陵發潮州白粥 (已結業)

由朋友推介,一行四人約九點鐘到,都要攞飛等位,但都好快有位,點了:鵝片-幾大碟,又唔嚡。九菜豬紅:都唔錯。煎蠔餅:都幾多蠔,但略油。大眼雞一條:有魚味,肉又唔會好嚡,o.k.。三拼鵝腸,生腸,墨魚:鵝腸好爽,墨魚鮮,good。蠔仔粥:又係好味啦又多蠔仔。花生豬手:豬手夠淋,又好入味,正。腐乳通菜:這個腐乳就好咸,嗱到我Ｄ痱茲好痛,白飯２個加３支可樂,共$ 385 ,好滿足的一餐。

真的好好食, 一一定要試!

跟太座約好，買完年貨後即走去飛鷹來個港式扒餐。去到門口，赫然見到有十零人响到排隊，實在太誇張。決定放棄，沿住荔枝角道一路走，去到金鳳，仲誇張，有成二十幾三十人添，實在太離譜。正苦惱之際，忽然陵發出現响眼前，實在有食神...不嬲知道呢度牆上係冇餐牌ge，所以今次還原基本步，隨便叫幾碟例牌嘢就算...久未嚐韭菜豬紅，即刻嚟一碟。蒜蓉粒下得極多，極惹味；豬紅質感不嚡，大大件，韭菜冇渣，有水準...鵝片極嫩且不過肥，同陳勤記有得揮。惜鹵水味道温温吞吞，浪費咗D鵝片及伴碟嘅豆腐；出奇地碟底嘅花生味道甜甜，大大粒，食到唔停得口...蠔烙並唔係用慢火煎成餅狀，而係求其放入滾油酥炸而成，頗油，有D失望，好彩蠔仔都算大隻，補番數...再加一飯一粥，乜嘢傷風鼻塞，不藥而癒...

星期五適逢返shift，放晏，一個同事仔提議我和另一返shift同事等她放學一起吃飯，立即和議！一行三人選擇去打冷，陵發地點非常隱秘，即使同事仔帶路我也攪不清方向，但晚上九時多依然其門如市，餐牌上選擇不多，三個人點了豬紅韮菜，大眼雞（兩款我都不吃，但同事仔話好好味），還有豉椒灼蜆，煎蠔餅及蠔仔粥。豉椒灼蜆原來是將蜆灼熟再加豉椒汁，感覺有點怪，還是平時大排檔的豉椒炒蜆比較惹味；煎蠔餅鬆化，蠔仔大大粒，味道不錯；蠔仔粥用料十足，值得推介。另外叫了一枝大啤，三個女子，飽晒！陵發餐牌的食物全沒有標價錢，以上四餸一窩粥一大啤埋單盛惠$220。下次有機會想試試鹵水鵝片！

看見的食評，才留意到這間食店，所以便和辣椒女來試試。餐牌食物的選擇很少，最後選擇了鹵水鵝片、豉椒灼蜆和蠔仔肉碎粥。鹵水鵝片- 鵝片幾有口感，肉質也幾好，可惜味道唔多夠。豉椒灼蜆- 感覺都算新鮮，蜆肉幾爽口，但就沒有什麼味道，醬汁味道很淡，感覺奇奇怪怪。蠔仔肉碎粥- 蠔仔好大隻，可惜沒有什麼鮮味，加上胡椒粉又唔夠香。看見蠔餅大大件，好像幾得，下次有機會考慮試試。

平均一個月都會去三幾次。水準平均而份量適中，就算兩個人都可以叫三幾味。地方就比較大眾化(搬過舖己好咗以前仲好有排檔風味)。大眼鷄好味蠔餅正(次次都金黄色，唔係黑色啲千年油)鹵水OK，我就仲意生腸拼大腸

正~ 第二次黎~ 無價錢牌~都係海鮮價~ 但唔會太貴既~今次叫左4個送一支大金威$10大眼雞有40 / 50 / 60 蚊要左50~其餘果d都好好食~ 大腸拼鵝腸都好大碟~ 下面都係少少芽菜墊底~ 花生都係得幾粒.. (反而覺佢配菜唔夠XD)蠔餅一定好脆~ 邊邊粉會多D~~~ 爽呀XDDD埋單160~ (即係其他三十幾蚊左右) 飽~~~~~

連續幾餐出街食，真係諗到頭都大。難得太太有心水，即刻飛身試下啦。星期六晚7:30 未到，已經好多人，好彩咁有張二人，可以即刻叫野食。一心食打冷，鹵味點少得。馬上叫鵝片拼大腸、墨魚拼生腸、韭菜豬紅，再啤啤佢！冇幾耐，有個師傅出話：『鵝片拼大腸好少喎，不如三拼，鵝片單碟上。』冇問題啦！啤酒先到，嘩！之後各樣菜陸續上，個粥個飯先。鵝片幾瘦下，晒我胃口，肉質仲幾嫩滑，唔會太。墨魚冇乜味又淋，反而大腸有陣味；兩種都麻麻地！生腸勝在爽口煙韌，配埋辣椒油，好食！韭菜豬紅份量多，豬紅好大舊好實淨，但又唔會實的的。韭菜吸晒油吸晒汁，味道唔錯。個飯冇特別，反而個粥有驚喜，好綿喎！除知道支啤酒係$10 之外，其餘唔知價。總之埋單$160 蚊啦。以前打冷剩係識去九龍城，依家起碼多個選擇。

皇后碼頭之最後一夜,送別她之前與友人在太子新填地,打冷老字號"陵發"晚飯.雖然已霸佔左右兩大舖,七點多已差不多座無虛席,兩個人點四味,再叫支金威啤.本來想在對面士多買支古越龍山,可惜沒有,還是作罷.打冷一定會點味鹵水菜式,鵝片拼大腸,鹵水味豐厚,兩者也鹵得入味,鵝片就略略鞋口,大腸就肥美非常.內裏味道甘香.再來個韭菜豬紅,也不錯呢.兩味蠔仔菜,蠔餅煎得金黃香脆,蠔仔粒粒飽滿肥美,肥到咬落有水"必"出.兩個人分一窩蠔仔粥,已經差不多了.事後聽住太子多年的友人講,此店幾十年來,賣的東西也是來來去去幾樣,想找點新意思也沒有.堅守傳統,不折衷,總好過變到不倫不類,自取滅亡.埋單後,一同坐車到皇后碼頭,見証其最後一夜,身為死硬派的港英餘孽,眼前的此情此景,難免不勝唏噓...以後未來是個謎不必牽強說盟誓難料那夜再一齊LET ME TOUCH YOU ONE MORE NIGHT......

This is the my favourite Chiu Chow restaurant in Mong Kok and Prince Edward. Taste and environment are both good. Price is reasonable. Can park the car outside.