影片
更多
2011-10-19
186 浏览
早前見到雜誌嘅介紹，知道尖東有間蠔吧，價錢超筍，比得上批發價，所以今晚一於同兩位好友踩場。Open Oyster位於尖東南洋中心地下，並非面向廣場嗰邊，其實係南洋中心與華懋廣場中間嗰條”冷巷”入面，雖然話”冷巷”，其實都頗闊落，擺咗兩行枱櫈，仲有好闊嘅路面可以行，但係始終都俾兩幅牆夾著，感覺比較差。好彩今日溫度唔高，我哋坐係露天嘅位置，都唔會熱，仲有陣陣微風吹過，都幾舒服。見到佢嘅櫥窗擺放咗十幾種蠔，已經好開心，諗住即叫即開，原來佢哋話唔止咁少，餐牌上有廿幾三十款選擇，即刻攞起嗰餐牌參詳一吓先。餐牌上好清楚寫明大細、產地、價錢等基本資料，亦有註明Best Seller或Highly Recommended嘅字眼，係唔錯嘅安排，但係就冇一個精簡嘅描繪，略嫌失色；另外，價錢都有兩個，一個係正常價錢，一般嘅法國蠔都係$40至$43一隻，比坊間平少少，但另一個係wine lovers’ discount，法國蠔嘅價錢係$25至$28一隻，嘩Jesus Christ，仲平過自己買番屋企開；咁點先算係wine lovers，原來只要order兩杯酒，就係wine lovers，一支wine，就當五
Open Oyster位於尖東南洋中心地下，並非面向廣場嗰邊，其實係南洋中心與華懋廣場中間嗰條”冷巷”入面，雖然話”冷巷”，其實都頗闊落，擺咗兩行枱櫈，仲有好闊嘅路面可以行，但係始終都俾兩幅牆夾著，感覺比較差。
好彩今日溫度唔高，我哋坐係露天嘅位置，都唔會熱，仲有陣陣微風吹過，都幾舒服。
見到佢嘅櫥窗擺放咗十幾種蠔，已經好開心，諗住即叫即開，原來佢哋話唔止咁少，餐牌上有廿幾三十款選擇，即刻攞起嗰餐牌參詳一吓先。
餐牌上好清楚寫明大細、產地、價錢等基本資料，亦有註明Best Seller或Highly Recommended嘅字眼，係唔錯嘅安排，但係就冇一個精簡嘅描繪，略嫌失色；另外，價錢都有兩個，一個係正常價錢，一般嘅法國蠔都係$40至$43一隻，比坊間平少少，但另一個係wine lovers’ discount，法國蠔嘅價錢係$25至$28一隻，嘩Jesus Christ，仲平過自己買番屋企開；咁點先算係wine lovers，原來只要order兩杯酒，就係wine lovers，一支wine，就當五杯，其實一個真正嘅lover，又何止兩杯呢？我哋今晚一於做wine and oyster lovers，不醉無歸。
其實我哋三個對白酒都冇咩認識，服務員就介紹咗一支紐西蘭嘅白酒Te Mania俾我哋，$335一支，見Robert Parker都評88分，應該唔會點錯，所以就叫咗一支；香味果然足，聞到幽幽嘅香味，唔會太濃烈，入口亦唔會覺太甜，淡淡的，容易入口，唔錯。
開蠔需時，我哋就先叫一客白酒煮青口及一客烤雞沙律；白酒煮青口，一碟八隻，唔算多，不過$98一客，差不多啦，選用嘅當然唔係藍青口，但樣子頗肥美，亦唔覺韌，ok，但嗰白汁則唔夠味，偏淡，既然唔係選用靚青口，嗰汁就顯得更為重要，改良一吓，相信會更好；烤雞沙律，$78，只得三件雞，雞件唔夠嫩滑，雞皮亦烤得唔夠焦脆；菜，都算爽脆，但有些少澀味，沙律醋亦唔多足夠。
