Cafe Whale

营业中

休息中

見到呢一間Burger店D Burger好Fusion都幾過癮，於是決定入去試吓，原來Burger之外佢D小食都幾搞鬼，我二話不說就叫咗呢一個腐乳味薯條，以$42嘅價錢又真係一D都唔貴。佢係有腐乳粉再加一粒乾腐乳，D腐乳味同D薯條又真係幾夾woo。跟住叫多個番薯條試吓，甜甜地都幾好食。佢個炸魚件專登寫住魚市場直送，好似好正咁咪又試吓law，佢嘅味道又幾OK，估唔到炸魚件都有鮮味，唔怪得要寫到明係魚市場直送啦。好喇，終於到Burger喇，我揀咗最貴嘅手打騸牯牛Burger，其實都只係$108，我覺得好好食，D牛肉好Juicy，而且牛肉味都幾出，好掂。呢間店整體都唔錯，值得推薦。

和牛、安格斯等高檔次牛肉用嚟做Burger都聽得多，不過手打騸牯牛呢個名字喺一間Burger店出現又真係有啲陌生嘅感覺，通常火鍋店先至有騸牯牛呢啲咁刁鑽嘅食材，不過呢間太安樓小店竟然有。刁鑽還刁鑽，最緊要味道好同埋要襯返個菜式，我試咗之後又真係覺得唔錯，感覺上好似脂肪少啲冇咁肥而且牛肉味都重，而且據了解騸牯牛每日供應真係唔多，所以有機會咪試吓囉。另外佢係人手帶嘅漢堡牛肉，所以有大細不一嘅層次感，食落去開心過用機打嘅漢堡扒，雖為人手打令師傅辛苦好多，但係始終用機打會打得太細緻，無晒牛肉嘅質感。

白色魚湯做湯底配魚蛋魚片頭嘅烏冬再加一碟麻辣魚扣，$68嘅價錢真心喜出望外，淨係個湯底已經值回票價，而呢一碗咁精彩嘅魚湯烏冬竟然係喺一間burger店食到，真係有趣非常。店員話白色嘅魚湯底係老闆每日喺魚市場買新鮮魚返黎，先煎一煎佢然後再煲，最後成為呢碗烏冬嘅湯底，所以佢嘅鮮味會特別出。呢個魚扣聽講係花尾躉魚扣，本身好大個嘅，大過常見嘅烏魚扣好多，食落煙煙韌韌，如果唔講仲以為自己食緊無豬羶味嘅豬耳。

之前食過呢間舖頭的香港仔分店，味道幾好同D野食真係好有誠意，原來西灣河太安樓都開咗，於是就幫襯下。今次叫咗霹靂雞扒漢堡、炸薯角同封門柳沙律三樣野，樣樣味道都唔錯，封門柳沙律同雞扒漢堡都有驚喜。封門柳沙律個賣相好靚，好有文青feel，沙律菜好新鮮好味，不過最重要就梗係D封門柳啦，封門柳嘅牛肉味好香濃，配柚子醋好好味，真係非一般的牛肉沙律。個雞扒Burger係店長介紹嘅，佢話沙律已經有牛就不如Burger食雞啦，於是就叫咗，味道真係唔錯，件雞扒煎得好香而且幾Juicy，個包入面D生菜又係好fresh，整體都唔錯。我自己鍾意食炸薯角多過薯條，呢度有就梗係要試下啦，佢嘅著角味道真D，唔似嗰D一咬開只見薯仔粉，又係唔錯。

去Burger店唔食Burger都真係好奇。去Cafe唔飲Coffee又真係好奇。我就係好好奇咁樣走咗入呢間Burger店然後問店長唔食Burger可以食乜之下店長叫我試吓佢個鮮魚仔湯烏冬加麻辣魚扣。我好想講個魚扣先，因為我真係以為係豬耳，我仲專登問店長點解會變咗做豬耳，店長表示佢真係魚扣黎架，不過個魚扣好大個所以切絲再加麻辣汁上碟，老老實實，佢個樣同口感真係好似豬耳仔，附上近照一張。魚湯烏冬個湯真係無得頂，奶白色嘅湯底，鮮甜嘅魚味，一D都唔鯹，店長話係自己去街市買鮮魚煲嘅，估唔到一間咁嘅小店都有咁高質素。

