No.9 Bistro (已結業)

同事話觀塘王子大廈有新餐廳-No. 9同事試完話好好味，有一位仲話以後要去多d。心唸!有冇咁跨張呀！今終於去試，一行6人。去到見餐廳環境唔錯，比人有舒服感覺。但lunch時間都唔係太多人。Set Lunch 有餐湯/餐包/主菜/餐飲。都有10款左右揀。我最揀咗非洲雞扒($92)餐湯-什菜湯，我覺得比較酸，但免強可以接受餐包-硬豬仔包配牛油主菜-非洲雞扒配意粉。意粉上面有一堆意粉醬，見到唔係幾開心，因為我唔食的。唯有撥開繼續食。好彩有一小碗燒汁，撈你埋意粉一齊食，就可以蓋過意粉醬味道。意粉硬度我鐘意，唔會唸。雞扒有少少花生醬味，肉質軟又有肉汁，唔錯。有蕃茄及一條西蘭花做伴碟。凍檸水凍飲唔洗加錢。不過我冇影相到埋單先知有9折。但我都覺得比較貴，而且未至於係好好好好食的。

食物再好吃也沒有用，惡劣的服務態度已令我再不會踏足。星期天下午五點多帶朋友還有兩個小孩到這裡吃下午茶，之前巳在這裡吃過午餐覺得有誠意及良好的服務態度才不斷推薦及帶朋友來吃。但經過這次那位黑面中年男子服務之後，我巳不會再來亦希望貴店知道如果是不歡迎小孩或不太想serve下午茶，應在門口説明！但值得讚揚是那位年青的服務員，每次也會盡心盡力招呼每一位客人，加油！

這間餐廳開在樓上，如非看到樓下易拉架都幾難會幫襯到，見到他們的$55快餐招徠，有湯有熱飲，可知現在生意難做。今個lunch叫了幾款餐，香煎南瓜龍脷柳飯上檯點睇都唔似快餐嘅，嘩有晒擺碟。魚柳很細心的煎香，並不是求其蒸熟淋個汁上面的茶餐廳水準，配菜的蕃茄也煎過的，好感動呀！本人是焗豬扒飯的Die hard Fan，出街食飯諗唔到必點焗豬扒飯，好唔好食除了豬扒質素外，至緊要個汁，坊間大部份餐廳都係茄汁溝燒汁打獻淋上面焗一焗就算，要比較這間餐廳個汁就真係誠意之作，我食到蕃茄味，不是茄汁的酸味，豬扒也沒食出用鬆肉粉加工，最後是俄國牛柳絲飯，味道滑不留口，香濃惹味，配搭的洋蔥燈籠椒很新鮮，食落令牛柳絲也給比下去。食完可以選即磨咖啡，這樣的環境質素，收這麼大眾的價錢，你話我賣廣告都要幫佢地宣傳下這間我的首選餐廳。

觀塘人多車多，這間餐廳開在我公司樓上，價錢同食物質素成反比，絕對是價賺物美之選，今天和同事上去蛇王，西餐廳就景然有茶餐廳的食品，而且做得更精緻，點了一個西多士，不是配傳統糖漿，改用蜂蜜配搭，炸得外脆內軟的多士，滴上絕不是普通的超市蜜糖，從未試過這樣的西多士，甜度剛好帶走已不多的油膩感。另外一個芝士煙肉卷，外表平平無其，切開立刻現真身，勁濃郁的芝士流出，喜愛芝士人士必點之選，熱食外皮鬆脆，內裡芝味十足，每口都充滿香濃的芝士，再配上一杯即沖熱咖啡，即刻充滿能量，再回公司搏殺。

上星期五下午同Madam去咗觀塘開會，一開就３個鐘，落樓都４點鬆Ｄ，冇理由走番入沙田返公司，同Madam嚟過眼神交流就決定蛇一蛇，自動下班！但由於肚餓，２個人就鐘咗上這間樓上餐廳食個tea set先。餐廳唔係好大間，下午茶時段都只是有３、４枱食客，幾清靜。睇睇餐牌，下午茶餐既選擇都好多喎，有成２０幾款。Madam點咗 ”熔芝士吞拿魚三文治” 而我就點咗 “蝦多士”。我一心以為這是普普通通一份三文治，點知大不同，首先係圓形既，底層既麵包唔厚，最上層是芝士，焗過既芝士好香，中間是一層厚厚既吞拿魚溶，切開時吞拿魚溶湧出嚟。若是吞拿魚fans就真係開心死啦，份量十足。我份 “蝦多士” 是有原隻鮮蝦放面，麵包脆蝦肉彈，！！而且蝦多士也差不多在餐廳絕跡了，食到真開心。兩個茶餐加埋都是$80，同大NaNa差唔多價錢，但係又有Ｄ特色，環境又唔錯，是中午蛇一蛇既好地方，我好羨慕觀塘返工既朋友，你地有個咁好的蛇竇。

