Cafe Whale

营业中

休息中

今日試了騸牯牛Burger，我鍾意佢D牛肉味濃D但係又唔會好重油脂，唔會食到成口油，所以食嘅時候就唔會食到一半已經好漏，佢唔似安格斯或者和牛咁樣D油會比較多，令人食嘅時候好快就飽飽滯滯，呢樣野真係可能只有騸牯牛先可以做得到。原本打算叫個黑松露薯條，不過原來夜晚堂食有細薯條送，所以就無叫到黑松露薯條，佢個薯條雖然係免費贈送，不過以半份薯條黎講份量比想像中多，仲要係新鮮炸出黎嘅，一D都唔孤寒。另外佢仲送埋汽水，咁樣以百幾蚊黎講都算幾抵。

呢一份魚湯烏冬看似簡簡單，不過真係唔好睇少佢，佢嘅烏冬、魚蛋、魚片、魚片頭、入面嘅娃娃菜同埋個話梅番茄仔都唔係個重點，佢最有驚喜嘅就係個魚湯。奶白色嘅魚湯一飲就知係真材實料自己搵魚去煲，如果你知道點煲一個靚魚湯嘅話你就會知道有幾多功夫，洗魚仔仲要係好多條，煎香啲魚肉再落熱水淥佢一淥，然後先再去煲，先會出到呢種鮮味，合成野罐頭紙盒裝魚湯點都做唔到呢個味道。重點係呢份野嘅售價只係$68，似乎老闆開錯價。

一條友入到去只係叫咗三樣野食，店長已經話Lunch Time會唔會太豐富，仲叫我叫少樣唔夠先至再加，我話唔洗因為實食得晒，同埋真係想試呢幾樣野。講緊嘅就係一個安格斯Burger、一份招牌炸魚柳同埋一份炸番薯條，再加一罐可樂。炸魚柳係呢度嘅名物，老闆係用新鮮魚整嘅(聽講係龍躉)，一咬落去已經feel到D魚油嘅香味，另外件炸魚柳入面新鮮魚肉嘅質感亦都係非常正，另外佢D拌碟沙律菜都幾新鮮。個安格斯Burger都幾抵食，件漢堡扒好厚身，咬落去嘅時候D肉汁標出黎真係好爽。佢D安格斯真係幾香牛肉味，似乎安格斯牛肉嘅含量都幾高。食番薯條唔食薯條嘅原因好簡單，就係薯條好多地方都有，反而番薯條唔係成日都食得到。佢D番薯條係新鮮炸嘅，一食落口就知道唔係翻炸又或者一早炸定喺度。

今日又去幫襯，老闆叫我試吓新嘢，咁咪試吓囉，我最鍾意做白老鼠。呢個新包嘅名都幾巴閉吓，叫做花雕雞油一夜干馬友漢堡，顧名思義即係先將新鮮馬友魚柳熟成一晚再用黎做Burger，有少少鹹魚feel，再用花雕同埋雞油去吊返出馬友嘅鮮味出嚟，都真係玩得好刁鑽吓，佢個花雕酒仲要俾你自己噴，成個香水樽咁樣好靚仔，可惜唔記得影相俾大家睇吓。呢個包$128，驟眼睇落去好似高咗少少，不過味道真係唔錯，再加上心機錢功夫錢，值得一試。

見到太安樓呢間burger一直都好想試 今日終於有機會嚟試😋由於位置比較偏僻 所以人流都比較少 我平日夜晚嚟到都無乜人(˶‾᷄ ⁻̫ ‾᷅˵) 餐廳位置闊落 都幾好坐 比一般burger餐廳舒服 餐廳仲好貼心咁提供紙巾同埋酒精搓手液 呢個位都幾加分✨❣️黑松露醬沙巴龍躉漢堡 ($92)有驚喜‼️首先佢嘅包真係非常鬆軟 包面烘得脆 完全做到外脆內軟嘅口感 係我食過最好食嘅包🥺入面塊魚都幾有驚喜🐟真係同普通魚柳唔同 係平時酒樓食開個啲龍躉嘅味道😚肉質新鮮嫩滑 夾埋黑松露醬 味道更豐富🤤另外佢6點後會送薯條 好抵‼️薯條即叫即整 熱辣辣～burger高質! 夜晚呢個價錢包埋薯條同嘢飲真係好抵‼️餐牌都幾多各類種類嘅burger可以選擇 都幾特有創意幾特別 會想試哂佢所有款式🤣🤣而且店長親切有禮 絕對會再嚟食😋推薦指數：🌟🌟🌟🌟【𝐏𝐫𝐢𝐜𝐞: 4/5 𝐅𝐨𝐨𝐝: 5/5 𝐄𝐧𝐯𝐢𝐫𝐨𝐧𝐦𝐞𝐧𝐭: 4.5/5】

