Cafe Whale

营业中

休息中

cafe 位置非常隱閉。在太安樓入面，最近惠康後門的一條巷。裝修簡約，座位大約20 個。可能因為位置隱閉，唔係太多人光顧。這裡是即叫即制。新鮮熱辣的漢堡，包體是外少少脆而軟綿。牛脷漢堡：牛脷薄砌，多層層疊成為漢堡的主覺。軟綿綿的感覺。醬汁多而不膩。很好吃。安格斯珍寶牛肉漢堡：牛肉真的很珍寶，size 非常厚和juicy .而汁也不會掉到一手都是汁，是剛剛好的分量。作為一個lady ,食要有儀態,拿著吃而手不會骯髒是很重要的事。蕃薯條： 上檯時有點小失望，因為覺得份量有點少。但一吃就覺得有驚喜。只能用老土地形容，外脆內軟。沒有其他形容詞更貼切。一口接著一口吃。雖然其貌不揚，但真的好吃。注意：趁熱吃完是好吃的秘訣。這些🍔都比sogo 區那些好吃太多了。但開在太安樓內，只係識食的才會來。地點雖然和價錢不太匹配，但用料實在，味道，大推

呢度的海鮮Burger有驚喜，所謂海鮮，其實就係軟穀蟹Burger同埋沙巴龍躉Burger，兩個都好味。飛魚子蛋黃醬軟穀蟹漢堡件軟穀蟹都幾大舊，你見佢凸晒出個包外面就知道啦。佢個炸粉好薄，所以咬落去唔會成口粉。佢D飛魚子撈埋入mayonnaise度，咬落去爆吓爆吓，可見廚師嘅心思。黑松露醬沙巴龍躉漢堡用嘅沙巴龍躉喺Menu上面寫住魚市場直送，真係食得出同一般魚柳包嘅分別，佢真係好食好多，完全Feel到龍躉肉嗰種骨膠原。黑松露薯條D黑松露粉無一陣電油味，同埋即叫即炸實好食嘅。見到隔離枱食呢個鮮魚湯烏冬好似好正咁，見到D魚湯白雪雪，而且出晒煙咁，下次黎要忍住唔叫Burger試吓呢個。

呢間雖然係叫 cafe，但係主打係食漢堡~ 依家終於由香港仔開到西灣河，太安街又有新野食啦！今次試咗兩個招牌既漢堡: 手打騸牯牛堡 vs 黑松露醬沙巴龍躉漢堡不得不讚係個包質地好，超香牛油味再加埋外脆內軟既質地，加埋手打既騸牯牛肉飽滿既肉香油香肉汁，加咗煙肉就梗係更加邪惡～黑松露醬沙巴龍躉漢堡，由魚市埸直送既新鮮靚魚製造～真係魚味十足而且肉質嫩滑食到一絲絲既魚肉質感，新鮮唔油膩唔會成口粉，配埋黑松露醬味道更加豐富，沙律菜又新鮮。值得等～個人覺得魚堡更出色更吸引～絕對值得一試～無聊小分享：沙巴龍躉其實係外來物種，好多係被人放生落海，但佢哋生長速度快生命力頑強，係有擔憂聲音會影響到本地海洋生態。所以，保護海洋由我做起，就等我食多幾個沙巴躉漢堡為香港既海洋出返一分力！（謎之結語）依家仲有個新既【5週年紀念脆脆枝竹羊漢堡】，等我下次就挑戰呢個啦～

去親Burger店都係食牛肉雞肉魚柳漢堡配薯條薯角，今日就反一反傳統，漢堡包同埋小食都叫咗啲特別嘢。個burger就揀咗芥末蛋黃醬吉列墨魚漢堡，至於個小食就叫咗烤焗鱔仔乾。先講個小食，所謂嘅烤焗鱔仔乾其實就係鱔嘅炸脆骨，夠香口卜卜脆好好食。佢上面好似落咗啲大地魚粉，所以特別惹味。以$48呢個價錢，呢間舖頭俾嘅份量都算多。個芥末蛋黃醬吉列墨魚漢堡非常好食，雖然個吉列墨魚其實即係厚身嘅炸墨魚餅，但係佢個墨魚滑做得好出色，入面特別加咗大粒嘅墨魚粒，所以咬落去嘅時候有層次感，同手打牛肉漢堡扒同出一轍。佢個吉列墨魚好厚，咬落去好開心。芥末蛋黃醬都調得幾好，真係值得試吓，唔使下下食啲傳統款式嘅burger。

