泰嘟嘟

營業中

休息中

今日friend約我去食泰國菜，位於大角咀的新舊樓附近，有間五光十色的泰嘟嘟，裏面坐滿晒人，門口好多人等位，但老婆想試吓，我們就等等，好彩都好快有位🙏🏻，入到店內，氣氛感覺好好，而我兩有幸第一次來就可以坐在嘟嘟的坐位上😆。先來杯芒果芝士沙冰，清涼👍🏻，第一道菜上場：焗黃咖喱麵包軟殼蟹，咖喱好好味，點麵包食一流😋，再來是小食拼盤（小），有我最鍾意食嘅炸蝦餅，記得要點泰式辣醬，還有春卷，雞串燒，牛油雞翼😋。之後是炭燒豬頸肉，有個爐熱住，特別好食😋，見到menu有泰式生蝦，但已被刪除，但睇menu相幾靚，我就多口問一問店員有冇得食，開心的回覆☺️有呀😋一共有六隻生蝦，兩種醬汁，兩種都好好味，有小小辣更加正，必食。滿足的一餐🤤

位於大角咀利得街既一間泰國美食店🇹🇭雖然店舖空間不大，但裝潢都算有特色用心準備店舖有３張泰國便利交通既嘟嘟車做卡位嘟嘟車卡位位置比較闊落會坐得舒服啲有冇機會坐就要靠運氣啦因為都係由職員隨機安排既餐牌列出勁多食物選擇，花多眼亂呀樣樣都想食，今次得２人同行，下次要搵埋朋友泥食多啲選擇呀香芒軟殼蟹米紙卷 ＄７８雖然落單時職員有同我地表示需要製作２０分鐘但等左１０分鐘內已經上左米紙卷每件米紙卷都有大大舊芒果同埋軟殼蟹勁足料！芒果好甜、軟殼蟹啖啖肉唔會太鹹，正馬拉盞炒通菜＄５８辣辣地，好惹味，食落真係停唔到口份量好大碟，岩晒平時需要食好多菜既我串燒沙嗲半打（自選豬肉／雞肉）＄８８我地叫左各３串，無論豬肉／雞肉都好juicy唔會燒到乾晒泰式菠蘿海鮮炒飯＄９８成為店舖推薦產品一於試下佢啦分量又係大大碟，２個人真係食唔晒海鮮係有２隻青口同埋蝦炒飯粒粒分明唔會過分濕，好食📍泰嘟嘟 Thai Tuk Tuk🔎大角咀利得街14號地舖

/位於大角嘴既Thai Tuk Tuk主打經典泰國菜模仿泰國篤篤車餐既餐座 餐廳設計及裝潢色彩繽紛之餘 仲好有泰國風味 好似去左轉泰國咁🇹🇭.🦐小食拼盤-細（$108）咩炸物都想試少少 最岩就係叫拼盤啦 細既拼盤有蝦餅 串燒 春卷及雞翼 炸物既外層香脆 蝦餅好彈牙 雞翼都大大隻 春卷入面有蘿蔔同蔬菜 唔會好油膩 配埋沙嗲醬同泰式甜辣醬食 好夾啊.🦑泰式海鮮炒貴刁（$78）一上枱比佢既份量嚇親 超大碟！配料有青口 魷魚 蝦 菇同埋唔同既蔬菜 炒得好有鑊氣 食落辣辣地 幾惹味 食唔停口啊 .🐮泰式咖喱牛筋腩煲（$108）泰式咖喱既辣度好岩岩好 幾creamy 牛筋係入口既融 牛腩都煮到好入味 送飯同蒜蓉包一流.🍞香蔥蒜蓉包（$42）用左厚切方包 有六大件 成座山咁高啊 入口外脆內軟 烘既時間岩岩好 蒜蓉同牛油味好濃郁 加埋泰式咖喱一齊食真係絕配.🫖泰式奶茶（$26）落單既時候店員都好貼心話泰式奶茶會偏甜 但係我都想試想試下泰式風味 飲落茶味好出 煉奶味香濃 .泰嘟嘟📍大角咀利得街14號地舖.#anygoodfood_hk#anygoodfood_taikoktsui

