11月份好评餐厅十强
2018-12-06

又系时候同大家报榜喇。11月嘅十强餐厅入面,有两三间都系火锅店,睇嚟天气开始转凉,令到一众边炉友密密出动喇。而今次仲有成7间餐厅都系第一次新上榜㗎,甜品店、西餐厅、茶饮店等都有代表,百花齐放啊。

第十位  菓甜品(*新上榜)

甜品几时都会食得落,呢间甜品一嚟开喺尖咀呢个旺区,地理方面绝对占优,二嚟佢哋嘅甜品造型相当精致,最啱就系打卡呃like。要入十强绝对唔难。就好似呢道「芝士栗一烧」咁,差唔多枱枱都嗌,像真度激高,香甜嘅粟米粒粒包住嘅系芝士蛋糕,味道同样香浓。

 图:Wincyholic山区面包王

第九位  幸福班戟

一开业已经即刻登上上个月榜首位置嘅日本pancake店,今个月稍稍回落至第9位,但人气依然高企。排长龙都要等食嘅pancake,松软、带啲啲空气感,蛋香唔使讲啦,蜂蜜牛油、焦糖酱都令佢嘅味道更加香甜,想试下特别口味嘅可以谂谂热朱古力同奶茶味。

 图:lamphoebe15nnnjoo

第八位  发哥粥底海鲜火锅(*新上榜)

呢间粥底火锅新开冇耐,位於九龙湾工厦内,但日头系冰室嚟,夜晚先做粥底火锅。有唔少海鲜选择,好似鲍鱼、蛏子、龙虾咁,几新鲜,令到最後煲粥有好香浓嘅海鲜味,格外鲜甜。

 图:5teps20eatingchingching

第七位 烤鱼工房(*新上榜)

近年好多人都锺意返深圳食酸菜鱼或者烤鱼,其实唔使上去,元朗呢间一样好受欢迎,成日都要排队。蒜香酸菜烤鱼非常惹味,条鱼几新鲜嫩滑。锺意食蒜嘅重味朋友,仲可以叫埋蒜蓉烧生蚝,够晒香口。

 图:chowroy为食女司机

第六位   泰浓面

上个月第7位嘅泰浓面,今个月前进一位。由泰国厨师主理,汤底相当浓郁,而船面嘅配料亦有返咁上下份量,即使以牛肉为主,都有美国肥牛、顶级安格斯牛同飞驒和牛拣。唔食牛食海鲜一样咁开心,例如有原只波士顿龙虾海鲜船汤。

 图:食最重要甘甘子

第五位  一茶词(*新上榜)

喺一堆珍珠奶茶围攻中,呢间茶饮店能够突围而出打入十强,当然有佢过人之处。大家都系珍奶,但佢哋嘅珍奶就再加多咗少少功夫,少少变奏,变成火焰焦糖珍珠鲜奶。面层焦糖用火枪烧过,脆脆地,另外有杯烤棉花波波茶都好过瘾。

 图: Victoria Ylamlamyuk

第四位  金鹤拉面

由三甲微跌至第四位嘅拉面店,主打鸡白汤拉面,汤底由日本制造直送,上枱前打入泡沫,幼滑清香。无论卖相定味道都有一定水准,难怪持续得到拉面迷嘅欢心。

 图:花生mamanutty_eater

第三位  宝哥火锅味馆(*新上榜)

打边炉嘅季节,造就咗呢间佐敦嘅火锅店新上榜就进占三强嘅位置。喺度打边炉,有ABC餐拣,都系不外乎刺身、和牛同海鲜,汤底仲有成12款选择,三个钟任饮任食,食物质素又唔错,系值得试嘅。

 图:Molly_Momo

第二位   LIFETASTIC Patisserie(*新上榜)

甜品控嘅新宠儿,首推当然就系佢哋主打嘅澳洲西瓜蛋糕啦,杏仁碎饼、玫瑰忌廉、西瓜夹埋有五层,顶头仲有士多啤梨同开心果碎,个样靓仔之余味道又香甜。另外法式焦糖炖蛋泡沫咖啡都好特别啊。

 图:cloudybluevioletloveeating

第一位  猪手工房(*新上榜)

榜首系属於大围嘅一间工厦食店,但环境几chill下,仲要有露天座位。招牌菜系外脆内软嘅脆爆咸猪手,真系卜卜脆㗎,咸香肉滑,送埋杯菠萝0%啤都几爽。烧扇贝、燕麦紫薯饼同样要试。

 图:ChickenBalemckey


文:Kar



关键字
十强
排行榜
甜品
拉面
火锅
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】零食速报 每周新款零食、酒品点评
4天前
日本吉列牛排店京都胜牛进驻铜锣湾 黄金六十秒炸法 推介京都胜牛三味套餐
2021-02-18
楚捻记新line!荃湾新开饺子店 必试黑松露什菌饺+香煎潮汕韭菜粿
2021-02-10
食肉兽必收藏!牛年到 五间品牛餐厅介绍返
2021-02-11
1月份好评餐厅十强
2021-02-09