岩鹽日本料理 (利舞臺廣場) (已結業)

今日同朋友經開銅鑼灣就去左試岩鹽釜飯，好似知名度都唔差。前菜首先點左日本蕃茄沙律。新鮮嘅蕃茄沙律配上酸甜嘅日本醋，非常開胃可口，做前菜一流！之後有味噌醬燒黑豚肉串，黑豚肉有彈性，配埋惹味十足嘅味噌醬，口感一流！再有生牛肉他他生菜包，全生嘅牛肉他他生菜包，怕生既都可以食，剁碎咗嘅鮮牛肉被生菜包住，牛肉雖然全生但一啲血腥味都冇。生牛肉上面放左啲脆魚乾，令整個生菜包口感提升另一層次！最後有北海道海鮮釜飯，其實係似日式既煲仔飯咁。上菜時，員工好貼心咁提醒要過一分鐘後先揭蓋，咁就會有飯焦，仲提供埋個沙漏俾你計時。夠鐘之後，一打開蓋，香味撲鼻而嚟，海洋釜飯好足料，有海膽，蟹肉，三文魚再加一些小配菜，成個釜飯都充滿鮮味。食剩嘅飯加埋鰹魚湯就可以做埋茶漬飯，一個飯兩種食法。成餐飯都好精緻，好靚既環境添！

媽媽生日話想食日本嘢，咁就帶佢食個岩鹽啦👍🏻今次一行六人叫左一個二人set再叫嘢食。有燒千舌、壽司、生蠔、釜飯⋯⋯本身個二人set已經有沙律、刺身、釜飯、燒牛扒同三文魚頭煲👍🏻👍🏻👍🏻每次嚟都好期待食釜飯，因為食到差唔多又可以做茶漬飯咁食🤤🤤唔好睇佢煲仔細細裡面有好多飯係到㗎👍🏻最近做緊優惠可以用$98嘅價錢有一客海膽生蠔啲生蠔都唔差都幾新鮮😋😋燒牛舌都燒得好好味，唔會太乾太硬食唔到燒得岩岩好，咬落仲係爽口嘅👍🏻👍🏻👍🏻

難得平日過海做野，揀間有保證的食好點餐廳喺利舞臺夠哂方便～ 地方好大，但都好多人座無虛席，一打開餐牌Set lunch真係好多款揀，見到啲相真係好吸引，種類豐富，跟餐再送野飲。Lunch set 已包沙律，刺身，前菜，麵豉湯etc。沙律酸酸甜甜幾開胃，刺身都幾夠新鮮、甜美！ 蒸蛋好滑！ 廣島蠔釜飯 － $108個釜飯上枱時會有一個小漏斗，店員話等1分鐘就食得～一打開木蓋，傳來陣陣海鮮香味...好期待要試食！廣島蠔都幾肥美的，但個飯就好普通，明明呢間係出名食釜飯～仲要即叫即整，但真心麻麻...同區的話奈良XX好好多...用app訂又有優惠。火灸三文魚腩伴黑松露丼 - $138呢個反而比釜飯出色～黑松露味好濃，三文魚腩又夠新鮮，火灸燒到半熟，好香呀！！！價錢還可以接受，但始終唔算特別好食，而且限時1.5hrs!中評吧！

經過人地介紹，咁岩今日出開銅鑼灣，決定要黎試試佢😄佢棟大廈有好多野食，定力少啲就會改變主意😜限時個半鐘，一入到去，有個開放式既吧枱，可以望到啲師傅整壽司等等...職員帶我地坐窗口位，可以望下出面既人物事。海膽蠔喱個係優惠加配既海膽蠔，一百蚊有六隻，因為夠凍，味道、口感好爽甜海膽又一啲都唔腥，仲好香。 另外佢仲有得加配海膽山飯，同樣抵同吸引燒灸三文魚定食味噌湯唔會好咸，而家有蜆同豆腐，比坊間有料沙律前菜亦都令人感覺健康，而個飯好足料，鋪滿晒餸，三文魚同珍珠米都好好味雜錦刺身飯每款刺身都有兩片，味道鮮甜，唔會有渣因為係定食餐，所以可以選擇要餐飲定還是雪糕，而雪糕仲係 Haagen Dazs正呀

呢間岩鹽位於銅鑼灣利園既日式餐廳一向都好多人選擇係度食lunch。今日就同同事一齊黎睇下呢間餐廳既盧山真面目。呢間餐廳有幾類大眾化既日式定食，魚生飯，斧飯，鍋，鐵板都有，今日就試左個同事推界既三文魚親子斧飯。除左個飯之後，會有前菜：沙律，魚生，麵豉湯提供，質素中上。之後親黎到主角斧飯，一黎到要等漏斗漏完先食得，店員仲會講解食飯，服務周到。大約一分鐘後就可以食得，嫌唔夠味仲可以加醬汁調味。味道總括黎講中上，有飯焦👍🏻最後，仲有雪糕提供，如果唔想食雪糕仲可以揀果汁添！

