和拉麵

营业中

休息中

一入到餐廳內，就會聽到播放著輕快的日本歌曲，令人有少少置身係喺日本拉麵檔既感覺。拉麵主打三款:豚骨原味拉麵/辛辣拉麵/味噌拉麵，哩度揀麵係自由度非常高，自選湯底麵嘅軟硬，甚至配料嘅多少都有得揀，每款都配有兩片叉燒,半隻糖心蛋,竹筍,木耳,紫菜，而蔥/蒜就自己揀要唔要，另外湯底可以揀要香滑/特濃，可以滿足到唔同人嘅口味。今次我揀咗辛辣拉麵(中辣)，一黎到就見到湯底顏色好深，仲閒到陣辛辣香味。即刻試咗啖湯，果然冇失望，夠哂重口味，辣得黎又唔會灼喉嚨，拉麵食落口感唔錯，唔會太軟又唔會太硬。當中有叉燒有溏心蛋。一咬溏心蛋一口，蛋黃就溢岀來，真係好正。味噌拉麵一向食原味拉麵的朋友，今次試下味噌味！果然湯底更加濃郁，充滿味噌的咸香味，而且湯底十口十分順滑！拉麵也煮得軟硬度適中，豚肉燒得香口！魚手指炸得香脆金黃，炸粉唔厚，而且又大條，食落淡淡魚香，好鮮甜。

今日難得放假，專程約埋朋友食想試好耐的和 拉面。和 拉麵喺小巷間，大大個紅色"豚骨"燈籠十分搶眼，似足日本嘅隱世食堂😂😂 一拉開木門入店内，店員已經好熱情咁招待。午市套餐($80）已經包埋拉麵，小食同飲品。拉麵仲可以好似一蘭咁自己揀麵嘅質感同湯底嘅濃度，十分貼心。豚骨拉麵 熱辣辣上枱，叉燒大大塊，肥瘦適中，香得黎亦唔會太油膩。😋😋麵條質感彈牙，配合濃厚既豬骨湯底，簡直絕配。溏心蛋 蛋白軟滑，半熟半流心嘅蛋黄香濃，仲要入口即化！😋😋😋下次黎食一定要叫多一隻溏心蛋歎下😋😋套餐仲包一份小食，煎餃剛剛炸起金黄色就上碟，外皮香脆熱辣辣，十分惹味。意猶未盡另外仲叫左芝麻雞翼($28)，雞翼外皮薄脆有芝麻香，雞肉嫩滑多汁😋😋值得推薦👍和 拉麵無論裝潢同食物質素都似日本既傳統拉麵小店😋👍👍，下次黎一定要再試下其他拉麵款😋😋

餐廳只有三款拉麵，分別係豚骨原味拉麵($75)，辛辣拉麵($80)和味增拉麵($80)。拉麵方面，Order紙上，除了可以選擇邊一款拉麵湯底外，還可以選擇湯底的濃度，蔥、蒜蓉多少和麵的硬度。而且餐牌上寫明係堅持正宗日本博多系豚骨拉麵，湯底經大火超過10小時熬製而成，無添加，濃而不膩。我叫咗一碗辛辣拉麵，小辣，有叉燒，麵底揀咗普通硬度，其他配料都係正常份量！叉燒都幾大塊，而且好滑，肥瘦適中，入口即融！湯底先係精髓，濃郁香醇，加少少辣味好開胃！佢自家嘅辣芽菜可以任添，更加惹味！味噌拉麵，湯底用咗十個鐘熬製而成，好夠濃郁，味噌味好突出，麵身揀咗普通，食落有咬口，同樣掛湯。魚手指炸得好香脆，內裏魚柳好足料又香，好高質。另外見到老闆每一個客人入場離場都會同客人打招呼，感覺好有人情味。

在連鎖店橫行的年代，我喜歡幫襯用心的小店，今天跟朋友去的小店是和拉麵。和拉麵不在主要街道找它都花了些時間，不過是值得的。 踏入店內即時映入眼簾的就是黑膠唱機：我相信有品味的人開店一定會用心及做到最好。和拉麵食品不是太多，分類只有拉麵、小食、炸物及天婦羅。 拉麵只有三個味道可選，分別是原味豚骨、辛辣及味噌。 小食選擇很多，我覺得炸物最特別的是紫芋甘栗薯餅。我選了小辣拉麵要特濃湯底及紫芋甘栗薯餅，拉麵的湯頭很濃郁而且麵也很煙韌，我和朋友都認為整體水準不錯。

