新肥泉海鮮大排檔

營業中

休息中

响香港，而家大排檔越來越少，想試吓昔日風味，唯有上去佐敦寶靈街官涌市政大廈2樓熟食中心。先來個炒大蜆，上枱够大碟，味道好。($138)。跟住來個黃金魷魚，真惹味，真好味，外面漿粉薄而脆，內面魷魚軟熟，十分有魷魚鮮味。炸得好，碟底一啲都唔油膩，一贊($138)椒鹽軟殼蟹，同黃金魷魚一樣，冇得彈，軟殼蟹亦都10分鮮味，再贊。($138)頭抽乾炒牛河，嘩，真係大碟夾抵食，夠深色，差不多成碟有三份一係牛肉，都係$88。隔籬枱，上咗一碟型蝦，問吓夥計，原來喺金銀蒜蒸花蝦。跟住叫夥計照板煮碗，嘩！真係大花蝦，其他地方好少有咁大隻嘅花蝦，新鮮，肉爽，有羔，冇得彈。(盛惠$168)。韮菜瑤柱羹，夠大兜，多肉絲，（$128）當晚仲有喜力小姐推介啤酒， $28一支，抵飲，好食。贊

以前同朋友飯聚間中都會上大排檔，大排檔既小炒的確係有另一番風味🍻前晚突然好想食小炒，佐敦附近就有官涌巿政熟食中心，「新肥泉海鮮大排檔」絕對係不二之選！豉汁蒸白鱔我就肯定自己唔會喺屋企整既，最鐘意喺大排檔點，嗰種味道係特別唔同🤤圓轆轆白鱔浸滿陳皮豉汁香味，完全停唔到口，記得要襯佢熱辣辣上枱時食呀！菠蘿拔絲咕嚕肉見圖就知道咩水準，酸甜度岩岩好又掛汁，咕嚕肉唔會成口肥膏八分瘦💕腰果西芹炒蝦仁蝦仁大隻夠爽好，腰果都幾多，用黎送啤酒🍻最岩不過！鮮蝦腐皮卷同我想像有點出入，我以為係酒樓嗰種，原來仲會炸爆個面😂好似響鈴咁樣！啤酒🍻選擇都幾多，小菜款式多到嚇親寶寶😂又有得打邊爐，我見都幾多家庭客黎晚飯，大家都係預早少少到會比客好😅

#佐敦 陪媽媽去佐敦買凍肉, 原來街市樓上有個熟食中心, 我哋可以順便食個晚飯再返屋企! 雖然係熟食中心, 但唔熱! 地下都好乾淨, 入座前仲見到侍應用布抺櫈, 好細心! 而櫈係有背椅的, 唔係圓櫈仔, 坐得好舒服! 不過穫氣才是最重要的! 🐚招牌豉椒炒大蜆 $138 ~ 好好好大隻, 呢種蜆無乜砂, 好讚! 大量配菜同炒, 好香! 蜆肉都幾厚, 好新鮮好甜! 🦪薑蔥生蠔煲 $168 ~ 厚實的炸粉包裹生蠔, 炸得香脆, 蠔無縮水, 味道唔羶, 肉質好飽滿, 薑蔥好香, 好適合配酒的一道菜! 夠晒熱辣辣! 🦐金銀蒜蒸花蝦 $168 ~ 好鮮甜好多膏, 估唔到花蝦咁多膏! 肉質好結實彈牙又新鮮, 隻隻開邊食得好方便! 粉絲底吸晒所有汁, 好順喉又入味! 

