鏞記酒家

营业中

休息中

作為鏞記嘅常客，一定必點佢地嘅招牌燒鵝。夏天燒鵝嘅皮下脂肪通常比冬天少，肉質相對會較乾身，不過，今日隻鵝肥瘦兼宜，好好食。我地仲叫左一品雛鵝煲、南乳香酥小排骨、滑蛋炒蝦仁同百花釀蟹鉗，雛鵝煲真係好味，小排骨夠香口但我覺得偏乾咗少少；滑蛋炒蝦仁雖然係家常菜式，但要做得好並唔容易，今次呢碟嫩滑有蛋香，相當唔錯。裝修後鏞記更有味道，可能因為落雨客人無預期多，唔需要等位，非常幸運。

禮雲子蛋清是我在鏞記的必點菜式，大多數的人都從未吃過，甚至聽過它的名字，但它其實是雌性蟛蜞的卵子，口感近似蟹黃。熟的禮雲子像粉狀化的鹹蛋黃，散發著濃郁的鹹香味，配上蒸蛋清和白飯，口感細膩滑溜，味蕾層次更上一層樓，強烈推薦。不過值得留意的是，禮雲子的膽固醇偏高，要避免過度攝取。另一道讓人驚艷的是桂花蟹肉炒津絲，稱得上色香味具全，金黃的色澤讓人食指大動，入口濃濃的蟹香港及蛋香，芽菜爽口，搭配在一起口感一流。荷葉雲腿蒸斑球亦屬準之作，斑球吸收了雲腿的鮮咸和荷葉清香，嫩滑之中味道有層次，值得一讚。

防疫措施放寬之後就即刻拉埋班朋友去鏞記飲茶，試左碟燒賣和北菇揀手棉花雞。燒賣因為即叫即蒸，入面啲肉餡超香，啱晒我口味，啲皮蒸完之後完全無爛，連埋張相上面嗰粒大瑤柱，比佢地嘅真材實料驚艷曬。另外，香菇滑雞一啲骨都無，雞肉又滑又嫩，完全吸曬啲菇味，如果唔係一籠得一粒，我多多都食得落。整體食完，我真心覺得佢啲點心比一般茶樓整得好，不愧系老字號。

🐲《端午節 》應節食糭😋「蛋黃鹹肉糭」和「紅豆陳皮鹼水糭」， 用冰袋包裝好，內附一張食用方法🥰 煲30/20分鐘食得，好大一隻， 一咸一甜，啱晒😋可能對鏞記食物有啲期望，最後有啲失望，味道還可以，但料真的很少， 米佔8， 料佔2😢食糭最怕就係飯多過料，但給我偏偏遇上😔蛋黃鹹肉糭成個總入邊得一粒普通魚蛋大細既鹹蛋，一件麻雀還小嘅豬肉～完～紅豆陳皮鹼水糭有紅豆，但鹼水糭嘅味道好淡口。 因為太失望，唔記得咗影打開咗之後入邊個樣俾大家😔#鏞記#燒鵝糭另一選擇

爸爸生日，點名要去鏞記試下，一家人今日即日去食下lunch. 我今日即日打電話去，都訂到位，所以唔算多人。我們到達酒樓，待應都十分禮貌，會唔該前唔該後。大家如想食點心，記得要問佢地拎點心餐牌，因為一般餐牌只有小菜和小量點心。我們叫左必食我燒鵝（例），皮脆肉香，係好食既。其他叫燒賣、蝦餃、牛肉腸粉、蒸魚雲、咸水角、煎堆、鳳眼餃。埋單只係$750。唔算好貴。除左燒鵝好味，魚雲的湯底都都分足料，好有藥材味，咸水角即叫即炸，好香脆。