朋友聚餐，旺區的銅鑼灣、旺角、尖沙咀人多價貴，最惨是物非所值。今晚這間餐廳就近朋友公司，他也身先士卒試了幾次午餐才敢訂檯。先來的是龍蝦湯，飲出清淡蔬菜甜味，剛好中和龍蝦的濃味，令味道更有層次感。口感香氣馥郁，鮮而不滯。接著的香蒜辣椒象拔蚌意大利粉，是採用細品種的象拔蚌，食出不是雪藏海鮮，新鮮的海鮮加橄欖油香草炒意大利粉，4個人1分鐘洗碟，相當恐怖。再來的蜜汁銀雪魚大蝦，份量適合女孩子，煮法味道都可以。友人特別預定頭盤的特色焗北寄貝及慢煮英國威路士芥末半鞍，北寄貝一碟有兩種焗法，忌廉焗及煙肉焗，最惨兩種都咁好味，又高脂肪，真係收買人命。本人不好羊，羊鞍食了半件，沒有羶味，肉厚鮮嫩，一分錢一分貨。最後一個鮮蜜汁海鮮意大利飯，Risotto是我的至愛，雖然絕對魔鬼的誘惑，但好味指數是120%，點忍啊！意大利飯加了墨魚汁，更突出了海鮮飯的神髓，大蝦帶子墨魚都非常新鮮鮮味。埋單每人接近$300。工廠區真係臥虎藏龍，高質素的餐廳都有勇氣開在這，相信隨了租金因素外，廚師的傲氣也是原因。

食晏時份來到觀塘，當然先醫肚，朋友推介來到No.9 Bistro, 呢度既環境真係唔錯，燈光好柔和，座位又舒適。今日想點一d清新食物，打開餐牌有很多選擇，最後order左一份鮮什果沙律加＄10配美國有機鷄柳，沙律醬味道不錯很開胃，醬汁剛剛好沒有水流流感覺，夠凍得來不會有冰感，鷄柳配合生果的果香，清甜！份量又足頗抵食，免加一也蠻不錯。

每年一度的中學同學聚會通常都是BBQ, 今年出名識煮識食既阿May做攪手, 一改過往周六室外燒野食的作風, 轉咗係周六晚上, 重包咗間餐廳慶祝Alumni 10周年. 我哋比咗D好苛刻既條件比阿May, 包括budget 唔超過7嚿水但要包酒水, 要有海鮮, 有特色, 唔要老餅中菜廳, 最好包場或包廳. 諗住講笑既要求, 點知佢真係搵到這間位於觀塘一幢商厦樓上既餐廳, 出地鐵行唔洗5 分鐘, 樓下重有停車場, 算相當方便. 餐廳面積唔算好大, 略適合我地這類唔大唔細 ( 我地有28人囉!) 又想有exclusive既包場聚會.當然乜都係假, 最緊要係好食同物有所值. 這餐有9道菜, 唔係講笑係9樣. 主菜前有4款頭盆、1款湯再有sorbet . 係這些頭盆中最特別的是 ”龍蝦扎”. 餐廳負責人話這味菜一定要預訂或者包場先食得到, 因為要花成日先做得到. 由於是新鮮龍蝦肉, 肉非常彈牙, 兩片蝦肉包住好濃好濃味道既龍蝦醬汁, 咬落去好似有好多隻龍蝦係口咁, 既鮮又特別, 絕對籍得一試.主菜是 ”海鹽蛋白焗海鱸” 和 “燒頂級美國肉眼扒”, 上菜是先嚟清淡既焗鱸魚後濃味既肉眼扒. 我個人超

走進這間餐廳完全是為了避那失魂雨，順便食埋Lunch等雨停。星期六約12點半客人不多，睇menu都有7、8款套餐，同女友點了兩個餐，她選沙律餐；我選了$98的，另加$18可改餐廳特飲。 沙律食落感覺新鮮，個麵湯底西得嚟又中中地，蝦同帶子都食出爽彈鮮味，配合應該是意大利天使麵，需然不像中式的生麵的爽脆，但廚師控制天使麵的軟硬度非常好，食到尾麵都不會淋Pet Pet。另提一提我那杯荔枝特飲，用新鮮荔枝甜到漏，抵過飲那些化學合成珍珠奶茶啦！兩個人午餐銷費二百幾以質素來講物有所值。

同事成日叫我去試下，今日終於有時間一齊去食。👀見餐牌有好多選擇，仲要唔係一般set lunch,叫隔離抬個外國人食個象拔蚌aglio olio ，即刻😋😋，因為諗番起上次Cova 個scallop aglio olio, 無諗過係觀塘區都食到呢個少有的意大利pasta, 就叫了一個。真係好好食，象拔蚌好新鮮，好香既蒜香味加埋橄㰖油辣椒真係同Cova有得比，仲要平3、4倍，真係同事就order左佢地至愛和牛漢堡同龍蝦肥牛飯。真係無介紹錯，超，下星期一定再來食其他

