影片
更多
2021-09-14
2288 浏览
【TLDR】餐廳職員服務態度差，唔講明交枱時間在先但係成餐飯不斷催促我哋交枱，要我哋「遵守遊戲規矩」。更表示餐廳有錄低食客對話內容。食物質素一般，唔建議大家揀呢間餐廳，以免中伏。【事情經過】2021年9月12號我哋一行五人滿心歡喜嚟呢間餐廳食生日飯，一早訂咗6點枱，並且準時入席。訂枱或入席時店員冇講明交枱時間，只係話訂枱分6點同8點兩輪。食飯嘅時候已經感受到樓面同經理好心急執拾，我哋停低傾幾句偈，甜品都未食完就已經有人問枱面食物係咪唔要，係咪可以收咗佢。到7:19分，當我哋仲食緊甜品，就有職員過嚟執枱而且表示上埋個蛋糕俾我哋，我哋有講想遲啲先上蛋糕，但唔知職員係冇聽到定係不予理會，照攞咗個蛋糕出嚟。我哋再表示想食埋個甜品先食蛋糕，食唔落蛋糕住，職員先將蛋糕收起。我哋禮貌地問職員其實幾點要交枱，職員話8點。明白生意難做，其實我哋都好願意配合。但係見距離交枱時間仲有40分鐘，我哋覺得冇必要咁心急上蛋糕。第一，如果個蛋糕係驚喜，我哋未叫上蛋糕就由職員口中講上蛋糕，咁咪破壞咗個驚喜同大家食飯嘅心情；第二，其實我哋先係食客，仲要有俾切餅費，個蛋糕係應該我地決定幾時上同食，點解要職員幫我哋決定？第
【事情經過】
2021年9月12號我哋一行五人滿心歡喜嚟呢間餐廳食生日飯，一早訂咗6點枱，並且準時入席。訂枱或入席時店員冇講明交枱時間，只係話訂枱分6點同8點兩輪。
食飯嘅時候已經感受到樓面同經理好心急執拾，我哋停低傾幾句偈，甜品都未食完就已經有人問枱面食物係咪唔要，係咪可以收咗佢。到7:19分，當我哋仲食緊甜品，就有職員過嚟執枱而且表示上埋個蛋糕俾我哋，我哋有講想遲啲先上蛋糕，但唔知職員係冇聽到定係不予理會，照攞咗個蛋糕出嚟。我哋再表示想食埋個甜品先食蛋糕，食唔落蛋糕住，職員先將蛋糕收起。我哋禮貌地問職員其實幾點要交枱，職員話8點。
明白生意難做，其實我哋都好願意配合。但係見距離交枱時間仲有40分鐘，我哋覺得冇必要咁心急上蛋糕。第一，如果個蛋糕係驚喜，我哋未叫上蛋糕就由職員口中講上蛋糕，咁咪破壞咗個驚喜同大家食飯嘅心情；第二，其實我哋先係食客，仲要有俾切餅費，個蛋糕係應該我地決定幾時上同食，點解要職員幫我哋決定？第三，交蛋糕俾餐廳嘅時候職員亦冇講明最遲幾點切蛋糕。到大概7:30分，我哋想切蛋糕所以就同職員講可以上蛋糕，點知等咗十分鐘都冇人理。終於蛋糕嚟到，未夠7:55分職員就俾張單嚟叫我哋埋單。其實有眼見我哋蛋糕未食完，又收走咗我哋兩支叉。我哋仲要坐正喺收銀對面，其實係咪真係需要咁急？
我哋真係有啲嬲，所以唔滿意嘅說話講得有啲大聲。呢個時候陸經理就行過嚟講咗句：「出嚟食飯就係要講遊戲規矩」。出嚟食餐飯要講遊戲規矩都係第一次聽。有規矩都唔緊要，食飽你先講？街坊餐廳我哋都唔期望服務態度好好，但係第一句回應我哋就話要講遊戲規矩，唔知仲以爲佢先係客。而且喺爭論期間我哋有幾個唔滿意嘅地方：
#1
職員待客之道極差，特別係陸經理，唔客氣亦唔友善。整個過程都感覺唔到佢有認真聆聽食客意見，簡直係俾錢買難受。
#2