一直以嚟都好中意食鏞記酒家，所有嘢都好傳統好正宗，上次個職員介紹我試下佢哋個百花釀蟹鉗，作為一道好傳統嘅粵菜相信都好多人識，不過要做得好就好難，又要炸皮夠薄唔用甩，內餡又要夠鮮甜同鎖住肉汁。鏞記就依兩個點都做得好好而且仲大大件，真係好抵食。好多黑心酒樓所謂嘅釀蟹鉗都係全部粉嚟，連一啖肉都冇但就收到貴一貴，坦白講真係會有畀人呃嘅感覺，好彩依到就唔需要擔心，質素同份量都好合理，食落心理都平衡啲。可惜依個好似係限時先有嘅，唔知幾時先有得再食到。

日日睇得多新聞真係會搞到個人好唔開心，疫情好似永遠唔會停咁搞到做咩都冇心機，襯朋友得閒想一齊出去食返啲好嘢慰勞下自己，上網睇到鏞記最近都有啲新嘢就諗住去試下，反正之前都未食過。飲茶就當然為咗佢啲點心，一盅兩件啱啱好，足料之餘又好食，每一件都好精緻一啲都唔會馬虎，金錢肚好香濃，咬落去入曬味同時夠腍，真係冇得彈。同職員吹咗陣水佢哋話原來而家全日都會有點心供應，啱曬我依啲平日唔知醒又中意食點心嘅人，而且仲要有得外賣點心，少少哋外賣返屋企食又安全啲唔使驚中招都唔錯，臨走問佢哋攞咗張外賣紙睇下過幾日外賣返去食下，依啲時期食返啲好嘢個人都會開心啲，唔錯唔錯。

對上一之食已經係一月份嘅時候，自從疫情又爆發都冇咩機會出街食飯，屈住屈住搞到個人心情差咗好多，所以決定點都要嚟食返次好嘢慰勞下自己，屋企人都亳不猶豫揀咗鏞記，除咗佢嘢食質素好之外仲有佢成個用餐體驗都好好，一啲都唔似其他酒樓咁，每一個職員都會好熱心幫你做任何嘢，落單添水之啲嘢全部都好主動咁做，戴住口罩都feel到好好態度同願意幫你，依啲服務態度表現就係令我一直嚟嘅原因。加上而家食肆少咗人，上菜速度都快咗，而且質素更有保證，等疫情好返啲再食多次先。

作為一個點心愛好者嘅我最中意放假周圍去搵啲酒樓一盅兩件。雖然鏞記出名嘅唔係點心而係佢其他菜，不過依然唔影響我山長水遠去食返次，一入到門口第一件事就係感覺成個環境都佈置到好靚好復古，但又一啲都唔會畀人好老積嘅感覺，反而幾文青下。講返啲點心先，雖然都係叫返啲最大路嘅嘢不過係食得出好食啲，每一件都好足料又熱辣辣，大大啖不知幾滿足，唯一要講下嘅就係好啲貴，個價位當然唔算平，但計埋鏞記個大名同埋食物質素都係可以接受嘅範圍嚟嘅，私心排名可以排喺中上位置，食返一次體驗下都值得嘅。

之前去飲茶見到幾難忘嘅一幕，突然醒返起想分享下。嗰次見到個年紀有返咁上下大嘅伯伯一個人嚟食點心，見佢行路都唔係太方便，點知即刻有個知客嚟扶佢坐低，仲好有禮貌咁幫佢落單一啲都唔會覺得佢麻煩，因為見唔少餐廳特別係酒樓都唔會對依啲老人家好禮貌得去邊，唔係覺得佢哋煩就係好難溝通。依啲位睇得出佢哋嘅training做得好好，服務態度好專業，加分。都要講返啲食物嘅，嗰日我就胃口唔算好所以冇叫好多嘢食，而個山竹牛肉的確係幾好食，入面加埋啲陳皮更加係令佢更加香，係同坊間其他酒樓有啲距離，4.5/5分啦，唔錯。

