沾仔記 (威靈頓街)

营业中

休息中

2005年8月3日(星期三) 下午7時45分在附近辦完一些事便到這裡吃一個簡單的晚餐，坐下來便立刻點了雲吞河及腐乳通菜【見上圖】。雲吞河($11)：湯底是比較淡的，可以說味道欠奉；鮮蝦雲吞就大大粒，而且爽口彈牙，以這樣便宜的價錢，蝦沒有鮮味是可以理解的。腐乳通菜($5)：通菜尚算幾嫩，走了油再加小小腐乳，又是比較健康的一餐。

聖誕節同完穌哥開生日會，原本去蓮香，但沒想過星期天還比平日多人，便一行四人來沾仔記吃，星期天，人亦是多的。坐的是店內的VIP房，毗連廚房旁，我寧可選擇此多於店中，因為比較寬敞。叫了一碗細蓉、芥蘭湯上。「沾仔記」的雲吞、鯪魚球，滿足了中國人那種吃的口感外，亦能反應其意識形態。大還是小的好，就像某部份，投其所好，各具特色，故此「麥奀」於對面有市場都是一個現實。說回正題，雲吞是本人的食物排行榜有一席位，小小的雲吞，裡面有真正的半肥瘦、蝦肉的，內裡有湯、肉汁，雲吞皮是很關鍵，靚的雲吞皮薄而光澤又能看得蝦肉就有質素，「沾仔記」始終保持水準，雲吞豬肉比例可以接受。漢果湯底喫下去，甘香但不突出，羅漢果是正氣食品，多吃也無坊。但鹼水麵一出，略嫌鹼水蓋過其湯底，鹼水分量減少，鹼水麵的麵能夠軟身些少，那便真是佳作。最後伴以芥蘭湯上，原因不喜歡蠔油那種「霸道」的感覺，湯上就最好不過，但芥蘭中間剪開就失了芥蘭的質感，故此美中不足。湯底、雲吞、麵底誰是主角，一時之下，難以定奪，但就入場人次，便有一定的答案。埋單$18，有感「威靈頓」華洋共處，中西美食應有盡有，我對腳投了支持的一票確實值得。

之前聽過同事講話沾仔記鯪魚球好味，今日我終於同另一位朋友一齊去試吓。我哋叫咗個雲吞鯪魚球麵同雲吞牛肉麵。鯪魚球同雲吞大大粒，味道都OK。而且鯪魚球彈牙，雲吞又比較多蝦而少肉。個麵亦都好彈牙。反而試過個湯底，淡淡哋，味道唔太重。一碗雙拼麵18蚊，加多碟油菜要6蚊。係中環比咁價錢，食到不俗食物，都算唔錯啦！

沾仔記雲吞依然jumbo size，爽口彈牙較上趟好食，老實嘅工作人員說不加添味精，敢情是。但為何啲湯可保持水準，依然無味！由早到晚滾完雲吞、牛肉、魿魚球，應當很甜很惹味，究竟…點解會係咁淡﹏﹏？

新裝修既沾仔記看起來比從前舒服好多.. 一埋位叫左個至愛雲吞麵同cream soda. 雲吞仍然大粒, 麵仍然彈牙, 味道口感價錢都十分滿意, 但我唔會再黎... 原因好簡單- 衛生好唔掂!! 食第二口麵時已見到有溺斃的小強飄浮在上湯之中.. 還好亞姐肯換一碗俾我.. 但唔換由至可, 今次仲換左碗沾仔記既新出品「免治小強雲吞麵」俾我.. 呢碗麵我真係唔懂點評喇.. 呢間舖, bad list forever 喇..

假日閒遊,想買"泰x"沙翁,點知條龍長到見唔到尾,唯有再四圍搵野食.同下面o個位朋友一樣,都係食鯪魚球雲吞麵.鯪魚球同雲吞都大大粒,每樣兩粒.鯪魚球除左彈牙外,仲有陣陳皮香味,一流!雲吞反而覺得麻麻地,雖然蝦都算新鮮,但太多了,幾乎成粒都係蝦,其實蝦同肉o既比例維持番7:3仲好.而且蝦肉較硬,算一般啦.$12一"食送",$18雙拚係喱帶尼講算平.

經過見到新開間麵舖，原來係沾仔記。平時都唔見有咁多人，但裝修後lunch time勁多人排隊，果然包裝係好重要。價錢都冇變，16蚊已有一碗雙併，可能心理作用關係，感覺好食o左。鯪魚球大粒又彈牙，雲吞多蝦而蝦肉又爽，鐘意佢冇咁多豬肉。麵亦爽口冇水味，同事們話D上湯好好味，差不多飲晒成碗。腐乳通菜只係6蚊一大碟，而且幾嫩。雖然不是稱得上十分好食，但一定是好抵食。

印象中, 紅磡個間d雲吞好食d, 但都好食既, 12蚊一碗, 抵到笑, 兩個女仔一人一碗加油菜好, 不過都係好多味精, 算啦, 佢無我先奇怪~幾舒服, 裝修之後都唔貴, 平價之選!