今日系大埔行行下街朋友突然間覺得有點肚餓，系大埔依到搵野食一啲都吾難，就系轉角位比我地見到間名叫約和拉麵既拉麵店，門面比我既感覺好似置身日本一樣，店內環境舒適，店內座位雖然少，但已經坐滿人，另外一字排既座位式設計亦都舒服。睇咗一陣餐牌然後店員好有禮貌地推介我地食拉麵套餐，附送小食加飲品，我地就點咗一個原味豬骨拉麵同埋一個辛辣拉麵，小食方面，就選擇咗章魚小丸子和餃子，而飲品就大家都系揀可樂，等左大約15分鐘就上枱，吾算等得太耐。首先，賣相同其他拉麵無太大既分別，但原味豬骨拉麵湯底濃郁，麵質彈牙，味道比較出，然而辛辣拉麵，讚，因為朋友選擇咗大辣，辣度四粒星，麵質彈牙剛剛好，另外小食方面，章魚小丸子就算放涼都沒問題，都系保持住外脆內軟，而餃子就算不點餃子汁都好有鮮味。

今日黎到大埔行下，估唔到大埔都有咁好食嘅拉麵。今日叫左一份拉麵，午巿可以加一份餃子或者章魚燒同一個汽水。咁我就叫左一個博多豚骨拉麵，配餃子同可樂。拉麵湯底豬骨味香濃，咸度適中，即使飲哂成碗都唔會太口渴。另外豚肉燒得好好，聞落非常香，食落亦都非常不錯。餃子皮薄香口，作為配菜一流。更加估唔到嘅係可樂可以選擇玻璃樽裝！小食方面，試左酥炸多春魚、雞軟骨同天婦羅拼盤。多春魚炸得非常香口酥脆，連骨都可以直接食埋，而且唔會太油膩。雞軟骨份量充足，同樣非常香口迷人，醮埋沙律醬非常好食。天婦羅拼盤當中嘅種類好多，當中比較少見嘅係魚柳天婦羅同蘆筍天婦羅。魚柳炸完啲肉都仲係好嫩，蘆筍嘅清新能夠中和到口腔嘅味道。總結黎講非常推薦依家拉麵比黎到大埔嘅朋友！

成日聽人講：大埔有條隱秘食街，今天一場黎到"和拉麵"就試下佢到底有幾好味喇!~有豚骨原味、辛辣 同 味增，仲可以叫特濃湯底，點都有款岩你口味；而且可以選擇拉麵既軟硬度，夠哂貼心~!視覺味覺都好滿足。流心蛋夠哂奪目，叉燒幾肥美，可以俾多塊就好喇<3所以唔夠食既朋友可以再另加叉燒。大辣辛辣加特濃湯底很好味對於D好食得辣既人其實佢唔係好辣，而且亦唔會COM過豚骨味，兩者味道岩岩好紫芋甘栗薯餅炸到岩岩好，唔會好油膩，紫芋甘栗味道都夠突出，唔會死甜。而且夾埋佢地既自家制芽菜，正呀~!

今晚一支公開飯，男人的浪漫首選當然係食日式拉麵。打開Openrice, 發現和拉麵係大埔區選係數一數二好評的拉麵店，就呢間啦。一坐低，店員就奉上冰水，正宗日式服務wor, 好感大增。拉麵店主打豚骨原味、辛辣、味噌三種不同的口味，要試出拉麵店的真功夫，當然要揀最基本的原味拉麵。落單後就一路等一路聽住店內播放的懷舊日本歌曲，就似置身於京都拉麵小路。首先要試試湯底，好甜，食得出很足料的豬骨湯味。麵條方面，我揀咗普通的軟硬度，爽口彈牙，口感出奇地同湯底配合，成個層次提升晒。叉燒很野味，食落有口感。糖心蛋。拉麵有半隻，自己另外加多半隻。流心嘅蛋黃汁，我的最愛。食拉麵，當然要配可口可樂啦。埋單都唔洗一百蚊，有咩滿足得過放工後來一碗拉麵、幻想一下去咗一轉京都？