難得有時間岀去食lunch ，見附近開左好多間新西餐廳，就去試下新野，見到巧明街頭有好多廣告，d相好靚，就決定去試下。。。點知中伏！餐牌有11個餐，好多選擇！是日餐湯，南瓜湯，餐到先上，無南瓜味！我選左香蒜辣椒象拔蚌意粉$98得四粒唔係象拔蚌即野，都算，意粉好乾，但蒜味都重，仲幾辣下，我本人食得辣，所以ok！但意粉比岀面既粗！我同事選左燒秘制雞扒配燒烤汁跟意粉呢個餐$88，我地立即諗同上市茶記個間有咩分別？真係好失望，秘制醬汁無諗過同茶記一樣味道，再加上個BBQ醬，真係唔知點形容，配意粉原來係拾意粉加左小小蕃茄醬！我地兩個食左幾啖，已經無再食！雖然有8折，兩個餐$153，食左個高級茶餐廳！

雖然在觀塘工作, 但絕冇想過係這區食晚飯, 上星期由於來自英國的舊同學Mike來上海和香港出差, 住係觀塘的商務酒店, 而我又是係這區返工, 順理成章就約係觀塘見面食晚餐。Mike係上海出差兩個多星期已經食了很多中餐，所以我就選擇咗這間fusion餐廳 …… 其實我只係在午餐時來過幾次，覺得唔錯，就即管一試。餐廳裝修唔中唔西, 似越南餐廳多過西餐廳, 唔係人人鍾意. Weekday晚上餐廳客人唔算多，靜靜地都好適合知己傾計既。Mike 點了頂級美國安格斯肉眼扒，菜上之前我都有Ｄ擔心, 因外國人食肉多個我食齋，一定有要求。但好快就放心曬，上菜的頭幾分鐘佢就好專心咁食，一邊切一邊點頭嘴角上撓，佢話這塊牛肉本身相當唔錯，肉質很嫩，再加上烤的時間同火力剛剛好，真係無得輸。只是醬汁偏咸, 唔點好過. 而我就點咗蜜燒銀雪魚伴大蝦，大蝦很鮮，肉質彈牙，銀雪魚皮有蜜塘既甜味，甜甜脆脆，魚肉亦很嫩滑，但配菜偏少，多番少少就perfect啦。最後值得一讚是個甜品，我點咗心太軟。其實大膽講句喫過過百心太軟，見盡無數失敗之作，唔係太硬就是太塔，又或是只有甜味而冇朱古力味，好食Ｄ既隨時要舊幾水。這份心太軟只係晚

中午出觀塘港鐵，成條大直路幾十個易拉架夾道歡迎，何其壯觀！超過一半是樓上餐廳Cafe，檢閱完架陣後，隨意選了這間沒中文名的樓上店9 Bistro，時間已過2點故不用等位，餐Set真係最平幾十至百鬆元，現在食Lunch茶記都要$40幾，更不要說翠X啦！搵食唔難，抵食好食(唔難食)才難！Order了Set餐卡邦尼意大利粉，餐湯是洋蔥湯，湯面沒有花巧的烤芝士脆包，簡簡單單盡顯廚師功夫，濃郁的洋蔥甜味徘徊口腔，即時胃口大開；主食卡邦尼意大利粉就真係故佢唔到，是以黑松露醬配忌廉汁，再一次印證最高境界簡單就是美，沒有多餘配菜，點睛位是意粉面鋪上幾粒鮮魚子，與意粉卷著放入口中，黑松露醬獨特的濃香夾雜魚子的鮮味、味蕾又一次被煥醒。今次誤打誤撞試了這店，驚喜真係源源不絕，最加分係杯餐飲咖啡，是即時用咖啡機冲，聞到已經醒晒，值得再重臨研究研究其它美食。

與同事見觀塘新開間Fusion菜餐廳，一於上去試下，裝修陳設雅致及舒服，位置方便。是日餐湯是洋蔥湯，味香濃又健康。煙三文魚龍利卷配查吉斯汁，口感十足有層次，吾錯！非洲雞扒，份量十足，d醬汁薄薄地包住件雞配合薯仔好香口的!食完飯就梗係要嘆返杯咖啡~~估不到味道都OK!!!上碟講究精美，食物有質數，係人多街窄的觀塘區，找間舒適的的餐廳 relax 吓！好好享受一頓美食。

今日上午跟叮噹到觀塘開會，12點前開完會就順路係觀塘食晏，隨便上了這一間係樓下派傳單的餐廳。由於未到食晏時間，一到就有位子。餐廳的門口有一幅以巴黎鐵塔的畫，配上略帶越南風的椅凳，環境ＯＫ啦。我點了非洲鷄扒配薯菜，整塊鷄扒表面鋪有一層濃濃的香草醬料再烤的，而出奇地肉質相當嫩滑，而且味道夠濃，基本上不用點另上的醬汁。薯菜包括烤蕃茄、烤黃瓜跟炸薯角，分量相當足夠。叮噹就點了特式煎肉餅馬拉盞配薯菜，肉餅很有嚼勁，感覺並不似機打而是手打，而且有淡淡既馬拉盞味，味道適中不算太咸，藉得一讚。而薯菜是菜芯加焗薯，分量偏小，但女生就剛剛好。