平民美食集中地 葵涌廣場逐層掃
2016-07-05
香港愈嚟愈多大型商場,呢啲商場裡面開嘅多數都會係啲中高檔次嘅餐廳或者連鎖店,好似葵涌廣場呢類平民商場,真係買少見少。雖然,而家嘅葵涌廣場同以前讀書時代嘅葵涌廣場,都已經有好多舖頭唔同咗,啲嘢食亦都貴咗,但依然有一種喺裡面「搵到寶」嘅感覺。可能大家對佢嘅印象都係頂樓好多嘢食,好多人,但其實,每一層喺啲賣衫賣雜貨嘅舖頭仔中間,都有啲好吸引嘅小食㗎!今次就等開飯仔同大家逐層睇下啦。

3樓

雪糕班戟  又一戟


Photos by winnielamlamlam & fatjasxogt

先由頂樓開始掃落去,呢間又一戟都算係幾耐歷史喇。舖頭門面放咗好多樣板喺度,耐唔耐就會有新款班戟出,每次行過,唔買都總係會望下。班戟有甜有鹹、有熱有凍,廿零三十蚊一件,又唔算話好平,但拎住件班戟食嗰陣又幾有滿足感,啲配搭都幾新鮮,煙鴨胸加蜜桃、焦糖脆珠、熱香蕉加朱古力、熱榴槤香蕉芝士、鹹牛肉等等。如果揀凍食嘅仲可以有多球雪糕,但就要自己小心配對喇,未必款款都咁夾㗎!班戟皮暖暖地,都脆嘅,但可惜蛋香味就差少少,熱食係扁形而凍食就筒形。

脆脆爆谷  Pop Pop Rangers


Photos by wall-eat & 圓圓 Eunice Chow

行行下街,離遠都聞到爆谷嘅香味,呢間爆谷店都有幾多口味揀,甜嘅有焦糖、朱古力、 牛奶、焦糖芥末等等,而鹹嘅就有避風塘、紐西蘭牧場之類嘅味,有選擇困難症或者貪心嘅朋友,畀多幾蚊就可以有兩種味mix。口痕嘅買包細嘅,邊行邊食都唔錯,好脆口,食下一粒食下一粒好快就食晒。

埋嚟試雪糕  YUMMY MUMMY


Photos by pat33ka & 金魚太太

如果你係葵廣嘅常客,對呢檔一定唔會陌生。基本上每次行過檔口,阿姐姐都會叫你試食下啲雪糕。10蚊3球、12蚊5球,雖然細細球,但都算幾抵㗎喇。荔枝味、菠蘿味、曲奇味等等都有,最近仲有榴槤味。除咗雪糕,佢哋仲有好多懷舊小食賣,冰糖胡蘆係其一,另外就係棉花糖。三色花嘅棉花糖都不過係15蚊,整到靚一靚,真係成棵花咁。呢排仲研發到minions棉花糖呀,有長形版同圓形版都幾得意,食落係minions最愛嘅蕉蕉味嚟。

人氣酸辣粉  東門町


Photos by Pen & 茱麗葉

呢間小食店,檔口前面永遠都企住一大堆人。講真,有時唔係話特別肚餓,不過見到個個都拎住一串串一兜兜嘢食,又會好想食下。鍾意食辣嘅朋友要試下佢哋嘅酸辣粉呀,堅係夠麻辣,頂得住嘅嗌大辣仲爽!而喺咁多款嘢食之中,炸燒賣係幾受歡迎嘅,炸到個皮脆卜卜,而中間依然係好軟熟,加埋椒鹽好惹味,蜜糖味甜甜地都唔錯。15蚊件紫薯手抓餅都幾大塊,煙煙靭靭,可以買嚟頂下肚餓。

2樓

鐵塔窩夫  Haru & P


Photos by eatnfat & mandymanlovefoodie

落到2樓,當然要提下呢間鐵塔窩夫店。前排人氣非常旺盛,即叫即整嘅窩夫要等成3個字先有得食,不過依家應該可以快少少。咁受歡迎梗有原因,窩夫嘅外形當然係其中一個主因,一件窩夫有成大半隻手臂咁長,上面嘅cream又夠多。款式又係另一個原因啦,好多款揀嘛,仲有港人至愛嘅抹茶同紫薯!不過,食落可能會有少少失望,因為佢嘅味冇expect之中嘅咁甜咁濃,係偏淡少少嘅,但係見到紫薯窩夫中間都有紫薯餡、抹茶味連個窩夫都真係綠色,又會加返佢少少誠意分嘅。