出城接老公放工，遊走附近搵好嘢食。想起有朋友推介過官涌熟食中心有幾檔食肆幾唔錯，於是摸上去一探究竟。講起官涌街市，可能大家會喺米線關注組睇過富＿軒經常大排長龍，為咗「等一碗米線」。我哋上到去，見到間鋪已經收咗檔。咁我哋就轉戰隔離嘅新肥泉，試吓大牌檔風味啦！甫坐低，服務員攞咗兜花生過嚟俾我哋，同場見到已有一對食客喺度嘆緊羊腩煲。搞到我都心郁郁想試吓，但由於我嗰晚唔想食太多肉嘅緣故，所以就決定點幾個海鮮小菜就算喇。咁我哋就點咗以下呢幾味：招牌豉椒炒大蜆大蜆大大隻，蜆肉好厚。蝦醬通菜炒鮮魷通菜好嫰，調味亦恰到好處，鮮魷好鮮味有咬口，份量都好夠。金銀蒜粉絲蒸大元貝熱辣辣送上嚟，帶子好鮮甜，粉絲係有炸過，同蒜蓉配搭得天衣無縫。呢度樓底好高，枱同枱之間嘅空間都幾闊落，而且係開放式廚房，一邊食一邊睇到師傅起勢咁炒，根本冇停過手，而且樣樣小菜都鑊氣十足 。我八卦裝吓隔離枱的食客，碟小炒王堆到座山咁高，飄住煙，真係好吸引。隔咗冇幾耐，陸續都有食客嚟打邊爐，啤啤佢，熱鬧非常。難得喺佐敦呢頭都有個可以俾三五知己開懷暢飲嘅聚腳點。

收工來到佐敦的官涌市政大廈內的熟食中心，🐷先生話要試試大排檔✨ 真的很久沒食過大排檔風味！星期一晚上人流不多，只有幾枱食客，但無阻我倆的興致。餐牌款式很多，除了多款經典小炒外，還有很多海鮮選擇。當然不能少得喝杯啤酒🍻✨椒鹽脆鮮魷 $128大排檔一定要點椒鹽鮮魷吧？新鮮炸起，炸漿薄薄，魷魚軟腍，加上椒鹽炸蒜，蘸上喼汁超級美味🤤 而且份量超足❣️✨黑椒薯仔牛柳粒 $128同樣大大碟、份量足。牛肉粒醃得入味，薯仔外脆沾上黑椒蜜糖汁，惹味👍🏻✨金銀蒜蒸大元貝(4隻) $198元貝大粒彈牙😋 重點是蒜蓉蒸粉絲，超香超入味，無論單食或是下飯也是一流❣️不知不覺白飯被扒光了，超滿足的🥰

已經三年多沒有回港，好期待回港食新鮮海鮮，在 open rice 看到這間大排檔的海鮮食館，滿心歡喜結果真是強差人意！我第一次到新肥泉大排檔、叫了三個菜：薑蔥炒蟹一隻，豉油王煎海蝦，一個啫啫芥蘭煲、白飯一個、藍妹啤酒一技、收咗我$809！假若好吃的話沒問題，所有食物咸到食唔倒，隻蟹又細又無肉居然收$480，海蝦沒有去蝦腸，滿口沙，真沒想到香港食館大失水準，又貴又唔好吃，認真唔抵、無下次！

今晚同朋友最想食番啲地道野，上咗官涌熟食中心食大排檔，秋天涼涼地唔怕熱，地面乾爽仲有部📺大電視添兩個人又想食得多款小菜，最後揀咗食二人套餐（2位起）💰2️⃣8️⃣8️⃣，一共有8款仲包左一支啤酒🍻🔸金銀蒜蒸巨蟶子🔸招牌xo鮑魚煲🔸豉油皇大花蝦🔸招牌香煎金錢鱔🔸避風塘炒軟腳蟹🔸韮黃瑤柱羹🔸上湯浸時蔬🔸水果🍍🍍招牌香煎金錢鱔👍 - 鱔嘅肉質新鮮，走過油特別香脆避風塘炒軟殼蟹🦀 - 即叫即炸，食落外脆內軟，微辣嘅避風塘風味送酒岩哂韮黃瑤柱羹 - 好足料仲超多肉嫩嘅肉絲，唔洗叫飯都好飽肚🎈新肥泉海鮮大排檔🎈佐敦寶靈街17號官涌市政大廈2樓熟食中心