太安樓有幾間賣熱狗漢堡，老麥之外，得呢度有得堂食，星期六一於偷食。試新店一向食基本牛肉漢堡，試普通的包，即製，等左應有10分鐘。半自助形式，先點餐付款，自行取飲品，後坐低等食。包香軟，坊間食過之中最好。牛肉中間仍有粉紅色，口感可以，比老麥安格斯juicy, 只有Triple O可與其比併。菜整理得很好，免得吃時四處掉下狼狽。與一眾差不多價位之漢堡比較的話，可以是頭1、2位，五條友個錫紙整到個包濕淋淋最狼狽。包一罐飲品，＄80，少少貴。

揸車去拜年無意中聽到小儀喺收音機介紹呢一間Burger店，講到佢地選用來自香港仔的海鮮，啱晒又鍾意Burger又鍾意海鮮的我。一坐低先叫咗個炸雞鎚，味道唔錯，不過佢D配菜沙律幾新鮮，估唔到D拌碟都咁高質素。Burger就諗咗一陣，因為同海鮮有關的Burger就有芥末蛋黃醬吉列墨魚漢堡、墨松露醬沙巴龍躉漢堡同埋飛魚子蛋黃醬軟殼蟹漢堡三款，最後我揀了比較少見的軟殼蟹Burger。炸軟殼蟹的好處就係感覺似啖啖肉嘅蟹，因為可以連殼都食埋(其實最正就係個殼)，另外個蛋黃醬加埋飛魚子，一邊食一邊會有咬爆魚子的脆口感，配得非常恰當。食Burger又點可以無薯條呢？呢度嘅薯條款式真係多，又黑松露又腐乳又地寶魚，不過最後我揀了炸番薯條，好鍾意炸番薯條的微甜。呢間店D野真係唔錯，下次去會試埋墨魚Burger同龍躉Burger。

今日去太安樓幫襯左一間專食漢堡包嘅小店，佢嘅漢堡包都有幾多款式，有啲仲好特別嘅。平時和牛安格斯牛嘅漢堡包出面都好常見，不過今日試咗一個幾特別嘅，就係手打騸牯牛漢堡包。上網search騸牯牛原來就係閹割咗嘅牛，刁鑽得嚟食落個味道又真係同平時食到嘅唔同，佢嘅肉質比較嫩而牛肉味亦都比較濃，入口又唔會好似和牛咁比較膩，我好欣賞佢係人手打嘅漢堡扒，入口會feel到有粗有幼，頗有層次感，另外嗰啲配菜都幾新鮮。食漢堡包又點可以冇薯條呢，所以小食我就揀咗黑松露薯條，啲黑松露粉冇電油味，佢嘅薯條係即叫即炸熱辣辣好好食。

去Burger店唔食Burger係乜野玩法？咁呢間店個名係有Cafe呢一個字，咁我今日都有飲到咖啡嘅，佢杯咖啡都唔錯，我叫的是Hazelnut Latte，佢個Hazelnut好香，值得一試。其實我本來係想食Burger嘅，不過坐低見到隔離枱叫咗個魚湯烏冬好似味道唔錯，D魚湯好香，我坐隔離都聞到，於是就叫黎試下。佢個Set係咁嘅，一碗魚湯烏冬，入面有兩粒魚蛋同兩粒魚片頭，粒魚片頭仲火炙咗Cafe Whale個「鯨」字落去，魚蛋同魚片頭都好食，有D料到，不過最有料到嘅係個魚湯，白色嘅魚湯要用幾種魚先煎封再攞去熬湯先至會出到呢個效果。另外仲有一小碟麻辣魚扣，真係活用成條魚一D都無嘥，個魚扣都幾爽幾好食。

今次再黎幫襯，食左個安格斯珍寶牛肉Burger，好有肉汁very juicy，肉質唔鞋會太老，整得岩岩好，有pink meat feel。個包又夠香脆都唔會淋晒，真係一間整個漢堡包由內到外都好有要求的Burger店。漢堡包水準仍然Keep到，同上次一樣咁好食，同埋真係即叫即做，所以送到黎嘅時候係熱辣辣好新鮮，味道一定加分，對得起$80呢個價錢。買Burger仲送汽水，都真係物超所值，大家真係要去試一試。

呢間Cafe啲漢堡包真係又好多款式(好似有9款)，而且D口味都幾有趣，都係D fusion野，我就揀了霹靂雞扒漢堡，見佢個英文名Peri Peri Sauce唔知會唔會好葡萄牙菜feel呢。佢個Burger上嘅時候已經切開咗一半，咁又真係易D食，平時成大個咁好多時都真係有D難搞。試咗佢個霹靂汁(Peri Peri Sauce)又無乜葡萄牙菜feel woo，不過個味道真係幾好，件雕扒都幾新鮮。我另外再order咗一個小食，佢D小食又係有好多選擇，我最後決定唔揀薯條反而叫咗個炸魚柳，Menu話魚市場直送，咁食落又係好好味woo，雖然係炸魚不過佢D肉質好有彈性唔會淋pat pat。汽水係跟Burger送嘅，真係令人開心。

