香港有拉麵店就做呢個pair up嘅menu嘞,係呀,拉麵配手工啤,好似比較少有。佢哋預設咗4道具北海道風味嘅菜式配4款由小樽釀酒廠北海道麦酒醸造出產嘅手工啤酒,成餐都好有北海道嘅味道,食完就當去咗先啦。
昆布味三文魚配味噌忌廉汁x小樽麦酒Ale
呢隻小樽麦酒Ale味道比較濃烈,就咁飲可能唔太容易入口,但係一配埋甜杮味噌醬同帶鮮味嘅三文魚,就即刻中和返之餘,仲可以同時食出甘同甜兩種口味,係豐富嘅。
北海道海膽和牛配南瓜糰子x小樽麦酒Amber Ale
和牛同海膽本身已經係日本菜界別嘅寵兒,而家合體之餘再加埋甜甜地嘅南瓜蓉,就令到成道菜更加感覺甜甜der。所以就配搭呢隻酒味較濃、飲落又有微微酸味嘅Amber Ale,夾埋就有種甜甜酸酸,好開胃嘅感覺。
赤拉麵x小樽麦酒Lager
呢個配搭就同上面嘅啱啱相反,Lager味道清淡啲,易入口啲,而赤拉麵嘅辣肉醬同黑蒜油味亦濃啲,一重一淡,完美配搭。
北海道牛奶雪糕及桑果雪葩配蕎麥茶啫喱x小樽麦酒Pilsner
食甜品一樣可以配手工啤。蕎麥茶啫喱帶有啲果仁嘅香味同時又有啲甘甘地嘅茶味,北海道牛奶雪糕就好重奶味,而雪葩冰凍得嚟又有少少酸,一啖就食到幾種口感,再飲返啖少少苦嘅Pilsner,仲唔係苦中一點甜?
隨時接收最新資訊
讚好OpenRice專頁!
關鍵字
中環
拉麵
手工啤
北海道
Gogyo
複製到剪貼簿