📍泰嘟嘟🇹🇭今個星期不斷落雨搞到好多活動都要cancel🫠不死心既我唯有約朋友仔食下Dinner吹水 最尾揀左呢間位於大角咀既泰國菜😋去到餐廳剛好係接近full既時間 小等待左一下好彩好快有食客埋單 以至於我地唔洗係外面淋太耐雨🤣全日冇乜點食野 已經係餓鬼既我地即刻order🤣⭐️小食小食我地嗌左兩款 分別係印度薄餅(32 hkd)以及泰國金柚子蝦沙律(88hkd) 印度薄餅乾身唔會好重油味 拎上手亦都好乾身🥰口感方面係偏向脆口同香 份量作為開胃小菜不過不失😋 柚子蝦沙律我地選擇左唔辣既 味道方面柚子果肉爽甜 酸酸甜甜既醬汁醒腦開胃 配搭味道較濃烈既主菜係必嗌之選👍🏻👍🏻👍🏻👍🏻👍🏻⭐️蝦醬炒通菜 (58 hkd)食泰國野一定唔少得要嗌款菜試試😎平時會叫馬拉盞炒通菜 今日就試下換個口味 今日叫既通菜十分正常👍🏻菜葉顏色唔會過老 蝦醬調味適中 唔會蓋過通菜嘅味道😛⭐️主菜今之叫左海南雞飯(半隻 98hkd)同埋冬陰功海鮮湯(hkd 108hkd) 睇下我地影既圖就知我地勁黎悔 因為真係好足料😂😂海南雞配搭既係泰式辣醬而非傳統嘅三色醬 味道上有啲似泰國出名嘅水門雞飯 而且雞肉十分嫩滑唔鞋口👍🏻配

最近都食左唔少日本菜同西餐🤔所以想食下東南亞菜式香港最好就係好易都食到唔同國家嘅地道名物😌呢日就同朋友去左大角嘴食泰國菜🇹🇭.🌟招牌焗黃咖喱麵包軟殼蟹 （$168）一上枱就見到金黃色嘅咖喱🥘大大隻嘅軟殼蟹放咗喺麵包上面 賣相一流🦀軟殼蟹炸到卜卜脆麵包亦都焗到剛剛好唔會太硬點埋啲咖喱醬就非常惹味🥖.🌟原隻椰青海鮮焗飯 （$88）椰青海鮮焗飯我都係第一次食未食已經聞到陣陣嘅椰香🥥食落就食到椰汁嘅清甜飯入邊仲有好多海鮮 而且份量好多 裝滿成個椰青 值得一試👍.🌟泰式海鮮炒貴刁 （$78）泰式貴刁嘅材料有蝦🦐、青口、同魷魚🦑食落都幾辣下🌶炒得乾身有鑊氣而且唔肥膩.餐廳嘅裝修幾特別😛卡位用左篤篤車嘅座位改裝而成坐喺入邊好似置身喺泰國一樣職員都好有禮貌☺️

之前都食過泰嘟嘟，又平又好食，今日又同老公嚟返尋味！平日晚上嚟到都好好生意，我哋食完都重有客等緊位。餐牌嘅選擇好多，厚厚一本多到影唔曬，講得出嘅泰國菜全部都有得點，真係好似去咗轉泰國咁。香芒軟殼蟹米紙卷　$78即叫即製，軟殼蟹食落都重好夠脆，米紙皮又薄又黏口，入面重有啲芒果、檬粉同生菜，點埋啲酸酸地嘅醬汁，口感同味道非常豐富，係好清新開胃嘅前菜。泰式明爐花甲鍋　$108酸酸辣辣嘅湯底非常惹味～花甲鮮甜，鍋入面重有好多菇同粉絲，吸滿湯汁，好入味好正。泰式菠蘿海鮮炒飯　$98本身想點椰青海鮮焗飯，不過已經售罄，就點咗份菠蘿炒飯。嚟到都冇令我哋失望，好足料好大份，海鮮嘅份量非常大方飯粒都炒得幾乾身，做到粒粒分明得嚟又唔會好油。芒果芝士沙冰　$32超好飲，鹹鹹地嘅芝士奶蓋同香甜嘅芒果非常之夾；芝士嘅份量都幾多，對我呢啲芝士控嚟講真係非常滿足。西瓜芝士沙冰　$32因為啲沙冰打得好夠細密，所以飲緊呢個西瓜芝士沙冰嗰陣就好似食緊一個起曬沙嘅西瓜咁，好清甜好正。

每次食泰國菜🇹🇭都好鍾意食黃咖喱麵包！嗰次見到有 就即刻嗌咗個招牌焗黃咖喱麵包軟殼蟹嚟食🤩上枱真係嚇親 原個麵包吐司磚🍞入面裝滿晒黃咖喱汁🍛再擺住原隻香脆嘅軟殼蟹 份量十足 賣相相當吸引！

大角咀有啲新住宅，樓下有幾個鋪位喺食肆，開始慢慢將呢區改造。有間泰國餐廳長期座無虛席，外面排隊，好在等咗10幾分鐘就有位。裝修有幾架tuk tuk 車卡位坐，己有空間感。menu有海鮮，咖喱，蔬菜，小食拼盤，飲品種類仲多，火龍果芝士奶蓋好解渴，果肉濃。豬頸肉有個爐慢慢燒幾過癮，咖喱軟殼蟹麵包係signature, 麵包都有四人份量，再點咖喱汁不用10分鐘清晒。蝦餅脆口彈牙，小食拼盤之中最喜愛，有雞醬同沙嗲汁可以點。泰式生海蝦用Shooter杯，有半打或一打揀，橙色同綠色醬汁放入Shooter杯各佔一半，個人喜歡橙色醬汁，綠色有啲青椒味同偏辣。下次要試吓海鮮，見到人哋食明爐泰式花甲煱又有湯浸住好正。