近年去大排檔食飯，唔係妹記就楚撚記，少有呢間街市上嘅大排檔特別出色，環境比其他嘅熟食中心大啲，當日星期四唔算多人關係，兩個人都安排左大枱比我哋。粟米炸斑塊🐟 $118回頭率極高嘅一碟小菜👍🏻👍🏻👍🏻，魚塊新鮮即炸熱辣辣😍，粟米汁嘅份量啱啱好😗，唔會令到炸魚塊淋咗🤓，而且食到最後都唔會變水狀😋。椒鹽軟殼蟹🦀 $138呢度嘅炸物真係必食之一🤤，同樣都係即叫即炸😯，熱辣辣脆卜卜非常邪惡，加上椒鹽炸蒜蓉，好惹味☺️👍🏻！肥泉小炒王🥦 $98比其他大排檔嘅小炒王料多🤩，份量十足😉。韭菜、蝦乾、鮮魷、菜蒲、腰果、鮮蝦、磨菇、蘿蔔，配上一杯冰凍啤酒🍻一流喔！可愛bb鴿🐥 $52@1大排檔少有乳鴿😄，所以叫返隻試下，味道同酒樓差唔多😌！冰鎮小鮑魚🍞 $48@1新鮮鮑魚，白灼後冰鎮凍食，特別爽口😗！新肥泉海鮮大排檔 (佐敦)佐敦寶靈街17號官涌市政大廈2樓熟食中心😋味道: 8/10🤑價錢: 7/10✨環境: 7/10🧹衛生: 7/10👷🏻‍♂️服務: 7/10#hkig#hkiger#hkfood#hkfoodie#foodie#hkgirl#food#hk#hongkong#hongkongfoodie#

秋涼特別有食慾, 亦更有意慾去試平時唔會去既大排檔. 官涌街市政大厦既肥泉記之前都聽人講過食物唔錯, 今次一行三人去試試佢既晚飯水準.肥泉記地方寛闊, 雖然無冷氣, 但有足夠風扇, 坐係幾好坐, 秋冬唔黎會覺得對唔住自己.我地叫左幾樣小菜, 全部都覺得係水準之上, 而且每份份量好足夠, 我地眼闊肚窄, 最後都要打包兩個餸. 椒鹽鮮魷大份, 即叫即做, 食落口感豐厚而且燙口. 薑蔥蠔煲非常足料大份, 一個煲有9隻蠔, 而且好入味, 百幾蚊呢個價錢我覺得非常抵食.鵝腸都係大份, 係咁食都仲有, 好爽脆, 味道適中, 唔太鹹唔太淡.最後要讚既係呢個干炒牛河, 成日話炒河要睇河底碟面多唔多油, 我都睇一睇, 真係無咩油, 上枱熱辣辣, 雖然叫左四樣小菜食唔哂, 但都清左碟牛河!!總結: 抵食夾大件, 非常滿足, 推介比各位

爸爸同auntie 生日就到打算感受本土情懷， 去間無限時既餐廳食晚飯，慶祝生日大家傾下計，過一個愉快既晚上。 上OpenRice 睇到依間食評唔錯， 就預早決定訂位去試下。 餐廳係街市既2樓，去到6點半但冇咩食客。因為街市既關係所以只有風扇同風機，但都尚可以接受。我地叫幾個小菜1. 新鮮鵝腸2. 涼拌青瓜3. 子疆皮蛋3. 椒鹽軟殼蟹4. 菠蘿咕嚕肉5. 炒牛仔骨6. 蒸白鱔7. 菜膽蒸雞8. 小炒王9. 冰鎮鮑魚餐廳人手極都不足只有兩個職員， 上菜好慢， 有啲仲催左幾次都未黎，最後2、3、5係取消左。‼️菠蘿咕嚕肉絕對唔係食評講到咁好食，軟殼蟹10分之鹹， 白鱔非常唔新鮮‼️可取之處就係啲餸都算大碟而且價錢唔貴， 亦都唔收切餅費，埋單價錢只係1036。但係如果你食食下向上望，或者街去廁所， 你會好難望唔到好幾隻十分巨型既大老鼠.. 如果你好似我咁驚，驚到差啲暈低，我強烈建議你唔好黎食.. 因為好恐怖

今日收工，同同事想食啲嘢先返屋企，去咗佐敦熟食市場入邊食小炒，揀左新肥泉！每次食小炒都一定係豉椒炒蜆，呢度d嘅超大隻，啖啖肉～另外仲嗌咗個鮑魚雞煲，送飯一流👍🏻👍🏻估唔到咁嘅價錢竟然有唔少鮑魚仔，好有驚喜！

