8月份好評餐廳十強
2019-09-03

8月份嘅十強榜可以話係牛魔王嘅世界,十間餐廳入面有四間都係主打牛肉嘅!不過,榜首則由一間素食餐廳力壓群雄!

第10位  牛繁(*新上榜) 

 圖:山區麵包王MGani

呢間由日本開過嚟嘅燒牛肉店,牛肉主要嚟自美國、澳洲同日本,份量大、CP值高。招牌首推厚切牛舌,但想試啲特別啲嘅話,有壺漬牛肋條。以味噌醬汁醃製美國Prime級牛肋條,味道香濃。

第9位  Check-In Taipei(*新上榜) 

 圖:eunice2046hkfoodsprite

成日睇IG見到台灣啲鮮奶麻糬好qq好呃like,原來唔使飛台灣都試到。呢間餐廳有好多款口味嘅鮮奶麻糬,而且仲係跟元祖配方,以日本鮮牛奶製作。黑芝麻、Oreo等味道各有特色,口感冰涼,入口綿滑。

第8位  堅石燒(*新上榜) 

 圖:技巧樹熊clowntony

新開一排嘅石燒牛扒店,佔地成3000平方呎,美國、澳洲、韓國等地嘅靚牛都有得食。特別介紹坊間少見嘅1++韓牛肉眼,肉味濃郁得嚟亦同油脂香做到平衡,好juicy。除咗石燒牛扒外,呢度都有供應韓式石頭鍋飯。

第7位  天吉屋(*新上榜) 


圖:nutty_eaterkeudrat

嚟自東京嘅天婦羅專門店,唔止炸漿、醬油講究,就連米飯飯都選用晶瑩嘅北海道七星米,招牌天吉丼已經連續拎咗5年日本丼聯盟天丼金賞獎,一碗有齊黑虎蝦、海紅鯛、魷魚等,當然要試,但得香港限定嘅軟殼蟹丼亦同樣吸引,啖啖鮮甜蟹肉。

第6位  The ThirtySix(*新上榜) 

 圖:Gingerbunny

好少酒吧會上到十強,呢間主打cocktails嘅酒吧當然有佢獨特嘅過人之處啦。首先,男神吳彥祖係合伙人之一啊!另外,無論係酒款定小食都好有心思。嚟到記得要飲返杯highballs,冰磚係用咗兩日去過瀘嘅水而製成啊。Hojichha Mizuwari喺威士忌嘅苦烈中,滲出淡淡焙茶香。

第5位  琥酌  

 圖:hk.good.foodJikomoto

呢間吉列牛嘅人氣從來都冇減退過,日本A5和牛又好,美國安格斯牛又好,都一樣咁有肉香,外層仲脆卜卜添,同而家好興嘅石燒牛相比,又係另一種風味嚟。燒牛之外,同時食埋和牛涮涮鍋都得。

第4位  FAMA

 圖:chow928food_enthusiasthk

上月第9位嘅大埔café,空間極大,而且仲有boardgame玩,幾啱一班人上嚟hea下輕鬆下。Burger大大份,超多料,除咗一般嘅牛呀菜呀芝士呀等等之外,仲有菠蘿,好juicy,可以中和下牛嘅膩感。唔怕肥仔嘅飲埋杯爆谷朱古力仲滿足!

第3位  牛魔   

 圖:missdeliciousEstherrab

呢間牛肉燒肉店已經係第三次上榜啦,主打美國、日本、澳洲嘅和牛,再由客人自行燒製當然吸引,lunchtime燒唔切嘅話食返個安格斯特選牛肉眼丼飯同樣開心,但能夠喺眾多燒牛肉店中突圍而出,相信同佢哋每枱都有部自助啤酒機不無關係!

第2位  美滋鍋   

 圖:天天食好野silverthoughts

上個月第4位嘅新加坡養顏火鍋店,今個月再上升2位。招牌膠原蛋白養顏美容鍋固然深得女生歡心,粉紅主題嘅裝修同樣不容忽視,打住邊爐都可以打個靚卡!比較特別嘅食材推介活醉海花蝦,浸住喺酒度上枱㗎真係,仲有專人協助剝蝦添~

第1位  素一

 圖:CameronWanloklok12378

呢個月嘅榜首,係間素食自助餐餐廳,可見素食文化愈嚟愈普及喇!呢度款式多多,中式素食又有,日式「壽司」又有,香口炸嘢都有,總共有成60幾款咁多呀,無論係口感定係造型嘅像真度都幾高,就算唔係特別食素嘅朋友仔都可以一試啊。


文:Kar

關鍵字
十強
報榜
好評餐廳
石燒牛扒
素食
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
6天前
尖沙咀新商場開幕 過江龍餐廳一覽
2019-08-30
【2019中秋】最新人氣話題+送禮靚盒月餅集合
2019-09-09
【蠔癡必看】生蠔海鮮的浪漫盛宴!
2019-08-27
台中人氣手工芋泥甜品登陸尖沙咀 必試招牌雙芋仙草奶凍、神仙奶
2019-09-03