星期日晚一家外出晚飯，目標就係食泰國菜，原本鎖定另外一間，但經過沒有開門，再揸車兜來兜去，終於泊車到呢間泰嘟嘟。我地被安排坐tuk tuk 車卡位，大人細路好開心，因為真係好有泰國風味。我地3大2小叫左4人餐+冬蔭公湯+飲品咖哩軟殼蟹， 必食推介， 好好味菠蘿炒飯，可以，沒有什麼特別花甲湯，味道有點像冬蔭公湯，花甲肥美的炒金邊粉， 漏單，等了一個小時都沒有，粉炒得較濕，因時間關係外賣回家總括來說晚餐抵食好味

店名聽落好似幾有趣，入到去就發現實情係Thai TukTuk，用咗泰國特色交通工具命名，內裏裝修亦取咗篤篤嘅概念，氣氛充滿泰式風味。冬陰功海鮮湯逢食泰菜必點冬陰功湯，皆因係自己屋企煮唔到嘅味道。用明爐上檯，大大鍋，保持湯嘅溫度，入口酸甜微辣，飲到好出嘅香料同蔬菌味，夠曬新鮮又惹味。最抵讚係海鮮都幾豐富，主打用上大頭蝦，蝦肉唔梅仲幾爽彈，仲有啲魷魚同甲殼類海鮮，全部都好鮮美👍🏻泰式海鮮炒貴刁食慣泰式金邊粉同埋炒河，偶爾都可以轉下其他款式，今次就揀咗炒貴刁。份量大不在話下，配料好多，以海鮮為名果然無花無假，蝦仁、魷魚、蟹柳等，鑊氣十足每口麵都煙靭有嚼頭，又唔會過乾過濕，整體味道都好和諧，如果無埋啲三色豆應該會更好😂豬頸肉啫椰菜苗煲（馬拉盞）重口味人士之選，超級香濃，配飯一流！未食已經聞到好香嘅馬拉盞味道，用鍋盛住仲會滋滋聲，熱度十足。雖然以菜為主，但估唔到豬頸肉份量都好多，肥瘦相間，成碟菜式有唔少醬汁，配埋少少炸蒜，一啖食落夠曬滋味。最抵讚係啲菜食到尾都依舊嫩滑又爽脆，推薦！

是日下午經過大角咀就比呢間泰國菜吸引到，望望菜單價格合宜，當中有啲款式都幾新穎，一於試下佢。小食拼盤（小）每次心思思想試多幾款，但揀唔落食咩，第一樣總會叫小食拼盤。呢到$108包四種：串燒、春卷、雞翼、蝦餅，四款口味都唔錯，特別推薦蝦餅，肉質彈牙有鮮蝦味道，外面超級酥脆。另外春捲都幾好，樣貌素素地，咬開內裏包咗白蘿蔔蓉同少量蔬菜，咬落層次豐富又唔會過油。招牌焗黃咖喱麵包軟殼蟹見有廚師推薦，俾個機會試吓佢，做今餐嘅主食。上枱份量都好多，軟殼蟹同黃咖哩都溢出包外。軟殼蟹幾厚身，咬落脆身得來唔會淨係得塊炸皮。配搭外脆內鬆軟嘅麵包，沾埋濃濃黃咖哩，每一啖都好滿足，就算飽都會令人忍唔住不斷meet嚟食～芒果芝士沙冰友人係芒果迷，見到呢杯坊間好少見嘅特色飲品，上檯未飲已經覺得好正！呢個價格，大大杯，眼見鮮豔芒果黃，上層仲有唔少芒果粒同芝士奶蓋，飲落夠新鮮又清甜，解膩解渴解熱都一流！餐牌如下

