康年餐廳

营业中

休息中

被“新鮮出爐”的蛋撻那飽滿樣子所吸引，明知回家還有吃飯，也要友人走入去坐一坐。二人要了一個雞批、一件蛋撻和兩杯COT。 雞批個批皮好脆，惟牛油偏重，內餡茨汁過杰，可以因為要蓋住雪藏雞o既味道；撻只屬中上，因為撻皮唔夠酥化，而且蛋漿偏淡，蛋味不足，COT則跟大路茶餐廳有同一弊病———超多冰，不過檸檬好新鮮，切得夠薄，而且唔係得兩三塊咁孤寒！

食過兩次，第一次係外賣墨西哥，第二次係堂食瑞士雞翼天使麵。要左兩個墨西哥，一拿上手，第一個感覺係好大個，夠晒熱。一食落去，原來墨西哥入面係奶王，個皮同包底都係鬆化，好高水準，但係就好油，唔信用手指掂一掂之後就知。食完一個覺得好漏，但又買左兩個，食晒覺得唔係咁好，最多食一個已經好夠。墨西哥本身己經漏，但食埋奶王就更不得了。瑞士雞翼，暖暖地，連汁都有雞味，算唔錯。但天使麵就好一般，因為佢唔夠乾水，所以加埋汁會有少少溝淡，同埋天使麵同稀既瑞士汁唔多夾，食落不如一丁好。

今晚同友人一行3人黎呢度食晚飯,自己吾太肚餓只系左油菜芥蘭$12,份量都幾袖珍,但芥蘭幾嫩綠鮮甜.友人要左瑞士雞翼天使麵餐$32, 自己試左一啖天使麵,無乜味,d麵似米粉多d,友人話瑞士雞翼吾錯!食完個餐男友人吾夠飽,叫多個豬排包餐$20,友人覺得個豬排包都過得去;女友人見男友人食得咁高興,叫多個椰撻$5,亦不俗!撻皮頗鬆化,椰茸頗香!環境比一般茶餐廳舒適,所以價錢亦相對地較高.服務方面侍應亦十分殷勤,仲有埋name tag,抵讚!

今朝同朋友去食早餐,叫左兩個A餐~ 羅宋湯螺絲粉,我配左個腿蛋治,朋友就要腸仔煎蛋+ 餐包湯同粉都好味,又夠大碗,三文治細細地但有兩件不過朋友話隻煎蛋唔夠熱,只係微暖,但可接受我覺得好味又抵食下次會試下佢既墨西哥同菠蘿包

見好多食家都詵這餐廳出品的包好正，某晚放工極度肚餓，回家吃飯前順路買了兩個包頂肚。墨西哥包面頭o個層(其實食佐咁耐都唔知係乜o黎)真係好出色，好耐冇試過咁正o既墨西哥包，包身鬆軟，有口感；菠蘿包層外皮焗得很香脆，真的不俗！可惜的是唔係新鮮出爐，如果唔係我想會更加好味！

O尋日清明節放假專登同老公o黎食波蘿包，但係一去到見墨西哥奶皇包出爐立即叫個食先，係幾香幾軟熟，不過幾甜，包底好似有層酥皮，都幾油。一個唔夠再食多個菠蘿包，可能先食墨西哥包的關係，所以覺得菠蘿唔夠味，包面夠脆，但係包身唔得鬆化，有D失望。而杯奶茶都係一貫茶餐廳水準，沒有太大驚喜。老公食了個豬軟骨撈麵餐，我試了一舊豬軟骨，夠晒入味亦鬆化，但D汁就過咸，而D粗麵都幾爽。總體來講冇我預期中咁好，如果有選擇我會去番金華。

