約咗朋友去蘭桂坊飲一杯，飲酒前決定食啲嘢先，經過Tokio Joe，咁啱見到佢開門，燈光昏暗，氣氛好似唔錯，一於喺呢度食個飯。 Tasting menu 非常豐富，但今晚唔想食太飽，決定散叫。 先食一個刺身盛合，雖然話係二人份量，但有啲刺身都有三件，仲要好厚切！份量都好慷慨！吞拿魚肉味濃郁；油甘魚腩油脂豐富；toro近乎入口即溶，食完齒頰留香，好正😋 之後叫咗炙燒壽司盛合，有四款壽司：火炙toro 、和牛、帶子同埋三文魚。最最最好味係火炙和牛壽司，肉味同埋油脂都大爆發，一人一嚿都有啲唔夠喉😛 火炙toro都係必食推介，toro本身已經油份好重，再燒一燒迫晒啲魚油出嚟，真係好好食！ 食完壽司飲碗麵豉湯暖下胃👍 最後再食埋西京燒鱸魚，鱸魚肉質細嫩，配西京燒汁味道唔錯！ 食飽飽之後有水果同甜品☺️ 菠蘿雪葩非常清新消滯！

Airside開咗咁耐都冇去食過飯，今晚約咗閨蜜食飯，搵間坐得舒服啲嘅餐廳。 嵐月裝修非常雅致，座位同座位之間空間感十足，啱晒大家食飯傾偈。 呢度嘅價錢唔算好平，不過食物擺盤精緻，材料高質，服務又好，絕對係值回票價👍 如果啱食嘅話，套餐其實真係好抵。 我哋今晚食咗幾樣嘢味道都非常唔錯，咖啡燻20日初鴿好有特色，一上枱已經聞到煙燻咖啡豆嘅味道，配上細細隻嘅初鴿，炸得皮脆肉嫩，真係好好食，一人一隻好滋味😋 蘋果木燻泰安雞係必食推介，侍應一拎起個罩已經聞到好香嘅蘋果木味道，泰安雞煮得剛剛好，入味、雞肉嫩滑、雞皮爽口，充滿茶燻嘅香味，旁邊仲有啲烘脆咗嘅茶葉，配埋一齊食口感更加豐富。 嵐月小炒王亦都有特色，味道少少辣，幾惹味，材料豐富，最特別係有炸脆咗嘅芋絲同埋瀨尿蝦乾，呢碟餸用嚟送飯一流！ 我哋冇嗌飯，叫咗炒新竹米雪場蟹炒桂花，米粉炒得利落乾身，食起上嚟一啲都唔油膩，配埋芽菜同埋少少芹菜增加口感，呢個主食我哋都好鍾意。 呢度仲有唔少特色甜品，不過我哋今次就食唔落啦，下次再品嚐。

嚟到呢度一定要食沙羅曼特大丼，呢個飯係份量超級大㗎，勁大條好厚肉嘅鰻魚丸原條上枱，視覺效果非常震撼😂 鰻魚下面仲有玉子同埋紫菜飯，非常豐富！ 呢個飯好啱食肉獸，啲鰻魚食極都有好滿足 另外一個主食我哋要咗鰻魚萬花筒，鰻魚中間放咗一隻溫泉蛋，撈埋之後成碗飯更加香滑，好味道啊！呢個套餐仲跟一碗湯，幾抵食。 香港專門食鰻魚飯嘅餐廳唔多，呢間性價比都算幾高！依家仲做緊優惠啊，無論食任何套餐都會送一串鰻魚串燒👍🏻👍🏻 把握時間快啲去食！