今日有同事介紹一間好好食嘅日本野，餐廳喺利舞臺 (Lee Theatre) ，其實呢度周不時都會嚟，因為呢度雲集左好多唔同嘅餐廳，好多都好好食。喺呢度食小籠包同埋韓國嘢比較多，從來都唔知道原來呢度有一間日本野！不過最好都係要book定枱，第一次嚟到發覺呢度都幾full。Set lunch有好多選擇，有成五頁咁多，價錢亦都好合理見到啲相，真係好吸引，每一樣都好想試！最後揀咗個三文魚親子釜飯，lunch set 包左沙律，刺身，前菜，同埋麵豉湯。沙律配上柚子汁，酸酸甜甜好開胃呀，雖然置身係錫爆嘅酸酸甜甜好開胃呀，雖然刺生係set包嘅，但係質素一啲都唔差，帶子甜蝦三文魚同埋油甘魚都10分新鮮好食！個釜飯上枱嘅時候會有一個小小嘅漏斗，店員會同你講等1分鐘就食得嫁啦半熟嘅三文魚好吸引☺️☺️甜品仲有Häagen-Dazs™ 雪糕或煮餐茶，108包咁多野食，性價比極高❤️

行開銅鑼灣諗住上OpenRice搵間新野試下，見到呢間鋪新開無耐，仲要咁多好評，所以決定試一試。上到去唔算太多人，但都等左30分鐘，尚算可以接受。今次叫左3樣野1）明太子蛋卷呢個係成晚最好食既食物，整得好滑，味道適中，唔會過甜2）銀鱈魚釜飯銀鱈魚唔夠油份，食落唔夠香，釜飯同平時既飯無乜分別，没有驚喜3）廣島蠔釜飯比起銀鱈魚，廣島蠔比較好味，起碼肥美又甜，但因為個飯真係好普通，所以唔會話好出色最後，呢間野係可以一試，但我個人黎講唔會再特別想再試。希望會有另一間釜飯俾到我驚喜啦

岩鹽係其中一間我和同事都好鐘意食嘅餐廳，食品一向優質，價錢公道，一個壽司餐都是100頭。無去大約1個月，今個星期五去食，發現加咗價，已經無咗100左右嘅壽司餐，多咗個200幾嘅高級壽司餐，有靚吞拿魚。我揀咗幾170嘅壽司餐，魚生依舊好新鮮，跟好滑嘅蒸蛋，同不過不失嘅麵豉湯。整個餐再失色係烏冬，太霖，一d都唔彈牙，跟嘅幾片牛內都好香牛味，不過就好細片。所以都係食咗幾啖就算。有時我會叫佢唔駛上烏冬，以免浪費食物。最開心係個餐嘅甜品係haagen dazs雪糕，如果唔食雪糕，有咖啡，檸茶，或橙汁，西柚汁，都好多選擇。不過今日嘅雪榚係Cream Chess Mochi, 太甜，唔係好鐘意嘅味道

火炙壽司lunch set （$138）整體而言都不錯帶子好甜海膽唔會苦不過左口魚唔係入口即溶蒸蛋好滑完全無渣甜品仲有哈根大師雪糕（不過無得揀口味）個人覺得幾抵（抵在甜品）

是日晚上約左姊妹們食日本菜，餐廳地點就腳，見好評亦不少，就揀呢間啦！餐廳睇黎幾受歡迎，入面FULL晒，門口好多人等位，好彩BOOK左位等一陣就可以入座。《木魚高湯浸翡翠苗》高湯清清地，但非常入味，配上翡翠苗，清新的前菜。《刺身壽司定食》大家一致認同刺身都幾夠新鮮、甜美！《北海道海鮮釜飯》到左我好期望既招牌釜飯喇！上枱時未打開蓋要等一等，係幾有神秘感！打開木蓋，傳來陣陣海鮮香味...不過望一望，今晚我地呢個釜飯好似唔太討好....最重要既北海道蟹鉗、帶子、海膽份量都較少，而且米飯太淋身了，估唔到期望愈高失望越大啊！《串燒拼盤》好豐富有雞翼、牛舌、冬菇、蕃薯仔、青椒等，調味適宜，整體都唔錯。另外定食仲配有沙律、味噌湯，同埋甜品雪糕架！值得一讚係雖然繁忙，店員都忙於應付，但態度仍保持友善，難得一見

銅鑼灣真係好多好野食，見依間都幾多好評就一於試下佢啦！環境都幾舒服，枱與枱之間唔會好近，所以唔會嘈，傾計岩哂～一開佢嘅menu都睇左好耐，因為選擇好多雖然係公眾假期夜晚黎，但佢都有dinner set揀～叫左個雜錦壽司定食，個set會包埋麵豉湯、沙律、牛肉烏冬(無影)、野飲/Haagen Dazs雪糕！都唔錯，壽司上嘅魚生都唔腥，係好食嘅不過個牛肉烏冬味道偏淡，無乜味。嗌左一個set其他都係散叫，可以試多啲其他野食依個牛肉火鍋個湯底係勁甜！所以啲大白菜、竽絲吸哂啲湯係幾好味。玉子好好食，同黑松露味好夾，甜甜地，入面好足料有好多金菇同本菇！另外叫左個釜飯，無諗過有咁多帶子同咁大舊鵝肝，幾抵食！食完仲可以落茶撈埋啲飯焦，幾得意天婦羅都炸得幾好，唔會好厚粉！依個海膽生蠔係特別promotion黎，嗌佢menu 上嘅野食加$98就食到！海膽同生蠔加埋一齊食其實又無乜特別嘅，我都係分番開黎食，但兩樣野都好夠新鮮，正整體黎講依間野質素唔錯，價錢都可以接受，試得過！