呢度D小食真夠創意，薯條係會有腐乳同地寶魚味(聽都未聽過)之外，佢仲會有烤焗魷魚乾同烤焗鱔仔乾，梗係要嗌黎試下啦。烤焗魷魚乾其實即係好似以前街邊食到嗰D烤原塊魷魚乾咁樣，不過佢已經幫你剪開咗，等你易D咬。烤焗鱔仔乾就係咁樣，雖然兩樣都好食，不過如果魷魚乾同鱔仔乾兩樣之中，我個人比較鍾意鱔仔乾多D，貪佢夠香脆，始終魷魚乾令到牙骹攰D。我仲叫咗個慢煮日本雞胸沙律，揀了芝麻汁，唔知係唔係因為慢煮嘅關係呢？佢D雞胸一D都唔鞋，估唔到呢D小店都有咁嘅水準，真係臥虎藏龍。D菜好新鮮，個芝麻汁同個沙律又好夾。Main Course當然要試佢個Burger，因為嗌咗太多野所以諗住輕巧D食個魚柳包就算，佢個魚柳包做得唔錯，雖然都係炸魚，但係難得無乜雪味，佢Menu寫住漁市場直送，呢間野似乎真係有D料到。

原來Cafe Whale除了香港仔的總店之外亦喺西灣河太安樓開了分店，作為柴灣居民以後唔洗山長水遠去幫襯。呢間店雖然叫做Cafe，不過其實佢D精心炮製的漢堡包先至係主打。佢地嘅Burger雖然有好多款，不過今次我最後都係決定食手打騸牯牛漢堡，另外再叫了一個腐乳味薯條，因為好似幾特別同埋出面其他地方好少見到。呢個就係食手打騸牯牛漢堡，因為Cafe Whale所以喺個包上面印咗個鯨字。入面的騸牯牛肉漢堡扒牛味好香，食落去好有唔同大小Size的肉的口感，呢種口感係一定係要人手打先至有，用機打一定會無晒，因為會打到好幼細，另外我想講嘅就係佢個Burger入面用的蔬菜新鮮得黎感覺上比較嫩，真係唔錯。腐乳味薯條其實就係腐乳粉再加腐乳醬，腐乳粉就好似麥記的shake shake粉咁嘅作用啦，唔會好鹹，味道唔錯。

是晚於西灣河太樓竟然沒有進行掃街式的嚐試不同小吃，反而光顧了一家新開的Cafe，此Cafe以賣漢堡包為主打，甚是有趣。我點了兩樣東西，分別是炸雞鎚和魚柳包。炸雞鎚一共有5件，炸雞鎚的粉漿不太厚，而且沒有雪藏的味道，坦白說以$64的價錢而言真的價廉物美，配上此店的日本Suntory生啤真的令人暢快萬分。這個非一般的魚柳包全名為黑松露醬沙巴龍躉漢堡，黑松露醬的味道為沙巴龍躉炸魚柳起了畫龍點睛的作用，大大提升了沙巴龍躉的鮮味，另外值得一讚的就是魚柳魚中用選用的蔬菜，很新鮮且爽口，大大減低了漢堡予人飽飽滯滯的感覺。

今日試了這家Burger店，上Openrice先至知原來係新開無耐，味道唔錯，值得推薦比大家。餐牌上D Burger都幾有特色，我今次就試了余均益蛋黃醬牛脷漢堡，主要係因為余均益加蛋黃醬呢個combination已經殺晒。牛脷雖然係薄切，但係喺脷疊脷嘅情況之下，咬落去係好有牛脷嗰種質感，佢唔洗原條牛脷連埋D粗糙嘅邊位，反而小片小片揀D嫩口位感覺仲出眾。至於個余均益加蛋黃醬就蛋黃醬出味D，余均益只屬非常輕微嘅辣。薯條我就揀了地寶魚味薯條，其實就係將D薯條加地寶魚粉，味道都唔錯，中西合璧有特色。另外仲叫咗個炸雞鎚，幾好食，D炸粉唔會太厚，同埋我想講佢個醬好好食，唔係求其比D泰式辣汁你嗰隻，值得一讚。