朋友點名要食辣嘢，一於同佢去麻辣香鍋啦！選擇夠多👍🏻 旺角嘅麻辣香鍋好熱鬧，平日晚飯去都全場滿座。 諗住一陣食水煮魚定係招牌香鍋！兩樣都好似好吸引，最後就決定食招牌香窩，有好多配料可以揀。我哋揀咗好多樣嘢：豆皮、午餐肉、豬頸肉、腐竹、萵筍，五個餸已經好大兜！ 我哋揀咗麻辣小辣，香濃惹味，整體麻得黎唔會好辣，好正。推介大家一定要食午餐肉，煎香咗嘅午餐肉好香口，豆皮同腐竹就吸晒味道，好食，送飯一流！ 一路食辣嘢，一路飲冰凍嘅啤酒，麻甩又開心😂 之後叫咗個冷盤同埋炒菜，份量都多，好抵食。 最後食埋脆卜卜熱辣辣嘅炸饅頭，配甜甜嘅煉奶，解辣又好味。 最後飲埋飲品，真係飽到上心口

今晚的晚餐非常滿意，第一道菜由廚師親自拎過嚟，閒談兩句，非常欣賞廚師煮食嘅理念，亦好欣賞佢大膽創新嘅食材配搭，每一道菜都有小驚喜😍 餐牌簡單直接，一人揀一個頭盤一個主菜就搞掂，唔使三心兩意！ 先來拖羅小金杯，中拖羅配青提子，提子嘅酸甜正好中和拖羅嘅油膩感，呢道菜嘅驚喜在於鰹魚芥辣啫喱，細細粒透明嘅啫喱味道豐富濃郁，令拖羅嘅味道更加突出👍🏻 另一個頭盤系花生醬牛尾肉球，呢個頭盤都有啲飽肚感。 牛尾都煮得幾淋，菲律賓蝦醬好有提鮮嘅效果，鐘意濃味嘅朋友會鐘意呢個dish! 第一個主菜系牛仔面頰肉配燒鵝油千層薯，牛仔肉上面加咗少少魚腥草，真系估佢唔到，放埋一齊好特別，味道即刻醒神咗！千層薯系我好鐘意嘅食物，用燒鵝油比用牛油更多香，雖然邪惡但真系好好食🤭 第二個主菜系侍應姐姐強力推薦嘅八寶釀乳鴿，真系無令我失望🙂 乳鴿一拎上枱已經聞到好香嘅味道，切開之後系好好食、好足料嘅紫米飯，食到好多瑤柱同埋羊肚菌！呢個真系必食推介👍🏻 甜品揀咗腐皮拿破侖😂 呢個甜品系全餐飯最驚喜嘅菜式，冇諗過可以將腐皮整脆來做拿破侖，簡直系顛覆咗我對腐皮嘅認知！用腐皮做拿破侖比酥皮感覺清新啲，而且多咗豆香，都幾夾幾好食。 成餐飯都好有驚喜，價錢亦都好合理👍🏻 香港嘅餐飲業真系好難做，希望大家都多啲支持有心有力嘅小店啦❤️

前晚同朋友去咗諾士佛台1號 地鐵站行過去，5分鐘就到 因為係一樓所以可以行樓梯上去，唔使排長龍等𨋢 都有唔少人排隊等位， 好彩一早book咗位 餐廳裝修好似居酒屋 環境衛生 啲枱唔算好迫 傾偈聚會都好舒服 侍應首先俾咗張落單指我哋自己點串燒 淨係雞牛豬，每樣都有好多款 例如有鹽燒同汁燒 最貼身係有個坐暖器 啲串燒嚟咗之後可以放上去，唔使攤凍晒 我哋今次主要叫肉 大部份都係日式和牛串燒 大力推薦 肉質鮮嫩，入口即溶，油脂味好重 係我最鍾意嘅牛 燒嘅時間唔會太耐 火候控制得剛剛好 另外亦推薦牛舌 唔會好大浸內臟味 厚薄啱啱好 雖然係主打日本串燒 但燒豬頸肉，配上泰式辣汁都好好味 總括而言，款式多樣唔單調，服務貼心，環境舒適，朋友聚會就最適合不過。 兩位買單都只係$800有找，同區性價比算高👍🏻