勁辣魚蛋  回味無窮


Photos by mandymanlovefoodie & Janbear

行行下街揀揀下衫想篤返兩串魚蛋,呢檔絕對係一個幾好嘅選擇,特別如果你係鍾意食辛辣嘅話,咖喱魚蛋好有咬口,彈牙㗎,而且佢隻咖喱嗰種香辣味係會令人上癮。勇者可以試下特別口味嘅飯,即係魚蛋飯同燒賣飯,頹得嚟又食得飽,而且味道唔差呀。

心機水餃  鄧媽媽過橋水餃


Photos by Miss K.fly & 出琪出琪

鄧媽媽又係另一個中學回憶嚟,佢都喺度開咗好多年喇,養大咗唔少葵涌區嘅中學生。啲水餃一係椰菜餡、一係韮菜餡,可以揀湯或者煎。無論點煮都好,都好香口,粒粒都係大大粒,多粒多汁,好有鮮味。唔止餃子,其實佢嘅紅油抄手都幾好食,辣辣地幾開胃,有時唔想食粉麵嘅 ,就咁淨叫一碟餃子/抄手都夠飽!

1樓

爆多芝士撈麵  名星小店


Photos by chyyoki & Yan_PIG

落到1樓,你就會見到好多人都拎住兜撈麵或者粟米,其實就係嚟自呢間舖嘅。基本上嚟得食一定係叫芝士撈麵或者撈烏冬,冇得解,因為啲芝士真係多到成碗都係,遮住晒啲麵,夠晒creamy夠晒吸引,啖啖都有芝士味。不過講明先,唔平㗎,一碗都要17蚊。如果加埋其他配料就成廿幾蚊碗,抵唔抵食就見仁見智喇,燒賣芝士撈麵係幾新鮮嘅配搭嘅。另外杯裝粒粒粟米都幾香,睇你鍾意牛油味、蜂蜜味、煉奶味定黑椒味啦,8-10蚊一杯。

地下

抵食海膽  問卷手卷專門店


Photos by jac_choi & loisssss

有睇 10間吸睛吸like海膽食店篇文嘅,就會知道葵廣有唔少手卷壽司店,今次同大家介紹第3間。呢間喺最底嗰層嘅手卷專門店,成檔檔口都貼滿晒手卷嘅選擇,多到係有啲難揀嘅,價錢由15至45蚊都有。呢度一樣都有好吸睛嘅海膽手卷,仲有得揀雙拼嘅海膽三文魚添,而以呢個價錢嚟講,啲海膽都算係幾鮮,唔多腥,但份量就……可能未食晒成條就已經食晒啲海膽。另外,佢哋都有唔少醬料畀食客自由加,海苔沙律醬都幾特別。

甜心糯米糍  長洲地道糯米糍


Photos by babyfooddoc & heyuling

呢檔糯米糍都幾出名,最傳統嘅芒果糯米糍啖啖都係果肉,好甜。另外佢哋都有唔少特別嘅口味,例如紫薯呀、水蜜桃呀、麥提莎呀、抹茶呀、榴槤呀咁,全部都好香甜。糯米糍皮係有少少厚,不過口感算係幾煙韌,買得過。


文:Kar

隨時接收最新資訊
讚好OpenRice專頁!
關鍵字
葵涌廣場
雪糕
壽司
海膽
掃街
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
試勻時令魚鮮 春旬廚師發辦推介
2017-04-27
迪士尼新酒店餐廳巡禮 米奇造型甜品最吸睛(有片)
2017-04-28
散水餅派乜好? 5個西餅以外的選擇
2017-02-20
【開飯熱店入圍名單巡禮】甜入心之選 城中人氣甜品店
2017-02-21
【開飯熱店入圍名單巡禮】觀塘有寶!一區食勻多國菜式
2017-03-07
原隻北海道海膽x日本鮪魚 天后新開Omakase店(有片)
2017-03-29
餐廳資料
更多
收起
本月熱門
【隨時更新】最後倒數!即將結業的老字號及人氣小店
2020-07-21
【隨時更新】零食速報 每周新款零食、酒品點評
6天前
全城抗炎!北角酒店最新應變 自助餐都有得外賣?
2020-07-17
全城抗炎!送上門懶人煮食包及套餐大合集2.0 花膠燉湯/火鍋/鐵板燒
7天前
全城抗炎!屋企都嘆到三層架下午茶 Tea Set外送/外賣自取推介
2020-07-23