唔知係咪平時工作太煩悶，今日放假總係想搵野做下。就諗住一丁友踩單車去大美督，但踩完吐露港已經好肚餓。結果就走左去大埔搵食。亂咁行，見到有條小巷入面有幾間食肆，巷尾有間食日式拉麵既鋪頭，睇落啲裝修幾企理。門口放左menu出黎。午餐有齊拉麵，小食，汽水，先80蚊，冇加一，見幾抵就入左去。一坐底，店員已經超好招呼，落單都好好笑容，仲主動介紹佢地有個醃既辣芽菜（免費）可以試下。見佢每枱客都service得好用心，目測91.11%係老闆。先要一個豚骨原味拉麵，香滑湯底，拉麵軟硬要左普通。等左無耐，就已經送到我面前。未食已經香噴噴，搞到我日本人上身，「i ta da ki ma su」。湯頭完全唔似出面一味重味精，而且麵身比較幼，食落好順口。例牌叉燒入口嫩滑無渣。章魚小丸子每粒都好挺身，粉漿冇呈半熟，章魚粒熟之餘都好易咬，味道真心幾好。建議鋪頭可以加埋wasabi落去。單點叫左個脆炸龍王鬚，實質係炸魷魚鬚。外層粉漿唔厚，鬆脆惹味，仲加左少少椒鹽。呢餐已經令今日好圓滿，我都當自己已經踩完入大美督出返黎^＿^

大埔向來係平民美食既天堂，唔只食物種類多，價錢亦夠「貼地」。今日走訪大街小巷，終於俾我發現到一間隱世日本拉麵小店。門口掛住一個大紅燈籠，放左幾張櫈俾人等位，裝潢都好有日本拉麵店既感覺。午市套餐包一碗拉麵，一款小食連汽水。主打3款拉麵:豚骨拉麵，辛辣拉麵同味噌拉麵。仲可以依個人喜好去選擇湯底濃度，麵條硬度，同走唔走蔥蒜。豚骨拉麵湯底夠濃，湯面浮起一層薄薄既油脂，香而不膩。日式叉燒層次分明，邊位燒得好靚，唔會過肥過瘦，肉質幼嫩。麵條富彈性，沾上豚骨湯簡直一絕。小食二選一:煎餃子或章魚小丸子。要左煎餃子，落單即叫即煎，餃子皮薄肉厚，外脆內Juicy，冇油膩感。唔係一定要名店先有好野食，小店只要用心，都一樣有好出品。

今晚又倦又餓和老公都不想煮飯， 又不想去食平時去開嗰間茶記(港女mode💃🏻)就在附近找找其他食肆， 見到呢間拉麵舖🍜都乾淨企理，價錢又ok 就入去試試！湯底有豬骨原味／辛辣味／味噌味三款選擇仲有香滑或特濃，我選了辛辣味（中辣）加特濃， 唔錯夠味而且唔算太辣中辣啱啱好， 麵我揀咗硬Ｄ，ok但如果彈牙Ｄ就更好！紫菜都算唔錯叉燒🐷都ok如果切厚Ｄ可能更正！佢哋都有唔少少食炸物／天婦羅！我哋就揀咗炸紫薯甘栗薯餅🍤！良い味😍 !! 比想像中好好多食， 炸出嚟唔會過油又啱啱好裏面又好軟熟可以encores！埋單嗰陣老闆娘仲會送兩粒糖🍬🍬畀我哋，當係潤喉服務好ok!

見好耐無食日本拉麵，即刻上網搵下附近有冇好推薦。見有唔少網友都推介和拉麵，個lunch set都好似幾抵食，以試一試心態入去食個拉麵啦！來到就試下個招牌豚肉拉麵，午市套餐仲包埋小食同埋飲品。 小食可以揀日式煎餃子或者章魚小丸子。 拉麵亦都可以根據自己嘅口味自選畀師傅整， 感覺都幾特別。先上枱的是餃子，店員上菜時都提一提旁邊有餃子醬油， 感覺都幾貼心。餃子外皮十分脆口，咬開裏面啖啖肉！ 好足料！主角終於上枱喇! 日本博多豚骨拉麵，即刻試一試個湯底，入口好香濃，有啖啖豬骨味😋😋 忍唔住八卦問左店員，原來湯底係師傅親自熬制十幾小時。出面好少鋪頭會花咁多時間係個湯度，食得出師傅嘅心機，抵讚!!!麵質方面，麵嘅硬度我選左普通，師傅控制煮麵嘅時間啱啱好，拉麵食落好彈牙。溏心蛋十分吸引，半熟嘅蛋黄入口好順滑，十分滋味😋😋仲有兩片叉燒， 肥瘦適中，香而不膩。 叉燒醃制得很入味，配埋香濃嘅豬骨湯底， 簡直係絕配😋😋本來抱住試一試嘅心態黎到和拉麵， 食物質素絕對有驚喜😋 師父製作食物態度認真， 店員服務又親切， 絕對值得推薦😂😂

