10月份好评餐厅十强
2018-11-06

话咁快又一个月,踏入年尾,竞争更加白热化呀!今年好似特别多过江龙来港插旗,而且间间都系香港人热捧嘅当红餐厅。今个月都唔例外,轻而易举登上榜首嘅系佢!即刻睇睇今个月有边间餐厅打入十强先。


第10位    团日式拉面

上个月已经上榜嘅拉面店,由香港人一手一脚开设,引入日式拉面机,四款拉面口味各有千秋,难得好多食材都系自家制,制作相当有诚意。饮完汤唔口渴,溏心蛋生熟度刚好,而且有唔少新奇日本饮品,好有心机!

图:vincitoswloklucas


第9位    第一郡

同样系上过榜嘅餐厅,呢间小店由越南人开设,食物正宗而且价钱抵食。餐牌唔算多选择,但都好地道,好似招牌蟹膏蕃茄汤檬同出面有少少唔同,汤底较清,但蟹膏饼质感似鸡蛋,但就有鲜甜浓郁蟹味,有特色。

图:karyngng一座山


第8位    Hami Harmony

开业一段时间仍然持续人气,多次登上我哋十强榜嘅西餐厅,开业3年以来水准稳定,而且不时推出新菜式,好似卖相精致下午茶、打卡一流嘅软壳蟹意粉等,田园风装修亦成为唔少少女文青聚会好地方。

图:Ms.ZoieR


第7位    泰浓面 (*新上榜)

越来越多人锺意食泰式船面,呢间新开船面店唔同泰国街边一口一碗,改以靓料好似安格斯牛、飞驒和牛、黑豚肉等做配料。精髓汤底呈深色,牛骨香草味重而带甜,风味十足。性价比当然冇当地咁抵,叫做可以止吓口瘾罗。

图:doc25jpeatallyoucan


第6位    响 - Hibiki 日本烧肉

呢间烧肉放题已经连续三个月上榜,走势相当强劲!唔少人赞食物质素高,刺身有齐三文鱼、吞拿鱼、海胆、帆立贝,海鲜有生蚝鲍鱼大虾可以烧,和牛仲有牛胸腹、西冷同肉眼等唔同部位。仲有大量清酒甜品任食,贵少少食好啲都值嘅。

图:sheila_lo


第5位    Appendix Coffee & Bar

上个月季军位国稍为回落,型格咖啡吧位於商厦内,开放式设计开扬而且楼底高,气氛悠闲唔局促。咖啡为自家烘焙,鸡尾酒就由得奖调酒师设计,以职业命名玩味十足。另有tapas小吃、全日早餐等,嚟hea同chill都一样得。

图:vickyyy824紫扬晴海


第4位    Snow Peak Eat (*新上榜)

头四位系新餐厅嘅天下!殿军系日本着名山系品牌Snow Peak开设嘅露营主题餐厅,展示咗一系列型格产品。食物就以健康轻食为主,好似沙律、薄饼等,卖相靓而且份量足,坐住名牌露营餐枱椅,好有outdoor风味!

图:karin_torumonstergirlshk


第3位    金鹤拉面 (*新上榜)

今个月同时有两间拉面上榜。开业冇耐就登上三甲位置,主打鸡白汤拉面,卖相做法同名店相似,有泡沫同炸牛篣,鸡汤系於日本订造再直送来港,浓度刻意调低,唔会杰稠到饮唔到。另一主打鳗鱼饭够厚身,价钱唔平,但环境、食物都有日本水准。

图:cyndiiKwokwaiha


第2位    小糖钮 (*新上榜)

呢间甜品店本身位於元朗,由经验丰富酒店甜品师自立门户开设,甜品味道同卖相都有五星级,之後迁至尖沙咀,食物款式更多。必吃柚轮、富士苹果挞、大糖钮精选拼盘等甜品,咸食就要试海南鸡饭,做法系来自文华酒店架。

图:siufarbkei_dessert


第1位    幸福班戟 (*新上榜)

千呼万唤全城期待,来自日本嘅Happy Pancake,未开已抢尽风头吸引眼球!难得过江龙来港可保持水准,班戟质感轻盈松软,鸡蛋同蜂蜜牛油香味突出。排队排足两小时都无损人气,开业短短一个月登上榜首唔出奇!

图:fififishNicolewongg



文:Perrins

关键字
十强
排行榜
甜品
梳乎厘班戟
拉面
咖啡
烧肉
放题
船面
越南菜
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】零食速报 每周新款零食、酒品点评
2天前
日本吉列牛排店京都胜牛进驻铜锣湾 黄金六十秒炸法 推介京都胜牛三味套餐
2021-02-18
楚捻记新line!荃湾新开饺子店 必试黑松露什菌饺+香煎潮汕韭菜粿
2021-02-10
食肉兽必收藏!牛年到 五间品牛餐厅介绍返
2021-02-11
1月份好评餐厅十强
2021-02-09