【2018回顧】世界各地過江龍 食盡環球人氣美食
2019-01-02

喺過去嘅2018年,有嚟自唔同地方、大大細細嘅品牌餐廳先後登陸香港,香港成為咗唔少餐廳作為過江龍進軍海外嘅試點。嚟得香港開嘅都喺薄有名氣嘅餐廳,或者喺唔少港人早喺外地食過仲好想佢嚟香港開鋪等大家可以唔洗去旅行先食到嘅餐廳。所以通常開親鋪嘅頭幾日實會見到大班排隊黨、打卡黨去「朝聖」。過咗成年,你仲記唔記得有邊幾間?
 

高質親民壽司店 梅丘壽司美登利總本店

嚟自日本嘅人氣連鎖壽司店,就算喺日本咁多鋪都係要排隊㗎!好彩就算嚟到香港,價錢都Keep到幾親民。美登利旺角店更加喺佢嘅首間海外分店,9成食材由豐洲市場日日新鮮空運到港,由塊魚生去到每一粒米都喺日本來貨,又有日本師傅坐鎮,同喺日本食差唔多,最啱畀冇假去旅行嘅大家解下「鄉愁」。
 

人氣炭燒鰻魚飯 名代宇奈備長炭燒鰻魚飯專門店

同樣嚟自日本嘅人氣店,又係揀咗香港做海外店首站,又係出名性價比高,可能真喺當咗香港人係「日本鄉民」。現場店內炭烤鰻魚,喺香港真嚟唔多見。而日本Menu嘅500yen鰻魚飯喺香港店嘅售價係68蚊,普遍價錢都不過貴香港幾十蚊,差唔多啦香港租貴。
 

貼地飽肚丼飯 天丼

都係東京都內嘅人氣店,食魚生飯、壽司食得多?咁天婦羅丼飯你又食過未?大大碗嘅天婦羅丼飯裡面又有海鮮又有菜,保證食得飽你;仲要用埋日本米,都先$49碗飯;依家茶記晚市都收你五、六十啦!食得多魚生想轉口味,以後又多個平價選擇了。
 

來自鬆軟的幸福感 幸福班戟


日本班戟店一向競爭激烈,去過原宿同表參道就知道。而幸福班戟一直都係人氣店,就算全日本有咁多分店,就算你閒日去,間間都係咁多人,人氣可想而知!所幸終於開嚟香港,好感動!店內班戟全部即叫即做,所以需要時間等。招牌原味幸福班戟用咗日本小麥粉同雞蛋,再加上北海道蜂蜜牛油、紐西蘭麥蘆卡蜜糖,原來,等待呢種鬆軟香甜的口感…就叫做幸福!
 

京都日式甜品店 雪ノ下

日本人可能當咗銅鑼灣係香港「原宿甜品激戰區」,因為又係日本班戟店。不過呢到嘅招牌厚燒班戟,又喺另一種風味嚟嘅,睇到近4cm厚度嘅樣都知,主打口感扎實。另外仲有日式刨冰、手沖咖啡、雞蛋三文治,好有傳統日式咖啡室嘅感覺!
 

時裝品牌x班戟店 J.S. FOODIES

日本時裝品牌JOURNAL STANDARD開設嘅café,主打班戟同漢堡。裡面仲食到另一個人氣品牌Flipper’s嘅梳乎厘班戟,仲有傳統班戟,比多個選擇你!好多過江龍梳乎厘班戟店都喺銅鑼灣同尖沙咀,呢次開喺九龍塘又一城,又多個選擇比新界、九龍嘅朋友啦!
 

台式精緻藝術火鍋 寬巷子

火鍋店寬巷子嚟自大家熟悉嘅台北士林,鍾意食麻辣就唔可以錯過呢到嘅紅湯,特別加入唔少藥材,香麻唔油膩,而且辣度溫和。仲有唔少好似藝術品,又靚又有創意嘅自家手工製火鍋料:女仔見到實覺得好靚嘅玫瑰松板豬、童年回憶枝仔冰墨魚滑、以假亂真嘅台灣手信「牛軋糖」魚滑,睇得又食得!
 

飲得嘅麻辣湯 麻神麻辣火鍋


同樣嚟自台灣,又喺揀咗香港做首間海外分店。用料、食材大部分都嚟自台灣,保證有台式風味!麻辣湯比人感覺都係重口味,好少覺得可以飲,但呢到就喺畀你當湯飲。同樣落咗藥材去煲,最特別嘅係仲加咗蔬果落去,等麻辣湯多份清甜不膩嘅感覺。
 

山城傳統麻辣 重慶洪鼎火鍋

講到麻辣火鍋嘅根源就不得不提重慶呢座山城。佢正正就喺嚟自四川重慶火鍋店嘅老字號,國內有超過200間分店,仲有36年歷史,係當地嘅品牌名店。要食得有風味就一定係叫麻辣火鍋最佳火鍋配料:毛肚、黃喉、黑柏葉等呢類內臟,不過就算唔食內臟都有唔少新鮮河鮮同肉類選擇嘅!
 

紐約街頭人氣漢堡 Shake Shack

食快餐同漢堡梗係食快餐大國美國嘅牌子,實食到嗰種風味啦!首先就有紐約嘅Shake Shack嚟香港,先後係中環IFC同金鐘太古廣場開分店,招牌芝士漢堡ShackBurger同有大大隻炸啡菇嘅Shroom Burger都係人氣之選。喺IFC露天位置,一啖啤酒一啖Burger,去唔到外國住都可以享受下紐約Fast Causal Food嘅文化!
 

無添加快餐 Five Guys

緊隨其後就有Five Guys喺香港插旗,灣仔店仲係全亞洲第一間分店,你睇下香港真係咩都有得食。作為一間快餐,佢竟然為咗用料新鮮同表示用料新鮮而冇放冷藏櫃。所有漢堡同薯條都係每日新鮮即場炮製,店內仲會寫每日整薯條嘅薯仔喺嚟自咩產地,而且仲係手切!加上免費花生畀你食住等,唔怕悶親嗰時冇花生食!
 

Gordon Ramsay又開店 maze Grill

地獄廚神呢個名,除非你參加烹飪比賽節目比佢鬧先要驚啫,否則佢開嘅餐廳就係質素嘅保證。而2018年,佢就喺尖沙咀開設第3間餐廳maze Grill。招牌菜威靈頓牛扒,Share畀幾個人一齊食,以品牌名氣度同尖沙咀靚靚海景嚟講都算抵食嘅,一定唔驚係檸檬嘅「鐵粉牛扒」先!
 

全球最佳薄餅 KYTALY

呢篇文第唔知幾多間嘅「首間海外分店」。不過今次真心堅,因為佢係由世界上最著名嘅薄餅大師Franco Pepe開嘅店,總店喺遙遠嘅瑞士日內瓦。當中最特別係用含水量高達七成嘅麵糰搓成薄餅底,食落去口感特別鬆軟,每啖都食緊世界級手工。
 

文:Yanny
相:Tom Li、Cathy、Kar、Yanica


關鍵字
2018
飲食潮流
回顧
壽司
鰻魚飯
班戟
天婦羅
火鍋
麻辣火鍋
漢堡
快餐
地獄廚神
薄餅
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
2019-11-29
【2019聖誕】早鳥優惠! 聖誕自助餐推介
2019-11-27
秋風起!5間大閘蟹放題食店集合
2019-11-19
【2019聖誕】年尾叉電 聖誕下午茶集合推介
2019-11-19
【2019聖誕】約會之選 聖誕市集推介
1天前