今次是第二次食和拉麵，本身不多拉麵店會令我回頭，因為我一直認為每間拉麵店都差不多，但上次經友人推介後，今次我竟趁放假主動去大埔，真是十分難得。午市套餐其實價錢尚可，要食一碗好食拉麵，這個價真是算抵，與上次一樣都是豚骨原味拉麵，貪他的湯夠清，蔥一定要多，因為這裡的蔥特別香。麵夠爽，女仔份量算可以，男仔最好加多個麵底，就有滿滿的幸福。要正常軟硬度已經好正，拉麵真是不需要形容太多，試過就會讚好。兩塊叉燒肥瘦均勻，對比起湯和麵底，其他配料的確會被比下去，不是差，只是那些太好了。小食方面，兩款都試過，餃子餡料足，下次或之後都會繼續要餃子。以後來到大埔墟，終於有間環境舒適，小店中又可以品嚐到具特色的拉麵店。

如果 生舊叉燒好過生仔，我希望可以生哩舊叉燒。是日嚟到大埔，係同一條小街，有好幾多食店，日式拉麵店都有兩間。平日晚上八點幾，全店十幾個座位機乎滿座，好彩仲有張2人枱。店員好快安排我哋就座，亦迅速奉上有檸味嘅水，好清新到口腔。店完亦有講解餐牌，並叫我哋食麵的要寫紙。先上菜嘅竟然係炸物，剛炸起真係熱辣辣，調味亦好香，點少少蛋黃醬，唔會好油2個拉麵陸續送到拉麵賣相中規中矩，除叉燒外，基本配料溏心蛋，滷笋，木耳絲，紫菜都齊，都算足料。話明係博多口味，湯底唔會太濃厚，麵條較幼身而掛唔到湯汁味噌就較適合重口味人士，味噌香稍為補貼麵條唔索味嘅不足不得不提就係塊叉燒，一邊燒至少少焦香，豬肉味濃，有D食評話佢太薄冇口感我就覺得咁先配合到哩個較”輕盈”嘅拉麵，如果襯塊厚切反而格格不入。另一樣要試就係店員介紹嘅配菜，係師傅炒嘅辣芽菜，夾埋個麵食又有另一番味道。加咗罐汽水，哩個價錢算係合理，下次會再嚟試埋其他小食。

大埔區拉麵界這年頭開了幾間新店，達摩武藏俺流塩，一鳴那時還是那區數一數二，但自從一鳴租了隔鄰舖打通，地方大了變成居酒屋，和拉麵在同一條街里開店，形勢誰也沒有比誰強。和拉麵初開時，我直覺和拉麵是一鳴的附屬品牌，我亦認為他們共用一個廚房，前者未能查到，後者答案確實是。一鳴大了用排隊，少了人龍；和拉麵由於座位少，多了人龍。和拉麵質素向來俗，至少鬍鬚師傅煮麵時的專注是加了少印象分，初開時錯覺鬍鬚師傅是日本人，後來查實師傅是本地人，因為世界盃關係師傅用流利中文與店員交談賠率，當然客人點菜時又會用回日語與店員交談。開幕時期光顧一次的印象很好，今次再來餐牌多了很多小食及炸物款式，我認為是過多了，但作為夜店又無可厚非。有兩樣東西是感到差了點，湯底要濃豚骨湯要附加$8，卡位座椅是坐得舒服，但是其高度和木枱高度有點配合，我算是標準身高的男人，都要抬起雙手享用美食。我點選了豚骨原味香滑拉麵、章魚小丸子及厚燒芝士玉子。拉麵還可以，豚骨湯豚味還好，叉燒肥瘦層次分明，長度9cm，口感一般，木耳筍條有嚼口，青葱較多。章魚小丸子和厚燒芝士玉子同價錢$28，章魚小丸子較好吃抵食，玉子太細太小了。