2023.9.13 星期三 3:30pm平日下午去太安樓比較靜，好多鋪都落場，而Cafe Whale都繼續營業，去歎個下午茶很休閒舒適😌••••••••••••••••••••| 手工騸牯牛漢堡 | $108🐂🧀🍔包超脆，騸牯牛好香好多汁，手打一粒粒有口感。芝士味不明顯，但整體配合醬汁已經好夠味。| (期間限定) 鳳梨櫻花蝦堡 | $98🦐🍍🍔櫻花蝦餅都夠脆和彈牙，鳳梨是凍的台灣鳳梨果蓉，冰涼酸甜，將櫻花蝦堡的味道升級，好清新。Tea| 炸魚仲3件+薯條 | $45🔥🐟🍟即炸的炸魚好夠熱，鬆脆得來又鮮，魚味和油脂香味好出。薯條就比較普通，口感有點粉。所有漢堡送汽水••••••••••••••••••••這裡用的食材很新鮮，吃完都不覺膩，十分推薦！

黎呢間Cafe通常都係為咗食佢嘅burger，不過今天有d例外，因為準備叫野食嘅時候，排我前面嗰個人叫咗個魚湯烏冬，跟住我就聽到廚房話魚湯烏冬淨一，咁我就一於唔客氣來個海底撈月，叫埋最後一個魚湯烏冬。呢個車厘茄好好食，係冷盤黎嘅，去咗皮嘅，面頭落咗少少話梅粉，令到個車厘茄更鮮甜。主菜來了，個魚湯好似d咖啡咁打咗泡，所以好滑，個湯底好足料，應該真係用鮮魚自己煲，否則唔會咁鮮味。入面嘅魚蛋同魚片頭都好食，以$68黎講真係超值，仲送汽水。

太安樓食Tea真係有D難度，最主要係無乜得幾間可以坐得舒服，就算有嘅，下午茶時段又會落場唔開門做生意，不過呢一間Cafe就解決晒以上嘅難題。因為個Friend話Tea Time想食得健康D，於是佢就叫咗封門柳沙律，佢嘅份量都好足，D封門柳唔會得三幾片，而且個肉質同味道都唔錯，而D沙律用蔬菜都幾新鮮，唔會有出水嘅情況，仲有得揀芝麻醬同柚子醋，真係唔錯。至於我就梗係邪惡D揀咗個炸魚柳件，佢呢度個名叫魚仲，一份有5至6件左右，餐牌話魚市場直送，食落又真係同平時其他地方食到嘅好唔同，真係新鮮D，配菜都係用返封門柳沙律嗰D沙律菜而唔係求其用D下欄野，佢用黎點炸魚柳件嘅醬好正，唔好睇佢係白色就以為係沙律醬咁簡單，我覺得佢係用法式他他醬再溝沙律醬嘅。最後仲叫多份薯條，佢呢度嘅薯條即叫即炸，所以味道好正。

呢幅相衣家睇返都影得幾衰，不過呢個Burger真係好掂，由件騸牯牛肉漢堡扒到個麵包至到入面D醬汁再連埋個包入面D菜都係好食，而且明顯係新鮮嘅材料，$108連埋細薯條同埋汽水一罐都算合理。手打騸牯牛Burger真係好少見，對於漢堡包入面舊肉，我自己都比較prefer人手打instead of用機攪，因為人手打先至出到有粗有幼同大大小小的肉粒肉碎口感。個騸牯牛嘅牛肉味都幾出，唔會好似安格斯或者和牛一味得個Heavy的感覺，所以食完之後飽得黎又唔會好滯。

呢一個價值$68的魚湯烏冬真係不得了，CP值同性價比都非常高，聽講每日限量10碗左右，點解我會知？因為我叫咗最後一碗，之後有客人黎想叫，侍應姐姐話已經賣晒而且每日得10碗，Lucky!!一份魚湯烏冬仲包一份小食，可以揀麻辣魚扣或者話梅漬番茄仔，我揀咗麻辣魚扣，其實又唔算好辣，食落去有D似豬耳，煙煙韌韌都幾爽口。佢個烏冬都幾滑，當然最正係個魚湯，好鮮味，應該要用大量新鮮魚先煲到呢個雪白嘅魚湯，我全碗飲晒，好滿足。除咗烏冬之外，佢仲有魚蛋同魚片頭，都幾爽口彈牙。$68仲送汽水，物超所值。