重新裝修左既沾仔,坐得都舒服d，叫左個雲吞米，好大粒，超多蝦，正～食一碗都好飽

突然間好想食雲吞，即刻諗起好耐都買返屋企煮黎食．慘喇，好似包得唔靚，一個個窿．食落口，真係比起上幾次差好多，入口不太新鮮．從前的雲吞．．．是那麼的爽口，彈牙；大大隻，好多蝦．

今日下晝媽咪第一次帶我去品嚐沾仔記的招牌雲吞麪, 湯底perfectly delicious lor ,also smells pretty good!!雲吞裏有勁多蝦肉，麪口感一流．．．又爽又彈牙！都只係＄　１１！～～係中環＋通脹的環境下都算平靚正！不過，畢竟係老字號，所以鋪面裝潢較舊，不過ｄ　staff 服務態度不錯！！　：）

見有網友評沾仔記,我又想講兩句.中環同佐敦兩間鋪都幫襯過,個人偏好佐敦多,好似雲吞同鯪魚球都實淨,無咁"削".我至愛佢地鯪魚球,超彈牙同足料,日日新鮮,絕非坊間其他溝粉,要加蝦米,發菜黎幫補鯪魚球可媲美.本人試過港九好多其他食肆鯪魚球,暫時未發現有比沾仔記更優勝的.

中環是個福地, 你要食貴野, 貴貴都有很食. 你要食平野, 又好多選擇. 以前在中環工作, 由早餐, 午餐, 下午茶至晚飯都大把選擇, 後來搬左去長沙灣, 真係好似充軍塞外一樣.言歸正傳, 識得麥奀就應該識得沾仔記, 因為在威靈頓街打對台. 我地呢D 草根一族, 當然多數幫襯沾仔記. 最近佢地可能環境好左, 所以睇齊返干諾道中變返11 蚊, 不過都徇眾要求, 唔駛買飛排隊咁麻煩. 沾仔記只有三味可揀, 雲吞, 牛肉同鯪魚球. 我個人多數會叫雲吞麵. 雲吞一共有三粒, 好似乒乓波咁大, 多蝦小豬肉, 少了傳統雲吞的甘香, 鮮味亦談不上, 但啖啖肉又口感十足. 個麵底應是全蛋麵, 無梘水味, 麵身亦幼, 不過有時淥得唔夠淋, 略為硬身, 但做得好時候就好爽. 睇下你好唔好彩, 通常我會加D 紅醋, 味道十足.我去門口睇下介紹, 個湯底係大地魚豬骨加羅漢果. 唔知大家食唔食得出.雲吞麵當早餐又得, 午餐又得, 下午茶又得, 而家買緊11 蚊, 加埋罐水貨可樂都係14 蚊. 抵食之極.若果選一項香港特色食品, 有人會揀旦撻, 我就會揀雲吞麵.

十蚊碗麵, 雲吞, 牛肉, 鯪魚球, 麵河米同價, 雙併$15, 飲品+$3. 單睇價錢好抵, 食落都好好, 夠大碗, 有三粒大雲吞, 大大隻爽口0既蝦, d 阿姐又nice, 唔怪之得咁好生意.

交完功課, 一個人唸食乜, 醒起好耐無食沾仔記的雲吞, 心唸兩點幾應該唔難搵位, 就決定食個快餐.一來到先發覺呢度裝修左, 兼且而家改左要先買飛, 都無所謂. 買左飛, 都未搵到坐邊(因都爆場), 有個亞姐好快手已走埋來問我幾位, 我話一個, 佢好快就搵到個位俾我, 跟手就撕左我手中其中兩張飛仔, 係雲吞米同油菜. 跟住我都擔心又唔係自己拎, 張飛又無檯號, 佢點知客人要D咩呢????????但好快我的雲吞米同油菜已送到面前, 賣相幾好, 大大碗, 碟菜又唔會好油或好黃. 但食落就發覺比以前少左D鮮味(明知係味精作怪), 湯好淡, 好似水咁, 雲吞係仍然好大粒, 但D蝦就無味, 食落只係食到D肥肉味, 至於碟菜就算唔差. 既然係咁, 都無謂慢慢嘆, 快手快腳十分鐘搞掂, 反正不斷有人入來....希望佢D 鯪魚球同牛肉的水準唔好好似雲吞的命運啦.....