下午茶時間喺太安樓一帶想搵間坐得舒服嘅餐廳真係唔客易，不過呢間新開無幾耐嘅餐廳就做得到。佢喺太安樓第三街，即係最入嗰度，靜靜地。Tea Time佢都有Mini Burger的選擇，不過因為唔想食咁多，所以最後決定叫一個沙律同埋一款小食。其實軟殼蟹同日本雞胸都好似幾吸引，不過最後都敵唔過封門柳，所以就叫咗封門柳沙律試吓。佢個封門柳嘅牛肉味都幾濃，有D咬口但係又唔算un，佢嘅沙律仲有柚子醋汁或者芝麻汁比你揀，我地揀了柚子醋，同D封門柳幾夾，另外佢D沙律菜都好新鮮，CP值都幾高。小食又係有好多款可以揀，我地就比寫住魚市場直送嘅炸魚柳吸引住，叫咗黎試一試。一份炸魚柳有6件，size唔算大，一啖一粒，點埋佢嘅Tartar Sauce就最正。食落去嘅感覺都真係同平時食到嘅好唔同，平時嗰D基本上點都有少少雪味，佢呢間嘅就真係無，而且仲食得出有輕微魚嘅鮮味。兩樣野食麵唔錯，下次要試埋佢D Burger先得。

今日在西灣河太安樓試咗一間唔錯嘅burger店，原來係分店，睇openrice見佢香港仔的總店都非常受歡迎，咁呢間野嘅野食又真係唔錯，唔怪得可以開分店啦。見佢嘅menu嘅burger都幾特別，例如余均益蛋黃醬牛脷漢堡、飛魚子蛋黃醬軟殼蟹漢堡同黑松露醬沙巴龍躉漢堡，個沙巴龍躉burger仲寫明魚市場直送添，問咗waiter邊隻好，佢建議第一次試就要試佢哋嘅signature手打騸牯牛漢堡，另外就試埋佢哋嘅腐乳炸薯條。個手打騸牯牛漢堡真係唔錯，唔知係咁係心理作用，我覺得騸牯牛嘅牛味真係香d濃d，大家試吓之後可以一齊分享吓。佢嘅牛肉夠厚，咬落去嘅口感特別開心，佢d蔬菜都幾新鮮，特別係個羅馬生菜，好正。腐乳薯條開頭以為好似腐乳通菜咁樣有一pat腐乳喺薯條上面，原來佢舊腐乳好似硬芝士磨粉咁樣，有d似shake shake粉，咁樣食仲會方便咗。佢嘅腐乳味啱啱好，唔算太濃。呢間Burger店整體唔錯，下次可以再encore。

之前喺香港仔已經試過呢一間漢堡包🍔專門店嘅和牛竹炭漢堡同飛魚子蛋黃醬軟殼蟹漢堡，食材超新鮮，份量超大（對我來講），每次我都要求餐廳將漢堡切開一半，我先可以放入口😅西灣河分店有蛋黃醬墨魚漢堡，對於我呢個蛋黃醬fans真係超滿足，吉列墨魚勁厚身，咬落彈牙而且勁Juicy，切開即刻流晒汁，口感一流👍🏻👍🏻，太安樓雖然大把美食，但係冇諗過有咁高質素嘅漢堡。新舖仲有大把位坐，枱與枱之間都有足夠空間一啲都唔侷促，比起香港仔店真係舒適好多😂

最欣賞佢嘅軟殼蟹burger, 好juicy, 之前喺香港仔分店試過魚仲burger, 魚肉好新鮮, 未試過喺其他burger店食過, 原來係去魚市場入貨，唔怪得知魚味咁鮮甜，所以知道西灣河開分店, 即刻過嚟試吓, 果然冇令我失望👍👍😋😋下次要試吓墨魚同埋和牛burger，仲有麻辣味薯條🍟