9月份好评餐厅十强
2017-10-06

仲有3个月就要同2017年说goodbye喇,第三季完结,又有咩餐厅上榜先?今个月似乎有唔少日本菜上榜,始终香港人都系锺意食日本料理,放题拉面居酒屋都系我哋杯茶!其他小店都不乏捧场客,第一位更加系本土美食!立即同你睇睇今个月嘅十强先:


第10位 云南啊老表黑羊汤锅米綫 (*新上榜)

呢间米线虽然开咗一段时间,但长期多人帮衬,选择好简单,主要就系羊肉同牛腩,黑山羊肉可以拣有皮或净瘦,汤底睇落好清,但系食落羊肉味浓微羶,系略嫌羊肉切得太碎,加埋辣油好惹味。唔食牛羊可以拣猪手、鸡肉或者小食,份量十足,系观塘返工人士嘅午餐饭堂。

图:心太软*~sunny.ho


第9位 金田家

元朗虽然有唔少拉面店,但呢一间由铜锣湾开入新商场,仍然吸引到唔少拉面迷朝圣,梗有原因嘅!猪骨汤底浓郁又唔油腻,食完拉面唔会太滞,溏心蛋更加系十个赞。食完拉面唔够饱,小食选择多,好似有男爵薯饼、芝士年糕、北寄贝海鲜沙律同埋芝士蛋糕等,抵佢多回头客嘅。

图:FOOODHUNTERAmyFu5007


第8位 极尚大喜屋日本料理 (*新上榜)

放题一直都系好受欢迎嘅菜系,不过似乎间间差唔多,呢一间就有啲特色。新开冇耐就打入十强,因为有好多放题甚少出现嘅新菜式,好似矶烧海鲜、鲍鱼花胶、原只葡式乳猪、海胆拖罗寿司,雪糕就系movenpick任食,好豪啫!不过有食评指人太多兼要排好耐队,咁要改善吓先得喎。

图:yemenikwanChiuyu118


第7位 云长小龙坎老火锅 (*新上榜)

今个冬天麻辣火锅肯定继续hit,天气未冻已经陆续有新店上榜!呢间由情歌王陈柏宇开设,麻辣汤底面层一层红油,辣度十足,而且愈滚愈浓,每人有一樽麻油俾你加料,重口味人士一定锺意!配料就有牛舌花、鹅肠、鸭血等招牌菜,仲有一个摩天轮有齐手打丸同饺子,打卡一流。

图:小东hkfoodelicious


第6位 正宗上海生煎皇 (*新上榜)

最近连开几间分店嘅生煎包专门店,唯一港岛分店上榜!生煎包新鲜热辣出炉,皮薄兼一咬爆汁,千祈唔好成粒啪入口呀!底部有脆皮,馅料份量亦十足。其他点心好似小笼包、鸡丝粉皮同埋拉面都有唔少好评,环境舒服而且服务唔错,绝对有机会打低曾获米芝莲嗰间呀。

图:RosanLaitangjack


第5位 青花 (*新上榜)

又系新餐厅!旺角最新商场The Forest开咗唔少新食肆,以呢间人气最旺!班底系做甜品起家嘅ATUM,贯彻商场嘅绿化感觉,装修都系小清新花园feel,似足城市绿洲。食物就系新派东南亚菜为主,招牌菜有泰式生虾、牛油果辣青柠薯花、柠檬柚子鱿鱼水冷面等,卖相够靓,最啱MK潮人打卡。

图:hanna_y糖小妹


第4位 鮨一日本料理 (*新上榜)

海鲜丼人气虽然稍为回落,不过呢一款食物就长期有人like,就系红爆fb、IG嘅千层海胆饭!海胆埋到成座山咁高,配上吞拿鱼蓉、加入赤醋嘅秋田小町米同即磨山葵,好犯规呀。难得其他菜式好似刺身、烧物等都唔错,即使唔系海胆控都可以帮衬!不过人太多,难book之余亦坐得唔系太舒服。

图:chongjackyiameatproduct


第3位 虾栈 (*新上榜)

全部都系虾!呢一间台式餐厅主打虾煲,大头虾全部都系游水货色,即叫即捞,肯定新鲜啦!有多款煮法,有台湾地道胡椒、奶油及三杯等口味,仲有港式避风塘,惹味香浓,虾膏多而且虾肉弹牙。老板太太系台湾人,所以其他台式小菜好似鲁肉饭、醉鸡卷等质素都相当唔错,小店值得支持!

图:ooiooiMiss K.fly


第2位 北海道炉端烧

又平又正嘅日本餐厅,喺香港真系唔多,偏偏香港人最锺意就系日本菜。呢一间来自日本大阪嘅居酒屋,走大众化路线,菜式选择好丰富,车轮芝士意粉、稻草烤鱼或牛、烧物都系必点,难得每一款质素都唔错,最重要系性价比高,抵食!餐厅座位唔多,都几有深夜食堂feel,成日爆满,唔book一定食唔到。

图:hktastycrushALISY


第1位 永年士多 (*新上榜)

长年人气高企嘅车仔面,冲出元朗喺尖沙咀开店,连条人龙都移师埋九龙!虽然评价两极,有街坊话不复当年勇,但仍然无损霸气,想食就要排队!招牌菜有猪肠、猪红、鱿鱼、萝卜等等,橙红色嘅辣汁有啲似辣版嘅沙嗲,浓郁惹味,食得辣不妨挑战大辣。地方好企理乾净,不过座位唔多,乖乖哋等位啦。

图:eatscravingFufooodie



文:Perrins


关键字
十强
排行榜
米线
拉面
放题
火锅
生煎包
泰菜
海胆
台湾菜
居酒屋
车仔面
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
情人节去K11 MUSEA 一文睇晒浪漫餐厅
2020-02-06
全城抗炎 与医护同行!提供医护餐饮免费优惠餐厅一览
2020-01-31
美国人气肉桂卷抵港!烟韧原味/朱古力/焦糖胡桃卷(有片)
2020-02-06
全城抗炎!60间餐厅推$0-$25酒精搓手液换购计划
2020-02-12
全城抗炎!卫生保障 推行防疫措施餐厅一览
2020-02-07