佐敦地道大排檔小炒 — 新肥泉海鮮大排檔 其實為食兔都鍾意食啲麻甩野，無論係大排檔小炒、海鮮或者係煎炸嘢都啱我口味😍但係今次就忍唔住嗌晒全部煎炸嘢😆今次去咗呢一間位於佐敦嘅熟食中心大排檔試試～🐟椒鹽九肚魚($108)係大排檔必食嘅嘢食，每次去都必叫呢一味餸，咬落肉質軟淋，食起來熱辣辣🥵九肚魚面頭沾上炸蒜，食落好惹味 ！🦆乳鴿($52)調曬味，好入味，唔洗再落華鹽都夠🍤邪惡黃金大蝦仁($128)咸蛋醬沾滿曬蝦仁，充滿咸香又唔會好漏、好鹹咁，味道適中，仲食到有好多鹹蛋醉😍啲蝦都大隻，食落幾爽口🐔當紅炸子雞($168)叫左半隻，兩個人都食唔晒，啲皮炸得好香脆～

每個食環署的街市都會有一個熟食中心，而當中也有不少的高質素的餐廳，而且性價比會更高，更有煙火味，也是我挺愛的一個點！這間就是其中一間！豉汁蒸白鱔（168元）鱔的份量挺多，豉汁味道香濃，配上點蔥花增香，而且蒸得剛好，鱔吃起來又滑又嫩又帶點爽的口感，味道鮮美鹹香！椒鹽九肚魚（108元）炸香以後的九肚魚外脆內嫩，魚肉是入口即化的質感，配上惹味的椒鹽香，但又不會太鹹，味道調得剛好！招牌拔絲海明蝦球（138元）蝦球的量比想像中的要多，滿滿一大碟，調味跟咕嚕肉差不多，但醬汁更濃，帶點拉絲的質感。蝦球是經過油炸以後再混合醬汁的，所以吃起來是外脆內爽滑的。四川回鍋肉（98元）這個辣中帶麻，辣味會比較突出，而且會有點甜，然後跟豬腩肉，豆乾，椰菜等炒在一起，咁起來很惹味，而且我覺得椰菜比肉更好吃，因為拆滿了醬汁！豬肉就爽滑彈牙！汽水（10元/支）

官涌熟食中心出名多好野食，有人氣米線又有地道大排檔。今次就同朋友飲下啤酒，食吓小菜🍻嚟到大排檔有幾款香口炸物都必點，包括避風塘軟殼蟹同椒鹽魷魚。差唔多台台都有叫椒鹽魷魚，我地就決定要個黃金魷魚。兩款小炒熱辣辣炸起，送啤酒一流。避風塘軟殼蟹好大碟，每一件外裏乾身香口，非常厚肉，入邊仲保留住有好多蟹汁，有啲仲有蟹膏。既惹味又肥美，推介👍🏻👍🏻至於黃金魷魚個粉漿厚度適中，入口酥化，充滿鹹蛋黃香味，又一推介👍🏻👍🏻另外，唔少得叫番個火鍋，一路滾住半隻麻辣雞鍋，烚下油麥菜，非常有風味。麻辣雞鍋好足料，有半隻雞仲有好多配料，幾抵食😆 最後叫多個特色小菜菠蘿拔絲咕嚕肉，可惜，唔知大廚唔記得走油定唔記得咗做拔絲，啲肉軟林林有點失望，有待改善🙌🏻總括嚟講，呢度地點方便環境企理，有特色小炒，有鑊氣，三五知己飲下啤酒食吓小菜最好不過👍🏻

My first ever time visiting the Kwun Chung cooked food centre. Wouldn’t normally dine at cooked food centres but I’d do it for good food 😆 A good thing about these very local #daipaidong is that THEIR PORTIONS ARR HUGE! My favourite were their 椒鹽鮮魷 and 薑蔥蠔🦑🦪 the fried batter was not thick at all, which was great as you get to actually taste the squid. Couldn’t believe their clay pot oysters were only $168 with 9 HUGE PIECES. The taste of ginger actually came through. Of course, their pepper salt