還記得上次光顧點了回味無窮的魚湯烏冬，當時已決定下次要試這店的漢堡包，機會終於來了，點了芥末蛋黃醬吉列墨魚漢堡和安格斯珍寶牛肉漢堡，晚餐時間堂食還有免費薯條贈送，真的令人喜出望外。這就是吉列墨魚漢堡的真身，中間的吉列墨魚很有彈性，其實就是手打墨魚餅中加入墨魚粒，所以吃起來很有層次感和口感，配予的蛋黃醬亦和吉列墨魚非常匹配。安格斯牛肉漢堡的牛肉質素高，加上厚身的漢堡扒，實在令人欲罷不能，一邊吃一邊有很滿足的感覺。因點了兩個包，所以送上兩份細薯條一拼上，而且還送汽水，真正物超所值的一餐。

香煎封門柳沙律配芝麻汁$108真係物有所值，因為比起其他地方食到嘅類似沙律(通常係牛柳或者薄牛扒嗰啲)，佢呢度係用封門柳，牛味濃郁而且鮮嫩，同埋份量比想像中多，所以性價比算高。小食系列之炸雞鎚$64就相對平淡咗少少，不過味道都ok嘅，只係未有太大驚喜，喲拌碟嘅沙律菜質素都算高唔係求其切啲菜落去。小食系列之烤焗魷魚乾$48都幾香口，特別推介佢個醬，自家製好掂。主角出場，就係炸軟殻蟹Burger，佢哋嘅軟殻蟹似乎係自己炸而唔係出面交貨返黎，所以啲炸粉好薄身，而且件軟殻蟹亦唔會一大陣雪味。堂食仲有薯條同汽水送真心正。

喺太安樓一條比較靜既橫巷，見到有間新開既burger鋪，當然要試下避風塘軟殼蟹漢堡上網見到其他人個漿係飛魚子蛋黃漿，落左order先發現嗰日係避風塘風味，可惜😢個軟殼蟹真係炸得唔錯，粉薄得黎又夠脆，只係避風塘口味有少少辣，好食但好熱氣和牛竹炭漢堡個包有陣特別既竹炭香味，和牛漢堡有點太熟，但依然好juicy手打騸牯牛漢堡呢個肉味更重，口感比較結實，而且煎得岩岩好，比和牛竹炭堡更好味除左漢堡，下午茶既沙嗲牛肉麵亦係誠意之作，牛肉好食之餘 沙嗲味好濃，比茶餐廳更好食另外魚湯烏冬就飲得出係用鮮魚黎熬製，鮮得黎有少少腥味，我諗老闆要諗下點樣去腥整體黎講，食物質素係高既，可惜鋪頭位置唔好，平時比較少人行呢條巷，所以我中午1點半左右去，都係得2枱客。而由於係即叫即整既關係，人雖然少但依然要等15分鐘以上先有食物上枱。不過，係值得再encore既❤️

今天的主角是魚，不過在一家Coffee Shop食呢兩樣野(魚湯烏冬同炸魚仲(魚柳))感覺係有D奇，不過無所謂，最緊要好食。先來個小食，漁市場直送的炸魚仲，一份有6件，鮮魚味好香濃，而且好Juicy，唔會炸到乾晒硬晒，皮頭的炸粉漿唔會太厚，咬開件魚仲入面D魚肉係一梳梳嘅，新鮮程度都幾高，同埋係即叫即炸唔係炸定然後再翻炸。呢度嘅魚湯烏冬真心佩服，其實就係魚蛋魚片頭烏冬，不過個Selling Point要講「魚湯」呢兩個字，佢個魚湯應該係亮點。白白的魚湯無化學味無味精味，似乎真係用新鮮魚去煲，似係傳說中的雜魚湯，不過佢比一般雜魚湯嘅魚味會再濃D，但係又一D都無魚醒味。另外佢有兩粒話梅番茄仔，冷盤黎嘅，酸酸地，開胃好味道。

呢度嘅burger同小食都好出眾好出位。炸番薯條甜甜地好味道，店長話攤一攤先好食因爲即叫即炸，真係熱辣辣。炸雞鎚唔係一般食到嗰啲，佢係有一條骨露出黎嘅，加埋個汁好食喲。炸魚仲一碟5件，用新鮮魚黎整好似有喲浪費，始終都係用黎炸，不過味道真係唔錯，浪費喲都值得。鱔仔乾個個都話最正，脆卜卜點沙律醬好味道。吉列墨魚漢堡舊炸墨魚餅好好吃，食到入面有一粒粒墨魚粒，有啃口，個醬好似係蛋黃醬，好夾喲味。招牌魚柳包用新鮮龍躉做真係真材實料，新鮮野就係無得輸。