成功取得街坊欢心,深水埗同天后各有分店。越南牛河同蕃茄蟹膏汤檬以外,亦有包住蕉叶嘅米纸卷、斑兰绿豆糕等好少有菜式。

图:MGanimush_room


第5位    响 - Hibiki 日本烧肉 (*新上榜)

日本烧肉加放题,两种最受欢迎嘅菜系结合又点会唔hit?呢间餐厅食材都唔错,刺身有海胆、带子等,有澳洲和牛、米泽三元豚,海鲜就有细条喜之次、生蚝同鲍鱼等,甜品就有Mövenpick雪糕。当然价钱贵少少,但一分钱一分货,值得嘅。

图:步菲imeatstock


第4位    粒粒果甜品 (*新上榜)

近年甜品唔系抹茶、班戟就系芋圆,好耐都冇食过新嘅港式甜品,呢间甜品店新开冇耐就登上第4位,因为有啲新意,好似系成粒波子咁嘅水果星球,晶莹剔透。仲有萌断面果汁,影IG就最适合,仲有牛奶小方、花形窝夫,好有新鲜感呀!

图:紫扬晴海KanakaD


第3位    海南鸡公主(*新上榜)

无论系新加坡定系泰式海南鸡饭都有好多捧场客,店主系半个泰国人,仲请来泰国师传炮制,海南鸡有浓郁鸡味,鸡皮之间仲有层啫喱膏,食落更香更滑,面豉酱够浓够酸香。鸡饭放入便当盒入面,连沙律同甜品,做得精致。猪手饭、咖喱都有水准,唯一缺点就系冇乜堂食位。

图:hianna_bananacoins520


第2位    Teru Teru Bōzu (*新上榜)

呢间日本餐厅真系够晒新,由日籍师傅主理,唔系寿司拉面,反而主打关西风摩登料理。特别菜式木盒蒸笼饭,用上大量蔬菜、海鲜等一齐蒸熟,保持食物原汁原味。亦有大量送酒小吃,网烧和牛、冷意粉等,几有新鲜感。

图:keithkkkucojicoji8898


第1位  FLIPPER’S

开业一年,三度打入十强榜,估唔到再次荣登榜首!始终梳乎里班戟不死,早排餐厅推出宇治抹茶班戟,成功再吸引人回流帮衬!之前趁白桃当造又有期间限定口味。好快就有强劲竞争对手,相信要保持优势都有一定难度。

图:mush_roomVincentyuen



文:Perrins

关键字
十强
排行榜
好评
臭臭锅
火锅
日本菜
居酒屋
越南菜
烧肉
放题
甜品
海南鸡
班戟
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
2021及历届米芝莲香港澳门指南完全版
2021-01-27
情人节爱意满泻 甜蜜蜜堂食/外卖下午茶推介
2021-02-01
【随时更新】零食速报 每周新款零食、酒品点评
2天前
日本吉列牛排店京都胜牛进驻铜锣湾 黄金六十秒炸法 推介京都胜牛三味套餐
7天前
楚捻记新line!荃湾新开饺子店 必试黑松露什菌饺+香煎潮汕韭菜粿
2021-02-10