由book枱到擺蛋糕都冇職員提及交枱時間。店方唔講清楚規矩（或者陸經理所講嘅「遊戲規矩」）在先，食客又點配合？作為食客係唔會知餐廳booking情況，餐廳8點食第二輪唔代表我哋呢張枱有第二輪預約。如果張枱係急用就應該一早講定。 而且陸經理有提及因為有客人要影相之類所以要早啲出蛋糕。真係咁considerate就應該一早同我哋夾定而唔係喺壽星面前講，可見佢哋只顧自己而唔理食客感受。到底係理由定係藉口相信都唔需要多講。
#3
陸經理話第二次上蛋糕嘅時候因為有職員唔知蛋糕放咗喺邊所以遲咗上。理論上個蛋糕係要雪嘅，咁唔知放咗喺邊咁即係無放返入雪櫃定求其放埋一邊？你哋溝通不善點解要blame我哋？
*
#4
陸經理話餐廳個閉路電視有錄音，佢會聽返睇吓成件事係點。我哋睇唔到餐廳喺明顯位置張貼告示表明顧客進食過程中會錄影同錄音。大家出去食飯都係想開開心心傾下偈，如果唔想承受個人資料同對話外洩嘅風險，選擇呢間餐廳前請三思。
*
#5
陸經理表示自己唔想聽到客人話下次唔幫襯，要講清楚件事。但係我哋反映完意見都係得到唔禮貌對待。無論係上蛋糕定係埋單，我哋都係被通知。爭論過後靠「指導」同事俾說話食客聽。其實服務態度咁差，不如反省吓點解客人會話冇下次先啦。
【食物質素】
食物方面，我哋叫咗熱門菜式魚露浸花甲，生醃瀨尿蝦，咕嚕肉同蠔餅等等...生醃瀨尿蝦同魚露浸花甲基本上都係一個鹹字。瀨尿蝦個汁其實都係魚露，完全蓋過瀨尿蝦嘅鮮味，而且啲肉好淋，食落口一pat嘢咁，淨係食到鹹味，$288得四隻細細嘅瀨尿蝦，完全係overrated。花甲雖然大隻，但係有沙同埋肉質好韌。咕碌肉嚿嚿肉都又薄又乾，食到炸粉多過肉。其他食物味道同份量都係中規中矩，打住正宗潮州菜嘅名號，味道只係普通貨色，不值一試。福果甜芋泥真係好甜，有自備蛋糕就唔洗再嗌。而且咁趕時間都enjoy唔到食物啦。
我哋之後再翻查網上新聞，發現有食客今年2月底幫襯呢間餐廳之後集體食物中毒。同年3月底餐廳亦因違例記分制或因違反牌照條件或嚴重違規而被食環署暫時吊銷牌照7天 (Source link喺下面)。所以希望再次提醒大家決定幫襯呢間餐廳前請三思。
【總結】
結論係呢間餐廳食物質素一般、服務態度極差。我哋更曾經嘗試打去新蒲崗店反映意見，但聽電話嘅職員表示晚市忙緊，叫我我哋留低電話之後再打返俾我哋，但我哋至今仍然未收到任何回覆 其實今時今日咁嘅服務態度真係得？真係可以接受？如果咁多位消費者都覺得唔可以咁，希望大家同我哋一樣可以用行動去反映一下。
Source:
https://topick.hket.com/article/2890684/%E3%80%90%E9%A3%9F%E7%89%A9%E4%B8%AD%E6%AF%92%E3%80%915%E4%BA%BA%E6%96%BC%E5%A4%AA%E5%AD%90%E9%99%B3%E5%84%80%E8%88%88%E5%B0%9A%E6%BD%AE%E6%A8%93%E7%94%A8%E8%86%B3%E5%BE%8C%E7%97%BE%E5%98%94%E7%99%BC%E7%87%92%E3%80%80%E6%9B%BE%E9%A3%9F%E6%BD%AE%E5%BC%8F%E7%8D%85%E8%9A%B6%EF%B9%91%E9%86%83%E8%9F%B9
https://www.fehd.gov.hk/tc_chi/licensing/list_premises_suspended.html
张贴