再次光顧此店，試了咖哩魚和鮮蝦菠菜餃。咖哩味道香濃，魚柳OK，不太硬又不太"淋"。至於poster推介的鮮蝦菠菜餃，蝦肉爽，雖不覺有菠菜，但整體味道很不錯。

星期六食完腸粉又走去旺角hea,行完金魚街走過黎買包。見到d包包都幾對眼,就放心買番幾個做茶點,買左菠蘿包&墨西哥包。菠蘿包好大個,甜味唔太重,不過都幾油,見個紙袋都索左唔少....但鐘意吃就唔理lu!!墨西哥無吃到,不過見好多奶黃,應該幾好味。阿姐好好人,我見啱啱有新鮮包出爐,問阿姐可唔可以要呢盤,阿姐立即話好,讚!!下次黎吃下午茶先。

是晚同老爸兩人開飯，平平地，想起食友近來提及的新進茶記─康年，便前往一試。裝修主色是好鮮豔的橙色撞湖水綠，令人精神為之一振，走類似翠華的路線，晚餐＄48一客，有湯/主菜/餐茶，特別是用自家制老婆餅做甜品，但因為兩款主菜都吾太對胃口，所以另點一客瑞士雞翼撈丁＄25跟熱飲；麵豉薑蔥豆腐炆班腩＄40跟例湯/白飯。瑞士雞翼撈丁有3整隻雞翼放在丁麵上，以瑞士汁伴食。雞翼一咬就皮肉骨分家，個人意見認為略略過熟，因我較喜歡有點咬口的雞皮，肉方面沒多大雪味，瑞士汁撈丁甜中帶鮮，份量也多過一個丁麵，算是不錯。另外一味送都吾錯，特別是例湯都吾馬虎，紅蘿蔔煲豬骨非常鮮味，上桌時熱得燙嘴。一邊食，一邊間中聽到師傅叫XX包出爐，短短一段晚餐時間，已經聽到有墨西哥，菠蘿包同蛋撻新鮮出爐，聞到陣陣麵包香味，吾試試都對吾住自己，當下點兩個蛋撻品嚐一番，酥皮香脆牛油味濃，黃黃的蛋漿像燉蛋一樣又滑又甜，為這頓簡單的晚餐劃上完美的句點。牆上貼有其他食物款式樣子都不俗，價錢也可以接受；下次要試試那圓圓的墨西哥，看看是否如其他食友所說這樣了得。

康年其實係金華分店所以佢地d 包都係做得差唔多好

行過又俾佢d出爐麵包吸左埋黎. 上次食過墨西哥奶皇包, 今日就試下菠蘿包. 咁o岩賣晒, 伙記話等兩三分鐘就有新出爐, okay, 就等下啦! 一路等時, 不斷有唔同伙記由外賣窗口探頭出黎問我有乜需要, 服務幾周到! 一如前文所言, 呢度菠蘿包外觀同金華好相似, 不過體型略細. 熱辣辣新鮮出爐, 忍唔住就一啖咬落去, 菠蘿皮脆, 包心軟, 而且果然甜度比金華輕一截. 未必適合好甜味o既小朋友, 但係就好切合現時追求健康o既潮流.

深夜找茶餐廳吃宵夜，附近幾間的都收兩點，只有這間收得晚。叫了西多士，所用花生醬是粗粒，平時多是幼粒，原來口感好得多。叫了個瑞士雞翼撈丁，d 雞翼不算入味，但d瑞士汁味調得幾好，d麵索晒d汁，不俗。跟餐叫了熱檸樂煲薑，不用另外加錢，抵。以茶餐廳來說，地方算十分乾淨。

奶黃墨西哥包、蛋撻和奶茶都好有水準，晚上8 時光顧，都有新鮮麵包出，正!

菠蘿包& 旦撻既味道好似金華,但整體d價錢比金華貴少少的。

今朝去妹記食粥前到此買面飽,要左個墨西哥---size都好大吓,一咬落去,d奶皇湧出黎!外層極鬆軟,極香牛油味!係我食過眾多墨西哥飽中最好的一個!菠蘿油---都ok!但不及金華,但塊牛油比金華香!旦撻---撻皮鬆化,唯旦不夠香!total$12,超值!