今晚出尖沙咀買嘢，順便食個飯先返屋企啦。見到呢間泰國嘢選擇都幾多，而且價錢非常經濟實惠，一於食佢啦！ 飲杯龍眼冰先再慢慢揀😬 呢度嘅海南雞真係非常推介，雞肉鮮嫩幼滑，配上醬汁真係一流👍🏻 兩個人食半隻啱啱好！ 食泰國嘢，當然要食燒豬頸肉，一份都有好多片，肉質爽口，味道唔錯。 主食揀咗菠蘿海鮮炒飯，好足料好多蝦，旁邊仲有一件燒菠蘿，酸酸甜甜好開胃😋 最後食埋香甜嘅芒果糯米飯，一份有齊黑糯米飯同埋普通糯米飯，啱晒心意嘅我哋！ 食得咁豐富，每人都係二百零蚊，性價比真係好高👍🏻

今晚同朋友仔想食得light少少，於是就去咗食西班牙菜，有tapas，細細碟，可以食多幾款唔同嘅嘢！ 呢間西班牙餐廳選擇都好多，心大心細揀咗幾樣嘢食。本身好想食海鮮飯，不過見到真係好大兜啊，兩個人應該食唔晒，唯有下次先再食。 Happy Friday 梗係要飲杯Sangria啦！ 和牛及鵝肝配長法包係必食推介，香脆嘅法包入面包住流心嘅鵝肝醬，面頭係火炙左嘅和牛，口感同味道都好豐富，好食到我嗌咗兩件啊！ 火腿雞蛋配脆薯片都好好食，個名好似好簡單咁樣，其實就係一啲香脆嘅薯仔絲喺底，上面就有蛋同埋西班牙火腿，香脆嘅薯仔絲配蛋汁真係好好食，配埋味道香濃嘅火腿，係一個好好食嘅tapas👍🏻 如果鍾意食生牛肉，呢度嘅生牛肉他他都唔錯㗎，味道都幾濃。 呢度啲tapas真係幾多選擇，樣樣都唔錯! 食完tapas 我哋都食咗一個主菜，叫咗cod fish，配埋燉蔬菜，味道清新健康，都係一個唔錯嘅主菜。 一個完美嘅晚餐點可以冇甜品呢😂 雖然已經食到好飽，但都食咗焦糖布甸，布甸口感creamy，略為覺得甜咗少少。 我哋都幾鍾意呢間餐廳，下次一定要嚟食西班牙海鮮飯！

今日去咗氣氛好好嘅居酒屋，可以選擇坐普通座位或者榻榻米😬 呢度餐牌選擇都好多啊，店員冇乜特別推介，自己慢慢睇。先叫兩杯飲品飲住先再揀。 我哋食咗打卡大家一流嘅海膽杯同埋鮭魚層層疊！ 海膽杯真係有海量嘅海膽同埋三文魚子，味道豐富😋 鮭魚層層疊有好多三文魚，侍應上枱嘅時候仲會火炙一下，令到要魚油香味更加突出👍🏻 然後食咗一客清酒煮蠔，份量好多，都算幾抵食！ 最後仲食咗玉子燒同串燒，一路食一路傾偈，食食吓都好飽肚。 串燒其實有好多款，不過飽得滯食唔到其他啦🤭 下次再嚟試吓。

之前天氣好凍，即刻去食啲辣嘢刺激下！ 銅鑼灣川滿居好熱鬧，平日晚飯去都好多人！ 呢度餐牌選擇好多，完全係眼闊肚窄。 嚟到呢度一定要食招牌香窩，有好多配料可以揀。我哋揀咗好多樣嘢：午餐肉、豬頸肉、油豆卜、腐竹、薯粉等等，上枱嘅時候好大一兜，非常香噴噴！我哋揀咗麻辣小辣，味道惹味濃味，麻得黎唔會好辣，好味道。油豆卜同腐竹係必食推介，吸晒濃味嘅醬汁，配埋冰凍嘅啤酒真係一流！ 我哋叫咗炸饅頭，炸得香脆熱辣辣，配甜甜嘅煉奶好好食🤤 黃金白玉菇都好味，每一條菇都佈滿邪惡嘅黃金醬！試食推介啊👍🏻 最後仲好健康咁食咗炒萵筍，清清地幾好味。