今日難得約男友當然要食好野，本身唸住練完歌去sky 100再食飯，但去完sky100已經8點半，有d想放棄過海😞 但最後憑著意志，我地都係去左岩鹽，結果真係出乎意外之外，好好食阿！由於去到已9點幾，小妹已餓到暈，望住餐牌狂嗌野食，點左2個壽司加烏冬定食、一個明太子玉子、一個清酒煮花蛤、一份雞軟骨同牛舌串燒。上菜速度都算快，首先壽司定食超豐富，有牛肉烏冬，湯底係鰹魚湯，好好食又熱辣辣！我個壽司定食就係火炙左口魚、帶子、三文魚、鰻魚、仲有2個加州卷、麵豉湯、沙律，仲有杯野飲，158呢個價錢係抵到爛！男友個壽司set又係有d刺身，佢話都幾新鮮，無雪藏味。之後就係明太子玉子，呢個係十級推介，超好食！熱辣辣，入面明太子咸咸地好開胃，一夾唔會散，真係想encore！清酒煮花蛤，不嬲係我去日式餐廳必點的菜，今次就用一個鍋形式上，仲點火可以熱住食，幾貼心。但有d花蛤有d沙，個湯又加了d牛油，所以我無乜飲d湯，但係不過不失啦，呢尾菜係好開胃ge最後就係串燒，雞軟骨不過不失，牛舌就麻麻地，有d難咬，但調味係ok的。最後餐飲點左熱柚子蜜同凍烏龍茶，成件事好完滿，一般柚子蜜都要加錢，但呢度係送！實在太滿足了

同朋友去左利園食飯。每人叫左一個斧飯定食， D 飯有D 多， 相反D 肉唔係好夠食。 可能係鵝肝太貴啦haha刺身合格，沙津幾開胃，整體黎講OK!跟餐有野飲叫， 買橙色好似比較養生因為斧飯太多飯既關係， 我地就叫多左個野川鰻魚煲。 D 鰻魚唔錯， 好香既魚味， 想食完再食D 餐具幾有味道：另外叫左個三文魚卷。 係menu 到推介既， 試下無冇所謂，唔特別黎個特寫： D 牛係唔錯的， 不過凍左就有D 失色， 一定要襯熱食， 底果D 飯焦都係凍左既味道好奇怪。

朋友特愛呢個飯堂，所以九唔九就要黎幫襯一下！睇下今日食咩先～大大份Set lunch 都係$108，一星期食一次，唔過份啦比你望下今日食乜～兩份一齊送到，如平常～大大份～不過其實真係想建議佢⋯可唔可以唔好又飯又烏冬⋯對女士黎講真係太over 了⋯成日都食唔曬，不如貴精不貴多，整其他啦不如～有點想投訴既係今次個烏冬唔係好夠熱呢～個湯～如果可以熱一點就perfect 池啦！有得揀哈根達斯雪糕/野飲，我選左凍咖啡，佢地個凍咖啡好好飲架！係日本餐廳飲到杯咁好飲既咖啡，真係好感盪！

今日同朋友去左試岩鹽嘅釜飯，話哂咁大個女都未食過，所以都滿心期待。首先點嘅係日本蕃茄沙律新鮮嘅蕃茄沙律配上酸甜嘅日本醋，非常開胃可口，作為前菜已經成功帶動起我嘅食慾。味噌醬燒黑豚肉串黑豚肉非常之有彈性，師傅燒得恰到好處，黑豚肉汁鎖住係鮮嫩嘅豚肉入面，配埋惹味十足嘅味噌醬，將黑豚肉提升去到另一個層次。生牛肉他他生菜包不嬲唔怕生嘅我點咗全生嘅牛肉他他生菜包。剁碎咗嘅鮮牛肉被生菜包住，牛肉雖然全生但一啲血腥味都冇。生牛肉上面放左啲脆魚乾，令整個生菜包都非常可口。北海道海鮮釜飯港式嘅煲仔飯就食得多，日式嘅真係第一次試。上菜時，員工好貼心咁提醒要過一分鐘後先揭蓋，咁就會有飯焦，仲提供埋個沙漏俾你計時。漫長嘅一分鐘終於過左，一打開蓋，香味撲鼻而嚟，海洋釜飯好足料，有海膽，蟹肉，三文魚再加一些小配菜，成個釜飯都充滿鮮味。食剩嘅飯加埋鰹魚湯就可以做埋茶漬飯，一個飯兩種食法。