3月份好評餐廳十強
2017-04-06

2017年已經過咗第一季,大家有冇周圍搵吓新餐廳試試先?睇吓個榜,今個月嘅上榜餐廳相當平均,咩類型菜式地區都有,但就以口碑餐廳、分店為主,暫時唔多見新開食店。唯有繼續留意下個月會唔會有新力軍殺入十大啦!


第10位 新泰東南亞餐廳 (*新上榜) 

食泰國菜除咗去九龍城,灣仔都有好介紹。雖然呢間餐廳已經開咗一段時間,不過一直都保持到水準,幾間分店食物質素都好穩定。主打泰國菜,亦有少量印尼、越南及馬來西亞等菜式,選擇夠晒豐富。招牌菜有燒春雞配香茅飯、日本焗南瓜海鮮飯等等,最緊要價錢唔算價,而且地方闊落,一大班人或者情侶都坐得舒服。


圖:小砂糖蘿蔔菜子


第9位 烏龍燒

呢度嘅串燒係自己親手燒,相信好多人都想過吓BBQ癮!每枱都有迷你燒烤爐同調味料,串燒有好多款揀,海鮮好似原隻扇貝、生蠔、鮑魚等都特別受歡迎,當然唔少得三種口味嘅燒雞翼啦!最特色係竹筒飯,將原個竹筒放喺爐上面燒,亦有煲仔、鐵板唔同煮法,有得食有得玩,仲開到凌晨三點,宵夜一流呀!


圖:Voracious、starki


第8位 ZUC.CCH.ERO (*新上榜) 

呢間甜品店一開業已經好矚目,甜品賣相好靚,最啱來影相呃like。3月推出嘅富士山甜品,藍白山係乳酪波子汽水蜜瓜芭菲,仲有噴煙效果,富士山下有用蛋糕整嘅青草地,成個造型神似又有詩意,所以難怪早排洗晒板囉!除此之外,另一款櫻花樹甜品都好吸睛,想試多幾款點雲石盤下午茶就啱晒。

圖:lokyanyansugarcat


第7位 鐵牛台灣牛肉麵 (*新上榜)

好想去台灣旅行但又冇時間,唯有食碗牛肉麵當去咗!呢間鐵牛早前喺旺角開咗分店就即刻上榜,因為舖頭由台灣人開設,招牌紅燒牛肉麵湯底濃郁,牛筋腩燜得入味,幾乎係每枱必點。滷肉便當有大碗滷肉飯同配菜,滷肉好豐富。仲有逢甲鹽酥雞、香腸等夜市小食,餐廳係半自助形式,價錢相宜又冇加一,晚市好多人排隊。


圖:sophia228為食Mojil


第6位 Green Waffle Diner (*新上榜)

呢間都算係窩夫店嘅始祖之一,中環店已經開咗好幾年,早前在銅鑼灣開分店。呢度多咗沙律吧,仲有smoothies bowl等健康食品。除咗唔同口味嘅窩夫,班戟都好多人鍾意食,有一款斑蘭班戟好出名,青色嘅班戟充滿斑蘭香味,食落唔會過甜,而且有龍鬚糖拌碟,賣相好吸引。鹹點就以全日早餐、鑊仔薯粒最受歡迎。


圖:IE食神俠侶ilovetoeat1


第5位 薯仔屋

近來興起party room,其實好多年前已經有樓上café啦!薯仔屋開業咁多年仍然有一大班支持者實有原因。食物唔似一般樓上café咁 參差,薯皮、雞翼大家share就啱晒,主菜都有燒豬肋骨同意粉等等,唔怕食唔飽。最緊要坐得舒服,仲有遊戲機、玩具、漫畫同大量board game,同friend子玩足大半日都得呀。

圖:akis365day


第4位 The Americano (*新上榜) 

天后Texas Burger的姊妹店,位於工廈入面所以環境闊落舒服得多,除咗漢堡包,亦有沙律、炸魚薯條等其他款式,比天后店餐牌選擇更多。漢堡包以巨型見稱,招牌德州燒烤漢堡係必食推介有好煙燻牛肉、煙肉、脆洋葱圈等配料,漢堡牛肉肉嫩多汁好足料。仲有加咗藍芝士嘅三重特濃芝士、燴豬絲、素食及煙燻鵝肝漢堡等六款口味。


圖:monchan98Raul L.


第3位 8鍋臭臭鍋

長期都榜上有名嘅8鍋臭臭鍋,今個星期又入返三甲,排隊人龍完全冇縮短過。湯底有9款選擇,如果已經食過幾次招牌臭臭或者台式麻辣鍋,不如試吓其他湯底,好似限量供應的南瓜鍋、藥膳羊肉鍋等等,評價都相當唔錯架。


圖:MiMi416識食小姐


第2位 Bingo & Cook (*新上榜)

大熱嘅韓國菜點可以冇份呢?今次呢間有大量oppa坐鎮,即刻加晒分!食物多元化,部隊鍋、炒年糕、紫菜包飯等大路菜式之外,最主打都係炸雞同烤雞,亦有拼盤可以每款都試啲。無骨雞件啖啖肉,新鮮炸起勁juicy,而且皮脆肉滑,甜辣醬調得啱啱好,每客亦跟沙律醬,蜜糖芥末醬,燒烤汁同辣醬汁,有多種食法。


圖:HktravelMapper


第1位 Candies Foodies (*新上榜)

第一位係由上海生煎皇明星老闆Oscar開設,今次唔賣上海點心賣多國菜,最霸氣菜式係原板海膽意大利飯,選用韓國海膽,成板上枱俾你自己加入飯中,飯用龍蝦汁燴過,夠晒甘香鮮甜!另有荷蘭薄餅、新鮮波士頓龍蝦、澳洲草飼肉眼扒等選擇。餐廳設有candy corner,如果讚好佢哋facebook每人可以免費夾糖一包!


圖:s12194catloveeat_cc



文:Perrins

關鍵字
排行榜
窩夫
漢堡
西餐
泰菜
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
2月份好評餐廳十強
2017-03-06
4月份好評餐廳十強
2017-05-10
【無綠不歡Green Monday】味覺顛覆 未來漢堡襲港
2017-04-18
【新店直擊】粉色系Café潮聖打卡必到
2017-03-03
【飲食潮流】MOS Burger有咖喱飯食?期間限定原隻軟殼蟹漢堡
2017-02-24
【優秀開飯熱店大賞2017】賽果公佈
2017-05-17
本月熱門
尖咀新開香噴噴古早味蛋糕 黃金鹹蛋味香港限定(有片)
2017-11-16
一文睇晒!第2屆香港國際美食巡禮有乜食買玩?
2017-11-16
2018及歷屆米芝蓮香港澳門指南完全版
2017-11-30
古早味魯肉飯登陸觀塘! 台灣食材帶出風味
2017-11-15
韓國兄弟拍住上紅磡開燒肉店 「食物好就一定會有回頭客」(有片)
2017-11-23