這家漢堡包店有很多非常有特色的Burger，其中令我比較有興趣的就有(1)手打騸牯牛漢堡，(2)飛魚子蛋黃醬軟殼蟹漢堡，(3)余均益蛋黃醬牛脷漢堡及(4)芥末蛋黃醬吉列墨魚漢堡，最後我就揀咗手打騸牯牛漢堡，而我個Friend就揀咗余均益蛋黃醬牛脷漢堡。呢間舖頭都幾細心，因為佢將d Burger切開一半，咁我哋就方便啲兩款口味都可以試晒。先講個手打騸牯牛漢堡，味道唔錯，唔會為gimmick而亂咁黎。我覺得佢嘅牛肉味都算重，而且因為係人手打所以食得出d肉入面有粗有幼，有層次感。至於個余均益蛋黃醬牛脷漢堡都幾好，佢用嘅牛脷都幾軟熟，同埋佢個醬同d牛脷都幾夾，有驚喜。另外我哋仲叫咗個薯角同埋黑松露薯條，因為食Burger如果唔食薯條就好似差咗d野咁。兩樣都好食，薯角唔會入面好粉，黑松露薯條d黑松露粉又唔會好電油味，真係唔錯。

呢間主打食burger🍔，裝修簡潔舒服，入到去冇乜人，兩條友可以慢慢嘆安格斯珍寶牛肉漢堡 有肉汁，配菜夠新鮮，仲好多醬汁 係食時有點呢hea，因為個碟好細，食到出哂界和牛竹炭漢堡 口感和安格斯差唔多，反而竹炭包就冇乜特別，都係揀返正路嘢好flat white 口感幼滑☕️，估唔到咁得話說嚟太安樓，係睇過KOL大推呢度美食，又話港版士林夜巿，去到完全係兩回事，試咗幾樣推介，真係麻麻，幸好搵到呢間較優質burger店，能慰藉一下

每次到西灣河太安樓都是「掃街」式的吃吃吃，不過自從光顧了這家Cafe便將我的一貫作風改變了，今次沒有吃漢堡包，卻品嚐了一碗非常出色的烏冬，配料有魚蛋和魚片頭和兩顆，兩者均很有彈性而且亦很鮮味，不過說到鮮味，真的不能不提它的雪白色湯底，鮮味十足，它是將多條新鮮小魚煲出來的鮮魚湯，完全沒有魚腥味，似乎老闆對食物的要求非常高，我亦將整碗湯都喝掉。餐牌上原本是跟麻辣魚扣的，但光顧時魚扣已經售罄，店員跟我說會改為話梅小番茄，味道有驚喜，想不到廚師將小小的番茄先去皮，雪凍後再加話梅粉，酸酸甜甜的清新感覺令人心曠神怡，是一個很好的選擇。

近排因為睇劇關係，連續食咗好多次漢堡🤣上星期食咗呢個漢堡因為未食過呢個牛肉：騸牯牛Order前還上網做咗功課。原來是：騸牯牛即閹牛，公牛被閹割後的激素較少，脂肪分布因而較平均，不像和牛般入口膩滯所以有一點期望。這個晚餐$133，一個漢堡，一包薯條先食薯條…脆，但有一陣怪油的味！好濃烈的其他食材的怪味….有點蔬菜味及苦味！包，香脆ok的,醬是千島，沒有甚麼驚喜。蔬菜有紫萵苣及苦苣，新鮮爽脆的，值得欣賞。可惜食到中間蔬菜太少，而且苦苣給千島浸到軟軟，失去了活力！如果這時有一點點洋蔥香甜勁度就更好。咬一大口牛肉，老咗！我期待是pink !因為見到其他食評照片都係pink !牛肉本身夠香的，但太瘦太乾，而且有點太咸！因為沒有太多脂肪，鹽一多就會太咸。這餐只算合格。

香港仔名物分店開喺西灣河太安樓真係令人開心，我入到去問老闆有乜嘢好介紹佢竟然介紹我食烏冬係乜嘢玩法？佢嘅秘製鮮魚仔湯烏冬會麻辣魚扣又真係冇介紹錯，個魚湯烏冬好足料鮮味好出，老闆話係喺街市買新鮮雜魚仔淆出嚟嘅魚湯，果然有料到。入面再魚蛋同魚片頭，兩樣都好食。跟埋一齊上嘅麻辣魚扣又唔係真係好辣，口感唔錯，爽口彈牙，印象中出面好少地方食得到，推。再問佢仲有乜嘢好食，佢又叫我試吓香煎封門柳沙律。個沙律一上枱賣相好靚，好有田園feel，啲風門樓真係幾好食，有趙口而且牛肉味好出，啲菜都好新鮮，推。之後再加咗個黑松露薯條，都幾大份，黑松露粉好香，推。