細細個就成日聽佢個名不過就一直未試過，因為名人飯堂依個名實在係太有距離感搞到唔係幾敢去試，直到上個星期朋友生日就膽粗粗book位試下佢，到嗰日入到去已經畀個環境吸引住，大氣得嚟又唔會太奢華，唔同區域仲會有唔同主題，睇得出淨係裝修依部份已係用咗唔少心機，果然係名人飯堂。點菜嗰陣同職員吹下水佢講到其實鏞記一啲都唔離地，其實好多時都係一家人嚟聚餐，貪佢夠多選擇，由平嘅到貴嘅都有，咁樣聽落即刻親切咗好多。嘢食方面就當然冇得頂，全部質素都係我食過咁多酒樓當中最高質素嘅，每一道都好似藝術品咁靚，口感同味道都係無得頂，啲燒味更加係完美，真係點都要試一次。

好中意鏞記個環境同嘢食，所以成日都會去飲個茶坐下，佢之所以正，除咗有好耐歷史嘅裝修令佢好有懷舊感，之後新裝修完更加有舊香港特色，仲有好多好嘢食，一盎兩件喺鏞記唔算係最出名嘅嘢，好多人都淨係知佢啲燒味依啲招牌菜，但其實佢哋嘅點心都係好好食仲有好多唔同選擇，由冇咩後生仔食過嘅懷舊點心到一啲新創嘢都會有，就算一家大細嚟食都可以。雖然個價錢就唔算係平，不過去開其實成個環境都坐得好舒服，一家人或者同個老死嚟食都可以，真心推介。

好中意佢哋新裝修之後有好多位都變靚咗，而且唔同區域都會有唔同主題，冇咗以前酒樓嗰種裝修千篇一律嘅感覺，感覺新鮮咗好多。另外啲位都幾鬆動下，一嚟衞生啲二嚟又唔會有聽到隔離檯傾計內容依啲尷尬情況發生，真係可以畀自己完全放鬆曬咁去享受一餐好食嘅晚飯，依兩點係我最欣賞佢哋嘅地方，坐得好舒服。另外佢哋服務態度都好好，由入座嗰下就已經feel到佢哋好有禮貌，唔該前唔該後咁聽落都開心啲，雖然佢哋唔小心漏咗單但係一問佢就即刻幫我追又係咁講唔好意思，搞搞到我都有少少尷尬，不過總括嚟講都係食得好開心，冇失禮佢哋個名。

最近家企人開始初一十五食素，但我真係唔知有咩好選擇，上網睇到有啲人講鏞記其實都有啲素菜提供，味道都好唔錯，所以就打算嚟試下，結果都幾唔錯同大家分享下。其實素菜選擇的確唔算多，不過羅漢野菌上素餃依道菜就真係幾吸引我，一上到嚟第一個諗法就係皮好薄，可以直接睇到入面有幾足料，夠曬飽滿咁好有食慾，而且味道同口感都係對得住鏞記個名。唔少酒樓為咗令素菜香啲都會用豬油嚟煎香先，但嗰啲就唔係全素嚟，而鏞記就好堅持唔會落豬油，食得安心好多，如果之後可以出多啲唔同素菜選擇就更加好喇。

好嘢食開完一間又一間，唔少都會為咗吸引食客而加好多新創意搞到有啲菜式好奇怪，不過傳統正宗嘅菜色先至有味道。鏞記都有返咁上下歷史，好多菜都係得佢哋先整得好，更加唔好講佢嘅燒鵝燒到全香港都識，皮薄肉厚，肥瘦適中得嚟又多肉汁，一哥地位真係呂使講。另外佢有個鵝肝腸豆仁炒鵝崧都好正，用大豆芽菜的豆仁加鵝崧同冬菇粒一齊炒香，再用生菜包住食，鵝肝腸同鵝崧香到不得了，問佢哋話其實依道菜都算係新創作嚟，不過師傅就好堅持用返最傳統嘅手法去整，味道好食得嚟都會係好正宗嘅粵菜嚟。