【飲食潮流】11架美食車大解構!黯然銷魂漢堡VS溫馨五色餃子
2017-02-03

幾時都話香港係美食之都,今年開始陸續會有唔同美食車進駐各個旅遊熱點。美食選擇由港式懷舊「好西」到手作式餃子,中西合璧叉包到健康水果撈都有,開飯仔就幫大家解構一下首批11架美食車,睇下去邊有咩好食啦!
 

五色餃子  有得餃水餃專門店

呢架美食車由元朗有得餃嘅老闆一家人經營,今次特別設計咗呢款五色餃子嚟代表一家人五代同堂。啱哂相機食先得嚟仲非常有內涵,全部餃子皮都係用天然食材染色,好似紫紅色餃子皮係加咗紅菜頭汁,入面係冬菇白菜豬肉餡。而且加埋有蒜蓉、香茜、豉油同醋等醬料嘅特製醬汁,趁熱食最滋味!老闆仲話夏天會有菠蘿汁,原隻西瓜汁等特飲供應。

預計即日開業
首兩個營運地點:黃大仙廣場、金紫荊廣場
 

櫻花蝦豆豉醬炒飯  八珍醬園美食車

今次連超過80年歷史嘅八珍都撈過界搞美食車!八珍除咗甜醋出名之外,其實佢地嘅醬料亦相當出色。招牌菜櫻花蝦豆豉醬炒飯就用咗豆豉醬配櫻花蝦乾,香味十足。而且仲會有八珍嘅櫻花蝦香辣醬、仁稔醬、黃梅醬等畀大家任點。另外仲有甜醋芝士蛋糕、甜醋浸咸蛋薑同陳醋蘇打等選擇,食過之後就可以認識多啲唔同香港出產嘅醬料啦。

預計2月尾至3月初開業
首兩個營運地點:起動九龍東1號場、中環海濱活動空間
 

火龍果沙冰水果撈  公主廚房

想食健康輕食嘅話,呢架美食車就幫到你喇。招牌菜火龍果沙冰水果撈唔單止顏色鮮艷,裡面除咗火龍果沙冰之外仲有燕麥、香蕉、士多啤梨、椰子片等,味道豐富而不失清新。另外仲有煙三文魚牛油果吐司、黑松露雜菌吐司等。喺附近返工嘅OL落嚟買件當Light Meal都係個唔錯嘅選擇吖。

預計2月16日開業
首兩個營運地點:尖沙咀藝術廣場、梳士巴利花園
 

神級燒鮮魷  豪園小食

黃大仙嘅豪園麵家都嚟一齊搞美食車,而且出品仲相當用心。例如招牌神級燒鮮魷係由師傅每日去介紹買新鮮魷魚,所以唔洗醃製就咁燒食得出魷魚鮮味,點埋秘製辣醬或者燒汁更好味。另外豪園清湯腩用嘅亦係新鮮牛坑腩,仲有唔見檸檬但檸檬味道相當濃郁嘅檸茶BB,食得出心機。

預計2月8日開業
首兩個營運地點:黃大仙廣場、尖沙咀藝術廣場
 

黯然銷魂漢堡  七桌子 X 樺得園

九龍城嘅漢堡包店樺得園今次同喺蘭桂坊街頭美食節擺過美食車嘅七桌子合作,推出一系列以六七十年代香港特色做主題嘅美食。黯然銷魂漢堡其實係用菠蘿包夾厚叉燒同煎太陽蛋,有Gimmick得嚟又好味。另外仲有沙嗲豬頸肉帕尼尼、乳豬貝果,同港式奶茶、咖啡、朱古力等,真係好似個迷你版嘅Fusion茶餐廳。

預計2月16日開業
首兩個營運地點:起動九龍東1號場、香港海洋公園
 

美式叉包  大師兄美食車

到底咩係美式叉包?答案就係中式蒸包夾美國式嘅燒肉!換走中式叉燒,呢架美食車有嘅係黑椒/洋蔥牛柳、上海紅燒肉、辣/燒烤汁雞扒、京式烤鴨同安格斯牛柳粒,而蒸包特別揀咗荷葉包,雪白賣相咬落特別軟熟。另外仲有各款小食,包括費城芝士牛肉餅、大師兄唐心蛋、紫薯沙律等。

