【新店直擊】CP值高！開飯仔放蛇親試尖咀新開丼飯店（有片）

丼飯嘅熱潮，由上年年尾一直帶到嚟而家，都依然係咁熱！話說最近又新開咗幾間丼飯店呀，記性好嘅應該記得上個月中，開飯仔去咗一間屯門小店度放蛇實試，排咗成2個鐘先有得食。今次開飯仔又出動喇，目標係開咗大約一個禮拜鬆啲嘅尖沙咀丼飯店。

呢間丼飯店開喺勁多嘢食嘅厚福街，暫時唔算好多人，開飯仔今次唔使等喇，喺晚飯時段去到都可以即刻入座。丼飯有兩類，一類係餐廳嘅預設配搭，一類就係自選配搭，最平88蚊就食到一碗，而平均都係大約百零二百蚊碗，喺尖咀呢個地段嚟講係幾抵。

預設配搭唔使諗，最吸引嘅一定係三色海膽丼同極上拖羅盛丼！前者嘅三色，係由北海道、加拿大同韓國海膽組成，面頭加多隻鵪鶉蛋、玉子同薑蓉，另配紫菜一包。不過開飯仔去嗰晚咁啱冇韓國海膽，咁餐廳就將另外兩款海膽加份而價錢不變。兩隻海膽舖滿晒成個碗，極邪惡！唔苦之餘仲要好香甜，當中又以北海道嗰隻較甜。

另外老闆教落，可以用紫菜包少少飯少少海膽咁變咗紫菜海膽包（aka.海膽卷）咁嚟食，一碗丼飯兩種食法！

而極上拖羅盛丼同樣都係佈滿晒拖羅，脂肪分佈算平均，不過就有啲筋啦，但無損佢嘅魚香味。無論飯定刺身嘅飯量都相當足料，一個人食都幾飽，CP值好高呀！

至於自選配搭，變化就多好多喇，其中有啲選擇係預設丼冇㗎，例如鰻魚同松葉蟹腳咁。唔止刺身有得揀，啲飯都有得揀要白飯、壽司飯、薑味壽司飯定係冬菇壽司飯。

鉄火堂
地址：尖沙咀厚福街10號地舖