炎炎夏日想透心涼，梗係要食返碗勁正嘅刨冰解暑啦！今次開飯仔精選咗6間必試冰品甜品店，無論你鍾意創新或傳統口味都有得揀～
焦糖燉蛋焙茶冰 Times Coffee 
呢間cafe嘅人氣甜品焦糖燉蛋焙茶冰，刨冰細緻綿滑，入口即溶，帶住濃郁焙茶香，唔苦唔膩，茶味自然回甘。頂層嘅焦糖燉蛋燒到金黃微脆，敲碎混埋冰食，焦香微甜好有驚喜～入面仲有啲椰子脆片，脆脆哋好有咬口。另有抹茶紅豆冰、焦糖布甸草莓冰等選擇，同樣吸引，鍾意刨冰嘅朋友記得bookmark！
自創拉絲麻糬冰 氷舍
圖：一間想保留港式風格嘅人氣雪花冰甜品小店，主打三大系列冰品：刨冰、炒冰以及冰杯，當中刨冰系列最受歡迎。全店採用日本淨水製冰磚，冰質特別幼滑綿密～必試之選泰式芒果糯米飯刨冰，以時令香甜芒果粒為主角，配上煙韌軟糯嘅糯米飯，再淋上香濃椰子奶蓋，清爽不膩；焦糖布丁刨冰就將原個布丁放喺面，好似一次過食兩份甜品咁令人滿足！另外仲有自家製麻糬，主理人為咗追求完美口感，用上日本木薯粉加明治濃縮牛奶反覆測試，花咗數月時間終於成功製出拉絲、煙韌、奶香滿滿嘅麻糬，最重要係可以加喺任何冰品上㗎！
蜂蜜豆腐刨冰 氷燒
圖：主打日式刨冰嘅木系咖啡店，由曾經喺日本米芝蓮級刨冰店學藝嘅店主主理，無論食材選擇、刨冰口感抑或甜味配搭都好有水準～人氣No.1嘅蜂蜜豆腐刨冰嘅黃豆粉牛奶醬用上深焙黃豆粉製成，加埋質感似cream cheese咁滑嘅蜂蜜豆腐，豆香撲鼻，鹹甜之間極有層次，唔膩又清新。鍾意濃味嘅可以試黑芝麻紅豆刨冰，芝麻香濃幼滑，紅豆綿密，係芝麻控必食款！想試特別啲嘅仲有期間限定榛子朱古力開心果刨冰，榛子醬香滑，混埋開心果碎，每啖都充滿驚喜。
韓系冰品 Nun Desserts Cafe
圖：菇獨的美食家
主打創新又有誠意嘅韓式雪奶系列，用上質感綿密嘅奶冰做底，配搭豐富配料同特製醬汁，入口即化，口感細滑，甜度亦掌握得恰到好處。招牌韓式醉人草莓雪奶以新鮮草莓與奶香交織，酸甜清新，夏天食特別解暑；韓式魔鬼OREO碎碎雪奶就口感豐富～另外最近仲推出粟米甜品系列，爆漿粟米爆谷Soosoo雪奶以粟米醬、煉奶、脆爆谷同炙燒粟米組合而成，帶出鹹甜交錯嘅驚喜滋味，濃郁之中又唔覺膩，打卡與味覺同樣滿足。
牛奶台式刨冰 潤一潤甜品屋
圖：講到又平又大份嘅刨冰甜品，紅磡呢間絕對係平民界嘅天花板！當中必試就係牛奶台式刨冰，堆到成個雪山咁高，視覺效果勁誇張；用咗香甜煉奶同牛奶做冰底，滑滑哋又唔會太甜膩，一啖食落去透心涼。配料仲可以自由選擇，如芋圓、小丸子、紅豆同仙草等，層次感十足。另外仲有唔同口味嘅雪花冰，如芒果、香芋同榴槤味，口感都好幼滑！
人氣連鎖甜品店巨大刨冰 甜姨姨
圖：講起巨型刨冰，呢間本地連鎖冰店都佔一席位～用咗日本製冰磚打碎成冰底，綿密又有層次，唔係得個樣咁簡單，口味配搭都超有驚喜！楊枝甘露刨冰頂層插住支芒果雪條，下面堆滿香甜芒果肉同柚子粒，仲有熱情果啫喱同芒果脆脆，食落口感豐富又爽口。刨冰本身帶淡淡椰香，加埋額外芒果醬真係畫龍點睛，酸酸甜甜好清新！奶醬多口味都係必食，表面淋上滿滿花生醬、豆腐奶蓋，入面仲藏住花生碎同芝麻碎等配料，食完超滿足！
文：Yanica
編：Cathy