今日落紅雨都堅持要去搭tuk tuk食泰嘟嘟😆好彩朋友識行 由太子站過去都係5分鐘路程🙌🏻7點左右到 已經差唔多full house😯入座一陣 出面開始排長龍🤭臨走職員都話平時遲啲黎都冇位食，大家最好book位呀❤️餐廳入面嘅裝修五光十色🤩播住泰文歌，幾有feel～有得單點都有套餐，二人餐揀三樣嘢都係2百幾，好抵食呀😋不過因為我地想食甜品同椰青，所以就單點啦😝主食：蟹肉炒粉絲、馬拉盞西蘭花炒蓮藕、泰式辣椒膏炒花甲小食：月亮蝦餅、芒果糯米飯飲品：椰青樣樣份量好足夠偏大👍🏻重點係！好熱！🔥食落熱辣辣好新鮮💯炒粉絲乾身不油膩，炒花甲唔會太辣非常惹味😋😋馬拉盞就有啲偏鹹，但係送粉絲一流😍月亮蝦餅一份有八件，勁多🤣🤣食唔曬🙈椰青清甜冰凍，正呀爽呀🙌🏻🙌🏻最後雖然食到好飽但係都忍唔住嗌左個芒果糯米飯🍚甜甜的，畫上完美嘅句號。💯下次嚟一定要提早book定位坐tuktuk，打下卡，慢慢食，過下泰國🇹🇭癮先！PS 個個服務態度都好友善，雖然好忙做到踢晒腳，但係佢哋都好快手，係咁幫手執走枱面上嘅嘢，買單嘅時候仲會同我哋傾兩句🥰好味呀啲嘢食👍🏻👍🏻

去咗轉泰國一樣😎位於大角咀原來有一間超有泰國style嘅餐廳😝一入到去不論裝修定擺設都另有一番風味👍🏼•招牌黃咖里麵包軟殻蟹 $168賣相超吸晴!一個勁厚多士再加幾隻軟殼蟹係上面，點知原來入面係空心㗎，全部都係!係全部都係！！！咖哩同配菜‼️驚喜十足!咖哩已調配港人口味，唔會太辣，連唔食辣嘅屋企人都食到👍🏼但味道夠哂👍🏼👍🏼見到當晚都不停有人嗌這招牌菜❤️•去骨海南雞配油飯(半隻) $98老實講，我有啲後悔無叫成隻🥲超嫩，連最唔好食嘅雞胸都煮到好似食緊雞髀咁樣🥹真係好得‼️另外，佢嘅雞超黃，黃油雞，食落有啲肥美，令成個口感好正！獲選為成晚我最愛嘅菜😙•泰國柚子蝦沙律 $88本來係expect好清新醒胃，但有少少調味調得太重手，成個感覺酸辣味多咗而cover咗柚子味!佢一共有3隻蝦，都彈牙嘅！我下次黎未必會再叫lu…•小食拼盤 $148份量好多，好滿足‼️有香葉包雞，蝦餅，魚餅，串燒，炸雞翼，仲有春卷添呀😙我地4個人都食唔哂🤣其中串燒係最得我心，加佢個沙嗲醬，真係好味道❤️•香芒軟殼蟹米紙卷 $78超級refreshing!!!芒果亦都好甜，中間有啲脆米係度，令口感更加豐富☺️夏天好啱食！！正！

同屋企人去咗奧海城行街，跟住就行幾步落去大角咀搵食🍽始終呢一區比較多唔起眼嘅小店，今日去咗呢間位於利德街嘅泰嘟嘟。泰式肉碎生菜包($88)生菜包幾乎係食泰國嘢必不可少嘅菜式之一😃豬肉碎香味突出，食到幾款香料味，作為前菜開胃一流。同埋豬肉碎份量好多，食得滿足，唔使慳住慳住食🤣串燒沙嗲 ($88) 一客串燒有三串豬肉+三串雞肉，雞肉外表微焦，配合串燒必配嘅沙嗲醬汁，味道更加誘人🤪豬頸肉啫通菜煲(馬拉盞)($76)以往食親泰國嘢都會忍唔住食通菜煲，呢度可以揀埋豬頸肉，價錢比起凈通菜唔算貴好多，又幾抵食啵！😋通菜大火猛炒夠鑊氣，味道唔會太鹹，食落惹味之餘亦唔會太口渴😆蟹肉炒粉絲($68)粉絲炒得夠乾身，食落口幾爽彈，口感唔錯，粉絲份量都唔欺人~

今日過咗大角咀搵食，食咗呢間都幾抵食嘅泰國菜！佢有套餐，如果套餐啱食更加抵。我哋今晚散叫，都好豐富泰式辣椒膏炒花甲係必食推介！呢個花甲炒得非常惹味，花甲亦都新鮮飽滿，味道唔錯一碟嘅份量都唔少！之後叫咗侍應推介嘅招牌黃咖喱麵包軟殻蟹，上枱已經覺得色香味俱全黃咖喱味道香濃，唔會好辣；軟殼蟹炸得幾香脆，好鍾意食！呢個菜式非常飽肚，烘脆咗嘅厚多士配咖喱汁幾好食最後食咗個蔬菜，感覺健康啲～$58 有大大碟飛天炒通菜，確係抵食！通菜加入左唔少香料，連平時唔鍾意食菜嘅我都食咗半碟呢度仲有好多泰式小食，下次多啲人嚟再試多啲嘢