11月份好评餐厅十强
2017-12-08

就快年尾,大家今个月食咗咩餐厅呀?天气反映食慾,凉风阵阵最好就梗系食啲暖身嘢,火锅呀麻辣呀就系首选,甚至系汤底热辣辣嘅拉面,都系唔错嘅选择。废话少讲即刻同大家睇睇今个月嘅好评十大先!


第10位 La Casa Bistro (*新上榜)

呢间西餐厅本来做意大利私房菜,十月新开地舖,舖头细细,但至少贴地啲吖嘛。主打手制意粉,有幼蛋面、阔条面同野菌或芝士菠菜意大利云吞,配自家制酱汁,仲可以拣意大利杂菜汤、牛腩蕃茄浓汤甚至泰式冬荫功海鲜汤变做汤意,几有新意呀。

图:hoitingting山区面包王


第9位 辉哥私房菜 (*新上榜)

打边炉最紧要就系用料新鲜,呢一间用料都好唔错,吸引唔少明星嚟帮衬。锅底选择丰富,好似蕃茄野菌龙虾花甲、胡椒猪肚花甲、杏汁猪肺等12款,食物都系传统为主,安格斯牛颈脊雪花平均,海鲜亦好新鲜。得五张枱同VIP房架咋,一定要订位先食到!

图:美*食家Wildchildcarol


第8位 2DP

好庆幸素食呢个潮流仍然长青,呢间主打素食嘅café,来到11月仍然喺榜中,稍稍回落三级。咁冻仲食茶味雪糕?仲有其他甜品半熟芝士炖蛋、桃胶雪莲佐黄耳都好滋润架。咸食的话就推介韩式泡菜芝士汉堡配蕃薯条同黑松露杂菌阔条蛋面,素食都唔一定系淡而无味嘅!

图:技巧树熊LazyDiary


第7位 饺饺饺子 (*新上榜)

呢间来自日本嘅饺子店已经开咗一段时间,之前兴浓汤水饺,今次就轮到日式饺子!饺子每日新鲜包制,皮薄而且煎我香脆仲不时推出新口味,好似京都九条葱饺子、蘑菇饺子及日本淡路岛产洋饺子等,仲有shake shake同拉芝鸡肉饺子添。

图:eunice2046sum_jessica


第6位 湘蜀人家

食麻辣嘅四川菜馆好多,但好味嘅又真系唔多。呢一间由四川师傅主理,有湖南及四川菜式,招牌菜有水煮鱼,辣度够而且好香,唔会一味死辣,而且份量十足。自家制四川凉粉好滑溜,酸香开胃。餐厅位於商场入面,企理乾净,坐得舒服。

图:mj712iam5tt


第5位 火锅英雄

连续几位十月都有上榜,因为又系麻辣又系火锅,系好难抗拒嘅!其实都有唔辣嘅汤底,好似二十五年陈年花雕醉乌鸡锅,用较健康嘅乌鸡,酒味浓郁。酸菜冷锅鱼就带酸香,加埋鱼片更富鲜味。其他川式小菜好似系水煮鱼、刴椒鱼头都唔好错过呀。

图:小东Kikivicki


第4位 翟道翟棉棉冰

天气冻都无阻食冰嘅决心!主打泰式芒果糯米饭刨冰嘅专门店,人气继续高企,只系微跌一级啫!除咗刨冰,饮品都系店子主打,香甜嘅泰式奶茶同猫山王奶昔固然多人like,其实冬荫功梳打都几得意,入口香辣有香茅味,好似冻同有汽版嘅冬荫功汤!下次试试佢吖。

图:Priscilla Chaneat_eat_everyday


第3位 三家村水产 (*新上榜)

食海鲜唔系一定要去西贡,去油塘都得!呢间新开冇耐嘅海鲜浜烧店,一室日式鱼市场格局,好似去咗日本咁!对住无敌海景,烧嘅就以日式海鲜为主,好似有帆立贝、生蚝、白蚬、虾、蟹,亦有本地螺、火箭鱿及自家风乾嘅一夜干,即拣即烧,唔使加任何调味都够晒fresh!

图:Curtht_dawn


第2位 有囍 (*新上榜)

呢间星马小店,有一道火焰胡椒蟹煲洗晒版,蟹斤量十足而且沾满胡椒酱汁,仲会喺客人面前点火!其他菜式好似系奶油虾、娘惹石蚝、药膳花胶肉骨茶等都好多人食。店子亦有星马火锅,汤底有喇沙、咸菜猪肚汤同肉骨茶,够晒特色啦!

图:noodlesx3ccrreami


第1位 (*新上榜)

呢间店突然新上榜,就好似旧人攞新人奖咁。一早於鹅颈桥底打响名堂,当年曾经系浓厚豚骨汤拉面嘅先头部队,今次於太子回归,就立即登上No. 1宝座!难得维持原有餐牌,招牌魂拉面、加入蟹膏金箔嘅太极、菠菜汁汤底青龙,仲有嗰只极销魂嘅溏心蛋,忠於原着,抵你排第一!

图:为食小晶晶mandymanlovefoodie



文:Perrins

关键字
十强
排行榜
饺子
拉面
火锅
旺角
太子
尖沙咀
素食
麻辣
星马菜
海鲜
西菜
意粉
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
尖沙咀新商场开幕 过江龙餐厅一览
2019-10-11
【特约分享】食鱼生转运 三种好意头日本海产介绍
5天前
日本人气茶室登陆尖沙咀 招牌Tea Set、甜品推介(有片)
2019-09-25
亚洲首间 Tiffany Blue Box Café 打卡必到!三层架下午茶 + 棉花糖鸡尾酒
2019-10-08
【特约分享】茶记实测 西多、菠萝油控必睇
2019-09-19