預計2月8日開業
首兩個營運地點:金紫荊廣場、中環海濱活動空間
 

花膠瑤柱羮  鴻福堂

連鎖店鴻福堂都嚟分一杯羹,招牌菜花膠瑤柱羮同四款自家雪糕都係美食車特有,門市反而搵唔到!四款自家雪糕分別係楊枝甘露、宇治抹茶奶露、芝麻糊同生薑番薯糖水口味,甜魔可以一試。另外亦會有唔同嘅自家湯品、保健茶、粥品、飯麵、甜品同小食供應。

預計2月13日開業
首兩個營運地點:中環海濱活動空間、起動九龍東1號場
 

鮮忌廉菠蘿包  菠蘿仔食堂

菠蘿包果然係香港嘅特色美食,呢架美食車就以菠蘿包做主角,招牌鮮忌廉菠蘿包用香脆菠蘿包夾幼滑忌廉同真·菠蘿果肉。另外仲有菠蘿油、菠蘿漢堡包、菠蘿豬扒包等,十分多變。食返個菠蘿主題,仲有原個菠蘿冰㗎!唔啱仲有奶茶咖啡揀。

預計即日開業
首兩個營運地點:梳士巴利花園、黃大仙廣場
 

摩廚撈麵  Mein by Maureen

灣仔嘅摩廚亦將佢地嘅招牌摩廚撈麵帶到美食車,呢款撈麵嘅特色係佢地自創嘅麵條糅合咗中國北方嘅擔擔麵同南方嘅雲吞麵特色,撈埋招牌或者香辣醬汁更顯滋味。餐廳另一招牌係慢煮菜式,美食車亦會有慢煮低溫三文魚、48小食牛肋條同花雕蛋等選擇。

預計2月7日開業
首兩個營運地點:香港迪士尼樂園、尖沙咀藝術廣場
 

蘿蔔豬軟骨飯配紅油雲吞便當  池記

另一連鎖店池記今次就喺美食車賣便當,招牌蘿蔔豬軟骨飯配紅油雲吞便當就有齊餐廳最出名嘅豬軟骨同惹味紅油雲吞。另外仲有蘿蔔牛筋同蘿蔔牛腩揀。大食啲嘅仲可以嗌埋小食,有柱候蘿蔔、蠔油冬菇、鹵水雞翼等選擇。

預計2月24日開業
首兩個營運地點:香港海洋公園、香港迪士尼樂園
 

叉燒脆  Crunch Munch

最後呢架美食車嘅招牌菜係叉燒脆,脆包入面夾住叉燒、煎蛋同生菜等。不過其他細節同菜式都未定,大家唯有繼續期待啦。

預計3月初開業
首兩個營運地點:香港海洋公園、起動九龍東1號場
 

咁多架美食車資料記唔哂?唔緊要,OpenRice已經新增美食車到餐廳類型,同時大家亦可以去下載旅遊事務署特別推出嘅HK Food Truck apps,咁就可以輕鬆搵到美食車嘅蹤影啦。



文、相:Cathy



開飯編輯推介:

1. 【專訪】音樂人開餐廳 由做音樂到做食物

2. 12月份好評餐廳十強

3. 2017年港澳版米芝蓮指南



熱門文章推介:

1. 【一個人開飯】一個人喺旺角食乜好?

2. 【熟食中心尋寶】鵝頸熟食中心

3. 【生日飯局】同好朋友慶生食咩好? 窩心西餐篇




隨時接收最新資訊
讚好OpenRice專頁!

關鍵字
香港
美食車
菠蘿包
餃子
漢堡
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
2017及歷屆米芝蓮香港澳門指南完全版
2016-11-09
2017亞洲50最佳餐廳 香港七間餐廳上榜
2017-02-22
【無綠不歡Green Monday】味覺顛覆 未來漢堡襲港
2017-04-18
一個人喺太子食乜好?
2017-05-04
【熟食中心尋寶】禾稈冚珍珠 皇后街熟食市場
2017-02-28
3月份好評餐廳十強
2017-04-06
餐廳資料
更多
收起
本月熱門
【隨時更新】最後倒數!即將結業的老字號及人氣小店
2020-05-19
【隨時更新】零食速報 每周新款零食、酒品點評
1天前
全城抗炎!人氣酒店自助餐重開 每位送鮑魚、帶子
2020-05-11
全城抗炎!喺屋企做大廚 懶人煮食包/套餐集合文
2020-05-13
旺角新開花藝Cafe 豐富全日早餐+明太子貓耳朵+特調有機花茶(有片)
2020-05-18