生蠔未到，我哋已經把Te Mania喝完，服務員就介紹咗另一支德國白酒Burd Layer Schlosskapelle俾我哋，$295一支，比Te Mania平少少；色澤與Te Mania差不多，但比Te Mania香，而且餘韻更長，感覺亦比較複雜，但我哋反而覺得Te Mania比較適合我哋，因為簡單，易入口，而且今晚嘅主角係蠔，唔係酒，所以越簡單越好，哈哈。
第一盤，係Roumegous, Fine de Claire & Ecailles d’Argent，睇嗰樣，都覺得唔錯，夠肥美，食入口，亦冇蠔碎，仲有海水味，基本上已算合格；Roumegous，味鹹但唔濃烈，肉質飽滿，略為creamy；Fine de Claire比較纖瘦，但爽脆，鮮甜；Ecailles d’Argent，比較鹹，亦爽脆，但餘香較前兩者長。
第二盤，係Ancelin, Royale Cabanon & Gillardeau；Ancelin，鹹度適中，爽口，鮮甜，餘韻悠長，而且有一種獨特嘅味道；Royale Cabanon則先鹹後鮮甜，非常爽脆，聽聞這種蠔嘅產量很少，因為每平方米只可養兩隻蠔，營養價值比其他蠔高；Gillardeau，則比較瘦，但海水味重，亦是先鹹後甜。
第三盤，係Tsarakaya & Muirgen；之前對Tsarakaya冇什好感，但今晚要改觀啦，有海水味之餘，唔會太鹹，肉質爽脆 (之前覺得比較creamy)，但覺幼細，蠔味十足，有一種剛柔並重嘅感覺，而且餘香帶有鮮味，非常好食；Muirgen，頗大隻，海水味重，但唔及Tsarakaya爽口。
八隻過後，支Burd Layer Schlosskapelle亦俾我哋喝完，覺得未夠喉，開多支Te Mania，每人再叫多四隻蠔，因為法國蠔都差不多俾我哋試齊哂，服務員就建議我哋試吓澳洲嘅Tasmanian再加Pousse en Claire，以及Ancelin & Tsarakaya；Tasmanian體形比較細，海水味亦唔及法國蠔，肉質略帶creamy；Pousse en Claire與Fine de Claire相近，體形纖瘦，肉質爽甜；至於Ancelin，一樣咁鮮甜、清香，但Tsarakaya則不及頭輪肥美。
一輪衝刺後，大家都想搵d熱食，叫咗嗰US Angus Rideye $198和三隻8”澳洲虎蝦，每隻$78，其實都唔平。嗰塊rideye，足足有18安士，非常厚身，亦好大塊，我哋要求medium rare，見大廚用嗰不銹鋼夾，係嗰燒烤爐上面，先燒焦兩面，再將塊rideye垂直夾起，燒焦四邊，跟著，就將塊rideye斜切，切成一片片，方便我哋义來吃；將塊rideye切開，見到入面通紅，好似略為生咗少少，不過生d，總好過太熟，都ok，不過肉質一般，比較嚡口，肉汁亦唔夠豐富，只屬一般水準；至於澳洲虎蝦，比預期細，講真冇8”咁長，頂多都係得6”，$78一隻，偏貴，肉質挺身，但唔爽，冇蝦味，亦唔夠惹味，完全唔抵食。
埋單$2,800，每人平均九佰幾，就算唔計熟食，平均每人食咗一打生蠔和一支白酒，每人都唔駛一仟蚊，非常抵。
總括而言，Open Oyster嘅生蠔種類頗多，亦夠新鮮，而且價錢係超抵，仲平過買番屋企自己開；酒嘅選擇唔多，但價錢大眾化，抵飲抵食；至於熟食，則非常勉強，講真，連廚房都冇，又何來美食呢？不過以呢個價錢，食到咁多款式嘅法國蠔，會再來幫襯。
张贴
