10月份好評餐廳十強
2023-11-09

唔知係咪因為 10 月有兩日公眾假期,定大家都襯無咁熱嘅時候約多咗飯局?今次好評餐廳十強有唔少都係適合聚餐嘅餐廳,環境各有特色,想要維港海景、度假風,定宮廷風都有得揀。
 

第10位  甘甘好蔗(*新上榜)  

圖: manmanbe

旺角八月新開嘅飲品店,標榜係「全港首創 甘蔗茶飲」!新鮮即榨甘蔗汁就咁飲得,配鮮奶、檸檬、白桃等唔同材料做成特飲亦得。熱賣嘅甘蔗青茶就係清爽嘅茶香加上甘蔗嘅甜味,最啱解渴。唔飲蔗汁亦可以揀班蘭椰奶或者爆打檸檬茶。
 

第9位  Amber’s Table(*新上榜) 

圖: AMJL

位於黃埔嘅精緻西餐廳,佢哋之前推出嘅煙燻肉扒系列好受歡迎,嚴選美國肉眼、加拿大豬鞍、美國春雞,用蘋果木煙燻增添香氣,上枱嘅時候更有蠟燭幫手保溫。餐廳嘅手工意粉、新鮮生蠔等亦有水準,甜魔們就記得留肚食埋梨批做飯後甜品呀。
 

第8位  張公館(*新上榜)   

圖: jessicalawb

坐落於銅鑼灣一座商廈嘅 29 樓,可以一邊居高臨下欣賞維港景色,一邊品嘗多款廣東菜。唔少食評更提到,呢間中菜館好啱一家大細嚟飲茶!因為佢哋有懷舊豬潤燒賣、生磨蛋白杏仁茶等懷舊點心,亦有脆脆笑哈哈、酥皮菠蘿叉燒包等新派點心。
 

第7位  Pause It(*新上榜)

圖: kuma_pie

旺角鬧市中難得可以好好 Hea 下嘅 Cafe,所以由山東街搬到嚟 THE FOREST 依然大受歡迎,高樓底同白色為主嘅簡約裝修,加上自然光感覺幾 Relax。必點嘅係佢哋嘅熱拿鐵,無論係咖啡定係抹茶都會有精美拉花!嘢食方面就推介返意粉同漢堡。
 

第6位  和藏  

圖: saruka

以原木作裝潢、位於上環嘅特色居酒屋,除咗常見嘅佐酒串燒、炸物、鍋物,亦有一系列創意和食,好似五卵卡邦尼烏冬、和牛他他紫菜卷等。而 CP 值最高應該就要數到廚師發辦午市套餐,最平 $158 就可以食到四道菜啦。
 

第5位  Vie Won Won 

圖: Yeung Sin Yung

石塘咀呢間餐廳感覺同萬聖節好啱 Feel,唔少食評都提到入到去就好似去咗歐陸古堡咁!環境典雅又帶啲玩味,供應嘅菜式亦走創意 Fusion 路線,估你唔到先有驚喜。例如打卡招牌甜品迷幻蘑菇,造型別緻,真身其實係加咗辣椒嘅水果雪芭,酸甜冰涼又有少少辣。
 

第4位  Butlery 

圖: uncommon.common

沙田區人氣餐廳之一,不時都會見到排隊人龍,皆因招牌梳乎厘班戟有水準,而且鹹食例如意粉、Taco、小食都有水準,加上英倫風裝修非常討喜。之前更推出期間限定嘅 Shizuoka Melon Pancake,選用香甜多汁嘅日本靜岡蜜瓜,同有蛋香嘅梳乎厘班戟好夾呢。
 

第3位  ASOK THAI GARDEN(*新上榜)

圖: MelodyWong5016

呢間裝修走度假風嘅泰國菜 Cafe,繼尖沙咀店曾經連續兩個月登上十強榜,荃灣新店 10 月都一躍登上第 3 位!芒果糯米飯椰子雪糕幾乎係每枱必嗌,芒果糯米飯加上椰子雪糕同雪糕筒,更 IG-able。香茅蜆肉忌廉湯、泰北蟹肉金湯烏龍麵都各有捧場客。
 

第2位  INN - I’m Not Nothing  

圖: Eatlife balanceeee

嚟到觀塘呢間餐廳,應該打卡才是正經事,白色為主嘅法式宮廷風裝修,加上室外同室內都有唔少擺設,食飯前先影多幾張相。唔少海鮮菜式都好出色,白酒忌廉汁煮南澳鮮青口配蒜蓉法包夠鮮甜香口,芝士焗美國波士頓龍蝦食落啖啖肉好滋味。
 

第1位  Yadllie Plate 야들리애플래이트 

圖: why playing

嚟自韓國嘅炸雞品牌,荃灣店隔咗兩個月再度登上十強榜!呢間分店其中一大加分點係環境舒適,以英倫歐陸車站風格為主題,而且有一排大玻璃,採光度高。招牌炸雞當然係必食,秋冬嚟可以試魚介湯鍋、特種部隊鍋等鍋物,食肉獸又有醬豬蹄、白切五花腩等,選擇多元化。
 




文:Cathy.H


關鍵字
十強名單
十強
旺角
銅鑼灣
觀塘
荃灣
西餐
點心
Cafe
泰國菜
韓國菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【2024生日優惠】持續更新!5月壽星「天際」慶生+驚喜杯壽司
2024-05-04
【隨時更新】最後倒數!2024即將結業人氣/老字號餐廳
7天前
東京炭火現烤手工漢堡扒 100%日本牛肉製作 7/5登陸中環
2024-05-02
【2024新店精選】5月更新! 娛樂體驗主題酒吧、古蹟化身意大利餐廳
5天前
【隨時更新】零食速報 每周新款零食、酒品點評
2024-05-17